གསུམ་པ་རྣམ་དག་ཆོས་ཉིད་ཀྱི་གཟུགས་སོགས་གསུངས་པས་རང་སྟོང་ལས་གཞན་པའི་དོན་དམ་གྲུབ་ཚུལ་ལ་དྲུག།
གསུམ་པ་རྣམ་དག་ཆོས་ཉིད་ཀྱི་གཟུགས་སོགས་གསུངས་པས་རང་སྟོང་ལས་གཞན་པའི་དོན་དམ་གྲུབ་ཚུལ་ལ་དྲུག
དང་པོ་རྣམ་དག་ཆོས་ཉིད་ཀྱི་གཟུགས་སོགས་མདོར་བསྟན་པ་ནི། རྣམ་གྲངས་མང་པོ་ཅན་སྟོང་གཞི་དེ་བཞིན་ཉིད་ནི་ཆོས་གློ་བུར་བ་ཐམས་ཅད་ཀྱིས་གདོད་ནས་སྟོང་ཞིང་དབེན་ལ་དག་པའི་གཞི་ཡིན་པ་ཉིད་ཀྱི་ཕྱིར་གཟུགས་དང༌། གཟུགས་ནས་སངས་རྒྱས་ཀྱི་ཆོས་ཀྱི་མཐར་ཐུག་པ་ངོ་བོ་ཉིད་གསུམ་དུ་ཕྱེ་ནས་ཚན་པ་གསུམ་གསུངས་པ་ལས་ཆོས་ཉིད་ཡོངས་གྲུབ་ཀྱི་གཟུགས་སོགས་དང་ཁམས་གསུམ་དང་དུས་གསུམ་ལས་འདས་པའི་གཟུགས་སོགས་ཀྱང་ཡིན་ཏེ། དཔལ་ཀྱེའི་རྡོ་རྗེར། ངེས་པར་དངོས་པོ་ཐམས་ཅད་ཀྱི། །གདོད་ནས་རང་བཞིན་གྱིས་དག་པ་དེ་བཞིན་ཉིད་དུ་བརྗོད་དེ་སྤྱིར་བསྟན་པའོ། །ཕྱི་ནས་བྱེ་བྲག་ཏུ་བཤད་པ་ནི་གཟུགས་ཀྱི་དེ་བཞིན་ཉིད་སངས་རྒྱས་རྣམ་སྣང་མཛད་ཅེས་པ་ལ་སོགས་པ་རེ་རེའི་དབྱེ་བ་ཡིས། ། ལྷ་རྣམས་ཀྱི་དག་པ་ནི་བརྗོད་པར་བྱ། །ཞེས་གང་གསུངས་པའོ། །དེ་བཞིན་དུ་དེ་དང་དོན་གཅིག་པར་རྗེ་བཙུན་བྱམས་མགོན་གྱི་ཞལ་སྔ་ནས་ཀྱང༌། དྲི་མ་གློ་བུར་བ་བྲལ་བའི་འབྲས་བུ་དག་པ་གང་ཡིན་པ་དེ་ཉིད་གཟུགས་ལ་སོགས།། གདོད་ནས་དག་པ་ཉིད་དེ་གང་གི་ཕྱིར། །དག་པ་དེ་གཉིས་ངོ་བོ་ཐ་དད་མ་ཡིན་ཞིང༌། །གཅད་དུ་མེད་པས་གདོད་ནས་རང་བཞིན་གྱིས་དག་པར་བརྗོད། །ཅེས་དག་པ་གཅིག་ལྡན་དང་གཉིས་ལྡན་གྱི་དག་གཞིའི་ངོ་བོ་གཅིག་པར་གང་གསུངས་པ་རྒྱལ་བའི་ཡུམ་དུ། རབ་འབྱོར་འགོག་བདེན་གྱི་གཟུགས་གདོད་ནས་རང་བཞིན་གྱིས་རྣམ་པར་དག་པ་གང་ཡིན་པ་དེ་ནི་དྲི་མ་གློ་བུར་བ་བྲལ་བའི་འབྲས་བུ་གདོད་ནས་རང་བཞིན་གྱིས་རྣམ་པར་དག་པའོ། །ཞེས་སོགས་འགོག་བདེན་གྱི་རྣམ་མཁྱེན་གྱི་བར་དུ་སྦྱར་བ་དང༌། འགོག་བདེན་གྱི་གཟུགས་གདོད་ནས་རང་བཞིན་གྱིས་ཡོངས་སུ་དག་པ་གང་ཡིན་པ་དེ་ནི་འགོག་བདེན་གྱི་ཤེས་རབ་ཀྱི་ཕ་རོལ་ཏུ་ཕྱིན་པ་གདོད་ནས་རང་བཞིན་གྱིས་ཡོངས་སུ་དག་པ་ཤེས་རབ་ཀྱི་ཕ་རོལ་ཏུ་ཕྱིན་པ་གདོད་ནས་རང་བཞིན་གྱིས་ཡོངས་སུ་དག་པ་གང་ཡིན་པ་དེ་ནི་འགོག་བདེན་གྱི་གཟུགས་གདོད་ནས་རང་བཞིན་གྱིས་ཡོངས་སུ་དག་པ་སྟེ། དེ་ལྟར་ན་འགོག་བདེན་གྱི་གཟུགས་གདོད་ནས་རང་བཞིན་གྱིས་ཡོངས་སུ་དག་པ་དང༌།འགོག་བདེན་གྱི་ཤེས་རབ་ཀྱི་ཕ་རོལ་དུ་ཕྱིན་པ་གདོད་ནས་རང་བཞིན་གྱིས་ཡོངས་སུ་དག་པ་འདི་ལ་གཉིས་སུ་མེད་དེ་གཉིས་སུ་བྱར་མེད་སོ་སོ་མ་ཡིན་ཐ་མི་དད་དོ། །ཞེས་སོགས་འགོག་བདེན་གྱི་རྣམ་མཁྱེན་གྱི་བར་དུ་སྦྱར་བ་ལ་སོགས་པས་རབ་ཏུ་རྒྱས་པར་གསུངས་སོ། །དེ་ལ་རྣམ་པར་དག་པ་ནི་གཉིས་ཏེ།ལམ་ལ་མི་ལྟོས་པར་རང་བཞིན་གྱིས་གདོད་ནས་དག་པ་དང༌། དྲི་མ་གློ་བུར་བ་ལམ་གྱིས་བཅོམ་ན་ས་དག་པའོ། །གདོད་ནས་རང་བཞིན་གྱིས་དག་པ་ལ་ཡང༌། གང་གིས་དག་པ་ནི་ཀུན་བརྟགས་གཞན་དབང་གང་ཡིན་པ་ཀུན་རྫོབ་ཀྱི་གཟུགས་ལ་སོགས་པས་དག་པ་སྟེ། ཆོས་དེ་རྣམས་ནི་གཤིས་ཀྱི་གནས་ལུགས་ལ་མོ་གཤམ་གྱི་བུ་ལྟར་གཏན་ནས་མེད་ཅིང་སྣང་བ་ཙམ་དུ་ཡང་མ་གྲུབ་པའི་ཕྱིར་རོ། །དེ་རྣམས་ཀྱིས་དག་པའི་གཞི་དོན་དམ་ཆོས་ཉིད་ཀྱི་གཟུགས་ལ་སོགས་པ་ནི་ནམ་ཡང་མེད་པ་མ་ཡིན་ཏེ།ཀུན་རྫོབ་ཀྱི་དེ་བཞིན་གཤེགས་པ་རྣམས་འཇིག་རྟེན་དུ་བྱོན་ཡང་རུང་མ་བྱོན་ཡང་རུང་འགྲོ་བ་རྣམས་ཀྱིས་རིག་ཀྱང་རུང་མ་རིག་ཀྱང་རུང་སྟེ། དེ་རྣམས་ནི་རྣམ་པར་དག་པའི་གཟུགས་ལ་སོགས་པར་རྟག་ཏུ་བཞུགས་ཤིང་།དེ་ཡང་དོན་དམ་ཡེ་ཤེས་ཀྱི་ལྷ་ཚོགས་མཁའ་ཁྱབ་རྣམས་སུ་བཞུགས་པའི་ཕྱིར་རོ། །