ལམ་ཟབ་མོ་ཡན་ལག་དྲུག་གི་ཉམས་རྟོགས་བརྙེས་པའི་བསྐོར་གྱི་རྣམ་ཐར།

རབ་བྱུང་དགེ་ཚུལ་གྱི་སྡོམ་པ་ཡང་དག་པར་མནོས་ཏེ་ངུར་སྨྲིག་གི་རྒྱལ་མཚན་འཆང་བའི་མཛད་པ་བདག་གིར་བཞེས་ནས་ཕྱིར་ཕ་ཡུལ་ལ་ལོགས་ཏེ། ལོ་དེར་རང་དགོན་དུ་དབྱར་གནས་ལ་བཞུགས། སྟོན་ཁར་རིགས་ཐམས་ཅད་ཀྱི་བདག་པོ། བྱང་ཆུབ་སེམས་དཔའ་ཐམས་ཅད་ཀྱི་ཡབ། གསང་སྔགས་འཛིན་པ་ཀུན་ཀྱི་གཙོ་བོ། རྒྱུད་ཞི་བ་བྱང་ཆུབ་ཀྱི་སེམས་རིན་པོ་ཆེས་ཀུན་ནས་གཏམས་པ། དཔལ་དུས་ཀྱི་འཁོར་ལོའི་རྫོགས་རིམ་རྣལ་འབྱོར་ཡན་ལག་དྲུག་གི་སྲོག་རྩོལ་གྱི་ཡེ་ཤེས་འཁྲུལ་བ་མེད་པར་མངོན་དུ་བྱས་པ་རྗེ་བཙུན་དཔལ་ལྡན་བླ་མ་དམ་པ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨྲོས་ན་༧ངག་དབང་བཤད་སྒྲུབ་དཔལ་གྱི་ཞབས་དྲུང་རྩིབས་སྟོང་མི་ཤིགས་འཁོར་ལོའི་མཚན་མས་ཉེ་བར་མཛེས་པའི་མདུན་སར། ནང་པ་སངས་རྒྱས་པའི་འཇུག་སྒོ་སྐྱབས་འགྲོ་དང་ཕྱག་འབུམ་སྦྲག་མ། ཐེག་ཆེན་ལ་འཇུག་པའི་སྒོ་བྱང་ཆུབ་མཆོག་ཏུ་སེམས་བསྐྱེད་པ། རིམ་པ་གཉིས་ཀྱི་ལམ་སྐྱེ་བའི་མཐུན་རྐྱེན་དུ་ཚོགས་གསོག་པ་མཎྜལ། རྡོ་རྗེ་ཐེག་པའི་མངོན་རྟོགས་ཐམས་ཅད་ཀྱི་ལམ་གྱི་དངོས་གཞི་དང་གེགས་སེལ་བོགས་འདོན་སོགས་རྩ་བའི་གཙོ་བོ་གཅིག་པུར་གྱུར་པ་བླ་མའི་རྣལ་འབྱོར་སྟེ། ཐུན་མོངས་ཀྱི་སྔོན་འགྲོ་ཐམས་ཅད་མ་ལུས་ལུས་པ་མེད་པར་སྔོན་དུ་སོང་བའི་སྒོ་ནས། ཐུན་མོངས་མིན་པ་དཔལ་དུས་ཀྱི་འཁོར་ལོ་ལྷན་སྐྱེས་ཀྱི་སྒོ་ནས་བསྐྱེད་རིམ་དང་ཧཀྵ་ས་ཡ་ཟློ་བ། དཔལ་མཆོག་དུས་ཀྱི་འཁོར་ལོའི་དབང་གོང་མ་བཞིས་ཡོངས་སུ་རྒྱུད་སྨིན་པར་བྱས་པའི་སྒོ་ནས། རྫོགས་རིམ་གཉུག་མ་རང་བྱུང་ལྷན་ཅིག་སྐྱེས་པའི་ཡེ་ཤེས་མ་བཅོས་སོ་མའི་ངོ་བོའི་རང་ཞལ་མཇལ་བའི་སྔོན་འགྲོ་ཐུན་མིན་ཁྱད་པར་ཅན་དབེན་པ་གསུམ་ལྡན་སྒོམ་པ་སྟེ། དེ་ལྟར་ཐུན་མོངས་དང་ཐུན་མོངས་མིན་པའི་སྔོན་དུ་འགྲོ་བ་མཐའ་དག་ཇི་བཞིན་དུ་ཐུགས་ཉམས་སུ་བསྟར་ནས། ལོ་གསུམ་ཕྱོགས་གསུམ་ལ་རྫོགས་རིམ་སྦྱོར་བ་ཡན་ལག་དྲུག་རྗེས་ཀྱི་བྱ་བ་དང་བཅས་པ་ལ་ཉམས་ལེན་ལྷོད་མེད་དུ་མཛད་པར་བྱས་སོ། །དེ་ཡང་ཐུན་མོངས་མིན་པའི་སྔོན་འགྲོ་ཁྱད་པར་ཅན་དབེན་པ་གསུམ་ལྡན་ནམ་ལྟོས་མེད་བཞི་ལྡན་གྱི་ཉམས་ལེན་མུན་ཁང་ལུས་གནད་བྱེད་བཅིང་ལ་རྩེ་གཅིག་ཏུ་གཞོལ་བའི་སྒོ་ནས་བསྒོམས་ཏེ་ཉིན་ཞག་བདུན་སོང་བའི་མཚམས་སུ། སྟོང་གཟུགས་ཀྱི་སྐུ་ཡི་དམ་གྱི་ལྷ་ཡབ་ཡུམ་སྐུ་མདོག་དཀར་བོ་རུས་པ་དང་རིན་པོ་ཆེའི་རྒྱན་རྣམས་མེད་པ་ཁ་སྦྱོར་ཞིག་ཤིན་ཏུ་གསལ་བར་མཐོང་སྟེ། དེ་ནས་བཟུང་སྟོང་གཟུགས་ཀྱི་ལྷ་དང་ཐིག་ལེ་སོགས་མངོན་སུམ་དུ་མཐོང་བ་དཔག་ཏུ་མེད་ཀྱང༌། འགའ་རེ་ཙམ་ད་དུང་ཡང་ཐོས་པ་ཡོད་མོད། གསང་སྔགས་ཐུན་མིན་གྱི་ཉམས་མྱོང་མང་དག་ཅིག་ནི་ཇི་དགར་བརྗོད་དུ་རུང་བ་ཡང་མ་ཡིན་ནོ། །རིགས་ལྡན་པདྨ་དཀར་པོའི་བསྡུས་པའི་རྒྱུད་ཀྱི་རྒྱལ་པོ་དུས་ཀྱི་འཁོར་ལོའི་འགྲེལ་བཤད་རྩ་བའི་རྒྱུད་ཀྱི་རྗེས་སུ་འཇུག་པ་སྟོང་ཕྲག་བཅུ་གཉིས་པ་དྲི་མ་མེད་པའི་འོད་ལས། མཆོག་གི་དང་པོའི་སངས་རྒྱས་སུ་རྡོ་རྗེའི་ཚིག་ཕྱག་རྒྱ་ཆེན་པོ་བསྒོམ་པའི་ལམ་དུ་བ་ལ་སོགས་པ་རབ་ཏུ་གསལ་བ་ཡིན་གྱི་བླ་མ་བརྒྱུད་བའི་རིམ་པས་འོངས་པ་མ་ཡིན་ལ་བླ་མའི་བཀས་བྱིན་གྱིས་བརླབས་པ་ཡང་མ་ཡིན་ནོ། །ལམ་འདི་ལ་ནི་ཡིད་ཆེས་པ་ཡོད་དེ། ཉི་མ་གཅིག་ནི་ཡོངས་སུ་བརྟག་ཅེས་པ་བཅོམ་ལྡན་འདས་ཀྱིས་གསུངས་པའི་ཕྱིར། ཞེས་དང༌། འགྲེལ་ཆེན་དྲི་མ་མེད་པའི་འོད་དུ་དུས་འཁོར་རྩ་བའི་རྒྱུད་ཀྱི་ལུང་དྲངས་པ་ལས། བསམ་པ་ཐམས་ཅད་ཡོངས་སྤངས་ནས། །ཉི་མ་གཅིག་ནི་ཡོངས་སུ་བརྟག །གལ་ཏེ་རྟགས་ནི་མ་བྱུང་ན། །དེ་ཚེ་ང་ཡི་ཚིག་དེ་རྫུན། །ཞེས་གསུངས་ཏེ། རྡོ་རྗེ་ཐེག་པའི་ལམ་མཆོག་དཔལ་དུས་ཀྱི་འཁོར་ལོའི་ལམ་འདི་ལ་བརྟེན་ཏེ་ཡིད་ཆེས་གསུམ་ལྡན་དམ་ཚིག་རྣམ་པར་དག་པའི་གང་ཟག་ཅིག་གིས། དབང་བསྐུར་ཟབ་མོས་རྒྱུད་ཡོངས་སུ་སྦྱངས་ཏེ་བླ་མ་དམ་པའི་མན་ངག་རྒྱུད་དང་མཐུན་པར་སྤྲོས་བྲལ་རྣམ་པར་མི་རྟོག་པའི་ཡེ་ཤེས་གོམས་པ་སྔ་ཕྱི་བསྡོམས་ཏེ་ཉིན་གཅིག་ལོངས་པ་ན། གཉུག་མའི་སེམས་འོད་གསལ་གྱི་རང་མདངས་དོན་དམ་ལྷན་ཅིག་སྐྱེས་པའི་སྟོང་གཟུགས་ཀྱི་སྐུ་མ་མཐོང་ན་བཅོམ་ལྡན་འདས་ཀྱིས་བསླུས་པ་ཡིན་པར་གསུངས་པ་ལྟར། འདི་ཡང་དོན་དམ་གཉུག་མ་འོད་གསལ་སེམས་ཀྱི་རང་མདངས་ཆོས་སྐུ་སྤྲོས་པ་དང་བྲལ་བ་མ་དག་ལས་སྣང་གི་ཤུན་པ་ལས་འདས་པའི་གདོད་མའི་ཆོས་སྐུའི་རང་ཞལ་མངོན་སུམ་དུ་བྱས་པའི་རྣམ་པར་ཐར་བ་ཡིན་ཏེ། སྤྱིར་ནི་རྣམ་པར་ཐར་བ་འདི་ལས་ཆེ་བ་ཞིག་ཅི་དགོས། འདི་ལས་ངོ་མཚར་བ་གཞན་ཅི་ཞིག་ཡོད། གྲུབ་མཆོག་ཐམས་ཅད་ཀྱི་ལམ་མཆོག་གཅིག་པུ་ཡང་འོད་གསལ་སེམས་ཀྱི་རང་ངོ་བདེ་སྟོང་སྣང་བ་སྣ་ཚོགས་པའི་ངོ་བོ་རྩོལ་མེད་དུ་སྐྱོང་བ་འདི་ག་ལས་གཞན་མེད་དེ། གྲུབ་ཐོབ་ཀུན་ཀྱི་སྤྱི་མེས་དཔལ་ས་ར་ཧའི་ལུང་ནཱ་རོའི་ཞབས་ཀྱི་དབང་མདོར་འགྲེལ་བཤད་དོན་དམ་པ་བསྡུས་པར་དྲངས་པ་ལས། རྨོངས་པ་ནམ་མཁའི་ཚད་མ་ནི། །གལ་ཏེ་ཤེས་ན་རྨོངས་ཚོགས་གཅོད། །དང་པོར་རྣམ་དག་ནམ་མཁའ་ལ། །ལྟ་ཞིང་ལྟ་བས་མཐོང་བ་འགག །ཅེས་དང༌། བར་སྣང་ལ་ནི་ཡིད་དང་རླུང་དང་མིག །དུས་གཅིག་ཏུ་ནི་གལ་ཏེ་ངེས་སྦྱར་ན། །རིན་ཆེན་རྒྱལ་བའི་ཡོན་ཏན་ངེས་པར་སྐྱེ། །འདི་དག་མཐའ་དག་དེ་བཞིན་གཤེགས་པས་གསུངས། །སྣ་ཚོགས་རྣམ་རྟོག་བྲལ་ཞིང་མི་སེམས་པར། །གལ་ཏེ་བར་སྣང་ལ་ནི་མིག་བལྟས་ན། །ཕྱོགས་བཅུའི་འཇིག་རྟེན་མཐའ་དག་ཡིན་ནམ་སྙམ། །རྣལ་འབྱོར་དབང་ཕྱུག་མཐའ་དག་འདི་ལས་ཐོབ། །ཅེས་དང༌། དཔལ་མགོན་འཕགས་པ་ཀླུ་སྒྲུབ་ཞབས་ཀྱི་ལུང་ནཱ་རོའི་ཞབས་ཀྱིས་དྲངས་པར་ཡང༌། གང་རྣམས་ཀྱི་བློ་རྟེན་དང་བྲལ། །ཡོད་དང་མེད་ལས་རྣམ་པར་འདས། །ཟབ་མོ་དམིགས་མེད་དེ་རྣམས་ཀྱིས། །མཚན་མའི་དོན་ནི་རྣམ་པར་སྒོམ། །ཞེས་དང༌། དེ་བཞིན་དུ་ཞི་བ་ལྷའི་རྡོ་རྗེའི་གླུ་ལས་ཀྱང། རྨད་བྱུང་ནམ་མཁའི་དཀྱིལ་ཤར་བྷུ་སུ་ཀུ། །སྟོང་ཉིད་གཟུགས་མཛེས་ཤར་རོ་བྷུ་སུ་ཀུ། །དཔེ་མེད་མེ་ཏོག་ཤར་རོ་བྷུ་སུ་ཀུ། །རིན་ཐང་མེད་པའི་མེ་ཏོག་རིན་ཆེན་ལོངས། །མེ་ཏོག་འདི་ནི་ཁ་དོག་སྣ་ཚོགས་ཅན། །མེ་ཏོག་འདི་ནི་སྟོང་ཉིད་དགོན་པར་རྒྱས། །ཞེས་འབྱུང་སྟེ། གཞན་ཡང་གྲུབ་ཆེན་ནག་པོ་སྤྱོད་པ་དང་ལྭ་བའི་གོས་ཅན་ལ་སོགས་པ་གྲུབ་པའི་དབང་ཕྱུག་ཐམས་ཅད་ཀྱི་ཐུན་མོངས་ཀྱི་ དགོངས་པ ་གཅིག་ཏུ་གྲུབ་པ་ལགས་ཏེ། ལུང་དེ་དག་གི་དོན་ནི་རྒྱས་པར་གསང་སྔགས་ཟབ་མོའི་རྫོགས་རིམ་མན་ངག་དང་ལྡན་པའི་སྒོ་ནས་ཤེས་པར་བྱ་བ་ཁོ་ནའོ། །དེ་ལྟའི་ལམ་མཆོག་ཟབ་མོ་དེ་ཉིད་རྗེ་བཙུན་ཏཱ་ར་ནཱ་ཐའི་ལྷན་ཐབས་འོད་བརྒྱ་འབར་བ་ལས། མྱོང་གྲུབ་ལ་ཡང༌། དཔྱད་སྒོམ་དང༌། རྣམ་རྟོག་ངོ་ལྟའི་སྒོམ་ལ། ཡུན་རིང་བསྒོམས་ཀྱང་སྟོང་གཟུགས་ཡིན་ངེས་ལར་མི་འཆར། ཉམས་ཐན་ཐུན་བྱུང་སྲིད་ནའང་དེ་ཡང་མང་པོ་མི་ཡོང་ལ། བྱེད་བཅིང་དང་ལྡན་པའི་མི་རྟོག་པ་བསྒོམས་ན་སྟོང་གཟུགས་མང་པོ་འཕྲལ་དུ་འབྱུང་བ་ད་ལྟ་སུའི་ལག་ལེན་ལ་བཏབ་ཀྱང་མྱོང་བས་གྲུབ། སྔོན་དུས་བྱུང་ངོ་བ་ལ་ཁག་འཇོག་མི་དགོས། བྲེ་སྲང་འཁྲིས་སུ་བཞེས་ནས་ཕོད་ཚོད་ཀྱིས་ཅི་བྱེད། དགག་སྒྲུབ་མཐའ་བཀོད་མང་པོའི་ཁ་ན་མེད་དོ། །ཞེས་ཉམས་མྱོང་གིས་གྲུབ་པར་གསུངས་པ་འདི་བླ་མ་དམ་པ་བཤེས་གཉེན་མཚུངས་པ་མེད་པའི་སྡེ་འདི་ཉིད་ཀྱིས་ཚེགས་མེད་པར་མངོན་དུ་བྱས་པ་ཡིན་ནོ། །དགག་སྒྲུབ་དང་ཚིག་གི་ཤུན་པ་ལ་མ་ལྟོས་པར་བླ་མའི་མན་ངག་ཟབ་མོས་རང་མྱོང་མངོན་སུམ་དུ་མཛད་པའི་རྐྱེན་གྱིས། ཕྱིས་སུ་གཞུང་ལུགས་སློབ་པ་ན་སྟོང་ཉིད་ཟབ་མོ་མེད་དགག་ཏུ་བསྟན་པ་དང༌། ཅི་མེད་ཅིང་མེད་ཅིག་ཏུ་བཤད་པ་དང༌། གཞན་སྟོང་དབུ་མ་ཆེན་པོའི་གཞི་ལམ་འབྲས་བུའི་རྣམ་བཞག་ལ་དགག་བཞག་