རྦད་ཅིང་བསྐུལ་བའི་ལས་མཐའ།
སྔགས་བདག་འབར་མའི་ཐུགས་ཐིག་ལས༔ རྦད་ཅིང་བསྐུལ་བའི་ལས་མཐའ་བཞུགས༔ རྦོད་གཏོར་མ་མོའི་ཚོགས་ལ་འདུད༔ གཏོར་མར་འགུགས་བསྟིམ་སྨན་རག་སྦྲེང་༔ རོལ་མོ་འཁྲོལ་ཞིང་འདི་སྐད་དོ༔ ཧཱུྃ་བྷྱོ༔ མ་བདུད་ཆེན་མོ་འབུམ་གྱི་གཙོ་མོ་ནི༔ དཔལ་ལྡན་དམག་ཟོར་རྒྱལ་མོ་རེ་མ་ཏཱི༔ ཤ་ཟ་མཁའ་འགྲོ་བདུད་མོ་སྨན་མོ་འབུམ༔ འཁོར་དུ་བསྐོར་ལ་དྲེགས་ཚོགས་དབང་དུ་སྡུས༔ ལས་ལ་བསྐུལ་ལོ་ཐུགས་དམ་དུས་ལ་བབས༔ སྔོན་ཚེ་རྒྱལ་བ་རྣམས་ཀྱི་སྤྱན་སྔ་རུ༔ སྤྱི་བོར་རྡོ་རྗེ་ལྕེ་ལ་བདུད་རྩི་བཞག༔ གསང་མཚན་གསོལ་ཏེ་བསྟན་པ་བསྲུང་བར་བསྐོས༔ སྲོག་སྙིང་ཕུལ་ཏེ་དམ་བཅའ་བཏབ་པ་རྣམས༔ ལྷ་མོས་དགོངས་ལ་བཅོལ་བའི་འཕྲིན་ལས་མཛོད༔ དཔལ་ལྡན་དམག་གི་རྒྱལ་མོ་རེ་མ་ཏཱི༔ མཐིང་ནག་མུན་པའི་མདོག་ཅན་རལ་གཅིག་མ༔ མེ་རླུང་དམར་ནག་འཚུབས་མ་ཀྱི་ལི་ལི༔ མ་བདུད་ཀུན་གྱི་རྒྱལ་མོ་ཤ་ཟ་མ༔ རྟག་ཏུ་དམ་ཉམས་དགྲ་བགེགས་ཤ་ལ་ཟ༔ དགྲ་ཤ་ཟོ་ཞིག་བདུད་མོ་རེ་མ་ཏཱི༔ དགྲ་ཁྲག་འཐུངས་ཤིག་ནག་མོ་ཀཱ་ལི་མ༔ ཕྱོགས་བཞི་མཚམས་བརྒྱད་ནད་ཀྱི་ཆར་པ་ཕོབ༔ ཕྱོགས་བཞི་མཚམས་བརྒྱད་དགྲ་བོ་རྡུལ་དུ་རློགས༔ རྒྱ་བོང་ཆིབས་ལ་སྟོང་གསུམ་བང་གིས་བསྐོར༔ དགྲ་བགེགས་ཐམས་ཅད་ཁུག་ལ་རྡུལ་དུ་རློགས༔ ཞལ་ནས་ནད་ཀྱི་རླངས་པ་བུ་ཡུག་འཐིབ༔ ནད་གདོན་དམག་སྒར་དམ་ཉམས་དགྲ་ལ་ཐོབ༔ རེས་འགའ་ཕྱག་ན་རལ་གྲི་བསྣམས་ཏེ་སྐྱོད༔ དམ་ཉམས་དགྲ་བགེགས་ཚལ་བ་ཚལ་བར་ཁོས༔ རེས་འགའ་ཕྱག་ན་རྩེ་གསུམ་བསྣམས་ཏེ་སྐྱོད༔ དམ་ཉམས་དགྲ་བགེགས་སྙིང་རྩ་འདྲེན་པར་བྱེད༔ རེས་འགའ་ཕྱག་ན་ཐོད་ཁྲག་ཐོགས་ཏེ་སྐྱོད༔ ཁྲག་མདའ་དམར་པོ་དགྲ་བགེགས་སྙིང་ལ་རྒྱོབ༔ རེས་འགའ་ཕྱག་ན་མདུང་དར་དམར་ནག་བསྣམས༔ དམ་ཉམས་དགྲ་བགེགས་རྡུལ་དུ་ད་རློགས་ཤིག༔ སྡིག་ཅན་ཡིད་ལ་བརྣག་པའི་དགྲ་བགེགས་འདིས༔ དང་པོར་སངས་རྒྱས་བསྟན་པ་གཉན་པོ་བཤིགས༔ བར་དུ་སེམས་ཅན་ཡོངས་ལ་གནོད་ཅིང་འཚེས༔ ཐ་མར་མི་དགེ་བཅུ་ཡི་ལས་ལ་སྤྱད༔ ད་ལྟ་རྣལ་འབྱོར་བདག་གི་དགྲ་རུ་ལངས༔ དུས་ལ་བབ་པོ་མ་མོ་མཁའ་འགྲོ་རྣམས༔ ཤ་ཟོ་ཁྲག་འཐུང་སྲོག་ཆོད་དབུགས་འགོམས་ལ༔ རྡུལ་དུ་རློགས་ཤིག་སྔགས་སྲུང་དམ་ཅན་མ༔ རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད༔ ཨཱོཾ་བཛྲ་རུ་ལུ་རུ་ལུ་སྙིང་ཁ་རག་མོ་བྷྱོ༔ ཨཱོཾ་རུ་རུ་རོ་རུ་སྙིང་ཁ་རག་མོ་བྷྱོཿབྷྱོ༔ ཅེས་བསྐུལ་ཕུད་དང་གཏོར་མས་མཆོད༔ དགྲ་བགེགས་བཟློག་ཅིང་འཕྲིན་ལས་མྱུར༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཤིང་ཕོ་བྱི་བའི་ལོ་ལ་རྒྱ་གར་རྩྭ་མཆོག་དྲུང་ནས་གདན་དྲངས་ཤིང་སྦས་ལུང་སྐྱིད་མོ་གཤོང་གི་གཙང་གྲོང་དགོན་པར་ཤོག་སེར་ལས་ཞལ་བཤུས་པའོ། །མངྒ་ལཾ།། །།