དབང་ཆོག་དྲེགས་པ་ཚར་གཅོད།
ཕག་མོ་སྔོན་མོའི་ཟབ་ཐིག་ལས༔ དབང་ཆོག་དྲེགས་པ་ཚར་གཅོད་བཞུགས༔ ཕག་གདོང་མཁའ་འགྲོའི་ལྷ་ཚོགས་རྣམས་ལ་འདུད༔ བསྙེན་བསྒྲུབ་དྲོད་རྟགས་ཐོབ་པའི་རྣལ་འབྱོར་པས༔ མཁའ་འགྲོའི་གཏོར་མ་ཙཀ་ལི་དར་གུར་ཕུབ༔ དཀྱིལ་འཁོར་དབུས་འགོད་སྨན་རག་གྲི་གུག་དང་༔ རྩེ་གསུམ་གཞུང་ལྟར་བསྒྲལ་ལས་ཆས་རྣམས་དང་༔ ལིངྒ་ཁྲོ་ལྕགས་སྣོད་བཞག་དར་ནག་བཀབ༔ ལྟ་བའི་གདེང་བསྐྱེད་བསྙེན་བསྒྲུབ་ཁ་ཡང་གསོ༔ འཛབ་ཀྱི་གནད་བསྣུན་དམིགས་པའི་འདུ་འཕྲོ་བསྒྱུར༔ ལས་བུམ་བསྐྱེད་ཅིང་བསྒོམ་བཟླས་མཆོད་བསྟོད་མཐར༔ སྙིང་པོ་བཟླས་ཤིང་ཏིང་འཛིན་དབང་བཞི་བླངས༔ དམ་ཚིག་ཚུལ་དང་ལྡན་པའི་སློབ་བུ་ནི༔ ལྔ་གསུམ་བདུན་ལས་མང་བར་མི་བྱ་ཞིང་༔ ནམ་གྱི་སྲོད་ལ་གོ་མཚོན་མཎྜལ་དབུལ༔ ཁྲུས་ནས་ཕྱུངས་ཤིང་བགེགས་སྦྱངས་བསྲུང་འཁོར་བསྒོམས༔ ཞེས་གསུངས་པ་ལྟར། སྟེགས་བུ་ཁེབས་ལྡན་ཁར་རས་བྲིས་སམ་འབྲུ་ཚོམ་སོགས་ཇི་ལྟར་རིགས་པའི་དཀྱིལ་འཁོར་གྱི་དབུས་སུ་མཉྫིའི་ཁར་མཁའ་འགྲོའི་གཏོར་མ་སྐུ་གཟུགས་དང་དར་ལྗང་གུར་ཕུབ། ཐོད་ཁྲག་གཡས། གྲི་གུག་གཡོན། ཁ་ཊྲཱཾ་མདུན། ཉ་བོ་བསྒྲལ་ཆས་རྣམས་བྱང་། གནས་གསུམ་དུ་ཁྲག་ཆང་བསྲེས་པའིཐིག་ལེ་བྱ་རྒྱུ། གཞན་ཡང་ལས་ཀྱི་བུམ་པ། སྤོས་ཐུན། བྱིན་འབེབས་ཀྱི་བདུག་རྫས་ཁྱད་པར་བ་གཞུང་ནས་འབྱུང་བ་ལྟར་སྦྱར་བ་དང་། ཌཱ་དྲིལ། འཐོར་ནས། བགེགས་གཏོར་མཎྜལ་སོགས་ཚོགས་པར་བྱས་ལ། སློབ་དཔོན་གྱིས་ལས་ཀྱི་གཞུང་བསྲང་ཞིང་འཛབ་བསྙེན་ནུས་ལྡན་དུ་བསྒྲུབ། བདག་འཇུག་བླངས། བཀའ་གཏེར་མཆོད་པ་དང་། ཚོགས་མཆོད་ཡན་གྲུབ་ནས། ལས་བུམ་བསངས་སྦྱངས། སྟོང་པའི་ངང་ལས་པད་ཉིའི་སྟེང་དུ་ཧཱུྃ་ལས་བདུད་རྩི་འཁྱིལ་བ་ལྗང་སྔོན་ཕྱག་གཉིས་གཡས་རྡོ་རྗེའི་དབྱུག་པ་དང་གཡོན་སྡིག་འཛུབ་མཛད་པ་ཁྲོ་བོའི་ཆ་ལུགས་རྫོགས་པའི་གནས་གསུམ་ཨཱོཾ་ཨཱཿཧཱུྃ་གིས་མཚན་པ་ལས་འོད་འཕྲོས་པས་ཡེ་ཤེས་པ་སྤྱན་དྲངས་དམ་ཡེ་དབྱེར་མེད་དུ་གྱུར་པའི་ཐུགས་ཀར་ཧཱུྃ་ལ་སྔགས་ཀྱིས་བསྐོར་བ་དམིགས་ལ། ཨཱོཾ་བིག་ནན་ཏ་ཀྲིཏ་ཧཱུྃ་ཕཊཿ ཅེས་བཟླས་པ་བརྒྱ་རྩ་ལ་སོགསཔའི་མཐར་བདུད་རྩིར་ཞུ་བར་བསམ། སློབ་མ་ཁྲུས་ནས་ཕྱུངས། བགེགས་བསྐྲད་བསྲུང་འཁོར་བསྒོམ་པ་རྣམས་ལེགས་པར་གྲུབ་ནས། ཆོས་བཤད་རྒྱས་བསྡུས་ཅི་རིགས་བྱ་སྟེ། དེ་ཡང་གཏེར་ཆེན་ནས་སྩལ་བའི་དབང་བཤད་ནི། འོ་ན་ད་ལམ་ཁྱེད་རྣམས་ལ་བཅོམ་ལྡན་འདས་མ་སྣ་ཚོགས་མཐར་ཕྱིན་གྱི་དབང་བསྐུར་བའི་ཐོག་མར་ལོ་རྒྱུས་ཀྱི་རྣམ་པ་མདོ་ཙམ་ཞིག་བརྗོད་པར་བྱ་སྟེ། ངོ་བོ་ཀ་ནས་དག་པའི་ཆོས་དབྱིངས་ཆེན་པོ་ནས་བཅོམ་ལྡན་འདས་མ་དཔལ་ཀུན་ཏུ་བཟང་མོའི་བྱ་བ་གྲུབ་པའི་ཡེ་ཤེས་ཀྱི་རང་མདངས་གོ་མ་འགགས་པ་ལས་སྣ་ཚོགས་མཐར་ཕྱིན་ལས་ཀྱི་དྷཱཀྐི་མ་འདི་རང་ཤར་ཞིང་། དབྱིངས་རང་བཞིན་རྣམ་པར་དག་པའི་མཁའ་སྤྱོད་དུ་དུས་གསུམ་རྟག་པ་རྒྱུན་གྱི་འཁོར་ལོར་རང་འོད་འབར་བཞིན་བཞུགས་པའི་རོལ་པ་ལས་འོག་མིན་སྟུག་པོ་བཀོད་པའི་ཞིང་ཁམས་སུ་རྒྱལ་བ་རྡོ་རྗེ་འཆང་གིས་གསང་སྔགས་བླ་མེད་ཀྱི་ཆོས་ཀྱི་འཁོར་ལོ་བསྐོར་བའི་ཚེ། ལས་ཀྱི་རིགས་ཀྱི་མཁའ་འགྲོ་མ་འབུམ་ཕྲག་མང་པོ་སྟོན་པ་དེའི་འཁོར་དུ་རང་ཤར་ཞིང་བླ་ན་མེད་པའི་བཀའ་ཡི་འཁོར་ལོ་རྣམས་ཉན་ཞིང་འཆང་ནས་ཚངས་ཆེན་གྱི་བསྐལ་པ་ཆེན་པོའི་ཞིང་འདི་དང་། འདི་མ་ཡིན་པའི་ཡང་ནམ་མཁའི་མཐར་ཁྱབ་ཏུ་ལས་དང་སྐལ་པར་ལྡན་པ་རྣམས་ཀྱི་སྣང་ངོར་སྤྲུལ་པ་དང་ཡང་སྤྲུལ་བསམ་གྱིས་མི་ཁྱབ་པས་དུས་གསུམ་ཀུན་ཏུ་སྐལ་ལྡན་མང་པོ་གྲོལ་ལམ་ལ་ཐབས་དང་གདམས་པ་མང་པོས་ཡོངས་སུ་གྲོལ་བར་མཛད་ནས་རིམ་གྱིས་བརྒྱུད་པ་ལས། རྩོད་ལྡན་ཚེ་ལོ་བརྒྱ་པའི་ཤཱཀྱའི་བསྟན་པ་ལ་མདོ་སྔགས་ཟུང་ཅིག་གི་ཉི་ཟླ་ཤར་བའི་ཚེ། ཨོ་རྒྱན་གྱི་སློབ་དཔོན་དཔལ་སངས་རྒྱས་གཉིས་པ་པདྨ་འབྱུང་གནས་ཀྱིས་འབུམ་ཕྲག་ཡངས་པའི་མཁའ་འགྲོ་མ་རྣམས་ལ་དབང་བསྒྱུར་ཞིང་མཁའ་འགྲོའི་གསང་མཛོད་ཐམས་ཅད་བརྟོལ་ཏེ་འཛམ་གླིང་སྤྱི་དང་རྒྱ་བོད་ཀུན་ཏུ་བསྟན་འགྲོའི་དོན་བསམ་གྱིས་མི་ཁྱབ་པ་མཛད་པའི་ནང་ནས། བོད་སྲིན་མོ་གན་རྐྱལ་དུ་བསྒྱེལ་བ་འདྲ་བའི་ནུ་མ་གཡས་པ་ཁམས་སྲིན་མོ་རྫོང་གི་ཆགས་རུ་ཕུག་སྔོན་འཕྲིན་ལས་ཀྱི་གཞལ་ཡས་སུ་ཕྱག་ཕེབས་ཤིང་སྣ་ཚོགས་མཐར་ཕྱིན་གྱི་སྒྲུབ་པ་མཛད་ཅིང་ལྗང་མོ་ཕྲིན་ལས་ཀྱི་སྒྲུབ་གནས་སུ་བྱིན་གྱིས་བརླབས་པའི་དུས་སུ། དབང་སྒྲུབ་ཐབས་མན་ངག་དང་བཅས་པའི་གདམས་པ་འདི་རྣམས་མ་མཁའ་འགྲོ་ཡེ་ཤེས་མཚོ་རྒྱལ་ལ་བཀའ་སྩལ་ཞིང་གདམས་པ་མཁའ་འགྲོའི་ཡི་གེར་བཏབ་སྟེ་ཕྱི་མའི་བསྟན་འགྲོའི་དོན་དུ་མཁའ་འགྲོའི་གསང་བཛོད་དུ་རྒྱས་བཏབ་ནས་བཞུགས་སུ་གསོལ་བ། འགྲོ་བ་འདུལ་བའི་ལུང་བསྟན་དུས་བབས་བཞིན་དུ་ཁམས་པ་ཉི་མ་གྲགས་པས་མེ་ཡོས་ཧོར་ཟླ་གཉིས་པའི་ཚེས་བཅུའི་ཉིན་གོང་ལ་གདན་དྲངས་ཤིང་ཤོག་སེར་ལས་བསྒྱུར་བའི་གདམས་པ་རིན་པོ་ཆེ་འདིའི་དབང་ཐོབ་པ་ལ་ཡོན་ཏན་དུ་མ་དང་ལྡན་ཏེ། རྒྱུད་ལས། དམ་ཚིག་མ་ཉམས་ལེགས་བསྲུང་བའི། །རྣལ་འབྱོར་ཕོ་མོ་གང་ཡིན་རྣམས། །ཚེ་རིང་ནད་མེད་ཆོས་སྤྱོད་ཅིང་། །དཔལ་འབྱོར་ལོངས་སྤྱོད་ཀུན་ཐོབ་ནས། འདི་ཕྱི་བར་གསུམ་བཀྲ་ཤིས་ལ། །དེ་ནི་རྟག་ཏུ་དགེ་བར་འགྱུར། ཅེས་དང་། དེ་བཞིན་དུ། དང་པོ་དབང་གི་མ་སྨིན་ན། །ཐེག་པའི་ཆོས་ཀྱི་གྲོལ་མི་ནུས། །རང་རྒྱུད་དབང་གིས་མ་གྲོལ་ན། །རང་སེམས་མངོན་དུ་མི་འགྱུར་རོ། ཅེས་དང་། རྒྱུད་ལས། དབང་བསྐུར་གནང་བ་ཐོབ་པ་གཙོ། །དབང་ཐོབ་རིགས་ཀྱི་བུ་དེ་ཉིད། །ཚེ་འདིར་བསམ་པ་ཀུན་འགྲུབ་ཅིང་། ཕྱི་མ་མངོན་པར་རྫོགས་སངས་རྒྱ། ཅེས་གསུངས་པའི་ཕན་ཡོན་དུ་མ་དང་ལྡན་པའི་དབང་ཞུ་བའི་ཐོག་མར་རྡོ་རྗེ་སློབ་དཔོན་གྱི་བྱ་བ་དང་སློབ་མའི་བྱ་བ་གཉིས་ལས། སློབ་དཔོན་གྱི་བགྱི་བའི་འོས་སུ་གྱུར་པ་བདག་མདུན་དབྱེར་མེད་དུ་སྒྲུབ་མཆོད་བཟླས་པ་དང་། ཟབ་གཏེར་སྲུང་མ་ལ་གཏོར་མ་ཕུལ་ཏེ་རྒྱ་འགྲོལ་བའི་ཕྲིན་ལས་བཅོལ་པ། ཚོགས་ཀྱི་འཁོར་ལོས་ཆོ་གའི་ལྷག་ཆད་བཀང་བ། བདག་འཇུག་གི་ཏིང་ངེ་འཛིན་གྱིས་བླང་བ་སོགས་གོང་དུ་གྲུབ་པ་ཡིན། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་དབང་བསྐུར་ཞུ་བའི་དོན་དུ་མཎྜལ་ཕུལ་མཛོད། ཞེས་བརྡའ་སྤྲད་དེ། དེ་ནས་གཞུང་ལས། འདུན་པའི་སེམས་བསྐྱེད་སྐྱབས་སེམས་དམ་ཚིག་ནོད༔ དབང་གི་དོན་དུ་གསོལ་བ་འདི་ལྟར་གདབ༔ ཞེས་པས་དམིགས་པ་འདི་བཞིན་དུ་གྱིས། ས་ཕྱོགས་འདི་ཉིད་ཀྱང་ཐ་མལ་གྱི་སྣང་བ་འདི་ལྟ་བུ་མ་ཡིན་པ་དྭངས་གསལ་གཉིས་སུ་མེད་པའི་ཡེ་ཤེས་རང་སྣང་ལས་གྲུབ་པའི་ཞིང་ཁམས་ཀྱི་དབུས་སུ་དཀྱིལ་འཁོར་གྱི་གཙོ་མོ་བཅོམ་ལྡན་འདས་མ་ལ་ཕྱོགས་དུས་ཀྱི་རྒྱལ་བ་སྲས་བཅས་སྐྱབས་ཡུལ་ཐམས་ཅད་ཀྱིས་བསྐོར་བ་མངོན་སུམ་ལྟ་བུར་བཞུགས་པ་གསལ་བཏབ་ནས་དེ་དག་གི་སྤྱན་སྔར་རང་གཞན་སེམས་ཅན་ཐམས་ཅད་བྱང་ཆུབ་ཀྱི་བར་དུ་སྐྱབས་སུ་མཆིའོ་སྙམས་པསའདིའི་རྗེས་བཟློས་གྱིས། ན་མོ༔ བླ་མ་ཡི་དམ་མཁའ་འགྲོ་སྟེ༔ རྩ་བ་གསུམ་ལ་སྐྱབས་སུ་མཆི༔ གསུམ། ཐེག་ཆེན་རྩ་བ་གཞན་ཕན་བྱང་ཆུབ་ཀྱི་མཆོག་ཏུ་སེམས་བསྐྱེད་པ་གལ་ཆེ་སྟེ། མཁའ་མཉམ་གྱི་སེམས་ཅན་ཐམས་ཅད་སྡུག་བསྔལ་གྱི་རྒྱུ་འབྲས་ལ་རྟག་ཏུ་སྤྱོད་པ་འདི་རྣམས་སྡུག་བསྔལ་ལས་བསྒྲལ་ཏེ་བྱང་ཆུབ་མཆོག་གི་གོ་འཕང་ལ་འགོད་པར་བྱ། དེའི་ཕྱིར་དུ་ཐེག་པ་ཆེན་པོའི་སེམས་བསྐྱེད་བླངས་ནས་ཚུལ་བཞིན་དུ་བགྱིའོ་སྙམས་པས་འདིའི་རྗེས་བཟློས་གྱིས། འགྲོ་བ་སེམས་ཅན་དོན་སླད་དུ༔ མཁའ་འགྲོའི་བསྐྱེད་རྫོགས་བསྒོམ་བཟླས་བསྒྲུབ༔ གསུམ། དེ་ལྟར་ཚོགས་ཞིང་ཁྱད་པར་ཅན་དེ་དག་གིས་སྤྱན་སྔར་ཚོགས་བསགས་པ་ནི། རང་གཞན་སེམས་ཅན་ཐམས་ཅད་ལུས་ཞིང་གི་རྡུལ་སྙེད་དུ་སྤྲུལ་ནས་ཕྱག་འཚལ་བ། མཆོད་སྤྲིན་སྤྲོ་བ། སྡིག་པ་བཤགས་པ། དགེ་བ་ལ་རྗེས་སུ་ཡི་རངས་བ། ཆོས་ཀྱི་འཁོར་ལོ་བསྐོར་བར་བསྐུལ་བ། མྱ་ངན་ལས་མི་འདའ་བར་གསོལ་བ་གདབ་པ། དགེ་བ་བླ་ན་མེད་པའི་བྱང་ཆུབ་ཆེན་པོ་བསྔོ་བ་སོགས་ཚིག་ཕྱིར་སེམས་གཞོལ་བས་འདིའི་རྗེས་བཟློས་གྱིས། ཧཱུྃ༔ བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆགས་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲུབ་ལ་རྗེས་ཡི་རང་༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདའ་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་ཐོབ་པར་ཤོག༔ དེ་ལྟར་ཐུན་མོང་གི་རྒྱུད་སྦྱོངས་བའི་རིམ་པ་སོང་ནས། དངོས་གཞི་དབང་གི་དོན་དུ་གསོལ་བ་གདབ་པ་འདིའི་རྗེས་བཟློས་གྱིས། ཧཱུྃ༔ རྡོ་རྗེ་འཆང་དབང་ལས་ཀྱི་མཁའ་འགྲོ་མ༔ བདག་ཅག་འདིར་ཚོགས་རིགས་ཀྱི་བུ་རྣམས་ལ༔ ལས་ཀྱི་མཁའ་འགྲོའི་དབང་གི་སྨིན་གྲོལ་མཆོག༔ ཡང་དག་ཉིད་དུ་སྩལ་བར་མཛད་དུ་གསོལ༔ གསུམ༔ གནས་གསུམ་ཁྲག་ཆང་བསྲེས་པའི་ཐིག་ལེས་བརྒྱན༔ སྐུ་གསུང་ཐུགས་ཀྱི་ས་བོན་གསལ་ཡང་གདབ༔ དཔོན་སློབ་ཐམས་ཅད་མཁའ་འགྲོའི་གར་སྟབས་བསྒྱུར༔ ལྷར་བསྐྱེད་རོལ་མོ་འདིར་ཞིང་སྤྱན་འདྲེན་བསྟིམ༔ གུ་གུལ་ནག་པོ་གྲི་ཀླད་ཤ་ཆེན་བསྲེག༔ ཏིཥྛ་བཛྲ་བརྗོད་ཅིང་རྒྱས་ཀྱང་གདབ༔ ས་མ་ཡཱ༔ ཞེས་པས། ད་ཁྱེད་རང་རྣམས་ཀྱིས་ཐུན་མོང་མ་ཡིན་པར་དབང་གི་སྣོད་དུ་རུང་བར་བྱ་བའི་ཕྱིར་ཡེ་ཤེས་དབབ་པའི་སླད་དུ་དམིགས་པ་འདི་བཞིན་དུ་མཛོད། ལས་བུམ་གྱི་ཆུ་གཏོར་ལ། ཨཱོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྣ་ཀོ྅ཧཾ། ཞེས་བརྗོད་པས་ཁྱེད་རང་གི་ཕུང་ཁམས་སྐྱེ་མཆེད་ཀྱིས་མཚོན་པའི་མ་དག་པའི་སྣང་བ་ཐམས་ཅད་