གཞན་སྟོང་སྐལ་བཟང་མིག་འབྱེད།
གཞན་སྟོང་སྐལ་བཟང་མིག་འབྱེད་ཅེས་བྱ་བ་བཞུགས་སོ། །
ཨོཾ་བདེ་ལེགས་སུ་གྱུར་ཅིག དུས་གསུམ་སངས་རྒྱས་རྟོན་པ་བཞི་ལྡན་སོགས། །ངེས་དོན་རྫོགས་ལྡན་ཆོས་མཆོག་སྟོན་མཛད་པའི། །མཁས་གྲུབ་རྣམས་ལ་གུས་པའི་ཕྱག་འཚལ་ནས། །སྟོང་ཚུལ་གཉིས་སོགས་སྟོང་ཉིད་རབ་བཤད་བྱ། །དེ་ལ་འདིར་རང་སྟོང་དང་གཞན་སྟོང་ཞེས་གངས་ལྗོངས་འདིར་ཡོངས་སུ་གྲགས་པ་ལས། གཞན་སྟོང་དབུ་མའི་རང་ལུགས་ལས་བརྩམསཏེ། རང་སྟོང་དང་གཞན་སྟོང་གི་སྟོང་ཚུལ་དང་སྟོང་ཉིད་ཀྱི་རབ་དབྱེ་བཤད་པ་ལ།རང་སྟོང་དང་གཞན་སྟོང་གི་ངོ་བོ་ངོས་འཛིན་ཙམ་བཤད་པ་དང༌། སྟོང་ཉིད་ཀྱི་རབ་དབྱེ་བཤད་པ་དང་གཉིས།དང་པོ་ལ་རང་སྟོང་གི་ངོས་འཛིན་དང་གཞན་སྟོང་གི་ངོས་འཛིན་ཚུལ་བཤད་པ་དང་གཉིས།དང་པོ་ནི། བོད་འདིར་རང་སྟོང་ཞེས་ཡོངས་སུ་གྲགས་པ་ནི། བདེན་གཉིས་ཀྱིས་བསྡུས་པའི་ཆོས་རྣམས་རང་གི་ངོ་བོས་སྟོང་བའམ་བདེན་གྲུབ་ཀྱི་སྤྲོས་པ་དང་བྲལ་བ་ཙམ་ལ་བྱེད་ལ། དེ་ལྟར་ཁས་ལེན་པའི་གནས་སྐབས་པའི་དབུ་མ་པ་ནི། དབུ་མ་རང་སྟོང་བ་ཞེས་གྲགས་པ་དེ་ཡིན་
པ་དང༌། སངས་རྒྱས་བྱང་སེམས་ཀྱི་དགོངས 
་པའི་རང་སྟོང་ནི་ཀུན་རྫོབ་ཀྱི་ཆོས་རྣམས་གནས་ལུགས་སམ་བདེན་པར་གྲུབ་པ་ཅུང་ཟད་ཙམ་མེད་པས་ཀུན་རྫོབ་ཀྱི་ཆོས་རྣམས་ནི་རང་སྟོང་མཚན་ཉིད་པ་ཡིན་ཏེ། ཚུལ་གཉིས་རྣམ་འབྱེད་ལས། དེ་ལ་རང་སྟོང་གི་དོན་ནི་ཀུན་རྫོབ་དང་དོན་དམ་པའི་ཆོས་ཐམས་ཅད་རང་གི་ངོ་བོས་སྟོང་ཞིང་བདེན་པར་མེད་པའི་ཕྱིར། ཆོས་ཐམས་ཅད་རང་སྟོང་ཡིན་ཞེས་འདོད་པའི་དོན་ཡིན་ལ། ཞེས་དང༌། ཟབ་དོན་ཉེར་གཅིག་ལས། རྒྱལ་བ་སྲས་བཅས་བཞེད་པའི་རང་སྟོང་གི་ལྟ་བ་དེ་སྤྲོས་པ་གཅོད་བྱེད་མཆོག་ཡིན་ཀྱང༌། གཞན་སྟོང་དུ་འདུས་པས་ལྟ་གྲུབ་ལོགས་ལོགས་པ་མིན་ལ། དེང་སང་གྲགས་པའི་རང་སྟོང་ཐལ་རང་གཞུང་ཕྱི་གསུམ་གྱི་ལྟ་བ་དོན་དམ་བདེན་མེད་དུ་འདོད་པ་ནོར་བ་ཡིན་པས་ལྟ་བས་སྤྲོས་པ་གཅོད་པ་ལ་བཟང་བ་མིན་ཏེ།སྐུར་འདེབས་སུ་འགྱུར་བའི་ཕྱིར། ཞེས་གསུངས་པའི་ཕྱིར་རོ། །གཉིས་པ་གཞན་སྟོང་གི་ངོས་འཛིན་ནི་སྟོང་གཞི་དོན་དམ་གཉིས་མེད་ཀྱི་ཡེ་ཤེས་རང་གི་ངོ་བོ་ནི། འཕགས་པའི་མཉམ་བཞག་སོ་སོ་རང་རིག་པའི་ཡེ་ཤེས་ལ་སྣང་ཚུལ་དང་གནས་ཚུལ་མཐུན་པའི་བདེན་པ་ཡིན་པར་གྲུབ་པའི་ཕྱིར་དང༌། རང་གི་ངོ་བོས་མི་སྟོང་ཞིང་གཞན་གཟུང་འཛིན་སོགས་སྤྲོས་པ་ཐམས་ཅད་ཀྱིས་སྟོང་བའི་ཕྱིར་དེ་ནི་གཞན་སྟོང་ཟབ་མོ་ཡིན་ལ་ཀུན་རྫོབ་སྣང་གྲགས་ཀྱིས་བསྡུས་པའི་ཆོས་རྣམས་ནི། རང་གི་ངོ་བོ་བདེན་པས་སྟོང་བ་ཡིན་ཏེ། ཐམས་ཅད་མཁྱེན་པ་ཏཱ་ར་ནཱ་ཐའི་ཚུལ་གཉིས་རྣམ་འབྱེད་ལས། ཀུན་རྫོབ་ཀྱི་ཆོས་ཐམས་ཅད་བདེན་མེད་རང་གི་ངོ་བོས་སྟོང་བས་རང་སྟོང་ཡིན་ཡང༌། དོན་དམ་དབྱིངས་ནི་བདེན་པར་གྲུབ་པའི་ཕྱིར་རང་གི་ངོ་བོས་མི་སྟོང་ལ། འོན་ཀྱང་སྟོང་ཉིད་ནི་ཡིན་ཏེ། གཞན་གཟུང་འཛིན་སོགས་སྤྲོས་པ་ཐམས་ཅད་ཀྱིས་སྟོང་བའི་ཕྱིར། དོན་དམ་ནི་གཞན་སྟོང་ཡིན་ནོ། །ཞེས་བཞེད་པས་དོན་ཡིན་པས། ཀུན་རྫོབ་རང་སྟོང་ཡིན་པ་ལ་མཐུན་ཡང༌།དོན་དམ་རང་སྟོང་བཞེད་མི་བཞེད་ཀྱི་ཁྱད་པར་ཡིན་ནོ། །ཞེས་གསུངས་པའི་ཕྱིར།རང་སྟོང་བ་དང་གཞན་སྟོང་བ་གཉིས་ཀའི་ལུགས་ལ། ཀུན་རྫོབ་དང་དོན་དམ་འཇོག་ལུགས་མི་འདྲ་སྟེ། རང་སྟོང་བ་རྣམས་ནི། འཁོར་འདས་ཀྱིས་བསྡུས་པའི་ཆོས་འདི་ལྟར་སྣང་བ་ནི། ཀུན་རྫོབ་ཡིན་ལ། དེ་རྣམས་རང་བཞིན་མེད་པ་གང་ཡིན་པ་དེ་ནི་དོན་དམ་བདེན་པར་འཇོག་ལ། དོན་དམ་དེ་ཡང་སྤྲོས་པ་བྲལ་ཙམ་དང་མེད་དགག་ལ་འཇོག་གོ། དབུ་མ་གཞན་སྟོང་བ་ནི་དངོས་པོ་དངོས་མེད་གཟུང་འཛིན་སོགས་གཉིས་སྣང་གི་བསྡུས་པའི་ཆོས་ཐམས་ཅད་ནི། ཀུན་རྫོབ་ཡིན་ལ། དོན་དམ་པའི་དབྱིངས་གཉིས་སྟོང་གི་ཡེ་ཤེས་རང་རིག་པ་ནི་དོན་དམ་བདེན་པར་འཇོག་པས།དོན་དམ་སྤྲོས་པ་དང་བྲལ་ཙམ་ལ་མི་བཟུང་བར་གཟུང་འཛིན་གཉིས་ཀྱི་སྤྲོས་པས་སྟོང་བའི་རིག་པ་ཡེ་ཤེས་ལ་འཇོག སྤྲོས་པ་དང་བྲལ་ཙམ་ནམ་མཁའ་ལྟ་བུ་ནི་བེམ་སྟོང་དང་ཆད་སྟོང་ཡིན་པས། ཆོས་དབྱིངས་ནི་དོན་དམ་པའི་ཡོན་ཏན་ཐམས་ཅད་དབྱེར་མེད་པའི་མ་ཡིན་དགག་དང་སྤྲོས་བྲལ་དུ་བཞེད་དོ། །དེས་ན་གཞན་སྟོང་དབུ་མ་པའི་མཚན་ཉིད་ནི། དབུ་མ་བ་གང་ཞིག།ཡོངས་གྲུབ་གཉིས་མེད་ཀྱི་ཡེ་ཤེས་ནི། གཤིས་ལ་རང་གི་ངོ་བོས་གྲུབ་པར་ཁས་ལེན་ཞིང་གཞན་དབང་དང་ཀུན་བཏགས་ཀྱིས་བསྡུས་པའི་ཆོས་རྣམས་གཤིས་ལ་རང་གི་ངོ་བོས་མ་གྲུབ་པར་ཁས་ལེན་པའི་གང་ཟག་དེ། གཞན་སྟོང་དབུ་མ་པའི་མཚན་ཉིད། དེའི་སྒྲ་བཤད་ནི་སྟོང་གཞི་གཉིས་མེད་ཀྱི་ཡེ་ཤེས་དེ་ནི་རང་ངོས་ནས་མི་སྟོང་པར་གཞན་གཟུང་འཛིན་སོགས་སྤྲོས་པ་མཐའ་དག་གིས་གདོད་ནས་སྟོང་བ་དང༌། ཀུན་རྫོབ་གློ་བུར་གྱི་ཆོས་རྣམས་ནི།དོན་དམ་པ་གཞན་གྱི་ངོ་བོས་སྟོང་བའི་སྟེང་དུ་རང་གི་ངོ་བོས་སྟོང་བར་སྨྲ་བས་ན་དབུ་མ་གཞན་སྟོང་བའོ། །དེ་ལྟར་བདེན་པ་གཉིས་ཀྱི་སྟོང་ཚུལ་ནི། སྟོང་ཙམ་དང༌།སྟོང་བའི་གཞི་གང་ཡིན་པ་དེ་མེད་དགག་དང༌། མ་ཡིན་དགག་གི་ཚུལ་འདི་དག་ལ་ཕུང་པོ་རྣམ་པར་དཔྱད་པ་ཆད་པའི་སྟོང་བ་ཉིད་དང་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་བ་ཉིད་ཅེས་ཀྱང་གསུངས་ཏེ། མགོན་པོ་འཇམ་དཔལ་གྱི་རང་གི་ལྟ་བ་མདོར་བསྟན་ལས། ཕུང་པོ་རྣམ་དཔྱད་སྟོང་བ་རྣམས། །ཆུ་ཤིང་ཇི་བཞིན་སྙིང་པོ་མེད། །རྣམ་པ་ཐམས་ཅད་མཆོག་ལྡན་པའི། །སྟོང་ཉིད་དེ་ལྟར་གྱུར་མ་ཡིན། །སྐྱེས་པ་མེད་པ་འགག་མེད་པ། །ཤེས་བྱ་གང་ཞིག་འདིར་མཐོང་བ། །སྟོང་བའི་དངོས་པོ་སྟོང་བ་ཉིད། །ཕུང་པོ་རྣམ་མེད་དཔྱད་པ་མིན། །ཞེས་དང༌། །རྗེ་བཙུན་སྤྱན་རས་གཟིགས་ཀྱི་དོན་འདི་ཉིད་ཡང་དང་ཡང་དུ་གསུངས་ཤིང༌། གསང་བདག་ཕྱག་ན་རྡོ་རྗེ་དང༌། །འཕགས་པ་རྡོ་རྗེ་སྙིང་པོ་ལ་སོགས་པས་ཀྱང་གསུངས་ལ། །འཕགས་པ་ཀླུ་སྒྲུབ་ཞབས་ཀྱིས། མ་སྐྱེས་པ་ཡི་སྟོང་ཉིད་གཅིག །གཅིག་ནི་སྐྱེས་པའི་སྟོང་བ་ཉིད། །མ་སྐྱེས་པ་ཡི་སྟོང་ཉིད་མཆོག །སྐྱེས་པའི་སྟོང་བ་འཇིག་པ་ཡིན། །ཞེས་དང༌།ལང་ཀར་གཤེགས་པ་ལས་ཀྱང་དོན་དེ་ཉིད་གསུངས་པ་དང༌། འཕགས་པ་ཐོགས་མེད་ཞབས་ཀྱིས་ཀྱང༌། གང་གིས་སྟོང་བ་དང༌། སྟོང་བའི་གཞི་གང་ཡིན་པའི་ཁྱད་པར་རྟོགས་ན་སྟོང་ཉིད་ལ་ལེགས་པར་ཟིན་པ། ཞེས་གསུངས་ཤིང༌། དེ་མ་ཡིན་པར་ཐམས་ཅད་རང་སྟོང་ཉིད་དུ་འདོད་ན་སྟོང་ཉིད་ལ་ལོགས་པར་ཟིན་པ། ཞེས་གསུངས་ཏེ།འདི་ནི་སྟོང་བ་ཉིད་ལ་བལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཞེས་པ་དང་དོན་འདྲའོ། །གཉིས་པ་སྟོང་ཉིད་ཀྱི་རབ་དབྱེ་ནི། སྟོང་ཉིད་གཉིས་སུ་དབྱེ་བ་དང༌། གསུམ་དུ་དབྱེ་བ་དང༌། བདུན་དུ་དབྱེ་བ་དང༌། བཅུ་དྲུག་སོགས་དབྱེ་བ་དང་བཞི། དང་པོ་ནི། རང་སྟོང་དང་གཞན་སྟོང་གཉིས་སྔར་ལྟར་ཀུན་རྫོབ་ཀྱི་ཆོས་རྣམས་རང་སྟོང་དང༌།དོན་དམ་བདེན་པ་ནི་གཞན་སྟོང་ཡིན་ཏེ། ཆོས་རྗེ་ཀུན་མཁྱེན་གྱིས་མཛད་པའི་སྟོང་ཉིད་ཀྱི་རབ་དབྱེ་ལས། སྟོང་ཉིད་གསུངས་པ་ཐམས་ཅད་རང་སྟོང་ཁོ་ན་མ་ཡིན་གྱི་གཞན་སྟོང་ཟབ་མོ་ཡིན་པའི་སྟོང་ཉིད་དང༌། རང་སྟོང་མི་ཟབ་པ་ཡིན་པའི་སྟོང་ཉིད་དུ་དབྱེར་ཡོད་དོ། །ཡང་རྣམ་པ་གཉིས་ཏེ། དོན་དམ་ཡིན་པའི་སྟོང་ཉིད་དང༌། ཀུན་རྫོབ་ཡིན་པའི་སྟོང་ཉིད་དོ། །ཞེས་དང༌། སྟོང་ཉིད་ཆེན་པོའི་མདོ་སོགས་ལས། །གང་ཞིག་གང་ན་མེད་པ་དེས་སྟོང་ངོ༌། །དེ་ལ་ལྷག་མ་གང་ཡིན་པ་དེ་འདིར་རྟག་ཏུ་ཡོད་དོ། །དེ་ནི་སྟོང་བ་ཉིད་ལ་ཡང་དག་པར་འཇུག་པ་ཡང་དག་པ་ཇི་ལྟ་བ་སྟེ་ཕྱིན་ཅི་མ་ལོག་པའོ།།ཞེས་དང༌།རྗེ་བཙུན་བྱམས་མགོན་གྱི་ཞལ་སྔ་ནས། ཡང་དག་མཐའ་ནི་འདུས་བྱས་ཀྱི། །རྣམ་པ་ཐམས་ཅད་དབེན་པ་སྟེ། །ཞེས་དང༌། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་དབྱིངས་སྟོང་གི །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱི་སྟོང་མ་ཡིན། །ཞེས་གསུངས་པའི་ཕྱིར་རོ། །ཡང་དེ་ལྟར་ཤེར་འགྲེལ་སྔོན་མེད་ལེགས་བཤད་ལས།འཁོར་ལོ་ཐ་མའི་མདོ་རྣམས་ལས་ནི་ལྷག་པར་ཡང་རྒྱས་ཤིང་གསལ་བར་གསུངས་ཏེ། བཀའ་འཁོར་ལོ་གསུམ་ཆར་གྱི་དངོས་བསྟན་དང་ཤུགས་བསྟན་དང༌། དགོངས་དོན་གྱི་གཙོ་བོའི་སྟོང་བ་ཉིད་ནི། གཞན་སྟོང་དབུ་མ་ཆེན་པོ་ཁོ་ན་ཡིན་གྱི་སྲིད་ཚད་ཐམས་ཅད་རང་སྟོང་དུ་འདོད་པའི་ལུགས་ལྟར་གསུངས་པ་ནི་མེད་དོ། །དེ་བས་ན་ཀུན་རྫོབ་ཀྱི་ཆོས་ཐམས་ཅད་གདོད་མ་ནས་རང་གི་ངོ་བོས་སྟོང་པར་འཇོག་པའི་གྲུབ་མཐའ་ནི། རང་སྟོང་རྣམ་དག་རྒྱལ་བའི་ དགོངས་པ ་ཡིན་ཡང་མཐར་ཐུག་དོན་དམ་དབྱིངས་ཀྱང་རང་གི་ངོ་བོས་སྟོངས་པར་འདོད་པ་ནི་ཤིན་ཏུ་ཆེས་ལོག་པར་ལྟ་བ་ཡིན་པས། དེ་གཉིས་བསྡོམས་པའི་གྲུབ་མཐའ་འདི་དག་ནི་ཁ་ཟས་བཟང་པོ་དུག་ཅན་དང་འདྲ་ལ། ཀུན་རྫོབ་ཐམས་ཅད་རང་སྟོང་དང༌། དོན་དམ་དབྱིངས་གཞན་སྟོང་དུ་འཁྱེར་ཤེས་པ་ཟུང་འཇུག་གི་ལྟ་བ་ཡོན་ཏན་ཀུན་དང་ལྡན་ པ་འདི་ནི། ཆོས་ཉིད་ཀྱི་གནས་ལུགས་དང༌།སངས་རྒྱས་ཐམས་ཅད་ཀྱི་དགོངས ་པའོ།།ཞེས་གསུངས་པའི་ཕྱིར་རོ། །སྐབས་འདིར་དོན་དམ་ཆོས་ཀྱི་དབྱིངས་དེ་ནི་རང་གི་ངོ་བོས་མི་སྟོང་བ་དང་བདེན་པར་གྲུབ་ཀྱང་དགག་བྱ་བདག་གཉིས་ཀྱིས་སྟོང་བ་དང༌། སྤྲོས་པའི་བདེན་གྲུབ་བམ་དགག་བྱ་བདེན་པར་མ་གྲུབ་སྟེ། རི་ཆོས་ལས། བདག་གཉིས་ཀྱི་སྟོང་བའི་ཕྱིར།ཞེས་དང༌། གཞན་སྟོང་དབུ་མའི་རྒྱན་ལས།མཚན་མ་སྤྲོས་པའི་བདེན་གྲུབ་ང་མི་འདོད།།སྤྲོས་པའི་དབེན་པའི་བདེན་ཚུལ་འདི་ལྟ་བུ། །ཞེས་དང༌། བདེན་གྲུབ་འགོག་ཚད་སྤྲོས་པའི་བདེན་འགོག་སྟེ། །ཞེས་དང༌། ཡོངས་གྲུབ་དེ་ལ་སྤྲོས་པའི་བདེན་པ་མེད། །སྤྲོས་པའི་བདེན་པ་ཡོད་ན་ཀུན་རྫོབ་སྟེ། །ཞེས་གསུངས་པའི་ཕྱིར། གཞན་དུ་ཡང་བཤད་ཟིན་ཏོ། །གཉིས་པ་གསུམ་དུ་དབྱེ་བ་ནི། མེད་པའི་སྟོང་བ་ཉིད་དང༌། ཡོད་པའི་སྟོང་བ་ཉིད་དང༌། རང་བཞིན་སྟོང་བ་ཉིད་དང་གསུམ། དང་པོ་ནི། ཀུན་བཏགས་རྣམས་ཞེན་ཡུལ་ལ་ཤར་བ་ཙམ་མ་གཏོགས། གནས་ལུགས་ལ་ལྟ་ཅི་སྨོས། ཀུན་རྫོབ་ཀྱི་ཤེས་པ་རླང་པོས་གཞིགས་ན་ཤེས་པ་ཀུན་རྫོབ་པ་དེའི་ངོར་ཡང་མ་གྲུབ་པའི་ཕྱིར་མེད་པའི་སྟོང་བ་ཉིད་དང༌། གཉིས་པ་ནི། གཞན་དབང་རྣམས་ཏེ། ཀུན་རྫོབ་ཀྱི་ཤེས་པ་ལ་གསལ་བར་སྣང་བ་དང༌། ཡང་དག་ཀུན་རྫོབ་བདེན་པའི་ངོ་བོར་ཡོད་པས་ཡོད་པའི་སྟོང་བ་ཉིད་དང༌། གསུམ་པ་ནི། ཡོངས་གྲུབ་སྟེ། དྲི་མ་སྦྱང་བའི་གཞི་གདོད་ནས་ཆོས་ཀུན་གྱི་རང་བཞིན་དུ་ཡོད་ཀྱང་དེ་ལྟར་མ་རྟོགས་པའི་དྲི་མ་སྦྱོང་དགོས་ཤིང༌། མངོན་སུམ་དུ་རྟོགས་པར་བྱ་ཞིང་ཐོབ་པར་བྱ་དགོས་པས་ན། སྦྱང་གཞི་དང་ཐོབ་བྱ་དང༌། རེག་པར་བྱ་བ་ཡིན་ཅིང༌། རང་གི་ངོ་བོ་དོན་དམ་ཡང་ཡིན་སྤྲོས་བྲལ་གྱི་སྟོང་ཉིད་ཀྱང་ཡིན། ཆོས་ཐམས་ཅད་ཀྱི་རང་བཞིན་དུ་གནས་པ་ཡང་ཡིན། གློ་བུར་གྱི་དྲི་མའམ་འཁྲུལ་སྣང་གི་གདོད་ནས་སྟོང་བ་ཡང་ཡིན་པས་དེ་ལ་རང་བཞིན་སྟོང་བ་ཉིད་ཅེས་བྱ་སྟེ། མདོ་སྡེ་རྒྱན་ལས། མེད་པའི་སྟོང་བ་ཉིད་ཤེས་ཤིང༌། །དེ་བཞིན་ཡོད་པའི་སྟོང་ཉིད་དང༌། །རང་བཞིན་སྟོང་བ་ཉིད་ཤེས་ན། །སྟོང་ཉིད་ཤེས་པ་ཞེས་བརྗོད་དོ། །ཞེས་གསུངས་པའི་ཕྱིར། དེ་ཡང་ཀུན་བཏགས་ནི། གཞི་ནས་མ་གྲུབ་ཀྱང་ཀུན་རྫོབ་ཏུ་དངོས་པོར་ཞེན་པའི་ཡུལ་ཡིན་པའི་ཕྱིར་ཤེས་པར་བྱ་བ་དང༌། གཞན་དབང་ནི་དོན་ལ་མེད་བཞིན་དུ། དངོས་པོ་འཁྲུལ་བའི་བློའམ། དེ་འདྲའི་བློ་ལ་དངོས་པོར་གསལ་བར་སྣང་བ་ཡིན་པས། འཁྲུལ་སྣང་རྒྱུ་དང་བཅས་པ་སྤང་དགོས་པས་དེ་ནི་སྤང་བྱ་དང༌། ཡོངས་གྲུབ་ནི། དྲི་མ་སྦྱང་བར་བྱ་བའི་གཞི་ཡིན་པའི་ཕྱིར་ན། ཡོངས་སུ་གྲུབ་པའི་