བྱས་པ་ཐམས་ཅད་ཅི་ཙམ་མཐོང་ཡང་བློ་སོམ་ཉིས་གཡོ་བ་ཙམ་ཡང་བསྐྱེད་ཐུབ་པ་མ་བྱུང་བར་གསུང་འཕྲོས་ལས་ལན་མང་དུ་ཐོས་ཏེ། འདི་ནི་སྔོན་བྱོན་དམ་པ་མཆོག་རྣམས་ཀྱི་རྣམ་ཐར་ན་ཡང༌། ལྟ་བའི་དཔྱད་པ་རྫོགས་པ་དང་མ་རྫོགས་པའི་སྐབས་ཞེས་སྐུ་ཚེ་སྟོད་སྨད་ཀྱི་གསུང་ལ་ཧེ་བག་འབྱེད་པ་རྣམས་ལས་ཀྱང་རྣམ་ཐར་རྨད་དུ་བྱུང་བ། སྐུ་ན་ཕྲ་བ་དགུང་ལོ་བཅུ་དྲུག་བཞེས་པ་ནས་རྒྱུད་ཀྱི་གསང་བ་ཟབ་མོ་ལས་ཀྱང་ཡང་ཟབ་མངོན་སུམ་དུ་རྟོགས་པའི་རྣམ་པར་ཐར་བ་འགྲན་ཟླ་དང་བྲལ་བ་ཡིན་པས། རྨད་དུ་བྱུང་བ་འདི་ལས་ཡ་མཚན་པ་ཞིག་སུ་ལ་བདོག །ཁོང་ཉིད་དགུང་གྲངས་བཅུ་དྲུག་བཞེས་པ་སྦྱོར་དྲུག་ལོ་གཉིས་པའི་དུས་སུ། མཁས་བཙུན་གྲུབ་པའི་དབང་ཕྱུག་མཁན་ཆེན་བློ་བཟང་འཕྲིན་ལས་མཆོག་ཨ་སྐྱོང་དགོན་དུ་ཕེབས་ཏེ། བོད་ཟླ་བཅུ་བ་སྟེ་དགུན་ཟླ་ར་བའི་ཚེས་གཅིག་ནས་དུས་འཁོར་དབང་ཆེན་དང༌། རྟ་ཕྱག་ཁྱུང་གསུམ་གྱི་རྗེས་གནང༌། མི་འཁྲུགས་པའི་དབང་བསྐུར་གནང་བ་རྣམས་ཞུས། སྐབས་འདིར་བླ་མ་བཤད་སྒྲུབ་དཔལ་མཆོག་དུས་འཁོར་དབང་ཆེན་ཞུ་བར་ཕེབས་པའི་ཞབས་གཡོག་རྣམས་བླ་མ་དམ་པ་འདི་ཉིད་ནས་མཛད། ལོ་དེར་རྡོ་གྲུབ་སྐུ་ཕྲེང་བཞི་པ་ཐུབ་པ་མཆོག་ཨ་སྐྱོང་དགོན་དུ་བྱོན་སྐབས་ཆོས་འབྲེལ་ཞུས། ལོ་དེར་ཡང་ཨ་པང་གཏེར་སྟོན་གྱི་སྲས་མོ་མཁའ་འགྲོ་ཏཱ་རེ་ལྷ་མོ་ལ་ཡང་ཐུགས་རྗེ་ཆེན་པོའི་ཆོས་སྐོར་འགའ་རེ་ཞུས། སྦྱོར་དྲུག་ལོ་གསུམ་པའི་སྐབས་དགུང་གྲངས་བཅོ་བརྒྱད་ཀྱི་དབྱར་མགོ་ཙམ་ན་ཀ༔ཐོག་རྨོག་སྤྲུལ་འཇིགས་བྲལ་ཕྱོགས་ལས་རྣམ་རྒྱལ་མཆོག་ལྕགས་རི་དགོན་དུ་བྱོན་ནས་བདུད་ཀློང་གི་དབང་གསུངས་པ་ན། རྡོ་རྗེ་འཛིན་པ་བླ་མ་བཤད་སྒྲུབ་དཔལ་དབུར་བཞུགས་ཏེ་དམ་པ་འདི་ཉིད་སོགས་སྦྱོར་དྲུག་བ་ལྷན་རྒྱས་ནས་དབང་ཡོངས་རྫོགས་ཞུ་བར་ཕེབས། གཡུ་ཐོག་ཀརྨ་བསོད་ནམས་མཆོག་ཨ་སྐྱོང་དགོན་དུ་ཕེབས་པ་ལ་ཡང་ཐུགས་རྗེ་ཆེན་པོ་འཁོར་བ་དུང་སྤྲུགས་ཀྱི་དབང་གསན། ལོ་དུ་མར་དགུན་དུས་སུ་ལོ་རེ་བཞིན་དུ་བླ་མ་རྡོ་རྗེ་འཆང་བཤད་སྒྲུབ་དཔལ་གྱིས་འོད་དཔག་མེད་ཀྱི་ཞིང་སྒྲུབ་ཟབ་མོ་སྐྱ་སེར་རིས་སུ་མ་མཆིས་པའི་ཐུན་མོང་གི་བགོ་སྐལ་དུ་འཚོགས་བཞིན་པ་ན། ཆགས་མེད་བདེ་སྨོན་གྱི་འགྲེལ་ཆེན་དང༌།

སྟོང་ཟ་སིདྡྷིའི་ཞིང་ཁྲིད་སོགས་མཁས་གྲུབ་རཱ་ག་ཨ་སྱའི་བདེ་སྨོན་གྱི་སྟེང་ནས་འཆད་འཁྲིད་ལན་དུ་མ་དང༌། རྣམ་ཆོས་ཞིང་དབང་དང༌། འཇིགས་མེད་གླིང་བའི་ཞིང་དབང་སོགས་ཞིང་སྒྲུབ་ཀྱི་ཆོས་བསྐོར་མང་པོ་ཐོབ། ད་དུང་འོད་མདོ་དང༌། ཇོ་ནང་ཕུར་བའི་ལུང་དང༌། སྒྲོལ་མ་དམར་མོའི་ཆོ་གའི་ལུང་སོགས་ཁྲིད་ལུང་ཕྲན་བུ་འགའ་རེ་དང༌། རྫོགས་པ་ཆེན་པོའི་སེམས་ཁྲིད་སོགས་མན་ངག་ཁ་ཤས་དང་བཅས་པ་གསན། གནས་འགོ་བླ་མ་ཆོས་མཐུན་གྱི་མདུན་ནས་ཡན་ལག་བདུན་པའི་ཁྲིད་དང༌། རྫོགས་ཆེན་གྱི་སེམས་ཁྲིད་རེ་ཡང་ཐོབ་གསུངས་ཏེ། ཆོས་དང་བླ་མ་ལ་ཕྱོགས་དང་རིས་སུ་མ་བཅད་པར་སྐྱེས་བུ་དམ་པ་ཀུན་ཀྱི་ཞབས་རྡུལ་གཙུག་ཏུ་བླངས་ཤིང་ཆོས་དང་གདམས་ངག་ཀུན་ལ་དག་སྣང་ཁྱད་མེད་དུ་བྱས་པ་ཡིན་ནོ། །

འོད་གསལ་ཆོས་སྐུ་ཐིག་ལེ་ཉག་གཅིག་སྣ་ཚོགས་དཀྱིལ་འཁོར་ལྷ་སྔགས་བདེ་བ་ཆེན་པོ་ཐོག་མེད་གདོད་ནས་གནས་པའི་ཞལ། །

མ་བཅོས་གཉུག་མ་རང་བབ་ངང་ནས་མངོན་སུམ་ས་ལེར་གཟིགས་པ་འདི་ག་རྒྱུད་དང་གྲུབ་ཐོབ་ཀུན་གྱི་གསང་ཆེན་ལམ། །

འབད་པའི་ངལ་བ་དབེན་པར་ལྔ་གསུམ་རྫོགས་པའི་གཞོན་ནུའི་དུས་ནས་ཨེ་ཝཾ་ཟུང་འཇུག་རྒྱུད་ཀྱི་དོན་རྟོགས་བྱུང་བ་འདི། །

འུད་དང་རྫུན་གྱིས་སྦག་པ་མེད་པར་དྲང་སྲོང་ཚིག་འདིས་སྐལ་མཉམ་གཞན་ལ་ཡང་ནི་དྭངས་བའི་ཤུགས་རབ་སྩོལ་གྱུར་ཅིག །

སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ལམ་ཟབ་མོ་ཡན་ལག་དྲུག་གི་ཉམས་རྟོགས་བརྙེས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་བཞི་པའོ། །