སྟོང་པར་སྦྱངས། སྟོང་པའི་ངང་ལས་གདན་གྱི་ཁར། ཁྱེད་རང་རྣམས་ཀྱི་སེམས་ཉིད་རིག་པའི་ངོ་བོ་ཡི་གེ་ས་ལྗང་གུ་ཞིག་ཏུ་གྱུར། དེ་ལས་འོད་ཟེར་འཕྲོ་འདུའི་ཡོངས་སུ་གྱུར་པ་ལས། ཡེ་ཤེས་ཀྱི་མཁའ་འགྲོ་ཕག་གདོང་སྔོན་མོ་སྣ་ཚོགས་མཐར་ཕྱིན་མ་སྐུ་མདོག་ལྗང་གུ་ནོར་བུ་རིན་པོ་ཆེ་མརྒ་ཏའམ་དབང་སྔོན་གྱི་ལྷུན་པོ་ལ་ཉིན་བྱེད་གཞོན་ནུའི་ཟེར་གྱིས་འཁྱུད་པ་ལྟ་བུ་ལང་ཚོ་རབ་ཏུ་རྒྱས་པའི་སྐུ་ཅན་ཆུ་སྐྱེས་དང་མྱོས་བུམ་རྣམ་པར་རྒྱས་པས་མཚན་པ། ཞལ་གཅིག་ཤིན་ཏུ་ཁྲོས་པའི་ཉམས་ཅན་སྤྱན་གསུམ་མཁའ་ལ་གཟིགས་པ། ཞལ་གདངས་ཤིང་ལྗགས་འདྲིལ་བ་མཆེ་བ་གཙིག་ཤིང་རྐན་སྒྲ་སྒྲོག་པ། ཕྱག་གཉིས་གྲི་ཐོད་ཀྱི་ཕྱག་རྒྱ་ཅན། ཐོད་སྐམ་ལྔས་དབུ་རྒྱན་དང་། དུར་ཁྲོད་ཀྱི་ཆས་བརྒྱད་དང་། རུས་པའི་རྒྱན་གྱིས་བརྒྱན་པ་ཞབས་གར་སྟབས་ཀྱིས་ཁཊྭཱཾ་ག་ལ་འཁྱུད་པ། དབུ་སྐྲ་རལ་བའི་གསེབས་ནས་ཕག་སྐད་འབྲུག་ལྟར་སྒྲོགས་པ། བདེ་སྟོང་གི་ཡེ་ཤེས་རབ་ཏུ་རྒྱས་པའི་སྐུ་སྣང་ལ་རང་བཞིན་མེད་པ་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པ། དེ་ལྟར་གསལ་བའི་གནས་གསུམ་འབྲུ་གསུམ་གྱིས་མཚན་པའི་འོད་ཟེར་དང་། བླ་མ་དང་མདུན་བསྐྱེད་མཁའ་འགྲོའི་ཐུགས་ཀ་ནས་ཀྱང་འོད་ཟེར་དཔག་ཏུ་མེད་པ་འཕྲོས་པའི་རྐྱེན་ཀྱིས་འོག་མིན་ཆོས་ཀྱི་དབྱིངས་དང་མཁའ་སྤྱོད་གནས་ཡུལ་དུར་ཁྲོད། ཁྱད་པར་ནུབ་ཕྱོགས་ཨོ་རྒྱན་གྱི་ཡུལ་ནས་ཡེ་ཤེས་ཀྱི་མཁའ་འགྲོ་མ་དཔག་ཏུ་མེད་པ་བྱུང་ནས་ཁྱེད་རང་གི་གནས་གསུམ་ལ་གཉིས་མེད་དུ་ཐིམ་བྱུང་སྙམས་པའི་མོས་པ་བརྟན་པོ་མཛོད། ཅེས་དམིགས་པ་སྤྲད་ནས་རྫས་བདུག་སྤོས་རོལ་བྱ་ཞིང་བྱིན་དབབས། ཧཱུྃ༔ ལས་ཀྱི་མཁའ་འགྲོ་ཕྲིན་ལས་དབང་མོ་ཆེ༔ ནུས་མཐུའི་དཔལ་ལྡན་དྲག་སྔགས་འཁོར་ལོས་སྒྱུར༔ ཕྲིན་ལས་མངའ་བདག་ཡེ་ཤེས་མཁའ་འགྲོ་མ༔ བཞེངས་ཤིག་བཞེངས་ཤིག་འབར་བའི་ཀློང་ནས་བཞེངས༔ གཏུམ་སྐད་ཕེམ་སྒྲའི་ང་རོ་འབྲུག་སྟོང་ལྡིར༔ ཕག་ཞལ་སྒྲ་སྒྲོག་ཁམས་གསུམ་དབང་དུ་བསྡུད༔ ཞིང་ཆེན་གཡང་གཞི་ཁྲག་ཏུ་ཙར་ར་ར༔ མི་མགོའི་ཕྲེང་བ་མང་པོ་ཁྲོ་ལོ་ལོ༔ གནམ་ལྕགས་གྲི་གུག་མཁའ་ལ་ཡ་ལ་ལ༔ ཐོད་ཁྲག་དམར་པོ་ཐུགས་ཀར་ཀྱི་ལི་ལི༔ རྡོ་རྗེའི་ཁ་ཊྭཱཾ་དབྱིངས་ན་ལྡེམས་སེ་ལྡེམ༔ དུག་སྦྲུལ་ཆུན་པོ་མང་པོ་ཉི་ལི་ལི༔ དུར་ཁྲོད་རུས་རྒྱན་སྐར་ལྟར་ཁྲ་ལ་ལ༔ དར་ཚོན་ཅོད་པན་སྤྲིན་ལྟར་སྤུངས་སེ་སྤུང་༔ སྟག་གི་པགས་པའི་ཤམ་ཐབ་ལྷབས་སེ་ལྷབ༔ རིན་ཆེན་སྣ་ཚོགས་རྒྱན་ཆ་སི་ལི་ལི༔ ཡེ་ཤེས་བསྐལ་པའི་མེ་དཔུང་འུ་རུ་རུ༔ འདོད་ཆགས་ཁྲག་གི་སེར་བ་ཤར་ར་ར༔ ཞེ་སྡང་དྲག་པོའི་གློག་དམར་སྐེམས་སེ་སྐེམ༔ གཏི་མུག་ནག་པོའི་མུན་པ་ཐིབས་སེ་ཐིབ༔ ང་རྒྱལ་དྲག་པོའི་ཐོག་རྒོད་ཉི་ལི་ལི༔ ཕྲག་དོག་དྲག་པོའི་འབྲུག་སྒྲ་འུར་རུ་རུ༔ མ་མོ་མཁའ་འགྲོ་ཐམས་ཅད་དབང་བསྒྱུར་ལ༔ ལྗང་མོ་འབུམ་གྱི་འཁོར་དང་བཅས་པ་རྣམས༔ དྲག་པོའི་གནས་ནས་ཡེ་ཤེས་མཁའ་ལ་སྤྱོད༔ སྒྲུབ་པའི་གནས་འདིར་བྱིན་གྱིས་བརླབས་ཕྱིར་གཤེགས༔ ས་ཀརྨ་དྷཱཀྐི་ནི་ས་མ་ཡཱ་ཧྲིང་ཧྲིང་ཕེམ་ཕེམ་ཛཿཛཿཨ་ཝེ་ཤ་ཡ་ཨ་ཨཱཿ ཞེས་ཡེ་ཤེས་དབབ་པའི་དམིགས་པ་དང་བཅས་མེ་ཏོག་འཐོར་ཞིང་རྡོ་རྗེ་སྤྱི་བོར་བཞག་ལ། སྤྱན་དྲངས་པའི་ཡེ་ཤེས་པ་རྣམས་བརྟན་པར་བཞུགས་སུ་གསོལ། ཨཱོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། དེ་ནས་དབང་དངོས་ནི་གཞུང་ལས། ད་ེནས་གཏོར་མ་མཁའ་འགྲོར་གསལ་བ་དེ༔ སློབ་བུའི་ལུས་བསྟིམ་འདི་སྐད་བརྗོད་པར་བྱ༔ ཞེས་པས། ཧཱུྃ༔ དཔལ་ལྡན་མཁའ་འགྲོ་རྡོ་རྗེ་རྣལ་འབྱོར་མ༔ ཕྲིན་ལས་མཁའ་འགྲོ་ལྗང་མོ་འབུམ་གྱི་སྡེ༔ སྣ་ཚོགས་མཐར་ཕྱིན་འཁོར་བཅས་སྐུ་ཡི་དབང་༔ སྐལ་ལྡན་བུ་མཆོག་རྣམས་ལ་ཡོངས་རྫོགས་ཤོག༔ ས་ཀརྨ་དྷཱཀྐི་ནི་བྷ་ར་ཧི་ཀཱ་ཡ་ཨ་བྷི་ཥིཉྩ་ཨཱོཾཿ ལྕང་ལོ་ཅན་གྱི་བྷནྡྷ་རཀྟ་ཐོགས༔ སློབ་བུའི་མགྲིན་པར་བསྐུར་ཞིང་ངག་ཏུ་སྦྱིན༔ ཧཱུྃ༔ ལྕང་ལོ་ཅན་གྱི་བྷནྡྷའི་སྣོད་ཡངས་དབུས༔ དགྲ་བགེགས་བསྒྲལ་བའི་ཁྲག་གི་རྒྱ་མཚོར་བསྐྱིལ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ སྣ་ཚོགས་མཐར་ཕྱིན་གསུང་གི་དབང་ཐོབ་ཤོག༔ ས་ཀརྨ་དྷཱཀྐི་བྷ་ར་ཧི་ཝཱཀྐ་ཨབྷི་ཥིཉྩ་ཨཱོཾ༔ གནམ་ལྕགས་གྲི་གུག་སློབ་བུའི་སྙིང་གར་སྦྱིན༔ ཧཱུྃ༔ གནམ་ལྕགས་ཞུན་མའི་གྲི་གུག་ཡ་ལ་ལ༔ མཐིང་ནག་དར་གྱི་ཅོད་པན་པུར་རུ་རུ༔ ལྗང་མོ་འབུམ་སྡེ་འཁོར་བཅས་ཐུགས་ཀྱི་དབང་༔ སྐལ་ལྡན་བུ་མཆོག་རྣམས་ལ་དབང་བསྐུར་བས༔ སྣ་ཚོགས་མཐར་ཕྱིན་ཐུགས་ཀྱི་དབང་ཐོབ་ཤོག༔ ས་ཀརྨ་དྷཱཀྐི་བྷ་ར་ཧི་ཙིཏྟ་ཨ་བྷི་ཥིཉྩ་ཨཱོཾ༔ རྩེ་གསུམ་སློབ་བུའི་ལག་ཏུ་གཏད༔ ཧཱུྃ༔ ལྕགས་སྣ་དགུ་ལས་གྲུབ་པའི་ཁ་ཊྭཱཾ་ག༔ མི་མགོ་སྐམ་རློན་རྒྱན་ཆ་ཁྲ་ལ་ལ༔ ཚེ་ཡི་བུམ་པ་དགོས་འདོད་ཀུན་འབྱུང་གནས༔ རྒྱ་གྲམ་འབར་བས་ཀླད་ཁྲག་དཀྲུག་པར་བྱེད༔ ཡེ་ཤེས་ལྔ་ལྡན་ཅོད་པན་པུ་རུ་རུ༔ ལྗང་མོ་འབུམ་སྡེའི་ཡོན་ཏན་དབང་ཐོབ་ཤོག༔ ས་ཀརྨ་དྷཱཀྐི་བྷ་ར་ཧི་རཏྣ་ཨ་བྷི་ཥིཉྩ་ཨཱོཾ༔ འཕྲིན་ལས་བསྒྲལ་དབང་གཞུང་ལྟར་སྦྱིན་པར་བྱ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ལྕགས་སྣོད་དུ་ལིང་ག་བཤམས་ལ། སློབ་བུ་རྣམས་ལྷར་གསལ་བས། དགུག་གཞུག་སྤྱི་ལྟར་གྱི་མཐར༔ ས་ཀརྨ་དྷཱཀྐི་ནི་བྷ་ར་ཧི་དགྲ་བོ་བྱད་མ་ལྷ་བསྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོ༔ ས་རྒྱས་གདབ༔ ཧཱུྃ༔ སྣ་ཚོགས་མཐར་ཕྱིན་འཇིགས་གཟུགས་རྔམ༔ རབ་ཏུ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ས་ཀརྨ་དྷཱཀྐི་ནི་བྷ་ར་ཧི་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་པོའི་སྙིང་ཁ་རག་མོ་སྲོག་ཁུག༔ མྱུར་དུ་ཁུག་ཛཿཛཿདགྲ་བོའི་སྙིང་དུམ་བུར་ཆོད་དུམ་བུར་ཆོད་དགྲ་བོ་མཱ་ར་ཡ་ཛཿཛཿ ཅེས་སློབ་མ་རྣམས་ཀྱི་དམིགས་པ་གསལ་བས་བསྒྲལ་ལ། དེ་ཡང་ཚེ་ལུང་ཁྲུས་ལུང་གི་དགོངས་པ་དང་ལྡན་པས། སློབ་དཔོན་གྱིས། འོ་ཁྱེད་རང་རྣམས་ཀྱིས་གནད་འདི་ཤེས་དགོས་ཏེ་མཉམ་གཞག་ཆོས་སྐུའི་ངང་དུ་རྟོགས་པས་བདག་བསྒྲལ་ནས། རྗེས་ཐོབ་སྙིང་རྗེའི་རྩལ་གྱིས་ཐུགས་རྗེས་གཞན་བསྒྲལ་བ་ནི་རྡོ་རྗེ་ཐེག་པའི་སྒྲོལ་དབང་གི་དགོངས་པ་ཡིན་པས། དེ་ལྟ་བུའི་དགོངས་པ་དང་ལྡན་པས་ཡུལ་གསུམ་གསལ་བ། དགྲ་གསུམ་བསད་པ་བདུད་བཞི་སྒྲོལ་བ། ཕྲང་གསུམ་བསལ་བ་དེ་ལྟ་བུའི་གཤིས་ལུགས་མངོན་དུ་གྱུར་པ་དེ་བསྒྲལ་དབང་གི་ངོ་བོ་ཡིན་པས་ཤེས་པར་གྱིས་ཤིག །ཅེས་བཤད་ལ་རྟོག་པ་བསྐྱེད་དེ་བསྒྲལ། དེ་ནས་ཤ་ཁྲག་ཚོགས་སུ་དམིགས་ཏེ་འབུལ་ཞིང་ཞལ་བསྟོབ་ནི༔ ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ ལིང་རོ་གཏོར་མར་སྟོབ་བར་བྱའོ། །དེ་ནས་ཤིས་བརྗོད་མེ་ཏོག་འཐོར། ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ཡེ་ཤེས་ལྔ་ལྡན་ཕོ་བྲང་ནས༔ ཕག་མོ་ལོངས་སྐུའི་བཀྲ་ཤིས་ཤོག༔ མཁའ་སྤྱོད་གནས་ཡུལ་དུར་ཁྲོད་ནས༔ ཕག་མོ་སྤྲུལ་སྐུའི་བཀྲ་ཤིས་ཤོག༔ བཀའ་ཡི་ཕྲིན་ལས་དཀྱིལ་འཁོར་ནས༔ སྤྲུལ་པ་འབུམ་སྡེའི་བཀྲ་ཤིས་ཤོག༔ ཅེས་དང་གཞན་ཡང་ཤིས་བརྗོད་གང་འོས་བྱའོ། དེ་ལྟར་བཅོམ་ལྡན་འདས་མ་སྣ་ཚོགས་མཐར་ཕྱིན་གྱི་དབང་བསྐུར་ཟབ་མོ་ཐོབ་པ་ཡིན་པས་གནས་སྐབས་དེ་དག་ཏུ་ཁས་བླངས་པའི་དམ་ཚིག་དང་གདམས་པའི་རིམ་པ་རྣམས་ཚུལ་བཞིན་བསྲུང་བར་བགྱིད་སྙམས་པས་འདིའི་རྗེས་བཟློས་གྱིས། གཙོ་བོའི་ཇི་ལྟར་སོགས། གཏང་རག་གི་མཎྜལ། སླར་ལུས་ལོངས་སྤྱོད་དུས་གསུམ་གྱི་དགེ་ཚོགས་དང་བཅས་འཁོར་ལོས་སྒྱུར་བའི་རྒྱལ་སྲིད་ཀྱི་འབྱོར་བ་ལྟར་སྤྲུལ་ཏེ་འབུལ་སྙམས་པས་འདིའི་རྗེས་བཟློས་གྱིས། དེང་ནས་བརྩམས་སོགས། དེ་ལྟར་དབང་བསྐུར་ཐོབ་པའི་དགེ་རྩ་སེམས་ཅན་གྱི་དོན་དུ་བསྔོ་བར་གྱིས། བསོད་ནམས་འདི་ཡི་སོགས་ནས། རིན་ཆེན་དགེ་ཚོགས་སོགས་དགེ་བ་བསྔོ་ཞིང་། དགའ་སྟོནཚོགས་འཁོར་ཡོད་ན་དྲིམ། སློབ་བུ་རྣམས་རང་གནས་བཏང་ངོ་༔ ལྷག་མ་བཏང་སོགས་རྗེས་སྤྱི་ལྟར་བྱ་བས་འཇུག་སྐྱོང་ངོ་། ཨེ་མ་མཁའ་འགྲོའི་དབང་ཆོག་གསང་བའི་བཅུད༔ དུར་ཁྲོད་བརྒྱད་ལ་སྤྱོད་པ་སྤྱད་པའི་ཚེ༔ ཡེ་ཤེས་མཁའ་འགྲོ་རྡོ་རྗེ་རྣལ་འབྱོར་མས༔ འབུམ་ཕྲག་མཁའ་འགྲོ་དབང་བསྡུས་བདག་ལ་སྩལ༔ དེས་ན་བརྗོད་པར་དཀའ་བའི་གདམས་པ་འདི༔ ཕྱི་མའི་དུས་ཀྱི་སྐལ་ལྡན་ཕོ་མོའི་དོན༔ ཡི་གེའི་རིས་བཏབ་རིན་ཆེན་གཏེར་དུ་སྦས༔ ལན་གཅིག་བསྐལ་བ་དུས་ཀྱི་ཐ་མ་ལ༔ འགྲོ་བ་འདྲེན་པའི་བུ་དང་འདི་འཕྲད་ནས༔ སངས་རྒྱས་བསྟན་པ་ཡུན་རིང་བསྲིང་བར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་ཆེན་ཉི་མ་གྲགས་པ་རྩལ་གྱིས་ཆགས་རུ་ཕུག་སྔོན་ནས་གུ་རུ་རིནཔོ་ཆེ་དང་སྲུང་མའི་བསྐུལ་བྱང་གསལ་བ་ལ་བརྟེན་ཏེ་སྤྱན་དྲངས་ཤིང་ཆགས་རུ་ཕུག་ནག་ཏུ་ཤོག་སེར་ལས་བསྒྱུར་བ་མངྒ་ལཾ། །སྣ་ཚོགས་མཐར་ཕྱིན་ལས་ཀྱི་མཁའ་འགྲོ་ཡི། །དབང་ཆོག་འཇུག་པ་བདེ་བར་བཀོད་པའི་དགེས། རབ་འབྱམས་ལས་ཀྱི་འདོད་པ་ཀུན་འཇོ་བས། །བསྟན་འགྲོའི་བདེ་ལེགས་བསྐྲུན་པའི་ནུས་ཐོབ་ཤོག །ཅེས་བཅོམ་ལྡན་འདས་མ་ཕག་གདོང་སྔོན་མོའི་དབང་ཆོག་དྲེགས་པ་ཚར་གཅོད་ཁྲིགས་སུ་སྡེབས་པ་འདི། བླ་མ་དམ་པ་མཁྱེན་སྤྱན་ཡངས་པ་འགྱུར་མེད་བློ་ལྡན་གྱིས་རིང་མོ་ཞིག་ནས་ནན་ཏན་ཆེན་པོའི་ཡང་ཡང་བསྐུལ་བ་དང་། ཉེ་བར་གྲུབ་པའི་དབང་ཕྱུག་བསྟན་འཛིན་སྙིང་པོ་ནས་གྲུབ་པར་གྱིས་ཤིག་པའི་གསུང་གི་གནང་བ་ཐོབ་པ་ལ་ཡི་དམ་དུ་བགྱིས་ཏེ་སྔགས་བན་ཝཱགྟི་མ་ཏིའི་བགྱིས་པ་ཉེས་གྱུར་མཁའ་འགྲོའི་ཚོགས་ལ་བཤགས།