བསྐུལ་ཞིང་རྦད་པའི་ལས་མཐའ།

སྔགས་བདག་འབར་མའི་ཐུགས་ཐིག་ལས༔ བསྐུལ་ཞིང་རྦད་པའི་ལས་མཐའ་བཞུགས༔ རྦོད་གཏོང་མ་མོའི་ཚོགས་ལ་འདུད༔ གཏོར་མར་ཤ་ཁྲག་ལིང་གས་སྦྲན༔ དཔལ་འབར་གཟུགས་ཤིང་སྨན་རག་སྦྲེང་༔ སྲིན་པོ་ཁྲོས་པའི་ངར་སྐད་དམ༔ མ་མོ་ཁྲོས་པའི་ངུར་སྐད་ཀྱིས༔ བསྐུལ་ཞིང་རྦད་པ་འདི་སྐད་དོ༔ ཧཱུྃ་བྷྱོ༔ སྔགས་སྲུང་རྒྱལ་མོ་ཆེན་མོའི་ཐུགས་དམ་བསྐུལ༔ བྱང་ཤར་རྒྱ་མཚོ་ཆེན་པོའི་ཕ་རོལ་ན༔ ཡོངས་འདུ་ཤིང་ཆེན་ལོ་འདབ་རྒྱས་པའི་དྲུང་༔ མུ་ལེ་མཐིང་མཚོའི་གཏིང་རུམ་ཡངས་པ་ནས༔ མཐིང་ཤུན་འོད་བཅས་ཐོད་མཁར་གཞལ་ཡས་ན༔ མི་རོ་རྟ་རོ་འབུམ་ནི་གཅལ་དུ་བཀྲམ༔ མི་ཁྲག་རྟ་ཁྲག་མང་པོ་རྒྱ་མཚོར་བསྐྱིལ༔ མི་རྟའི་གསུར་ཆེན་དུད་པ་ཆི་ལི་ལི༔ མི་རྐང་ཐོད་རྔ་གླིང་བུ་ཁྲ་ལ་ལ༔ རབ་ཏུ་འཇིགས་པའི་གནས་མཆོག་ཆེན་པོ་ནས༔ ཐུགས་དམ་བསྐུལ་ལོ་མ་གཅིག་དཔལ་ལྡན་མ༔ སྔོན་ཚེ་རྒྱལ་བ་རྣམས་ཀྱི་སྤྱན་སྔ་རུ༔ ཞལ་བཞེས་དགོངས་ལ་དབྱིངས་ནས་ད་གཤེགས་ཤིག༔ རེས་འགའ་སེང་གེ་ཆིབས་ཏེ་ལྷ་ཡུལ་ཉུལ༔ རེས་འགའ་འབྲུག་ལ་ཆིབས་ཏེ་བར་སྣང་ཉུལ༔ རེས་འགའ་གློག་ལ་ཆིབས་ཏེ་གཟའ་ཁམས་ཉུལ༔ རེས་འགའ་འོད་ལ་ཆིབས་ཏེ་རི་རབ་བསྐོར༔ རེས་དགའ་འཚུབས་མར་ཆིབས་ཏེ་གླིང་བཞི་བསྐོར༔ རེས་འགའ་སྤྱང་ཀིར་ཆིབས་ཏེ་དུར་ཁྲོད་ཉུལ༔ རེས་འགའ་སྟག་ལ་ཆིབས་ཏེ་གནས་རྣམས་ཉུལ༔ རེས་འགའ་དོམ་ལ་ཆིབས་ཏེ་ཡུལ་རྣམས་ཉུལ༔ རེས་འགའ་འཕར་བར་ཆིབས་ཏེ་འདུ་བ་ཉུལ༔ རེས་འགའ་གཟིག་ལ་ཆིབས་ཏེ་མཐུན་སྤྱོད་ཉུལ༔ རེས་འགའ་དྲེལ་ལ་ཆིབས་ཏེ་གཙུག་ལག་སྐྱོད༔ རེས་འགའ་རྒྱ་བོང་ཆིབས་ཏེ་ནད་མཚོན་འགྱེད༔ རེས་འགའ་རྟ་ནག་ཆིབས་ཏེ་དགྲ་སྲོག་གཅོད༔ རེས་འགའ་ཆུ་སྲིན་ཆིབས་ནས་ཀླུ་ཡུལ་ཉུལ༔ རེས་འགའ་མེ་ལོང་བསྣམས་ཏེ་ལེགས་ཉེས་གཟིགས༔ རེས་འགའ་རལ་གྲི་བསྣམས་ཏེ་དགྲ་སྲོག་གཅོད༔ རེས་འགའ་ཁྲམ་ཤིང་བསྣམས་ནས་ཁྲམ་ལ་འདེབས༔ རེས་འགའ་མདའ་དར་བསྣམས་ནས་ཚེ་གཡང་འགུགས༔ རེས་འགའ་མདུང་དར་བསྣམས་ནས་སྲིད་གསུམ་དཀྲུག༔ རེས་འགའ་བེ་ཅོན་བསྣམས་ནས་དགྲ་ལ་བསྣུན༔ རེས་འགའ་ཏྲི་ཤུལ་གཡབ་མོས་དགྲ་བགེགས་བརླག༔ རེས་འགའ་ནད་རྐྱལ་བསྣམས་ནས་སྲིད་གསུམ་འགེངས༔ རེས་འགའ་ཞགས་པ་ནག་པོས་དགྲ་བོ་འགུག༔ རེས་འགའ་ལྕགས་ཀྱུ་འབར་བས་དགྲ་སྙིང་འབྱིན༔ སྣ་ཚོགས་སྤྲུལ་བསྒྱུར་འགྱེད་པའི་དཔལ་ལྡན་མ༔ འཁོར་དུ་དྲེགས་ཚོགས་བདུད་མོ་འབུམ་གྱིས་བསྐོར༔ གདུང་བས་འབོད་པའི་གནས་འདིར་མྱུར་དུ་གཤེགས༔ དུས་ལ་བབ་པོ་སྔགས་བསྲུང་རེ་མ་ཏཱི༔ དྲག་ཏུ་རྒྱུག་ཅིག་མ་ཚོགས་འབུམ་སྡེ་རྣམས༔ དུས་ལ་བབ་བོ་དམ་ཉམས་དགྲ་བགེགས་སྒྲོལ༔ མ་གཅིག་དཔལ་གྱི་རྒྱལ་མོ་སྐྱོད་བའི་ཚེ༔ གཡུ་ཡི་ན་བུན་མང་པོ་ཐུ་ལུ་ལུ༔ འབྲུག་གི་སྒྲ་སྐད་མང་པོ་དི་རི་རི༔ གློག་གི་ལྕེ་མདུང་དམར་པོ་ཁྱུགས་སེ་ཁྱུག༔ ཁྲག་གི་ཆར་པ་ཆེན་པོ་སི་ལི་ལི༔ དུང་གི་ཁུ་འཕང་མང་པོ་ཐོར་རོ་རོ༔ ལྕགས་ཀྱི་སེར་བ་མང་པོ་ཁྲ་ལ་ལ༔ ཐོག་གི་བུ་ཡུག་མང་པོ་ཚུབས་སེ་ཚུབ༔ མི་རྐང་གླིང་བུ་མང་པོ་ཀྱུ་རུ་རུ༔ སྦྲུལ་ནག་ཆུན་པོ་མང་པོ་ཉི་ལི་ལི༔ ཁྲག་གི་ཞགས་པ་མང་པོ་ཁྱུགས་སེ་ཁྱུག༔ མཚོན་ཆ་སྣ་ཚོགས་བུ་ཡུག་ཐིབས་སེ་ཐིབ༔ དར་ནག་ཅོད་པན་མང་པོ་པུ་རུ་རུ༔ རཀྟའི་རྒྱ་མཚོ་མང་པོ་ཀྱི་ལི་ལི༔ ཞིང་ཆེན་གཡབ་མོ་མང་པོ་ལྷབས་སེ་ལྷབ༔ སྟག་སྤྱང་གཅན་གཟན་ཚོགས་ནི་འདུར་རུ་རུ༔ བྱ་རོག་འདབ་ཆགས་འབུམ་ནི་ཉི་ལི་ལི༔ དོམ་དྲེད་ཁྱི་ནག་མང་པོ་ཀང་སེ་ཀང་༔ རླུང་ནག་འཚུབས་མ་མང་པོ་ཀྱི་ལི་ལི༔ བསྐལ་པའི་མེ་དཔུང་དམར་ནག་ལྷབས་སེ་ལྷབ༔ ཆིབས་སུ་རྒྱ་བོང་དེ་ནི་དམར་ག་བཅིབས༔ རླུང་ལྟར་རྒྱུག་ཅིང་གློག་ལྟར་མྱུར་མགྱོགས་ལྡན༔ སྔ་ཤད་གཡས་ན་ཁྲམ་ཤིང་ཡ་ལ་ལ༔ སྔ་ཤད་གཡོན་དུ་ཚོན་དྲུ་ཀྱི་ལི་ལི༔ ཕྱི་ཤ་གཡས་ན་ཤྭ་རྡེའུ་ཁྲོ་ལོ་ལོ༔ ཕྱི་ཤ་གཡོན་ན་ནད་རྐྱལ་ཕྱུ་རུ་རུ༔ ཞབས་ལ་ལྕགས་སྒྲོག་འབར་བ་ཁྱུགས་སེ་ཁྱུག༔ དོ་ནུབ་ནམ་གྱི་ཕར་མ་ཚུར་ཕྱེད་ལ༔ དམ་ཉམས་དགྲ་བགེགས་ཐམས་ཅད་ཁུག་ལ་ཤོག༔ གནོད་བྱེད་གདོན་བགེགས་བཟློག་པའི་དུས་ལ་བབས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ རྦད་པ་ཡིན་ནོ་དགྲ་བགེགས་སྲོག་རྩ་ཆོད༔ བསྐུལ་བ་ཡིན་ནོ་ལས་ལ་བང་མ་བུལ༔ མངགས་པ་ཡིན་ནོ་དགྲ་བགེགས་ཐལ་བར་རློགས༔ རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད༔ ཧཱུྃ་བྷྱོ༔ སྐུ་ལས་སྤྲུལ་པའི་མ་མོ་ཆེན་མོ་ནི༔ རྒྱ་བོང་ཆིབས་པའི་བ་ལམ་དྲེལ་སྣ་མ༔ ཁྲོ་གཏུམ་ལྡན་པ་ནག་མོ་འབུམ་སྡེའི་ཚོགས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་རྒྱུད་བསྐུལ་བཅོལ་བའི་འཕྲིན་ལས་མཛོད༔ ཧཱུྃ་བྷྱོ༔ གསུང་ལས་སྤྲུལ་པའི་མ་མོ་ཆེན་མོ་ནི༔ སྟག་མོ་ཆིབས་པའི་སྟག་སྨན་གཟེར་འདེབས་མ༔ དྲག་ཏུ་ཁྲོས་པའི་ནག་མོ་འབུམ་སྡེའི་ཚོགས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ ཧཱུྃ་བྷྱོ༔ ཐུགས་ལས་སྤྲུལ་པའི་མ་མོ་ཆེན་མོ་ནི༔ བྱ་རོག་ཆིབས་པའི་ཁྲི་སྨན་སི་ལི་མ༔ ཤིན་ཏུ་ཁྲོས་པའི་ནག་མོ་འབུམ་སྡེའི་ཚོགས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ ཧཱུྃ་བྷྱོ༔ ཡོན་ཏན་སྤྲུལ་པའི་མ་མོ་ཆེན་མོ་ནི༔ དྲེལ་ལ་ཆིབས་པའི་རྡོ་རྗེ་བ་ལམ་མ༔ དབྱིངས་ནས་ཁྲོས་པའི་ནག་མོ་འབུམ་སྡེའི་ཚོགས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ ཧཱུྃ་བྷྱོ༔ བར་སྣང་ཡངས་པའི་ད་ལ་ཆེན་པོ་ནས༔ སྟག་ལ་ཆིབས་པའི་ཚངས་པ་དུང་ཐོད་ཅན༔ རྒྱལ་པོ་འབུམ་སྡེའི་ཚོགས་ནི་འཁོར་དུ་བསྐོར༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ ཧཱུྃ་བྷྱོ༔ བྱང་ཤར་ལྕགས་མཁར་སྒོ་མདུན་མཚོ་ནང་ནས༔ ཆུ་གླང་ཆིབས་པའི་ལས་ཀྱི་གཤིན་རྗེ་ལ༔ སྙིང་རྗེ་མེད་པའི་གཤིན་རྗེ་འབུམ་གྱིས་བསྐོར༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ ཧཱུྃ་བྷྱོ༔ ཤར་ཕྱོགས་བདུད་མཁར་རྩེ་དགུའི་ཕོ་བྲང་ནས༔ རྟ་ནག་ཆིབས་པའི་བདུད་པོ་ནག་པོ་ལ༔ བདུད་པོ་མི་ཟན་འབུམ་གྱི་འཁོར་གྱིས་བསྐོར༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ ཅེས་བརྗོད་གཏོར་མ་འབུལ་ཞིང་ཕུད་ཀྱིས་མཆོད༔ སྤྲུལ་པའི་ཚོགས་ཀྱིས་དགྲ་བགེགས་སྒྲོལ་བར་ངེས༔ དེ་ཕྱིར་གཅེས་སོ་ཡིད་ཀྱིས་བརྣག་པར་མཛོད༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ གཉན་རྒྱ༔ དམ་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཧ་ཙོ་ནས་གདན་དྲངས་ཤིང་ཤོག་སེར་ལས་བོད་ཡིག་ཏུ་བསྒྱུར་བའོ། མང་ག་ལཾ།