རྒྱལ་བསྟན་རིས་མེད་བགྲོ་གླེང་ཆེན་མོ་ཐེངས་དང་པོ་དབུ་ཚུགས་པའི་བསྐོར་སོགས་ལོ་ཕྱེད་རིང་གི་རྣམ་ཐར།

ཕྱི་ལོ། ༢༠༢༡ བོད་རབ་གནས་ལྕགས་གླང་ལོའི་བོད་ཟླ་གཉིས་པའི་ཚེས་བཅུ་ནས། གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་གི་ལོ་དེའི་ཐོས་བསམ་སྒོམ་གསུམ་གྱི་བྱ་བ་ཐམས་ཅད་བཀྲ་ཤིས་པའི་ངང་དབུ་བཟུང༌། བཤེས་གཉེན་དམ་པ་ཉིད་ཀྱི་ཞལ་སྔ་ནས། ད་ལན་ཟླ་བ་གཉིས་ཙམ་ལ་ཆོས་མཚམས་བྱས་པ་རེད། ཁ་ཤས་ཀྱིས་དེའི་ཡུན་ལ་ཡང༌། དཔེ་མཚམས་བསྡད་པ་དང༌། མཚམས་བསྙེན་སྒྲུབ། གྲྭ་བསྐོར་ལ་སོགས་པ་བྱས་ཡོད་འདུག །དེ་ཚོ་ལ་མཚོན་ན་ཆོས་མཚམས་ཟེར་བ་དེ་ངལ་གསོ་ཙམ་ཞིག་མ་ཡིན་པར། དགོས་པ་ཡོད་པ་དང་དེ་ཡོད་ན་ཕན་ཐོགས་ལྡན་པ་ཞིག་ཀྱང་རེད་འདུག །དེ་འདྲ་མ་ཡིན་པར་ཁྱིམ་པ་སུན་འབྱིན་དང་སངས་རྒྱས་ཀྱི་བསྟན་ལ་ཞབས་འདྲེན་མ་ཞུས་པའི་ཐོག་ནས། ངལ་གསོ་ཏོག་ཙམ་བྱས་ཡོད་ན་ཡང་མི་འགྲིག་རྒྱུ་ཅི་ཡང་ཡོད་པ་མ་རེད། ཡིན་ན་ཡང༌། ད་ནས་བཟུང་ངལ་གསོའི་སྐབས་ཀྱི་རྩེ་དགོད་དག་གི་གོམས་གཤིས་སུ་འགྲོར་མི་འཇུག་པར། སྤོང་ཀློག་གི་ལས་ལ་གཅིག་ཏུ་བརྩོན་དགོས་པ་རེད། མདོ་ལས་ཀྱང༌། བསམ་གཏན་ཀློག་པའི་ལས་དག་གིས། །ལུས་ལ་སྙིང་པོ་བླང་བར་བྱ། །ངུར་སྨྲིག་གྱོན་ཙམ་གྱིས་ཆོག་པའི། །བསམ་པ་ནམ་ཡང་མི་བྱའོ། །ཞེས་གསུངས་པ་བཞིན་རེད། གོང་ཐང་བསྟན་པའི་སྒྲོན་མེའི་ཞལ་སྔ་ནས། སོས་བདེ་གུ་ཡངས་ཤིག་འདོད་ན། །སྣ་ཐག་རང་མགོ་ལ་དཀྲི་དགོས། །མི་ཁོམ་སྟོང་འུར་ལ་གཟད་ན། །ཆེ་ཆེ་མཐོ་མཐོའི་རྩར་རྒྱུག་ཅིག །ཅེས་པ་ལྟར། མ་ཁོམ་མ་ཡོང་བས་ཟ་ངེ་ཟིང་ངེ་ཞིག་གི་སེམས་ཁམས་ཀྱིས་དཔེ་ཆ་ཡག་པོ་བལྟ་ཐུབ་རྒྱུ་དང་ཤེས་ཐུབ་ཀྱི་མ་རེད། དེས་ན། བསམ་པ་ཐམས་ཅད་གཅིག་ཏུ་དྲིལ་ནས་དཔེ་ཆ་ལྟ་བ་ལས། དྲན་རྒྱུ་བསམ་རྒྱུ་མང་པོ་མི་བྱེད་པ་གལ་ཆེ་བ་ཡིན། ཞེས་སོགས་གསུངས་སོ། །བོད་ཟླ་གསུམ་པའི་ཚེས་ཉི་ཤུ་གཅིག་དང་གཉིས་ལ། བཤེས་གཉེན་རིན་པོ་ཆེ་མཆོག་གིས་ཚོགས་གཙོ་སོགས་ཐོག་མཐའ་བར་གསུམ་གྱི་ཐུགས་འགན་གཙང་བཞེས་འོག །ཆོས་བརྒྱུད་རིས་སུ་མཆིས་པའི་མཁས་པ་མང་པོ་གདན་འཛོམས་ཏེ། གངས་ལྗོངས་རིས་མེད་རྒྱལ་བསྟན་མཐོ་རིམ་བགྲོ་གླེང་ཐེངས་དང་པོ། ཡུལ་དགོན་ཨ་སྐྱོང་དགོན་ངེས་དོན་རྟག་བརྟན་བཤད་སྒྲུབ་འཕེལ་རྒྱས་གླིང་དུ་དབུ་འཛུགས་མཛད་ཅིང༌། སྲོལ་ཡིག་དང་བཅས་འཐུས་ཚང་བའི་ལམ་སྲོལ་བཞག །རིས་སུ་མ་མཆིས་པའི་ཆོས་བརྒྱུད་ཁག་ནས་ཞབས་སོར་འཁོད་པའི་མཁས་མང་བླ་ཆེན་རྣམས་ལ་ཐུགས་དགོངས་མཐུན་པའི་མཇལ་འཕྲད་དང༌། ལུང་རིགས་ཀྱི་བརྒལ་བརྟག་འབེལ་གཏམ་གྱ་ནོམ་པ་མཛད་ཅིང༌། དཔལ་མཉམ་མེད་རི་བོ་དགེ་ལྡན་པའི་འཕགས་ཡུལ་གདན་ས་ཆེན་པོ་ནས་ཕེབས་པའི། མཁས་དབང་ལྷ་རམས་པ་འགའ་རེས་གསུང་བཤད་གནང་བར། དགེ་བཤེས་ཁོང་ལ་མཚོན་སོང་ན་མཁས་པ་ཙམ་ཞིག་མ་རེད། བོད་གངས་ཅན་གྱི་རླབས་ཆེ་བའི་སྐྱེས་བུ་དམ་པ་ཞིག་རེད། རྒྱུ་མཚན་གང་ཡིན་ཞེ་ན། ཇོ་ནང་པ་ཟེར་བའི་ཆོས་བརྒྱུད་གྲུབ་མཐའ་འདི་བོད་གངས་རིའི་ལྗོངས་ཀྱི་ནང་པ་སངས་རྒྱས་པའི་ཆོས་བརྒྱུད་ལྔའི་ཡ་གྱལ་གཅིག་རེད། ཉམས་གུད་དུ་སོང་ན་ཇོ་ནང་བའི་གྱོང་གུད་ཟེར་ནས་འདུག་རྒྱུ་ཡོད་པ་མ་རེད། བོད་པ་ཚང་གི་གྱོང་གུད་ཆེན་པོ་ཞིག་ཏན་ཏན་ཆགས་ཡོད་པ་རེད། དེས་ན། ཁོང་གིས་ཆོས་བརྒྱུད་གྲུབ་མཐའ་ཆེན་མོ་ཞིག་སླར་གསོ་མཛད་བཞག་པ་ཡིན་ན། དེ་ལས་ཆེ་བའི་