གསུང་འབུམ་པོད་གཉིས་པ། དབུ་མ།

བརྒྱད་པ་དོན་དེ་དག་ཡུམ་རྒྱས་འབྲིང་ལ་སོགས་པའི་དགོངས་པ་ཡིན་པར་བསྟན།

ཡུམ་རྒྱས་པ་དང་བར་མ་དང་ཁྲི་བརྒྱད་སྟོང་པ་རྣམས་ཀྱི་འགྲེལ་པར་ཡང༌། འགོག་བདེན་གྱི་གཟུགས་གདོད་ནས་རང་བཞིན་གྱིས་རྣམ་པར་དག་པ་གང་ཡིན་པ་དེ་ཉིད་གཉེན་པོས་དྲི་མ་བྲལ་བའི་འབྲས་བུ་གདོད་ནས་རང་བཞིན་གྱིས་རྣམ་པར་དག་པའོ། །ཞེས་བྱ་བ་ནི། ལམ་བདེན་གྱི་ཕ་རོལ་ཏུ་ཕྱིན་པ་དང༌། བྱང་ཆུབ་ཀྱི་ཕྱོགས་ལ་སོགས་པ་རྣམ་པར་བྱང་བའི་ཆོས་རྣམས་ཀྱིས་དྲི་མ་བྲལ་བའི་འབྲས་བུར་གྱུར་བ་རྣམ་པར་དག་པ་ཞེས་བྱ་བ་གཞིའི་ངོ་བོ་ལས་གུད་ན་གང་ཡང་མེད་ཀྱི། གང་ཆོས་ཉིད་ཀྱི་གཟུགས་ཡོངས་སུ་གྲུབ་པ་གཞི་འབྲས་ངོ་བོ་དབྱེར་མེད་ཀྱི་ངོ་བོ་ཉིད་ཀྱི་སྐུ་ཉིད་དུ་གྱུར་པ་རྟག་ཏུ་གནས་པ་རྣམ་པར་དག་པ་དེ་ཉིད་དྲི་མ་བྲལ་བའི་འབྲས་བུར་གྱུར་པའི་གདོད་ནས་རང་བཞིན་གྱིས་རྣམ་པར་དག་པའོ། །ཞེས་བྱ་བའི་ཐ་ཚིག་གོ །དེ་བཞིན་དུ་གཞི་འབྲས་ངོ་བོ་དབྱེར་མེད་ཀྱི་ཆོས་ཐམས་ཅད་ལ་ཡང་རང་བཞིན་རྣམ་དག་ཐ་མི་དད་པ་སྦྱར་བར་བྱའོ། །ཞེས་ཀུན་བརྟགས་གཞན་དབང་གི་གཟུགས་སོགས་ཀྱིས་སྟོང་ཞིང་དབེན་ལ་དག་པའི་གཞི། གང་ཡིན་པ་ཆོས་ཉིད་ཡོངས་གྲུབ་ཀྱི་གཟུགས་སོགས་ལ་གདོད་ནས་རང་བཞིན་གྱིས་དག་པའི་དོན་དུ་གསུངས་ཏེ་རྒྱས་པར་འགྲེལ་ཆེན་དེ་ཉིད་ངེས་པར་བལྟ་དགོས་སོ། །