བཀའ་སྲུང་ཨེ་ཀ་ཙ་ཏིའི་འཕྲིན་ལས།

ནོར་བདག་ཡིད་བཞིན་ནོར་བུ་ལས༔ བཀའ་སྲུང་ཨེ་ཀ་ཙ་ཏིའི་འཕྲིན་ལས་བཞུགས༔ ཁྲོ་བོའི་རྒྱལ་པོ་ཆེན་པོ་ལ་ཕྱག་འཚལ་ལོ༔ ཁྲོའམ་ཟངས་ལྕགས་སྣོད་ནང་དུ༔ དཔལ་བཤོས་ཤ་ཁྲག་ལིངྒས་བརྒྱན༔ སྨན་རག་སྦྲེང་ཞིང་དམིགས་བྱ་ཡི༔ ཤ་ཁྲག་ཕུང་པོར་བྱིན་གྱིས་བརླབས༔ རང་ཉིད་ཡི་དམ་གསལ་བའི་མདུན༔ སྔགས་སྲུང་ལྷ་མོ་འཁོར་བཅས་གསལ༔ གསུར་ཆེན་དྲི་བཟང་དུད་པ་བཏང་༔ རོལ་མོ་རྐང་གླིང་ཐོད་རྔ་འཁྲོལ༔ གདུང་བའི་དབྱངས་ཀྱིས་འདི་སྐད་དོ༔ བྷྱོཿ རང་མདུན་ཆོས་འབྱུང་པད་ཉི་དང་༔ དགྲ་བགེགས་བསྣོལ་བའི་གདན་སྟེང་དུ༔ མ་ཡིག་སྨུག་ནག་ཡོངས་གྱུར་པས༔ སྔགས་བསྲུང་རྒྱལ་མོ་རལ་གཅིག་མ༔ ཞལ་གཅིག་སྤྱན་གཅིག་ཞབས་ཀྱང་གཅིག༔ ནུ་གཅིག་ཚེམས་གཅིག་ཕྱག་གཉིས་ན༔ དགྲ་བོའི་ཙིཏྟ་སྲོག་རྩ་འཛིན༔ སྟག་ལྤགས་ཤམ་ཐབས་སྙིང་ཕྲེང་གསོལ༔ མ་མོ་མཁའ་འགྲོ་བྱེ་བས་བསྐོར༔ འོད་ཟེར་འཕྲོས་པས་འོག་མིན་དང་༔ ནུབ་ཕྱོགས་ཨོ་རྒྱན་དུར་ཁྲོད་ནས༔ ལྷ་མོ་འཁོར་བཅས་སྤྱན་དྲངས་གྱུར༔ བྷྱོ༔ དད་པ་དང་ནི་དམ་ཚིག་གི༔ སྔགས་ཀྱི་བསྲུང་མ་མཐུ་མོ་ཆེ༔ ཨེ་ཀ་ཙ་ཏི་མ་མོའི་ཚོགས༔ འཁོར་དང་བཅས་པ་གཤེགས་སུ་གསོལ༔ དུར་ཁྲོད་དྲག་པོའི་གནས་འདིར་བཞུགས༔ འདུ་འབྲལ་མེད་པའི་ཕྱག་གིས་མཆོད༔ ཕྱི་ནང་མཆོད་གཏོར་ཤ་ཁྲག་རུས༔ དགྲ་བོའི་དབང་པོ་ཚོགས་སུ་རོལ༔ མ་མོ་རཀྨོ་ཨེ་ཀ་ཙ་ཏི་དགྲ་བགེགས་ཀྱི་དབང་པོ་ཤ་ཁྲག་དོན་སྙིང་དང་བཅས་པ་ལ་ཁ་ཁ་ཁཱ་ཧི་ཁཱ་ཧི༔ གསུམ༔ ཧཱུྃ་བྷྱོ༔ ཀུན་ཏུ་བཟང་མོའི་སྤྲུལ་པ་མོ༔ ཞལ་གཅིག་ཆོས་ཉིད་འགྱུར་བ་མེད༔ རལ་གཅིག་རྒྱལ་བའི་དབང་བཞི་རྫོགས༔ སྤྱན་གཅིག་སྲིད་གསུམ་ས་ལེར་གཟིགས༔ ཚེམས་གཅིག་བདུད་བཞིའི་དགྲ་བགེགས་འཇོམས༔ ནུ་གཅིག་སྒྲུབ་མཆོག་བུ་བཞིན་སྐྱོང་༔ ཞབས་གཅིག་སྟོང་གསུམ་ཁྱབ་པར་ཉུལ༔ ཕྱག་གཉིས་ཞིང་བཅུའི་ཙིཏྟ་ཕྱུངས༔ སྙིང་གི་ཕྲེང་བས་སྐུ་ལ་བརྒྱན༔ སྟག་གི་པགས་པའི་ན་བཟའ་ཅན༔ ཡེ་ཤེས་མེ་དཔུང་ཀློང་ན་བཞུགས༔ སྤྲུལ་པའི་མ་མོ་འབུམ་དྲུག་འཕྲོ༔ ལས་སུ་སྔགས་ཀྱི་བསྟན་པ་བསྲུང་༔ ཟས་སུ་དགྲ་བོའི་ཤ་ལ་དགྱེས༔ སྐོམ་དུ་དགྲ་བོའི་ཁྲག་ལ་འཐུང་༔ ཨེ་ཀ་ཙ་ཏི་མ་མོའི་ཚོགས༔ ཤ་ཁྲག་གཏོར་མ་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ བྷྱོ་དམ་ལ་གནས་པའི་ཐ་ཚིག་ཅན༔ ལས་ལ་མྱུར་བའི་རྫུ་འཕྲུལ་ཅན༔ སྲོག་ལ་རྣོ་བའི་སྤུ་གྲི་མོ༔ དོན་སྙིང་ཕྱུང་བའི་ལྕགས་ཀྱུ་ཅན༔ དབང་དུ་སྡུད་པའི་ཕོ་ཉ་མོ༔ བདུན་བརྒྱུད་གཅོད་པའི་ཤ་ཟན་མོ༔ ཁམས་གསུམ་སྐྱེ་འགྲོའི་དབུགས་བདག་མོ༔ དགྲ་བགེགས་ཐམས་ཅད་མཱ་ར་ཡ༔ རྣམ་ཤེས་ཆོས་ཀྱི་དབྱིངས་སུ་སྤོར༔ སྔགས་སྲུང་ཆེན་མོ་དུས་མ་འགྱངས༔ སྔགས་བསྲུང་ཆེན་མོ་ལས་མ་གཡེལ༔ དམ་བཞིན་བཅོལ་བའི་འཕྲིན་ལས་མཛོད༔ དགྲ་བགེགས་འབྱུང་པོ་ཐམས་ཅད་མཱ་ར་ཡ་ཧཱུྃ་ཧཱུྃ་ཕཊ་ཕཊ་བྷྱོ་བྷྱོ་ཟློག་ཟློག༔ ཅེས་བརྗོད་གཏོར་མ་དགྲ་ཕྱོགས་འཕེན༔ རྒྱུན་ལྡན་མཆོད་གཏོར་མ་འགྱངས་ན༔ འཕྲིན་ལས་དུས་མཐའི་མེ་ལས་ཚ༔ ཅེས་པས་མ་འོངས་ཉམས་སུ་ལོང་༔ ལས་འཕྲོ་ལྡན་པའི་སྲུང་མར་ཤོག༔ སྱ་མྱ་ཡྻཱཿ ཅེས་པ་འདི་ཡང་ཁམས་པ་ཉི་མ་གྲགས་པས་ཁམས་སྲིང་མོ་རྫོང་མཆོག་ནས་ས་ཕོ་རྟ་ལ་གདན་དྲངས་ཤིང་། ས་མོ་ཡོས་ལ་ཤོག་སེར་ལས་བཤུས་པའོ། །མངྒ་ལཾ།། །།