ལྔ་བ་དེ་རྣམས་རང་སྟོང་དང་དོན་གཅིག་ཏུ་དོགས་པའི་མཐའ་མང་པོ་བསལ་བ།
ལྔ་བ་དེ་རྣམས་རང་སྟོང་དང་དོན་གཅིག་ཏུ་དོགས་པའི་མཐའ་མང་པོ་བསལ་བ་ནི།
གལ་ཏེ་རང་སྟོང་དང་ཆོས་ཀྱི་དབྱིངས་རྣམ་གྲངས་མ་ཡིན་ན། དཀོན་མཆོག་བརྩེགས་པར། ཆོས་ཀྱི་དབྱིངས་ཀྱི་རང་བཞིན་དབྱེར་མེད་པར་བསྟན་པའི་མདོར། བཙུན་པ་ཤཱ་ར་དྭ་ཏིའི་བུ་ཀུན་ནས་ཉོན་མོངས་པ་གཞན་དེ་ཡང་ཆོས་ཀྱི་དབྱིངས་ཀྱི་རང་བཞིན་ཉིད་ཡིན་པས་ཀུན་ནས་ཉོན་མོངས་པ་གཞན་དེ་ཉིད་ཆོས་ཀྱི་དབྱིངས་ཀྱི་རང་བཞིན་དུུ་སོ་སོ་རང་རིག་ཡེ་ཤེས་ཀྱིས་ཡོངས་སུ་ཤེས་པ་གང་ཡིན་པ་དེ་ཉིད་རྣམ་པར་བྱང་བ་ཞེས་བྱ་སྟེ་ཞེས་གསུངས་པ་ཇི་ལྟར་དྲང་ཞེ་ན། འདི་ཡང་སྔར་བསྟན་པ་བཞིན་དུ་ཉོན་མོངས་པའི་དེ་བཞིན་ཉིད་དམ། དེ་བཞིན་ཉིད་ཀྱི་ཉོན་མོངས་པ་ལ་དགོངས་ནས་གསུངས་པ་སྟེ། དགོས་པ་ནི་སྔར་བསྟན་པ་བཞིན་ནོ། །དེ་བཞིན་དུ་བློ་གྲོས་མི་ཟད་པས་བསྟན་པའི་མདོར།འགོག་བདེན་དོན་དམ་ཀྱི་ཉོན་མོངས་པ་འདི་དག་སོ་སོ་རང་རིག་ཡེ་ཤེས་ཀྱིས་རྟོགས་པའི་ཕྱིར་བྱང་ཆུབ་སྟེ། འགོག་བདེན་དོན་དམ་ཀྱི་ཉོན་མོངས་པའི་ངོ་བོ་ཉིད་གང་ཡིན་པ་བྱང་ཆུབ་ཀྱི་ངོ་བོ་ཉིད་དེ་ཡིན་ནོ། །ཞེས་དེ་འདི་ལྟ་བུར་དྲན་པ་མངོན་དུ་གཞག་ཀྱང་གང་ལ་ཡང་ཉེ་བར་མི་གཞོག རབ་ཏུ་མི་འཇོག་རྣམ་པར་མི་འཇོགཆོས་ཉིད་དེ་དག་གཤིས་ལ་གནས་པར་རབ་ཏུ་ཤེས་ཏེ། དེའི་ཕྱིར་ཆོས་ཀྱི་དབྱིངས་གཤིས་ལ་གནས་པ་ཞེས་བྱའོ། །ཞེས་གསུངས་པ་ཡང་ཉོན་མོངས་པའི་དེ་བཞིན་ཉིད་ལ་དགོངས་ནས་གསུངས་པ་སྟེ། དགོས་པ་ནི་སྔར་བསྟན་པ་བཞིན་ནོ། །གལ་ཏེ་སྤྱོད་བསྡུས་སྒྲོན་མར༌། དེ་བཞིན་གཤེགས་པ་སྙིང་རྗེ་ཆེན་པོའི་བདག་ཉིད་ཅན་ཐམས་ཅད་ཀྱིས་སེམས་ཅན་ཐམས་ཅད་སྡུག་བསྔལ་གྱི་རྦ་ཀློང་དུ་ལྷུང་བར་གྱུར་ཅིང་སྐྱབས་མེད་པ། དཔུང་གཉེན་མེད་པ་རྣམས་ལ་གཟིགས་ནས། ཀུན་རྫོབ་ཀྱི་ཚུལ་གྱིས་དང་པོར་ཉོན་མོངས་པའི་ངོ་བོ་ཉིད་རང་སྟོང་ཉིད་དུ་ཡོངས་སུ་ཤེས་པས་ཉོན་མོངས་པ་རགས་པ་ཙམ་རྣམ་པར་དག་པར་མཛད་ཅིང༌། དེ་ནས་ཉོན་མོངས་རང་སྟོང་དུ་ཤེས་པ་ཀུན་རྫོབ་ཀྱི་བདེན་པར་གཏོགས་པ་དེ་ཡང་དོན་དམ་པའི་བདེན་པ་མཐོང་བའི་ཡེ་ཤེས་ཀྱིས་རྣམ་པར་སྦྱངས་ནས་ཡང་དག་པའི་ཚུལ་གྱིས་བདག་ཉིད་ཅན་གྱི་ཏིང་ངེ་འཛིན་ལ་ཡང་དག་པར་འཇོག་པར་མཛད་པ་ཡིན་ནོ། །ཞེས་པ་ལ་སོགས་པས་ཉོན་མོངས་པའི་ངོ་བོ་རང་སྟོང་དུ་ཤེས་པ་ཉིད་ཀྱིས་དག་པར་གསུངས་པ་མ་ཡིན་ནམ་ཞེ་ན། དེ་ནི་རེ་ཤིག་ཉོན་མོངས་པ་རགས་པའི་རྩེ་འཇིལ་བའམ་མགོ་གནོན་པ་ལ་དགོངས་པ་སྟེ། མཐར་ནི་ཉོན་མོངས་རང་སྟོང་དུ་ཤེས་པ་ཀུན་རྫོབ་པ་དེ་ཡང་དོན་དམ་པ་མངོན་དུ་བྱེད་པའི་ཏིང་ངེ་འཛིན་མི་རྟོག་ཡེ་ཤེས་ཀྱིས་སྦྱང་དགོས་པར་གཞུང་འདི་ཉིད་ནས་ཀྱང་གསུངས་པའི་ཕྱིར་རོ། །དེ་བཞིན་དུ།ཀྱེའི་རྡོ་རྗེ་ལས་དོན་དམ་གྱི་དངོས་པོ་ངོ་བོ་མཐོང་བ་ཉིད་ཀྱིས་རྣམ་གྲོལ་ཞིང༌། །སྡུག་བསྔལ་ཀུན་འབྱུང་གི་དངོས་པོའི་འཆིང་བས་འཆིང་བར་འགྱུར། །འགོག་བདེན་དེ་མངོན་སུམ་དུ་ཡོངས་སུ་ཤེས་པས་གྲོལ་བ་ཡིན། །ཞེས་པ་ལ་སོགས་པའི་དོན་ཡང་འགའ་ཞིག་འདོད་པ་ལྟར་དངོས་པོ་རང་སྟོང་དུ་ཤེས་པ་ཙམ་གྱིས་གྲོལ་བ་ནི། མ་ཡིན་གྱི་འོན་ཀྱང་རླུང་སེམས་འགྱུ་བ་ལས་གྲོལ་ན་འཆིང་བ་ལས་གྲོལ་ཞིང༌། འཁྲུལ་པ་འཁྲུལ་སྣང་དང་བཅས་ཏེ་ཡལ་ནས་ཡེ་ཤེས་རང་སྣང་མངོན་དུ་འགྱུར་ཏེ་རྒྱས་པར་འཕགས་པ་རྡོ་རྗེ་སྙིང་པོའི་འགྲེལ་བ་ལ་སོགས་པ་སེམས་འགྲེལ་ཟབ་མོ་མན་ངག་དང་བཅས་པ་ལས་རིག་པར་བྱ་ཞིང༌། ངོ་ཤེས་པས་གྲོལ་བ་ལྟར་སྟོན་པ་གཞན་དང་གཞན་རྣམས་ཀྱི་དགོངས་པ་ཡང་དེ་ལྟར་རོ། །དེའི་ཕྱིར་འཆིང་བ་རྣམས་ཀྱི་གཙོ་བོ་བདག་འཛིན་གྱི་བཞོན་པ་དབུགས་ཀྱི་རྒྱུན་འགགས་ན། འཆིང་བ་མཐའ་དག་ལས་གྲོལ་ཞིང༌། སྟོང་གཞི་དོན་དམ་གཞན་སྟོང་ཡོན་ཏན་མཐའ་ཡས་པའི་བདག་ཉིད་ཐོབ་ནས་སེམས་ཅན་ཐམས་ཅད་ཀྱི་དོན་བྱེད་པར་འགྱུར་བའི་ཕྱིར་རང་སྟོང་དུ་གནས་པའི་ཆོས་ཐམས་ཅད་ཀྱིས་སྟོང་བའི་གཞི་ཆོས་ཉིད་དོན་དམ་པའི་བདེན་པ་ནི་དངོས་སུ་གསལ་བར་བསྟན་པའམ་ལྡེམ་པོ་ངག་གིས་བསྟན་པ་ཡང་རུང་སྟེ་གསུང་རབ་ཟབ་མོ་རྣམས་ཀྱི་མཐར་ཐུག་ངེས་པའི་དོན་ཡིན་ནོ། །