ཕྱི་རྗེས་ཤིག་འཇོག་རྒྱུ་རྙེད་མི་སྲིད་པ་རེད། དེ་ཡང༌། ལྷ་ཁང་ཞིག་བཞེངས་བཞག་པ་དང༌། གསེར་སྐུ་ཞིག་བཟོས་བཞག་པ་དང་གཏན་ནས་མི་འདྲ་བ་རེད། གང་ཡིན་ཞེ་ན། གཞི་ལམ་འབྲས་བུའི་རྣམ་བཞག་ཡོངས་སུ་རྫོགས་པའི་བཤད་སྲོལ་གྱི་ཤིང་རྟའི་སྲོལ་ཆེན་པོ་ཞིག་སླར་ཡང་གསལ་བར་བྱས་པ་རེད། ད་དུང་ཆོས་བརྒྱུད་འདི་བ་སང་ལ་མཁས་པ་ཁ་གྲགས་རྒྱུ་ཡོད་པའི་མི་གསོན་གོབ་ཆོད་པ་ཤིན་ཏུ་མང་པོ་ཞིག་བསྐྱེད་བསྲིངས་བྱས་ཡོད་པ་ཡིན་དུས། ཁོང་གིས་བཞག་པའི་མཛད་རྗེས་དེ་ཕྱི་རབས་ནས་ཕྱི་རབས་ལ་ཇེ་མངོན་ཇེ་གསལ་ཡོང་རྒྱུའི་ཕྱག་ལས་རླབས་པོ་ཆེ་བཞག་འདུག །བླ་མ་སྤྱན་རས་གཟིགས་ཀྱིས་གསུང་བཞིན་པའི་མི་སྣ་དེ་ཏན་ཏན་ཏིག་ཏིག་གིས་འདི་འདྲ་ལ་ཆགས་ཡོད་རེད་དྲན་གྱིན་ཡོད། ཅེས་སོགས་མཁས་མང་རིས་སུ་མ་མཆིས་པའི་བསྟོད་པའི་མེ་ཏོག་གི་འདབ་མ་ལྷུག་པོར་བརྡོལ་ཡང༌། མང་དུ་དོགས་ནས་དེ་ཙམ་དུ་བྱ། བོད་ཟླ་བདུན་པའི་ཚེས་བཅུ་གཉིས་ཉིན་ཁམས་མི་ཉག་དགོན་ཆེན་དུ་ཕེབས་ཏེ། ཇོ་སེར་མི་མང་འདུས་པ་རྒྱ་མཚོ་ལ་ཆོས་བཀའ་རྒྱ་ཆེན་བསྩལ་ཞིང༌། ཟབ་མོ་གཅོད་ཚོགས་ཆེན་མོའི་དབུ་བཞུགས་མཛད། ཟླ་དེའི་ཚེས་ཉེར་གཉིས་ལ། གངས་ལྗོངས་རིས་མེད་སློབ་གླིང་གི་སློབ་མ་རྒྱ་མཚོ་ལྟ་བུའི་འཁོར་གྱི་སྣ་དྲངས་ཏེ། ཛམ་ཐང་གཙང་བ་དགོན་དུ་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་བཅུ་དྲུག་པར་ཆིབ་བསྒྱུར་བསྐྱངས་ཏེ། ཕྱི་ཉིན་གྲྭ་ཚང་འདུས་པ་རྒྱ་མཚོ་ལ་བཀའ་སློབ་གསུངས་པ་རེག་ཟིག་ཏུ་གནད་བསྡུས་འགོད་ན། ཐུགས་མཐུན་ཁྲིམས་གཙང་གི་སྒོ་ནས་བཤད་སྒྲུབ་ཀྱི་བསྟན་པའི་སྙིང་པོ་ལ་འབད་བརྩོན་བྱེད་དགོས། ཞེས་པའི་གླེང་གཞི་ཞིག་གཏན་ཁེལ་བྱས་ཏེ་ཞུ་རྒྱུ་དེ་ཡིན། ཐུགས་མཐུན་ཁྲིམས་གཙང་གི་སྒོ་ནས་བཤད་སྒྲུབ་ཀྱི་བསྟན་པ་འཛིན་དགོས་པ་ཡིན་ན། དང་པོ། ཐུགས་མཐུན་པ་དེ་ཧ་ཅང་གལ་ཆེན་པོ་རེད། འོན་ཀྱང༌། ཐུགས་མཐུན་ཞེས་པ། དེང་སང་རང་རང་སོ་སོའི་ལས་འབྲས་དྲང་བདེན་དང༌། གནས་ལུགས་གཙིགས་སུ་བཟུང་ནས་གཞན་ལ་ཕན་མ་ཐོགས་ན་གནོད་མི་བྱེད་རྒྱུ་དེ་རེད། དེ་ཡང༌། ལས་འབྲས་དང་མཐུན་པ། ཆོས་འདུལ་བའི་བཅས་ཁྲིམས་དང་མཐུན་པ། འཇིག་རྟེན་མི་ཆོས་སམ་རྒྱལ་ཁབ་ཀྱི་རྩ་ཁྲིམས་དང་མཐུན་པ་ཞིག་གི་སྟེང་ནས་འགྲོ་དགོས་པ་རེད་མ་གཏོགས། ཀུན་དང་མཐུན་པ་མི་ཆོས་ཀྱི་རྩ་བ། །ཞེས་པ་དེ། རྐུན་མ་དང་མཐུན་པ། གཡོ་སྒྱུ་ཁྲམ་གསུམ་དང་མཐུན་པ། ཆབ་སྲིད་ཀྱི་གཡོ་སྒྱུ་ཅན་དང་མཐུན་པ་ཞིག་ལ་གོ་བ་མ་རེད། དེས་ན་རང་རང་སོ་སོའི་རང་ཚུགས་མ་ཤོར་བའི་ངང་ནས། གནས་ལུགས་དང་དྲང་བདེན་གལ་ཆེན་རང་བཞིན་དུ་བཟུང་ནས་འགྲོ་དགོས་པ་རེད་མ་གཏོགས་མི་ཐམས་ཅད་དང་མཐུན་པ་ཞིག་ཡོང་ཐབས་བྲལ་བ་རེད། བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་ཡང་འཛམ་བུ་གླིང་འདིར་བྱོན་པ་རེད་དེ། ཐམས་ཅད་དང་མཐུན་པ་ཞིག་མ་ཡོང་པ་རེད། ཁོང་ཐབས་ལ་མ་མཁས་པ་དང༌། བྱམས་སྙིང་རྗེ་མེད་པ་མ་རེད་ཏ། སེམས་ཅན་སོ་སོའི་ཁམས་དང་མོས་པ་སོ་སོ་བ་ཡིན་པ་དང༌། བསོད་ནམས་དང་སྨོན་ལམ་ཡོད་མེད་སྣ་ཚོགས་ཤིག་གིས་ཀུན་དང་མཐུན་པ་ཞིག་ཡོང་ཐབས་བྲལ་བ་རེད། སངས་རྒྱས་ཀྱིས་ནི་མི་མགུ་ན། །བདག་འདྲ་ངན་པའི་སྨོས་ཅི་དགོས། །ཞེས་རྒྱལ་སྲས་ཆེན་པོ་ཞི་བ་ལྷས་གསུངས་པ་བཞིན། ང་རང་ལྟ་བུར་མཚོན་ན་ཐམས་ཅད་དང་མཐུན་པ་ཞིག་དགོས་བསམ་ཀྱང་དེ་ནི་སྟོང་བསམ་ཁོ་ན་མ་གཏོགས་ཀུན་དང་མཐུན་པ་ཞིག་ཆགས་ཡོང་བའི་ཐབས་ཡོད་པ་མ་རེད། འོན་ཀྱང༌། གོང་དུ་ཞུས་པ་ནང་བཞིན། གནས་ལུགས་དང་དྲང་བདེན། ལྷག་ཏུ་ང་ཚོ་རབ་བྱུང་བ་ཞིག་ལ་མཚོན་ན། ཆོས་འདུལ་བའི་བསྟན་པ་ཡང་སྙིང་དུ་བཟུང་དགོས་པ་གལ་ཆེན་པོ་རེད་བསམ། རང་གི་ངོས་ནས་བསམ་བློ་བཏང་ན་ད་སྔ་ཡན་ལ། ཆོས་བརྒྱུད་རིས་སུ་མེད་པའི་མཁས་དབང་རྣམས་ཀྱི་མདུན་ནས་དབང་ལུང་ཁྲིད་གསུམ་ཞུས་ཏེ། གང་ལ་གང་འཚམས་ཀྱི་གཞུང་ལུགས་ལ་ཡང་བལྟས། ཆོས་བརྒྱུད་དག་ལ་རང་ནུས་གང་ཡོད་ཀྱིས་ཞབས་ཕྱི་བསྒྲུབས་ནས་སོང་པ་ཡིན་མ་གཏོགས། ཁ་རྐྱང་བ་ཙམ་གྱིས་མཐུན་སྒྲིལ་དང་རིས་མེད་ཟེར་ནས་ཞུས་པ་མེད། བྱ་བ་ཆེ་ཆུང་གང་སྒྲུབ་ན། དེ་ལ་འགལ་ཟླ་ཟེར་ན་འདྲ། ལྡོག་ཕྱོགས་ཤིག་ཡོད་པ་རེད། ལྷ་ཟབ་སར་བདུད་ཟེར་བ་རེད། སྤྱིར་བཏང༌། ཐང་བདེ་མོའི་སྟེང་གི་རི་མཐོན་པོ་ལ་རླུང་རྒྱབ་པ་དེ་དངོས་པོའི་ཆོས་ཉིད་ཅིག་ཡིན་པས་བྱ་བ་གང་སྒྲུབ་ན་རང་ལ་གནས་ལུགས་དང་དྲང་བདེན་ཡོད་ན། གཞན་གྱི་བར་ཆད་དང་འགལ་བ་ཡོད་ན་ཡང་རང་གི་གཟི་བརྗིད་ཅིག་རེད། གནས་ལུགས་ཡོད་པའི་རྟགས་མཚན་ཞིག་ཀྱང་རེད། ང་རང་གྲྭ་བ་གྲྭ་རྐྱང་ཟླ་གམ་ཁེར་རྐྱང་ཞིག་རེད། ངའི་མི་ཚེའི་བརྒྱུད་རིམ་ལ་བསམ་བློ་བཏང་ན། ལོ་བཅུ་ཕྲག་ཁ་ཤས་ལ་དཔེ་ཆ་ཞིག་ལྟ་ཁུལ་བྱས་པས། གཞན་ལ་གཡོ་སྒྱུའི་སྒོ་ནས་མགོ་གཡོགས་དང་མགོ་སྐོར་དང་དེའི་རིགས་ལ་བྱ་བ་སྒྲུབ་རོགས་གང་ཡང་མ་བྱས་པ་ཡིན། རང་ནུས་གང་ཡོད་ཀྱིས་ལས་འབྲས་གཙིགས་སུ་འཛིན་ཁུལ་བྱས་ཏེ་ཡོང་བ་ཡིན། ང་ཚོ་རབ་ཏུ་བྱུང་བ་ཞིག་ན། ལས་འབྲས་གཙིགས་སུ་བཟུང་ནས། ལྟོ་གོས་ཆས་གསུམ་ནང་པ་སངས་རྒྱས་པའི་བསྟན་པ་ལ་བརྟེན་ནས་ཡོང་གི་ཡོད་པས། ནང་ཆོས་དེ་རྩ་ཆེན་དང་མཐོང་ཆེན་བྱེད་རྒྱུ་ནི་གལ་ཆེན་པོ་རེད། ཐུགས་མཐུན་ཁྲིམས་གཙང་ཞེས་པ་ལས། ཁྲིམས་གཙང་བ་དེ་བཤད་ན། ཚུལ་ཁྲིམས་ལ་རིགས་མང་པོ་ཡོད་པ་རེད། ཡིན་ན་ཡང་དེ་རིང་འདིར་འདུས་པ་ཐམས་ཅད་ནི་གྲྭ་བ་ཤ་སྟག་ཡིན་པས་དགེ་ཚུལ་སློང་གི་སྡོམ་པའི་ཕྱོགས་ནས་ཉུང་ཙམ་ཞུ་རྒྱུ་ཡིན། རབ་ཏུ་བྱུང་བའི་སྡེ་ཞིག་ལ་མཚོན་ན་རང་རང་སོ་སོ་དགེ་ཚུལ་སློང་གང་ཡིན་ན་དེའི་ཚུལ་ཁྲིམས་དེ་སྲུང་དགོས་པ་རེད། སྲུང་པ་དེ་ཡང༌། དང་པོ། སྡོམ་པ་མ་ཐོབ་པ་ཐོབ་པར་བྱེད་པ། ཐོབ་པ་མི་ཉམས་པར་བྱེད་པ་སོགས་ཡོད་པ་ལས། དེ་རིང་འདི་ནས་ཞུ་རྒྱུ་ནི་སྡོམ་པ་མ་ཐོབ་ པ་འཐོབ་པར་བྱེད་རྒྱུ་ཧ་ཅང ་གལ་ཆེན་པོ་རེད་བསམ་ཡོད། རང་གི་བསམ་ཚུལ་འདི་འདྲ་ཞིག་རེད། དགེ་སློང་ཞིག་སྒྲུབ་པ་ཡིན་ན། ལོ་ཉི་ཤུ་མ་ལོན་སྔོན་ནས་དགེ་སློང་སྒྲུབ་མཁན་ཇོ་ནང་གི་དགོན་སྡེ་མང་པོ་ན་ཡོང་གི་ཡོད་པ་རེད། འོན་ཀྱང་ལོ་ཉི་ཤུ་མ་ལོན་ནས་དགེ་སློང་གི་སྡོམ་པ་དེ་ཆགས་ཀི་ཡོད་པ་མ་རེད། འདུལ་བ་མདོ་རྩའི་སྤྱི་བསྟན་གྱི་མདོ་ཚན་དྲུག་ཅུ་རེ་ལྔ་ལས་དང་པོའི་སྐབས་སུ། ཉམས་པ་དང་མ་ཆགས་པ་གཉིས་ལྟུང་བ་ལ་སྦྱོར་ན་ཉེས་བྱས་སོ། །ཞེས་གསུངས་པ་ལྟར། མ་ཆགས་པ་ཞིག་ཡོང་གི་ཡོད་པ་རེད། དེས་ན་དགེ་སློང་སྒྲུབ་པ་ལ་ཆ་རྐྱེན་རྣམས་ཚང་དགོས་པ་གལ་ཆེན་པོ་རེད། དགེ་ཚུལ་སློང་སྒྲུབ་པ་ལ་དགེ་ཚུལ་སློང་ལྔ་ཚོགས་ངེས་པར་དུ་དགོས་པ་རེད་དེ། དགེ་སློང་ལྔ་ཚོགས་ཕར་ཞོག །སྔོན་དུས་སུ་གསེར་སྐུ་རེ་དགེ་སློང་གི་ཚབ་ཏུ་བྱས་པ་དང་མི་གཅིག་ཙམ་གྱིས་བསྒྲུབས་པ་སོགས་ཉ་ཉོག་མང་པོ་ཞིག་ཤོད་རྒྱུ་འདུག །དེའི་དབང་གིས་སྡོམ་རྒྱུད་ཆད་འགྲོ་བ་དེ་ཡང་ཡོང་གི་ཡོད་པ་རེད། ཕྱོགས་གཞན་ཞིག་ཏུ། མི་ཚངས་སྤྱོད་ཀྱི་ཕམ་པས་མ་གོས་ན་ཡང༌། བླ་ཆེན་མང་པོས་མི་ཆོས་བླ་མའི་རྫུན་བཤད་པ་གོམས་གཤིས་ལྟ་བུར་གྱུར་ཡོད་པ་དང༌། ཐབས་ཤེས་སྣ་ཚོགས་བཏང་ནས་དཔལ་འབྱོར་སྒྲུབ་ཡོང་དུས་མ་བྱིན་ལེན་པའི་ཕམ་པ་བྱུང་སྟེ། དེ་ནས་ད་དུང་སྡོམ་པ་སྒྲུབ་བསྡད་མཁན་ཡང་ཡོད་ཡོད་འདྲ་རེ་སྣང་གི་འདུག །དེ་ལྟ་ཡོད་ན་ནི། སྡོམ་པ་སྦྱིན་མཁན་ཕར་ཞོག །སྡོམ་རྒྱུད་གཅོད་མཁན་དུ་གྱུར་ཡོད་པ་རེད། དེས་ན། དང་པོ་ནས་ཆོས་འདུལ་བ་ལ་སློབ་སྦྱོང་ཡག་པོ་ཞིག་བྱེད་རྒྱུ་གལ་ཆེན་པོ་རེད། ཚུལ་ཁྲིམས་སྲུང་བའི་སྐབས་སུ། རང་ཉིད་དགེ་ཚུལ་སློང་ཡིན་པའི་འདུ་ཤེས་ཡོད་རྒྱུ་དང༌། ཕམ་པས་མ་གོས་པ་དང་རང་བཞིན་གྱི་ཁ་ན་མ་ཐོ་བ་ལ་འཛེམས་པ་ཡིན་ན་དགེ་སློང་རྣམ་དག་ཡིན་ཞེས་ཆོས་འདུལ་བའི་སྐབས་སུ་གསུངས་པ་བཞིན། རང་རང་སོ་སོ་དགེ་ཚུལ་སློང་རྣམ་དག་ཡིན་པའི་འདུ་ཤེས་ཡོད་པའི་སྒོ་ནས། ནམ་རྒྱུན་སྲུང་སེམས་ཡོད་རྒྱུ་གལ་ཆེན་པོ་རེད་མ་གཏོགས། སྲུང་སེམས་ལྐོག་གྱུར་ཏུ་སོང་ན་སྡོམ་པ་ཡང་ལྐོག་གྱུར་ཏུ་བུད་སོང་རེད། དེ་ལྟ་ན་སྡོམ་པ་དེ་ལས་ཐོབ་པའི་དགེ་རྩ་ཡང་ནུས་པ་ཆུང་ཆུང་འགྱུར་འགྲོ་བ་རེད། བསླབ་ལ་མི་གནས་དེ་དག་ནི། །གཟུགས་པོ་ཁྱིམ་པར་གནས་པ་མཆོག །ཅེས་སངས་རྒྱས་བཅོམ་ལྡན་འདས་ཀྱིས་གསུང་པ་བཞིན། ཕམ་པས་གོས་པ་ནས་བཟུང༌། རབ་བྱུང་ངུར་སྨྲིག་གི་གོས་མི་གྱོན་རྒྱུ་གལ་ཆེན་རེད། ཆོས་རྗེ་ཀུན་མཁྱེན་རིན་པོ་ཆེས། ཚུལ་ཁྲིམས་འཆལ་བའི་ལུས་ཅན་གཞོན་ནུ་ཁྱོད། །དགེ་སློང་ཚུལ་དུ་མ་འཆོས་དཀར་པོ་གྱོན། །ཚུལ་ཁྲིམས་འཆལ་བའི་ཉེས་པའི་མི་ཆོག་པར། །ཚུལ་འཆལ་ཉེས་པའི་གོས་ན་མི་རུང་ངོ༌། །ཞེས་གསུངས་པ་ནང་བཞིན་རེད། དིང་སང་དགོན་སྡེ་མང་པོའི་ནང་དུ་རྒྱུད་ལ་སྡོམ་པ་མེད་ཀྱང་ངུར་སྨྲིག་གི་གོས་གྱོན་མཁན་དང༌། རབ་བྱུང་གི་སྡེར་ཞུགས་ཡོད་མཁན་མང་པོ་ཞིག་ཡོང་གི་ཡོད་པ་རེད། དེའི་རིགས་ཀྱིས་ཁེ་བཟང་རེག་གི་ཡོད་བསམ་ན་ཐང་ཏ། དོན་དངོས་སུ་ཚུལ་ཁྲིམས་འཆལ་བ་དེས་དགེ་འདུན་པའི་གནས་མལ་སྐད་ཅིག་ཙམ་ལ་ཡང་ལོངས་སུ་སྤྱད་ན་དམྱལ་བ་འགྲོ་བའི་རྒྱུ་ཡིན་པ་རེད། དེས་ན་ཚང་མས་དེའི་རིགས་ལ་གཟབ་གཟབ་གྱིས། བསྟན་པ་དག་ཐེར་གྱི་ཕྱོགས་ལ་ང་ཚོས་འབད་འབུངས་བྱེད་དགོས་པ་རེད། དེ་ཡང་སློབ་དཔོན་དབྱིག་གཉེན་གྱིས། སྟོན་པའི་དམ་ཆོས་རྣམ་གཉིས་དེ། །ལུང་དང་རྟོགས་པའི་སྡེ་སྣོད་དོ། །དེ་འཛིན་སྒྲུབ་པ་སྨྲ་བྱེད་པ། །སྒྲུབ་པར་བྱེད་པ་ཁོ་ན་འོ། །ཞེས་གསུངས་པ་ལྟར། སངས་རྒྱས་ཀྱི་བསྟན་པ་ལུང་རྟོགས་གཉིས་ཡིན་པ་ངོས་ཟིན་ཏེ། ས་རྡོ་རི་བྲག་གི་ལས་ཀ་ལྟ་བུའི་བསྟན་པའི་ཕྱི་གཟུགས་བརྙན་ཙམ་ལས། ལྷ་ཁང་གསེར་ཁང་སོགས་ཀྱིས་འཆད་ཉན་མི་བྱེད་ལ། ཐོས་བསམ་སྒོམ་གསུམ་མི་བྱེད། དེའི་རྒྱུ་མཚན་གྱིས། ང་ཚོས་སངས་རྒྱས་ཀྱི་བསྟན་པའི་སྙིང་པོ་གང་ཡིན་ངོས་ཟིན་དགོས་པ་གལ་ཆེན་རེད། དགེ་འདུན་པའི་བཞུགས་གནས་ཤིག་དང༌། གཙུག་ལག་ཁང་ཞིག་དགོས་ཀི་ཡོད་པ་རེད་མ་གཏོགས། དིང་སང་ལྷ་ས་ཕྱོགས་ཡིན་ན་འདྲ། གཞན་དག་ལ་བསམ་བློ་བཏང་ན། སྔོན་གྱི་སྒྲུབ་གནས་ཆེན་མོ་ཁ་ཅིག་མར་ཉམས་ནས་ནང་དུ་བཙུན་མ་གཅིག་གཉིས་ཙམ་ལས་མེད་པ་ལྟ་བུ་རེད། ཡང་ཁ་ཅིག་གིས་འཛུགས་སྐྲུན་རྒྱ་ཆེན་པོ་བྱས་པས་རྐྱེན་གྱིས། སྒྲུབ་གནས་ཆེན་པོ་དག་ད་ཆར་ཡུལ་བསྐོར་ལྟེ་གནས་སུ་བསྒྱུར་བ་ ཧ་ཅང་ཡིད་ཕངས་པ་མང་པོ་ཡོང་གི་ཡོད་པ་རེད། ལུང་རྟོགས་ཀྱི་བསྟན་པ་འཛིན་སྐྱོང་བྱེད་པ ་ལ་ཡང༌། ལུང་གི་བསྟན་པ་ལ་ཐོས་བསམ་སྒོམ་གསུམ་བྱས་ཏེ་འགྲོ་དགོས་པ་དང༌། ཐོས་བསམ་སྒོམ་གསུམ་པོ་རྒྱུ་འབྲས་ཀྱི་གོ་རིམ་ཞིག་ཡིན་པ་དང༌། སྔགས་བླ་མེད་ཀྱི་སྐབས་སུ་ཡང༌། པདྨའི་རིགས་ཀྱི་དམ་ཚིག་གསུངས་ཡོང་དུས། ཕྱི་ནང་གསང་བ་ཐེག་པ་གསུམ། །དམ་པའི་ཆོས་རྣམས་མ་ལུས་བཟུང༌། །ཞེས་གསུངས་པ་རེད། ཕྱི་ནང་གསང་བ་ཞེས་པ། བྱ་རྒྱུད། སྤྱོད་རྒྱུད། རྣལ་འབྱོར་གྱི་རྒྱུད། གསུམ་དང༌། ཐེག་པ་གསུམ་ཞེས་མདོ་ལུགས་ཀྱི་ཐེག་པ་གསུམ་གསུངས་པ་རེད། དེ་མ་ལུས་པར་ཡོངས་སུ་བཟུང་ཞེས། དམ་ཚིག་གི་གྲངས་སུ་བཞག་གི་ཡོད་པ་རེད། ཡང་དིང་སང་འཆད་ཉན་བྱེད་ཡོང་དུས། ང་རང་ལས་སྣང་མ་དག་པ་ཡིན་ན་འདྲ། རང་ལ་ཆོས་རབ་ཏུ་རྣམ་འབྱེད་ཀྱི་ཤེས་རབ་མེད་པའི་དབང་གིས་ཡིན་ན་ཡང་ཐང་མོད། མང་པོ་ཞིག་གིས་མ་བརྟག་མ་དཔྱད་པར་བྱུང་རྒྱལ་དུ་རང་བཟོ་བྱས་ཏེ། རང་རང་སོ་སོའི་ཡིག་ཆ་ན་ཡོད་པ་དེ་མི་ལབ་པར། མེད་པ་དེ་ལབ་འགྲོ་བ་ཧ་ཅང་མང་པོ་ཡོང་གི་འདུག །དེ་ཧ་ཅང་ཉེན་ཁ་ཚ་བོ་ཞིག་ཆགས་འདུག །བླ་མ་དགེ་བའི་བཤེས་གཉེན་ཚོས། ཆོས་འཆད་ཉན་སྐབས་སུ་བརྟག་དགོས་རེད་མ་གཏོགས། བདུད་ཀྱི་བཤེས་གཉེན་ཞེས་པ་མགོ་ལ་རྭ་སྐྱེས་འདུག་ཡོད་པ་ཞིག་ལོགས་སུ་ཡོད་པ་མ་རེད། རང་གི་སློབ་མ་ཚོ་ལོག་པའི་ལམ་དུ་ཁྲིད་འགྲོ་ན། བདུད་ཀྱི་བཤེས་གཉེན་ཆགས་སོང་བ་རེད། དེ་སོགས་འཆད་པའི་སྐབས་སུ་བསམ་བློ་གཏོང་དགོས་པ་མང་པོ་འདུག །རྩོད་པའི་སྐབས་སུ། དམ་བཅའ་འདུག་པ་ཡིན་ན། གཞན་སྟོང་བགྲོ་གླེང་ལྟ་བུ་དམ་བཅའ་ཁག་འཚོགས་ཡོང་དུས། ཆོས་ཀྱི་གནད་དྲིལ་བ་ཞིག་དང༌། གྲུབ་མཐའ་སྤྱི་དང་གཞུང་སྤྱིའི་བབ་དང་མཐུན་པའི་དཀའ་གནས་ཤིག་གི་ཐོག་ནས་རྟགས་གསལ་གཏོང་དགོས་པ་རེད་མ་གཏོགས། ངག་སྒོ་ཡངས་པ་ཙམ་གྱི་སྒོ་ནས། ཡིན་ཏེ། མིན་ཏེ། ཟེར་བ་ཙམ་ཆོས་ར་ནས་བསྡུས་གྲྭ་ཅུང་ཙམ་སྦྱངས་ཟིན་པ་ཡིན་ན་དངོས་འགལ་ཞིག་གཏོང་ཐུབ་ཀི་ཡོད་པ་རེད། དཔེར་ན། ནས་ཀྱི་རྩམ་པ་ཆོས་ཅན། རྩམ་པ་ཡིན་ཏེ། ཟེར་ན་རྟགས་འགོད་དཀའ་བ་དང༌། མེ་ཡིན་ན་ཚ་བ་ཡིན་དགོས་ཏེ་ཟེར་ན་ཡང་རྟགས་འགོད་ཁག་པོ་འདྲ་ཆགས་རྒྱུ་རེད་དེ། དེ་འདྲ་ཞིག་ལ་གནད་འགག་བཏང་ཟེར་བ་མ་རེད། འཇིག་རྟེན་གྱི་ཁ་དཔེར། ཉི་མ་འགྲོ་ཐབས། ཐང་མ་སྐམ་ཐབས། ཟེར་བ་ལྟ་བུ་ཞིག་ཡོང་གི་ཡོད་པ་རེད། ངག་སྒོ་ཡངས་བ་རེ་ཡིན་ན། སྐད་མཐོན་པོ་ཅན་ཚོས་མཆོང་ལྡིང་བྱས་འདུག་ན། ཚང་མས་མཁས་པ་རེད་ཟེར་བ་ཞིག་ཡོང་གི་ཡོད་ན་ཐང་སྟེ། དོན་གྱི་མཁས་པ་དེ་ཡོང་ཐུབ་ཀི་མི་འདུག །གདན་ས་ཁག་ཏུ་འདི་འདྲ་ཞིག་རེད། ཚང་མས་འཚང་ཁ་མི་རྒྱབ་པར། དཔེ་ཆ་ཡག་པོ་ཅན། གོ་རྒྱུ་ཡོད་པར་གཏོང་མཁན་ཚོས་དོགས་དཔྱོད་ཡག་པོ་གཏོང་དུས་ཚང་མས་དེ་ལ་གསན་ནས། དེ་ལ་རྟགས་གསལ་གཏོང་དུ་འཇུག་གི་ཡོད་པ་རེད། དེ་ལས་གཞན། ཡིན་ཏེ། མིན་ཏེ། ཟེར་ནས་དངོས་འགལ་ཙམ་གཏོང་བ་ལ། ཉི་མ་འགྲོ་ཐབས་ཙམ་ལས་ཕན་པ་ཆེན་པོ་ཡོད་པ་མ་རེད། དེས་ན་ངས་གང་ཞུ་གི་ཡོད་ཞུ་ན། རྩོད་པ་རྩོད་པའི་སྐབས་སུ། ལུང་རིགས་ཀྱི་རྒྱབ་ལྗོངས་ཡོད་པའི་སྟེང་ནས། གཞུང་སྤྱིའི་བབ། གྲུབ་མཐའ་སྤྱིའི་བབ། མདོར་ན། ཆོས་གཞུང་གི་དཀའ་གནས་ཤིག་གོང་འོག་བསྒྲིགས་ཏེ། འདི་འདྲའི་མཁས་དབང་མང་པོ་འཛོམས་ས་དེ་རྩོད་པ་རྩོད་དགོས་ཀི་འདུག་ཞུས་པ་ཡིན། རྟོགས་པའི་བསྟན་པ་ཡིན་ན། སྤྱིར་བསླབ་པ་གསུམ་གྱི་ཉམས་ལེན་དང༌། ཡང་དགོས་སུ་དཔལ་ལྡན་རྒྱལ་བ་ཇོ་ནང་པར་མཚོན་ན། དུས་འཁོར་གྱི་སྒྲུབ་བརྒྱུད་དེ་ཧ་ཅང་ཡག་པོ་ཞིག་ཡོད་པ་རེད། སྤྱིར་བཏང་ཡིན་ན། བཤད་སྒྲུབ་གཉིས་པོ་འགལ་མེད་གྲོགས་སུ་བརྟེན་ནས་འགྲོ་དགོས་པ་རེད། གང་ཤེས་པ་དེ་སྒོམ། གང་མ་ཤེས་ པ་དེ་ཐོས་བསམ་བྱེད་རྒྱུ་ཧ་ཅང ་གལ་ཆེན་པོ་རེད། མི་ཚེ་ཐུང་ཐུང་ཞིག་ལ་ཐམས་ཅད་ཤེས་མི་ཐུབ་ན་ཡང༌། བློ་ལྡོག་རྣམ་བཞི་ཡིན་ན་འདྲ། གང་སྒོམ་དགོས་ན་དེ་ལ་སློབ་སྦྱོང་དགོས་པ་རེད། ལས་འབྲས་ལ་ཡིད་ཆེས་ཡོད་པའི་སྟེང་ནས། ཟག་བཅས་ཉེར་ལེན་གྱི་ཕུང་པོ་འདི་མི་རྟག་པ་ཡིན་པར་ཤེས། སྡུག་བསྔལ་བ་དེ་སྡུག་བསྔལ་བ་ཡིན་པར་ཤེས་ཏེ། འཆི་བ་མི་རྟག་པའི་བློ་རྒྱུད་ལ་སྐྱེས་སོང་བ་ཡིན་ན། ཆོས་མ་བསྒྲུབ་རང་བསྒྲུབ་ཡིན་པ་ཆགས་འདུག་ཡོད་པ་རེད། ལས་འབྲས་ལ་ཡིད་ཆེས་ཡོད། རྒྱུ་མི་དགེ་བ་བྱས་པ་ལས། འབྲས་བུ་སྡུག་བསྔལ་བ་འབྱུང༌། དགེ་བ་བྱས་པ་ལས་འབྲས་བུ་བདེ་བ་འབྱུང་གི་ཡོད་པ་རེད། སྡུག་བསྔལ་ནི་མི་འདོད། བདེ་བ་ནི་འདོད་པ་དེ་ཆགས་ཡོད་པ་རེད། ཡུན་རིང་པོ་ཞིག་ལ་བསྡད་དབང་མེད་པར་འཆི་བ་མི་རྟག་པ་ཡིན་པར་ཧ་གོ་འདུག་ཡོད་པ་རེད། དེ་འདྲ་ཞིག་ལ་བསམ་བློ་གཏོང་ཡོང་ན་ད་གཟོད་ང་ཚོས་ཆོས་མ་བསྒྲུབ་རང་བསྒྲུབ་ཡིན་པ་རང་གོ་རང་ལ་འཕྲོད་ཡོང་གི་རེད། མདོར་ན། ཐོས་བསམ་སྒོམ་གསུམ་གྱི་བསྟན་པ་བཤད་སྒྲུབ་གཉིས་པོ་འགལ་མེད་དུ་བཟུང་དགོས་པ་རེད། སློབ་གཉེར་བ་རྣམ་པ་ཡིན་ན་ཡང༌། གང་ལ་གང་འཚམ་གྲྭ་ས་ཁག་ཏུ་ཡང་གྲྭ་སར་འགྲོ་དགོས་པ་རེད། དིང་སང་གྲྭ་རྐྱང་ཚོ་ཉམ་ཆུང་བ། ཁེ་དབང་མེད་པ། བཤད་དབང་མེད་པ། འགྲོ་དབང་འདུག་དབང་མེད་པ། ཐ་ན་དཔེ་ཆ་ཞིག་ལྟ་འདོད་ཀྱང་ལྟ་དབང་མེད་པ་ལྟ་བུ་ཞིག་ཆགས་འདུག །དཔེ་ཆར་ལྟ་བའི་དུས་ཚོད་དེ་ཕལ་ཆེར་ལོ་བཅོ་ལྔ་ནས་ཉི་ཤུའི་ནང་བར་ཙམ་ལས་ཡོང་གི་ཡོད་པ་མ་རེད། དེ་འདྲའི་དུས་ཚོད་རྩ་ཆེན་པོ་ཞིག་ཁོར་ཡུག་ཆུང་ས་ཞིག་ལ་འདུག་བཞག་པ་ཡིན་ན་གྱོང་གུད་རེད། འཛམ་གླིང་གི་སློབ་གྲྭ་ཆེ་ཆུང་གང་ཡིན་ན། དང་པོ། སློབ་ཆུང་ལ་འགྲོ་དགོས་པ་དང༌། དེ་ནས་སློབ་འབྲིང༌། དེ་ནས་སློབ་ཆེན་དང་ཞིབ་འཇུག་སློབ་མར་འགྲོ་གི་ཡོད་པ་རེད། རབ་བྱུང་ན། ཕྱི་རྒྱལ་གྱི་སློབ་གྲྭ་ཆེ་ཁག་ཏུ་ཡང་སློབ་སྦྱོང་ལ་འགྲོ་གི་ཡོད་པ་དེ་ཚང་མར་མཁྱེན་གསལ་ལྟར་རེད། དེས་ན། བླ་མ་རེ་ཟུང་གིས། རང་གི་འཁོར་གཡོགས་ཙམ་གྱི་ཆེད་དང༌། རང་གི་བསམ་བློ་ཙམ་ལ་ཤེས་རྟོགས་བཅོལ་ནས། ཚེ་འདི་ཕྱིའི་རེ་ལྟོས་འཆའ་བའི་སློབ་མ་ཚོའི་མི་ཚེ་འཕྲོ་བརླག་བཏང་བཞག་པ་རྣམས་ཧ་གོ་ན་དངོས་གནས་ཡིད་མི་བདེ་བ་ཡོང་གི་འདུག །དཔེར་ན། ན་ཆུ་ལྟ་བུའི་ཆུ་ཆུང་ངུ་ཞིག་ཏུ་ཉ་ཆེན་པོ་ཞིག་ཡོང་མི་ཐུབ་པ་དང༌། རྒྱ་མཚོ་དང་ཆུ་ཆེན་པོའི་ནང་དུ་ཉ་ཆེན་པོ་ཡོང་གི་ཡོད་པ་ནང་བཞིན་རེད། རང་དགོན་གཅིག་པུར་བསྡད་ནས་མཁས་པ་ཆེན་པོ་ཆགས་སོང་བའི་ལོ་རྒྱུས་མེད་པ་ལྟ་བུ་ཞིག་རེད། སྤྱིར་བཏང༌། དགོན་པ་ཆུང་ཆུང་ཚོར་གྲྭ་སར་མངག་ན་རང་དགོན་དུ་བཤད་གྲྭ་འཛིན་མི་ཐུབ་པའི་དཀའ་ངལ་ཡོང་གི་རེད་དེ། གསེར་ནག་གི་ཕུལ་ཁ་མི་ལྟ་བར། རམ་ནག་གི་བྲེ་ཁ་ལྟ་སོང་བ་ཡིན་ན། ཅུང་འགྲིག་གི་མེད་པ་ཨེ་ཡིན་བསམས་ནས་ཅིག་ཞུས་པ་དེ་ཡིན། ཞེས་སོགས་གནད་དུ་སྨིན་པའི་བཀའ་སློབ་ཏུ་མ་ལྷུག་པོར་