སྒྲུབ་ཐབས་མ་མོའི་སྙིང་ཞུན།
སྔགས་བདག་འབར་མའི་ཐུགས་ཐིག་ལས༔ སྒྲུབ་ཐབས་མ་མོའི་སྙིང་ཞུན་བཞུགས༔ བདག་འདྲ་པདྨ་འབྱུང་གནས་ཀྱིས༔ མ་འོངས་འགྲོ་བའི་དོན་བསམས་ཏེ༔ བཀའ་ཡི་སྲུང་མ་ཆེན་མོ་ཡི༔ མན་ངག་ཡང་ཏིག་སྒྲུབ་པའི་སྐོར༔ མ་བུ་ཆ་ལག་སོ་སོར་ཕྱེ༔ གབ་འཁྲུགས་མེད་པར་རིམ་བཞིན་བཀོད༔ ཆོས་བྱེད་འགའ་ཡི་དོན་འགྲུབ་ཤོག༔ ཆོས་ཀྱི་བར་ཆད་ཟློག་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ མ་འོངས་སྐལ་ལྡན་རྗེས་འཇུག་གི༔ ལྷ་མོ་ཆེན་མོ་བསྒྲུབ་འདོད་ན༔ བསྙེན་དང་སྒྲུབ་པ་ལས་སྦྱོར་རོ༔ ས་མ་ཡ༔ རྒྱ་རྒྱ་རྒྱ༔ བསྙེན་ཅིང་སྒྲུབ་པའི་རིམ་པ་ནི༔ སྒྲུབ་པོ་དམ་ཚིག་ལྡན་པ་ཡིས༔ དྲག་པོའི་གནས་སམ་སྒྲུབ་ཁང་ནང་༔ ཆག་ཆག་གདབ་ཅིང་གད་བདར་བྱ༔ འབྲུ་ནག་ཕྱེ་ལ་དཔལ་གྱི་བཤོས༔ ཟུར་གསུམ་ཁྲུ་གང་ལྡན་པར་བྱ༔ ཤ་སྣ་སྙིང་སྣ་དག་གིས་བརྒྱན༔ ཤ་ཆེན་ནལ་བུ་རབ་ཡིན་ནོ༔ བདུད་རྩི་སྨན་དང་རཀྟ་བཅས༔ འཕུང་ཤུལ་ས་ཡི་སྟེགས་བུའམ༔ མདའ་གསུམ་ཨོཾ་མམ་མཉྫིའི་སྟེང་༔ གཏོར་མ་བཞག་ཅིང་སྨན་རཀ་དང་༔ རྣམ་ལྔ་ལ་སོགས་རྒྱས་པར་བཤམས༔ མཐིང་ནག་དར་གྱི་གུར་ཡང་ཕུབ༔ བྷ་སུ་ཏ་ཡི་ཞགས་པས་དཀྲི༔ གཏོར་མར་ཆུ་གཙང་སྨན་རག་སྦྲེང་༔ རང་ཉིད་ཡི་དམ་བསྐྱེད་རིམ་གསལ༔ བསྟན་པ་བསྲུང་བའི་སེམས་ཀྱང་བསྐྱེད༔ ཐུགས་ཀར་ཧཱུྃ་བྷྱོཿཉི་མའི་དཀྱིལ༔ ཐ་མར་སྔགས་ཀྱི་ཕྲེང་བས་བསྐོར༔ རང་མདུན་དུར་ཁྲོད་ས་གཞིའི་དབུས༔ ཁྲག་ཞག་རྒྱ་མཚོ་འཁྱིལ་བའི་ཀློང་༔ གྲུ་གསུམ་ཐོད་པ་སྐམ་རློན་མཁར༔ ནང་ནི་གནམ་ལྕགས་ཨུར་མོ་གྲུབ༔ རླུང་ནག་འཚུབ་མ་བསྐལ་མེ་འབར༔ མི་རོ་རྟ་རོ་འབུམ་ཁྲི་བརྡལ༔ ཉི་མའི་དཀྱིལ་འཁོར་འབར་བའི་ཀློང་༔ ཏི་ལས་སྐྱེས་པའི་བོང་བུ་ནི༔ དམར་ག་དྲག་རྩལ་མྱུར་མགྱོགས་ལྡན༔ གཡང་གཞི་མི་མགོ་ཐོད་པའི་སྒ༔ གཡུ་མཐུར་གསེར་སྲབ་མིག་འབྲས་བརྒྱན༔ མཆོང་སྦྲུལ་རྒྱུ་མའི་གོང་རྨེད་ལ༔ མི་མགོ་སྙིང་གི་དོ་ཤལ་སྤྲས༔ རྣ་བར་དར་གྱི་འཕུར་ལྕེ་དང་༔ གསེར་གྱི་གཡེར་ཁ་འཁྲོལ་བར་བསྒོམ༔ དེ་སྟེང་པདྨ་ཉི་ཟླའི་དབུས༔ རང་གི་ཐུགས་ཀའི་ས་བོན་ལས༔ མ་འཕྲོས་ཡོངས་གྱུར་དཔལ་ལྡན་མ༔ མཐིང་ནག་ཞལ་གཅིག་ཕྱག་གཉིས་པ༔ སྤྱན་གསུམ་རབ་འཁྱིལ་ཕྱོགས་བཅུར་གཟིགས༔ ཞལ་གདངས་ལྗགས་འགྲིལ་མཆེ་བ་གཙིགས༔ རལ་བ་དམར་ནག་གྱེན་ཐུར་གཏིབས༔ གསེར་གཡུ་མུ་ཏིག་ཆུན་པོས་བརྒྱན༔ གཡས་པས་ཁ་ཊྭཱཾ་བ་དན་ནག༔ གཡོན་པས་ནད་གྱི་རྐྱལ་པ་བསྣམས༔ སྐུ་སྟོད་ཞིང་ལྤགས་དར་ནག་གསོལ༔ སྐུ་སྨད་སྟག་ལྤགས་མི་རྩིབས་ཀྱི༔ རེ་ལྡེ་མིག་མང་རིས་སུ་དཀྲིས༔ སྤྱི་བོར་རྨ་བྱའི་སྒྲོ་ཕོད་ལ༔ སྙན་གཡས་སེང་གེ་གཡོན་སྦྲུལ་གདེངས༔ ཐོད་པ་སྐམ་རློན་སྦྲུལ་གྱིས་བརྒྱན༔ སྤྱི་བོའི་གཙུག་ན་ཟླ་བ་རྒྱས༔ ལྟེ་བའི་དཀྱིལ་ནས་ཉི་མ་འཆར༔ ནག་མོ་འབུམ་གྱིས་བསྐོར་བར་བསྐྱེད༔ ས་མ་ཡཱ༔ རྒྱ་རྒྱ་རྒྱ༔ དེ་ནས་གཙོ་མོའི་ཐུགས་ཀྱི་དབུས་སུ་མ་དམར་ནག་གི་མིག་ཏུ་བྷྱོ་ནག་མོའི་མཐར༔ རེ་མ་ཏཱི་མཱ་ར་ཡ་ཛ་མ་མ་རཀྴ་སྙིང་ཁ་རག་ཙིཏྟ་སྲོག་དུང་དུང་ཛཿཛཿ ཧཱུྃ༔ དེ་ནས་བདག་གི་ཧཱུྃ་བྷྱོ་མ་ལས་འོད་ཟེར་འཕྲོས་པས་ཡིག་འབྲུ་རྣམས་བརྒྱུད་ནས་ཐུགས་ཀར་ཕར་འཕྲོས་ལྷ་མོ་དམ་ཚིག་སེམས་དཔའི་ཐུགས་ཀར་ཐིམ་སྔགས་འབྲུ་རྣམས་བརྒྱུད་ནས་བྷྱོ་དང་མ་ལ་ཕོག་པས་འོད་ཟེར་བྱང་ཤར་དུ་འཕྲོས་པས་མཚོ་མུ་ལེ་མཐིང་གི་ནང་ཡོངས་འདུ་ཤིང་གི་རྩ་བ་ནས་ཐོད་མཁར་འབར་བའི་ཕོ་བྲང་ནས༔ དཔལ་ལྡན་ནག་མོ་ཆེན་མོ་འཁོར་ནག་མོ་འབུམ་གྱི་ཚོགས་དང་བཅས་པ་སྐད་ཅིག་གི་བྱ་ཁྱུང་ཐང་ལ་ལྷགས་པ་ལྟར་སྤྱན་འདྲེན་ཅིང་ཡང་ཡང་བསྟིམ༔ ལས་བྱང་ལྟར་སྤྱན་འདྲེན༔ ས་མ་ཡཱ༔ རྒྱ་རྒྱ་རྒྱ༔ དེ་ནས་བསྙེན་སྒྲུབ་ལས་གསུམ་གྱི༔ ཡོངས་སུ་དྲིལ་བའི་སྙིང་པོ་འདི༔ འབོད་པའི་ཚུལ་གྱིས་བཟླ་བར་བྱ༔ བྷྱོ་རེ་མ་ཏཱི་ཆེ་གེ་མཱ་ར་ཡ་ཛཿཧཱུྃ་བྷྱོ་ཕཊ༔ རང་ཉིད་ཡི་དམ་གྱི་ང་རྒྱལ་དྲག་ཏུ་བསྐྱེད་ཅིང་ཐུགས་ཀའི་ཧཱུྃ་དང་བྷྱོ་ལས་འོད་ཟེར་དམར་པོ་དམར་ལམ་ལམ་དུ་འཕྲོས་པས་སྔགས་འབྲུ་རྣམས་རིམ་གྱིས་བརྒྱུད་མ་མོའི་ཐུགས་ཀར་ཐིམ་པས་བྷྱོ་དང་མ་ལ་ཕོག་དཔལ་ལྡན་མའི་ཐུགས་དམ་བསྐུལ་མ་མོའི་སྲོག་བཅུད་མཐུ་སྟོབས་བཀྲག་མདངས་རྣམས་བདག་ཉིད་ལྷར་གསལ་བ་ལ་ཚུར་འདུས་པར་བསམས༔ རང་གི་ཐུགས་ཀའི་ཧཱུྃ་ལ་ཐིམ་པས་སྔགས་བདག་མའི་མཐུ་སྟོབས་གཟི་བརྗིད་ཐམས་ཅད་རང་གིས་ཐོབ་པར་བསྒོམ༔ དེ་ལྟར་མ་ཡེངས་རྩེ་གཅིག་ངང་༔ སྤྲོ་བསྡུ་བྱ་ཞིང་བསྙེན་པ་བསྐྱལ༔ ས་མ་ཡཱ༔ རྒྱ་རྒྱ་རྒྱ༔ དེ་ཚེ་རྟགས་ཀྱི་རིམ་པ་ནི༔ རབ་ནི་མངོན་སུམ་ཞལ་མཇལ་ཞིང་༔ འབྲིང་ནི་རྨི་ལམ་ཉམས་སྣང་དུ༔ མ་སྲིང་བུད་མེད་ལ་སོགས་པས༔ ཕྱག་རྒྱ་བྱེད་དང་དངོས་གྲུབ་སྟེར༔ ཕྱག་མཚན་མཚོན་ཆ་བོང་བུ་རྙེད༔ རླུང་ནག་འཚུབ་དང་མེ་འབར་སོགས༔ ཐ་ནའང་ནི་སྒྲུབ་རྫས་ལ༔ བག་རྡུལ་མེད་དང་བསྐྱེད་རིམ་གསལ༔ དེ་སོགས་གྲུབ་པའི་རྟགས་བྱུང་ནས༔ མཆོད་བསྟོད་སྨན་རག་གཏོར་མ་འབུལ༔ དངོས་གྲུབ་བླང་ཞིང་འཕྲིན་ལས་བཅོལ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ སྲོག་གི་སྤུ་གྲི་འབར་བའི་རྒྱས་བཏབ་བོ༔ བཀའ་གཉན་རྒྱ༔ དམ་གསང་རྒྱ༔ འཆལ་བར་མ་སྤྱོད་ཤིན་ཏུ་གཉན་པས་གབ་རྒྱ༔ ཁ་ཐཾ་ཨྠིྀ༔ རྒྱ་རྒྱ་རྒྱ༔ ཆིག་བརྒྱུད་མ་གཏོགས་མ་སྤེལ་ལོ༔ ས་མ་ཡཱ༔ རྒྱ་རྒྱ་རྒྱ༔ ཅེས་པ་འདི་ཁམས་པ་ཉི་མ་གྲགས་པས་ཤིང་ཕོ་བྱི་བའི་ལོ་ཧོར་ཟླ་དང་པོའི་ཚེས་བཅོ་བརྒྱད་ཀྱི་སྲོད་དྲག་པོའི་དུས་སུ་འཕགས་ཡུལ་ཆེན་པོ་རྒྱ་གར་ཧ་ཙོའམ་རྩྭ་མཆོག་གྲོང་གི་བྱང་སྒོའི་བསམ་བསེའུ་ནས་འབར་ཞིང་འཁྲུགས་པའི་ཉམས་མང་པོའི་ངང་ནས་གདན་དྲངས་ཏེ་ཨོ་རྒྱན་སངས་རྒྱས་གཉིས་པའི་སྦས་ལུང་སྐྱིད་མོ་གཤོང་གི་མཚོ་གྲོང་དགོན་པའི་གཙུག་ལག་ཁང་གི་ཡང་དབེན་དུ་མཁའ་འགྲོའི་གསང་བའི་ཤོག་སེར་ལས་བོད་ཡིག་ཏུ་མགྱོགས་པར་དཀྱུས་སུ་བྲིས་པ་འདིས་ཀྱང་སངས་རྒྱས་ཀྱི་བསྟན་པ་རིན་པོ་ཆེ་བསྲུང་བར་ཤོག །མངྒ་ལཾ།། །།