བརྒྱད་པ་དེ་བཞིན་ཉིད་དོན་དམ་ཆོས་སྐུའི་གནས་སྐབས་གསུམ་དུ་བཞུགས་ཚུལ།
བརྒྱད་པ་དེ་བཞིན་ཉིད་དོན་དམ་ཆོས་སྐུའི་གནས་སྐབས་གསུམ་དུ་བཞུགས་ཚུལ་ནི།
རྒྱུད་བླ་མ་ལས། དྲི་མ་གློ་བུར་པས་མ་དག་པའི་གནས་སྐབས་དང་ལ་ལས་མ་དག་ལ་ལས་དག་པའི་གནས་སྐབས་དང༌། ། ཤིན་ཏུ་རྣམ་དག་གི་གནས་སྐབས་དང་གསུམ་ལ་གོ་རིམ་བཞིན། །སེམས་ཅན་དང་བྱང་ཆུབ་སེམས་དཔའ་དང༌། ། དེ་བཞིན་གཤེགས་པ་ཞེས་བརྗོད་དོ། །ཞེས་ཆོས་སྐུའི་གནས་སྐབས་གསུམ་གསུངས་ཤིང༌། དེའི་འགྲེལ་པར།ཤཱ་རིའི་བུ་དེའི་ཕྱིར་སེམས་ཅན་གྱི་ཁམས་ཏེ་དབྱིངས་གཞན་ལ་ཆོས་ཀྱི་སྐུ་ཡང་གཞན་པ་ནི་མ་ཡིན་ཏེ། སེམས་ཅན་གྱི་ཁམས་ཉིད་ཆོས་ཀྱི་སྐུ། ཆོས་ཀྱི་སྐུ་ཉིད་སེམས་ཅན་གྱི་ཁམས་ཏེ། འདི་ནི་དོན་གྱིས་གཉིས་སུ་མེད་དེ། ཡི་གེ་ཙམ་ཐ་དད་པ་ཡིན་ནོ། །ཞེས་པའོ། །