བསྩལ་ལོ། །བོད་ཟླ་བདུན་པའི་ཚེས་ཉེར་བདུན་གྱི་དགོང་མོར། གངས་ལྗོངས་རིས་མེད་ལྔ་རིག་མཐོ་སློབ་ཀྱི་སྐབས་གསུམ་པའི་མདོ་སྔགས་རབ་འབྱམས་པའི་དགེ་བཤེས་དམ་བཅའ་ཆེན་མོ་བཞག་ཅིང༌། སྐབས་དེར། ཉིན་ཡུལ་དགོན་ལུང་རྟོགས་རྒྱ་མཚོ། ཇོ་ནང་བསེ་དགོན་ཀུན་ཆོས། རྒྱལ་རོང་ཁང་སར་དགོན་དཀོན་མཆོག་བསྟན་འཛིན། རྒྱལ་རོང་ཛ་འགོ་དགོན་འོད་ཟེར། རྒྱལ་རོང་དར་སྐུ་དགོན་བསྟན་འཕེལ། མདོ་སྨད་ཇོ་ནང་གི་རྩ་བའི་འབྱུང་གནས་ཛཾ་ཐང་ཆོས་རྗེ་དགོན་མཐར་ཕྱིན་དཔལ་བཅས་ལ། འདེམས་ཐོན་ལྟར་མཁན་པོར་མངའ་གསོལ་མཛད། བོད་ཟླ་བརྒྱད་པའི་ཚེས་གཉིས་ལ། ཁྲིན་ཏུའུ་གྲོང་ཁྱེར་དུ་གྲྭ་ཇོ་སྔགས་གསུམ་གྱི་ཀུན་སྤྱོད་ཡར་སྐུལ་གྱི་བགྲོ་གླེང་སྟེང་དུ་ཕེབས་ནས། ཕྱི་ཉིན་མི་ལ་དགོས་པ་སྤྱོད་ཤེས་གཉིས་ཞེས་པའི་བརྗོད་གཞིའི་སྟེང་ཀུན་སྤྱོད་ཡར་སྐུལ་གྱི་གསུང་བཤད་གྱ་ནོམ་པ་གནང༌། ཚེས་བརྒྱད་པའི་ཉིན་སྔ་འགྱུར་རྙིང་མའི་གདན་ས་དྲུག་གི་དཔལ་ཡུལ་དགོན་ཆེན་གྱི་ནང་བསྟན་མཁས་དབང་བགྲོ་གླེང་མཐུན་ཚོགས་ཐེངས་དགུ་བའི་ཉིན་གཉིས་པའི་དགོང་མོར་གདན་ས་དེ་ཉིད་དུ་ཆིབས་བསྒྱུར་བསྐྱངས་ནས་ཆོས་རར་ཕེབས་ཏེ། གཞན་སྟོང་དབུ་མ་ཆེན་མོ་རྣམ་པ་ཀུན་ལྡན་དུ་དམ་བཅའ་མཛད་པ་ལ་ས་དགེ་བཀའ་རྙིང་གི་མཁས་དབང་རྣམ་པས་དོགས་འདྲི་དང་བརྒལ་བརྟག་གནང་བར་ཀུན་མཁྱེན་ཡབ་སྲས་སོགས་ཀྱི་དགོངས་པ་ཇི་བཞིན་དུ་ལན་གནང་ནས་གཞན་སྟོང་དབུ་མ་ཆེན་མོའི་སེངྒེའི་ངར་སྒྲ་བསྒྲགས་ཤིང༌། ཕྱི་ཉིན་ཡང་མཁས་པ་མཁས་པའི་ཁྲོད་ན་མཛེས་གསུངས་པ་བཞིན། མཁས་པ་ཕན་ཚུན་བར་གྱི་བགྲོ་གླེང་དྲི་མ་མེད་པའི་དུས་འདའ་བར་བྱས། ཚེས་བཅུ་ཐམ་པའི་ཉིན། གཞན་སྟོང་སྤྲོས་བྲལ་གྱི་དབྱིངས་རིག་ཡིན་པ་ཞེས་པའི་བརྗོད་གཞིའི་སྟེང་སྐར་མ་སུམ་ཅུའི་རིང་ལྟ་གྲུབ་དཔྱད་གླེང་དང༌། དེའི་རྗེས་སུ་སྐར་མ་སུམ་ཅུའི་རིང་རིས་མེད་མཁས་དབང་རྣམ་པས་ལུང་རིགས་ཀྱིས་བརྒལ་བརྟག་གནང་བ་ལ། སྐབས་བབ་ཀྱི་དྲིས་ལན་དང༌། བཅར་འདྲི་བྱས་པར། མ་འོངས་པར་གང་དྲན་དྲན་དུ་ལུང་དོན་མི་འཇོག་པར་ལུང་རྩ་ཆེན་བྱེད་རྒྱུ་གལ་ཆེན་པོ་ཡིན་པ་སོགས་ཀྱིས་བཀའ་སློབ་ལྷུག་པོར་བསྩལ། ཚེས་བཅུ་གཅིག་ཉིན་མདོ་སྟོད་དགུན་ཆོས་ཐེངས་ཉི་ཤུ་རྩ་གཅིག་པ་འབྲོམ་དགོན་དུ་ཚོགས་པར་ཕེབས་ཏེ། ཉིན་དེ་དང་ཕྱི་ཉིན་གཉིས་ཀྱི་སྲོད་ཆོས་དམ་བཅའ་ཆེན་མོའི་སྐབས་སུ། ལུང་རིགས་ཀྱི་བརྒལ་བརྟག་དང༌། མི་མང་ལ་བཀའ་སློབ་དང་ནང་ཆོས་ངོ་སྤྲོད་གནང༌། ཚེས་བཅུ་དྲུག་གི་ཉིན་གདན་ས་ཆེན་པོ་དཔལ་ལྡན་འབྲས་དཀར་སྤུངས་ནས་བཀའ་བཅུའི་མཚན་གནས་བསྩལ་ཞིང༌། གངས་ཅན་ཆོས་རིག་ལ་ཕྱིས་རྗེས་འཛད་མེད་བསྐྲུན་པར་གདན་སའི་ལས་འཛིན་མཁན་རིན་པོ་ཆེ་སོགས་ཀྱིས་ཆེད་བསྔགས་ཀྱི་ཕྲེང་བ་དུ་མའི་འཕྲིན་བཟང་བསྟུད་མར་བྱུང༌། བོད་ཟླ་དགུ་བའི་ཚེས་བཅུ་བཞིའི་ཉིན་ལོ་དེར་ཕར་ཕྱིན་མཐར་ཕྱིན་གྱི་མི་བཞི་བཅུ་རྩ་གཉིས་ཀྱིས་གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་གི་ཕར་ཕྱིན་དམ་བཅའ་ཆེན་མོ་ཐེངས་དགུ་བའི་མཚན་ཕུད་བཞག །ཚེས་ཉི་ཤུ་གཉིས་ལ་གདན་ས་ཆེན་པོ་དཔལ་ལྡན་འབྲས་དཀར་སྤུངས་སུ་དགེ་བཤེས་གཏོང་སྒོའི་གྲྭ་ཇ་བསྐོལ་ཞིང༌། ཡུལ་དགོན་དུ་མཆོད་མེ་ཁྲི་མཆོད་ལྷག་དང༌། གངས་ལྗོངས་རིས་མེད་མཐོ་སློབ་ནས་ཉིན་དེ་ནས་བཟུང་ཞག་ལྔ་ལ་སྐྱ་སེར་རིས་སུ་མ་མཆིས་པར་ཐེག་པ་ཆེན་པོའི་བསྙུང་གནས་ཀྱི་སྡོམ་པ་གནང་ལ། སྐབས་དེར་ཐེག་ཆེན་གསོ་སྦྱོང་གི་ཆོ་གའི་ཚིག་དོན་དང་ཕན་ཡོན་མདོར་བསྡུས་ཞེས་པ་དེ་ཉིད་བརྩམས། ཚེས་ཉེར་ལྔའི་ཉིན་བསེ་དགོན་རིས་མེད་མ་ཎི་ཆོས་ཚོགས་སྟེང་ནས་མི་མང་ལ་བཀའ་སློབ་ལམ་སྟོན་དང༌། སྐྱབས་སྡོམ་དང་སྐྱབས་འགྲོའི་བསླབ་བྱ་བཅས་ཀྱི་བཀའ་དྲིན་ཉེ་བར་བསྐྱངས། ཚེས་ཉེར་དྲུག་ཉིན་གང་གི་ཞབས་ཟུང་བསྟན་འགྲོའི་ཉེར་འཚོའི་དཔལ་དུ་གྱུར་བ་དེ་ཉིད་རྒྱལ་རོང་ཁང་སར་དགོན་དུ་ཉེ་བར་བཀོད་དེ། ཕྱི་ཉིན་ཞོགས་པར་ཐེག་པ་ཆེན་པོའི་གསོ་སྦྱོང་གི་སྡོམ་པ་དང༌། སྔ་དྲོར་ནང་ཆོས་ངོ་སྤྲོད་དང་བཀའ་སློབ་ལམ་སྟོན་དུ་མ་དང༌། ཕྱི་དྲོར་དགུང་གྲངས་བརྒྱད་ཅུ་རྩ་བརྒྱད་ལ་ཕེབས་པའི་དགོན་དེའི་རྡོ་རྗེ་སློབ་དཔོན་བླ་མ་ཤང་ཐར་སོགས་འདུས་སྤྱི་ལ་ཚེ་དཔག་མེད་ལྷ་གཅིག་བུམ་གཅིག་གི་དབང་བཅས་གནང༌། དེ་ནས་ཚེས་ཉེར་བརྒྱད་ལ་རྒྱལ་རོང་ཙག་དགེ་བ་དགོན་དུ་ཕེབས་ནས་མི་སྡེ་ཡོངས་ལ་ཆོས་འབྲེལ་ཟབ་མོ་དང་བཀའ་སློབ་རྒྱ་ཆེར་མཛད། ཚེས་ཉེར་དགུ་དང་ནམ་གང་གཉིས་ལ་པཱ་ལ་དགོན་དུ་རྒྱལ་རོང་བདེ་ཆེན་ཞིང་སྒྲུབ་ཆེན་མོའི་སྟེང་ནས། སྦྱོར་དངོས་རྗེས་གསུམ་དང༌། སྐྱབས་འགྲོ། བདེ་བ་ཅན་གྱི་རྒྱུ་ཚོགས་སྒྲུབ་ཚུལ་སོགས་ཆོས་ཁྲིད་དུ་མ་དང༌། བོད་རང་གི་སྤྱི་སྐད་གལ་ཆེ་ཚུལ་སོགས་ཆོས་དང་སློབ་སྟོན་དུ་མ་མཛད་ཅིང༌། གནམ་གང་གི་ཕྱི་དྲོར་ཛ་འགོའི་རི་ཁྲོད་དང་དགོན་དེའི་གྲྭ་མང་གིས་གཙོས། དད་ལྡན་མི་སྐྱ་འདུས་པ་ཡོངས་ལ་ངན་སོང་ཐམས་ཅད་རྣམ་པར་སྦྱོང་བ་རྒྱལ་བ་མི་འཁྲུགས་པ་ལྷ་དགུའི་དབང་བསྐུར་ཟབ་མོའི་བཀའ་དྲིན་བླ་ན་མེད་པ་བསྐྱངས་ཤིང༌། རྡོ་རྗེ་སློབ་དཔོན་ཆེན་པོ་བླ་མ་རྟོགས་ལྡན་མཆོག་དང་མཇལ་འཕྲད་གསུང་གླེང་གནང་ཞིང༌། ཐུགས་མཐུན་དག་གི་མོས་གུས་འཕེལ་བའི་རྐྱེན་ལས། བཤེས་གཉེན་རིན་པོ་ཆེ་ཕེབས་ཁར་བླ་མ་རྟོགས་ལྡན་རིན་པོ་ཆེ་བཤུམས་ནས་འབྲལ་མི་ཕོད་པ་ལྟ་བུར་མཛད། བླ་མ་གང་ཉིད་ནི་སྤྱིར་བཏང་རྟོགས་ལྡན་འཇིག་རྟེན་དང་མི་མཐུན་པའི་དཔེ་ལྟར། ཐུགས་སུ་དྲན་པ་ཤར་མར་གསུང་པ་ལས་བཅའ་བཅོས་གཏན་མི་གནང་པ་ཡིན་པ་ལ། ཛམ་ཐང་གཙང་བ་དགོན་དུ་མདོ་སྔགས་སློབ་གླེང་གསར་འཛུགས་བསྐོར་ཞིག་ལ་ཐོག་མར་མཇལ་སྐབས་ཀྱང༌། འཕྲད་མ་ཐག་ཐུགས་སྣང་འདྲེས་ཏེ་བཤུམ་པ་འབའ་ཞིག་མཛད་ཅིང༌། བཤེས་གཉེན་དམ་པ་གང་ཉིད་ཕེབས་ཤུལ་ནས་སློབ་མ་འགའ་རེར། ཁོ་བོས་ཚང་མའི་ཁ་ནས་དགེ་བཤེས་སང་ཟེར་ནས་མང་པོ་ཞིག་གླེང་འདུག་དུས། འདི་ཚོ་ཁ་མཁས་ལྕེ་མཁས་ཤིག་ཡིན་རྒྱུ་རེད་བསམ་པ་ལས། བླ་མ་འདི་འདྲ་ཁྱད་པར་བ་ཞིག་ཡིན་སྣང་མ་ཤར་ཞེས་ཐུགས་མོས་ཁྱད་པར་ཅན་མཛད་ཅིང༌། ཕྱིས་སུ་ཡང་འཚམ་རྟགས་སོགས་སྐབས་དང་སྐབས་སུ་བསྐུར་མ་མང་དུ་མཛད། ཉིན་དེའི་ནུབ་མོར་རྔ་ཡུལ་བསེ་དགོན་དུ་གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཆེན་མོར་གནོད་པ་མེད་པར་ཕེབས་སོ། །

ཁྲི་གདུགས་ཉ་གང་གཅིག་གི་སྣང་བ་ཡིས། །

གླིང་བཞིའི་ཁྱོན་ལ་ངལ་མེད་བསྐོར་བ་ལྟར། །

རླབས་ཆེན་སེམས་དཔའ་གཅིག་གི་ཕྱག་ལས་ཀྱིས། །

སེམས་སྟོར་དྭ་ཕྲུག་འབུམ་ལ་བློ་གྲོས་བསྩལ། །

སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་རྒྱལ་བསྟན་རིས་མེད་བགྲོ་གླེང་ཆེན་མོ་ཐེངས་དང་པོ་དབུ་ཚུགས་པའི་བསྐོར་སོགས་ལོ་ཕྱེད་རིང་གི་རྣམ་ཐར་མདོར་བསྡུས་པ་སྟེ་སོ་དྲུག་པའོ། །