གཉིས་པ་སྟོང་གཞི་གང་ཡིན་དོན་དམ་གྱི་ལྷ་དང་སྙིང་རྗེ་ལ་སོགས་པར་བཞུགས་ཚུལ།
གཉིས་པ་སྟོང་གཞི་གང་ཡིན་དོན་དམ་གྱི་ལྷ་དང་སྙིང་རྗེ་ལ་སོགས་པར་བཞུགས་ཚུལ་ནི།
རྒྱུད་སྡེ་རིན་པོ་ཆེ་རྣམས་སུ། སྟོང་ཉིད་བཅུ་དྲུག་ཀ་བ་མཁའ་ཁྱབ་རྣམས་ཞེས་དང་པོའི་སངས་རྒྱས་སུ་གསུངས་པ་དང༌། ཕྱག་ནི་སྟོང་པ་བཅུ་དྲུག་ཉིད། །ཅེས་ཀྱེའི་རྡོ་རྗེར་གསུངས་པ་དང༌། གཞན་ཡང༌། འཁོར་ལོ་སྡོམ་ཆེན་དུ་སྙིང་པོའི་པད་འདབ་བཅུ་དྲུག་དང༌། ཕྱིའི་དུར་ཁྲོད་བཅུ་དྲུག་དང༌། རྒྱུད་མང་པོར་དཀྱིལ་འཁོར་གྱི་ཕྱི་རོལ་གྱི་ཆ་བཅུ་དྲུག་ལ་སོགས་པས་སྟོང་ཉིད་བཅུ་དྲུག་བསྟན་པར་གསུངས་པ་རྣམས་ནི། ཨེ་ཡིག་དང་ཆོས་འབྱུང་དང་བྷ་ག་དང་མཁའ་ཁམས་དང་སེང་གེའི་ཁྲི་ལ་སོགས་པའི་དོན་ཡིན་པའི་ཕྱིར་རང་སྟོང་དངོས་པོ་མེད་པ་སྟོང་བ་ཉིད་དང་སྟོང་བའི་སྟོང་པ་ཉིད་ལ་དགོངས་པ་མ་ཡིན་གྱི་སྟོང་གཞི་དོན་དམ་རང་བཞིན་གྱི་རིགས་དངོས་པོ་མེད་པའི་ངོ་བོ་ཉིད་སྟོང་པ་ཉིད་དང་གཞན་གྱི་དངོས་པོ་སྟོང་པ་ཉིད་དང༌། མི་སྟོང་བའི་སྟོང་པ་ཉིད་ལ་རྣམ་པའི་སྒོ་ནས་བཅུ་དྲུག་ཏུ་ཕྱེ་བ་ཡིན་ནོ། །འདི་རྣམས་ཀྱི་དོན་ཇི་ལྟ་བ་བཞིན་རྟོགས་པ་ལ་ཕྱི་ནང་ཀུན་རྫོབ་འདི་ལས་གཞན་མཆོག་ཕ་རོལ་ཆོས་ཉིད་རྣམ་པ་ཐམས་ཅད་པའི་དོན་འགལ་འདུས་སྐྱོན་མེད་ལེགས་པར་རྟོགས་དགོས་སོ། །