ངོ་བོ་རང་བཞིན་སྟོང་བ་ཉིད་ཡིན་པར་གསུངས་ཏེ། མདོ་སྡེ་རྒྱན་ལས། རྟག་ཏུ་གཉིས་བྲལ་འཁྲུལ་པའི་རྟེན་གང་ཡིན་དང་གང་ཞིག་རྣམ་ཀུན་ཏུ། །བརྗོད་པར་ནུས་མ་ཡིན་ཅིང་སྤྲོས་པ་མེད་པའི་བདག་ཉིད་དེ་ཁོ་ན། །ཤེས་བྱ་སྤང་བྱ་རང་བཞིན་དྲི་མེད་འདོད་གང་རྣམས་པར་སྦྱང་བྱ་སྟེ། ། ཞེས་གསུངས་པའི་ཕྱིར། ཡོངས་སུ་གྲུབ་པའི་རང་བཞིན་སྟོང་བ་ཉིད་ནི། དེ་བཞིན་ཉིད་དང༌། ཡང་དག་པའི་མཐའ་དང༌། མཚན་མ་མེད་པ་དང་དོན་དམ་པ་དང༌།ཆོས་ཀྱི་དབྱིངས་དང༌། བྱང་ཆུབ་ཀྱི་སེམས་ལ་སོགས་པའི་རྣམ་གྲངས་སུ་བསྟན་ཏེ། དབུས་མཐའ་ལས། སྟོང་པ་ཉིད་ནི་མདོར་བསྡུས་ན། །དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་དང༌། །ཆོས་ཀྱི་དབྱིངས་ནི་རྣམས་གྲངས་སོ། །ཞེས་དང༌། འཕགས་པ་ཀླུ་སྒྲུབ་ཀྱི་ཞལ་སྔ་ནས། དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་ཉིད། །བྱང་ཆུབ་སེམས་མཆོག་དེ་ཉིད་དང༌། །སྟོང་བ་ཉིད་དུའང་བཤད་པ་ཡིན། །ཞེས་གསུངས་སོ། །དེ་ལྟར་སྟོང་ཉིད་གསུམ་གྱི་རྣམ་དབྱེ་ལེགས་པར་ཤེས་ན་གསུང་རབ་རྣམས་ལས་སྟོང་ཉིད་ཀྱི་རབ་དབྱེ་བསྟན་པ་རྣམས་རྟོགས་པར་འགྱུར་བ་ཡིན་ཏེ། ཤེར་འགྲེལ་སྔོན་མེད་ལེགས་བཤད་ལས། དེ་ལྟར་ན་སྟོང་ཉིད་རྣམ་པ་གསུམ་གྱི་དབྱེ་བ་འདི་མ་ཤེས་ན། འཁོར་ལོ་གསུམ་གྱི་མདོ་སྡེ་རྣམས་ལས་སྟོང་ཉིད་ཀྱི་རྣམ་བཞག་མང་པོ་གསུངས་པའི་དངོས་བསྟན་ཡང་རྟོགས་པར་མི་འགྱུར་ན།དགོངས་དོན་ལྟ་སྨོས་ཀྱང་ཅི་དགོས་ལ།།འདི་ཤེས་པས་ན་དངོས་བསྟན་དང་དགོངས་དོན་མཐའ་དག་ལ་མཁས་པར་འགྱུར་རོ། །ཞེས་གསུངས་པའི་ཕྱིར་རོ། །དེ་ལྟ་ན་གཞི་གྲུབ་ན་སྟོང་ཉིད་དེ་གསུམ་པོ་གང་རུང་ཡིན་དགོས་པས།གཞི་གྲུབ་ན་སྟོང་ཉིད་ཡིན་པས་ཁྱབ་སྟེ། ཚུལ་གཉིས་རྣམ་འབྱེད་ལས། གཞི་གྲུབ་ན་སྟོང་ཉིད་ཡིན་པས་ཁྱབ་པ་འཆའ་བ་ཡིན་ནོ། །ཞེས་སོགས་ལུང་རིགས་དུ་མས་གྲུབ་བོ། །གསུམ་པ་བདུན་དུ་དབྱེ་བ་ནི། ལང་ཀར་གཤེགས་པ་ལས། བློ་གྲོས་ཆེན་པོ་དེ་ལ་མདོར་ན་སྟོང་ཉིད་ནི་རྣམ་པ་བདུན་ཏེ། འདི་ལྟར་མཚན་ཉིད་སྟོང་བ་ཉིད་དང༌།དངོས་པོའི་རང་བཞིན་སྟོང་བ་ཉིད་དང༌། སྲིད་པ་སྟོང་བ་ཉིད་དང༌། མི་སྲིད་པ་སྟོང་བ་ཉིད་དང༌། ཆོས་ཐམས་ཅད་བརྗོད་དུ་མེད་པ་སྟོང་བ་ཉིད་དང༌། དོན་དམ་པ་འཕགས་པའི་ཡེ་ཤེས་སྟོང་བ་ཆེན་པོ་ཉིད་དང༌། གཅིག་གིས་གཅིག་སྟོང་བ་ཉིད་དང་བདུན་ནོ། །ཞེས་སྟོང་ཉིད་བདུན་གསུངས་ལ། དང་པོ་ནི། དངོས་པོ་རྣམས་རང་དང་སྤྱིའི་མཚན་ཉིད་ཀྱིས་སྟོང་བ་ཉིད་དང༌། གཉིས་པ་ནི། དངོས་པོ་རང་བཞིན་གྱི་སྐྱེ་བས་སྟོང་བ་དང༌། གསུམ་པ་ནི། ཕུང་པོ་རྣམས་བདག་དང་བདག་གིས་སྟོང་བ་དང༌། བཞི་བ་ནི་ཕུང་པོ་རྣམས་མྱང་འདས་ཀྱིས་སྟོང་བ་དང༌། ལྔ་བ་ནི་ཀུན་བཏགས་པའི་རང་བཞིན་གྱིས་སྟོང་བ་དང༌།དྲུག་པ་ནི་ལྟ་བ་དང་ཉེས་པའི་བག་ཆགས་ཐམས་ཅད་ཀྱིས་སྟོང་བ་དང༌། བདུན་པ་ནི། ཁང་བ་བ་ལང་གིས་སྟོང་བ་ལ་གསུངས་སོ། །དེ་ལྟར་དགག་གཞི་བདུན་གྱི་སྟེང་དུ་དགག་བྱ་བདུན་མེད་པ་ནི་སྟོང་ཉིད་བདུན་ནོ། །དོན་དམ་གཞན་སྟོང་ནི་དྲུག་པ་དོན་དམ་པ་འཕགས་པའི་ཡེ་ཤེས་སྟོང་བ་ཆེན་པོ་ཉིད་ཡིན་ནོ། །ཁ་ཅིག་གིས། བདུན་པ། གཅིག་གྀས་གཅིག་སྟོང་བ་དང༌། གཞན་སྟོང་གི་སྟོང་ཚུལ་དང་ཁྱད་པར་མེད་དོ་ཞེ་ན། དེ་ནི་མི་འཐད་དེ་སྟོང་ཚུལ་ཐ་མ་ནི་བུམ་པ་ཀ་བས་སྟོང་བ་ལྟར་ཀུན་རྫོབ་ཀྱི་ཆོས་གཅིག་གིས་གཅིག་སྟོང་བ་དེ་ཡིན་པས་དེ་ནི་ཉི་ཚེ་བ་དང་ཐ་ཤལ་བ་དང་སྤང་བྱ་ཡིན་པར་གསུངས་པས་དེ་དང༌། དོན་དམ་རང་བཞིན་པ་དེ་ཀུན་རྫོབ་གློ་བུར་བའི་ཆོས་རྣམས་ཀྱིས་སྟོང་བ་ནི་ཁྱད་པར་ཆེ་བ་ལས་ཀྱང་ཆེས་ཤིན་ཏུ་ཆེ་བའི་ཕྱིར་ཏེ། སྟོང་ཉིད་དྲུག་པ་དང་བདུན་པའི་རྒྱས་བཤད་ཀྱི་སྐབས་སུ། མདོ་དེ་ཉིད་ལས། བློ་གྲོས་ཆེན་པོ་དོན་དམ་པ་འཕགས་པའི་ཡེ་ཤེས་སྟོང་བ་ཉིད་ཆེན་པོ་གང་ཞེ་ན། འདི་ལྟ་སྟེ། བདག་གི་སོ་སོ་རང་གི་འཕགས་པའི་ཡེ་ཤེས་ཁུང་དུ་ཆུད་པ་ནི་ལྟ་བ་དང་ཉེས་པའི་བག་ཆགས་ཐམས་ཅད་ཀྱིས་སྟོང་སྟེ་དེའི་ཕྱིར་དོན་དམ་པ་འཕགས་པའི་ཡེ་ཤེས་སྟོང་བ་ཆེན་པོ་ཉིད་ཅེས་བྱའོ། །བློ་གྲོས་ཆེན་པོ་གཅིག་གིས་གཅིག་སྟོང་བ་ཉིད་གང་ཞེ་ན་འདི་ལྟ་སྟེ། གང་ལ་ཅི་མེད་པ་དེ་ནི་དེས་སྟོང་ཞེས་བྱའོ། །ཞེས་པ་ནས་ཆོས་ཐམས་ཅད་ཀྱི་རང་དང་སྤྱིའི་མཚན་ཉིད་ནི་གཅིག་ལ་གཅིག་མེད་དོ། །དེའི་ཕྱིར་གཅིག་གིས་གཅིག་སྟོང་བ་ཉིད་ཅེས་བྱའོ། །བློ་གྲོས་ཆེན་པོ་གཅིག་གིས་གཅིག་སྟོང་བ་ཉིད་འདི་ནི་ཀུན་གྱི་ཐ་ཤལ་དེ་དེ་ནི་ཁྱོད་ཀྱིས་སྤང་བར་བྱའོ། །ཞེས་གསུངས་པ་དང༌། དངོས་པོ་གཅིག་གིས་གཅིག་ཕན་ཚུན་སྟོང་འདི་ནི་མྱང་འདས་ཆེན་པོ་ལ་སོགས་པར་དོན་དམ་གཞན་སྟོང་གི་དཔེར་གསུངས་ཀྱི་གཞན་སྟོང་ཡིན་པར་མ་གསུངས་པའི་ཕྱིར། དེ་ནི་གཞན་སྟོང་ཟབ་མོ་ཡིན་པ་མདོ་འདིར་བཀག་ལ། ཁོ་བོ་ཅག་ཀྱང་དེ་ཁོ་ན་ལྟར་འདོད་པའི་ཕྱིར་ཉེས་སྐྱོན་གང་ཡང་མེད་དོ། ། བཞི་བ་སྟོང་ཉིད་བཅུ་དྲུག་སོགས་དབྱེ་བ་ནི། ཤེར་ཕྱིན་གྱི་མདོ་ལས། རབ་འབྱོར་གཞན་ཡང་བྱང་ཆུབ་སེམས་དཔའི་ཐེག་པ་ཆེན་པོ་ནི་ནང་སྟོང་བ་ཉིད་དང༌། ཕྱི་སྟོང་པ་ཉིད་དང༌། ཕྱི་ནང་སྟོང་པ་ཉིད་དང༌། སྟོང་པ་ཉིད་སྟོང་པ་ཉིད་དང༌། ཆེན་པོ་སྟོང་པ་ཉིད་དང༌། དོན་དམ་པ་སྟོང་པ་ཉིད་དང༌། འདུས་བྱས་སྟོང་པ་ཉིད་དང༌།འདུས་མ་བྱས་སྟོང་བ་ཉིད་དང༌། མཐའ་ལས་འདས་པ་སྟོང་པ་ཉིད་དང༌། ཐོག་མ་དང་ཐ་མ་མེད་པ་སྟོང་པ་ཉིད་དང༌། དོར་བ་མེད་པ་སྟོང་པ་ཉིད་དང༌། རང་བཞིན་སྟོང་པ་ཉིད་དང༌། རང་གི་མཚན་ཉིད་སྟོང་བ་ཉིད་དང༌། ཆོས་ཐམས་ཅད་སྟོང་པ་ཉིད་དང༌། མི་དམིགས་པ་སྟོང་པ་ཉིད་དང༌། དངོས་པོ་མེད་པ་སྟོང་པ་ཉིད་དང༌།ངོ་བོ་ཉིད་སྟོང་པ་ཉིད་དང༌། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཡིན་ནོ། །ཞེས་གསུངས་ལ། འདི་རྣམས་ཀྱི་དོན་ནི་རྗེ་བཙུན་བྱམས་མགོན་གྱི་དབུས་མཐའ་ལས། ཟ་བ་བཟའ་དང་དེ་ཡི་ལུས། །གནས་ཀྱི་གཞི་ཡི་སྟོང་པ་ཉིད། །དེ་ཡང་གང་གིས་ཇི་ལྟར་མཐོང༌། །གང་ཕྱིར་དེ་ཡང་སྟོང་བ་ཉིད། །དགེ་གཉིས་ཐོབ་པར་བྱ་བའི་ཕྱིར། །རྟག་ཏུ་སེམས་ཅན་ཕན་བྱའི་ཕྱིར། །འཁོར་བ་བཏང་བར་མི་བྱའི་ཕྱིར། །དགེ་བ་མི་ཟད་བྱ་བའི་ཕྱིར། །རིགས་ཀྱང་རྣམ་པར་དག་བྱའི་ཕྱིར། །མཚན་དང་དཔེ་བྱད་ཐོབ་བྱའི་ཕྱིར། །སངས་རྒྱས་ཆོས་རྣམས་དག་བྱའི་ཕྱིར། །བྱང་ཆུབ་སེམས་དཔའ་སྒྲུབ་པར་བྱེད། །ཅེས་སྟོང་ཉིད་བཅུ་བཞི་གསུངས་པ་ལས། །ཟ༵་བ༵་པོ་མིག་ལ་སོགས་པ་ནང་གི་སྐྱེ་མཆེད་རྣམས་སྟོང་པ་ནི། ནང་སྟོང་པ་ཉིད་དང༌། བཟ༵འ་བར་བྱ་བ་གཟུགས་སྒྲ་ལ་སོགས་པ་ཕྱིའི་སྐྱེ་མཆེད་སྟོང་པ་ནི་ཕྱི་སྟོང་པ་ཉིད་དང༵༌། ཕྱི་ནང་གི་སྐྱེ་མཆེད་དེ༵་གཉིས་ཀྱི་རྟེན་ལུ༵ས་སམ་ཁོག་པ་སྟོང་བ་ནི་ཕྱི་ནང་སྟོང་བ་ཉིད་དང༌། དབང་རྟེན་ཁཽག་པ་རྣམས་ནི་སེམས་ཀྱི་ཟིན་པས་ནང་དང༌། དབང་པོས་མ་བསྡུས་པས་ཕྱི་སྟེ་སྐབས་འདིའི་ཕྱི་ནང་གཉིས་ཀའོ། །གན༵ས་ཀྱི༵་གཞི༵་སྣོད་ཀྱི་འཇིག་རྟེན་རྒྱ་ཆེན་པོ་སྟོང་བ་ནི༵་ཆེན་པོ་སྟོ༵ང་བ༵་ཉིད༵་དང་དེ༵་ཡ༵ང་སྟོང་ཉིད་ཤེས་པ་ག༵ང་གི༵ས་སྟོང་བར་མཐོང་པ་དེའི་སྟོང་ཉིད་ནི། སྟོང་བ་ཉིད་སྟོང་བ་ཉིད་དང༌། ཇི༵་ལྟ༵ར་དོན་དམ་པའི་རྣམ་པར་མཐོ༵ང་བ་དེའི་སྟོང་བ་ཉིད་ནི། དོན་དམ་སྟོང་བ་ཉིད་དང༌། བྱང་ཆུབ་སེམས་དཔའ་རྣམས་ཀྱིས་དགོས་པ་གང་གི་ཕྱིར་དུ་སྟོང་པ་ཉིད་བསྒོམས་ནས་ལམ་སྒྲུབ་པར་བྱེད་ཅེ་ན། དགེ༵་གཉི༵ས་ཐོ༵བ་པ༵ར་བྱ༵་བ༵འི་ཕྱི༵ར་ཡིན་པས་ལམ་གྱི་དགེ་བ་འདུས་བྱས་ཀྱི་སྟོང་ཉིད་ནི། འདུས་བྱས་སྟོང་བ་ཉིད་དང༌། མྱང་ངན་ལས་འདས་པའི་དགེ་བ་འདུས་མ་བྱས་ཀྱི་སྟོང་པ་ནི། འདུས་མ་བྱས་སྟོང་བ་ཉིད་དང༌། རྟ༵ག་ཏུ༵་སེམ༵ས་ཅ༵ན་ཕ༵ན་འདགས་པར་བྱ༵་བའི་ཕྱི༵ར་བྱང་ཆུབ་སེམས་དཔས་སྒྲུབ་པར་བྱེདཔའི་གཞན་ཕན་མཐའ་ཡས་པའི་སྟོང་བ་ནི། མཐའ་ལས་འདས་པ་སྟོང་བ་ཉིད་དང༌།འཁོ༵ར་བ༵་བློས་བཏ༵ང་བ༵ར་མི༵་བྱ༵་བའི་ཕྱི༵ར་བྱང་ཆུབ་སེམས་དཔས་སྒྲུབ་པར་བྱེད་ལ།བློ་མི་བཏང་བར་བྱ་བའི་འཁོར་བ་ལ་ཐོག་མཐའ་མེད་པའི་སྟོང་བ་ནི། ཐོག་མ་ཐ་མ་མེད་པའི་སྟོང་བ་ཉིད་དང༌། ལྷག་མེད་མྱང་འདས་ཀྱི་དུས་སུ་དགེ༵་བ༵་མི༵་ཟ༵ད་པར་བྱ༵་བའི༵་ཕྱིར༵་བྱང་ཆུབ་སྒྲུབ་པར་བྱེད་ལ། དེའི་སྟོང་བ་ཉིད་ནི། དོར་བ་མེད་པའི་སྟོང་བ་ཉིད་དང༌། རིགས་རང་བཞིན་གྱི་དག་པ་གློ་བུར་གྱི་དྲི་མ་དག་པར་བྱ་བའི་ཕྱིར་བྱང་ཆུབ་སྒྲུབ་པར་བྱེད་ལ། དེའི་སྟོང་བ་ནི་རང་བཞིན་སྟོང་བ་ཉིད་དང༌། མཚ༵ན་ད༵ང་དཔེ༵་བྱ༵ད་ཐོ༵བ་པ༵ར་བྱ༵་བའི་ཕྱི༵ར་བྱང་སེམས་ཀྱིས་སྒྲུབ་པར་བྱེད་ལ། དེ་ནི་རང་གི་མཚན་ཉིད་ཡིན་ལ། དེའི་སྟོང་བ་ནི། རང་གི་མཚན་ཉིད་ཀྱི་སྟོང་བ་ཉིད་དང༌། སང༵ས་རྒྱས༵་ཆོ༵ས་རྣམ༵ས་ད༵ག་པར་བྱ༵་བའི་ཕྱི༵ར་བྱ༵ང་ཆུ༵བ་སེམ༵ས་དཔ༵འ་སྒྲུ༵བ་པ༵ར་བྱེ༵ད་པ་དེའི་སྟོང་ཉིད་ནི་ཆོས་ཐམས་ཅད་སྟོང་བ་ཉིད་དོ། །དེ་དག་ལས་སྟོང་ཉིད་དང་པོ་བཞི་ནི་ཤེས་བྱའི་དངོས་པོ་ལས་བརྩམ་པ་དང༌། དེ་ནས་གཉིས་ནི་ཡུལ་ཅན་ལས་བརྩམས་ཏེ། ལྔ་པ་དང་དྲུག་པའོ། །དེ་ནས་བརྒྱད་ནི་གང་གི་ཕྱིར་བྱང་ཆུབ་སེམས་དཔས་སྒྲུབ་པར་བྱེད་པ་སོགས་ལས་བརྩམས་ཏེ་བདུན་པ་ནས་བཅུ་བཞིའི་བར་རོ། །དེ་ནས་དངོས་པོ་མེད་པ་སྟོང་བ་ཉིད་དང༌། དངོས་པོ་མེད་པའི་ངོ་བོ་ཉིད་སྟོང་བ་ཉིད་གཉིས་ནི།དབུས་མཐའ་ལས། གང་ཟག་དང་ནི་ཆོས་རྣམས་ཀྱི། །དངོས་པོ་མེད་འདིར་སྟོང་བ་ཉིད། །དེ་དངོས་མེད་པའི་དངོས་ཡོད་པ། །དེ་ནི་དེ་ལས་སྟོང་ཉིད་གཞན། ། ཞེས་དང༌། དེའི་འགྲེལ་བར་དབུ་མ་པ་ཆེན་པོ་དབྱིག་གཉེན་གྱི་ཞལ་སྔ་ནས། གང་ཟག་དང་ཆོས་ཀྱི་དངོས་པོ་མེད་པ་ནི་སྟོང་པ་ཉིད་དོ། །དངོས་པོ་མེད་པ་དེའི་དངོས་པོ་མེད་པ་མ་ཡིན་ནོ། །ཟ་བ་ལ་སོགས་པ་སྟོང་པ་ཉིད་ཅེས་ཅི་སྐད་སྨོས་པ་དེར་སྟོང་བ་ཉིད་ཀྱི་མཚན་ཉིད་བསྟན་པའི་ཕྱིར་དངོས་པོ་མེད་པ་དང༌། དངོས་པོ་མེད་པའི་ངོ་བོ་ཉིད་སྟོང་བ་ཉིད་རྣམ་པ་གཉིས་ཐ་མར་རྣམ་པར་འཇོག་སྟེ། གང་ཟག་དང་ཆོས་སུུ་སྒྲོ་འདོགས་པ་དང༌། དེའི་སྟོང་པ་ཉིད་ལ་སྐུར་བ་འདེབས་པ་བསལ་བའི་ཕྱིར་གོ་རིམ་བཞིན་ནོ། །དེ་ལྟར་སྟོང་བ་ཉིད་ཀྱི་རབ་ཏུ་དབྱེ་བ་ཤེས་པར་བྱའོ། །ཞེས་གསུངས་པ་ལྟར། ག༵ང་ཟ༵ག་ད༵ང་ཆོས༵་སུ༵་གཏོགས་པའི་དངོས་པོ་རྣམ༵ས་གཤིས་ཀྱི༵་གནས་ལུགས་ལ་གདོད་ནས་མེད་ཅིང་མ་གྲུབ་པའི་ཕྱིར། རང་རང་གི་ངོ་བོས་སྟོང་ཞིང་དངོ༵ས་པོ༵་མེ༵ད་པ་ནི་འདི༵ར་དངོས་པོ་མེད་པ་སྟོ༵ང་བ༵་ཉིད༵་དང༌། གང་ཟག་དང་ཆོས་དེ༵་རྣམས་ཀྱི་དངོ༵ས་པོ་མེ༵ད་པའི༵་གཞི་ཆོས་ཉིད་དེ་བཞིན་ཉིད་ཀྱི་དངོ༵ས་པོའམ་ངོ་བོར་ཡོ༵ད་པ༵་ནི། དངོས་པོ་མེད་པའི་ངོ་བོ་ཉིད་སྟོང་བ་ཉིད་ཡིན་པས། དེ༵་ནི༵་སྔ༵་མ༵་དེ་ལས༵་སྟོ༵ང་པ༵་ཉི༵ད་གཞ༵ན་དུ་གསུངས་ལ། གཞན་ཡིན་པའི་རྒྱུ་མཚན་ནི་སྔ་མ་རང་སྟོང་དང་ཕྱི་མ་གཞན་སྟོང་ཡིན་པས་སོ། །སྟོང་ཉིད་བཅོ་བརྒྱད་དུ་ཕྱེ་ན་སྔ་མ་བཅུ་དྲུག་གི་སྟེང་དུ། མི་དམིགས་པ་སྟོང་བ་ཉིད་དང༌། ངོ་བོ་ཉིད་སྟོང་བ་ཉིད་དང་བཅོ་བརྒྱད་དོ། །དེ་གཉིས་ཀྱི་ངོས་འཛིན་ནི། ཤེར་འགྲེལ་སྔོན་མེད་ལེགས་བཤད་ལས། མི་དམིགས་པ་སྟོང་བ་ཉིད་ནི། དངོས་མེད་སྟོང་བ་ཉིད་དང་དོན་གཅིག་ལ། ངོ་བོ་ཉིད་སྟོང་བ་ཉིད་ནི་དངོས་མེད་ངོ་བོ་ཉིད་དང་དོན་གཅིག་གོ །ལྡོག་ཆའི་ཁྱད་པར་ནི། དངོས་མེད་སྟོང་ཉིད་ནི། ངོ་བོའི་སྒོ་ནས་མ་གྲུབ་པ་དང༌། མི་དམིགས་པ་ནི་ཡེ་ཤེས་ཀྱི་ངོ་བོར་དམིགས་སུ་མེད་ཅིང་མཐོང་རྒྱུ་མེད་པའི་དོན་ནོ། །ངོ་བོ་ཉིད་ནི་ཕྱིན་ཅི་མ་ལོག་པའི་རང་བཞིན་དེ་ལམ་གྱིས་གསར་དུ་མ་བཅོས་པའི་དོན་དང་དངོས་མེད་ངོ་བོ་ཉིད་ཀྱི་དོན་ནི་དངོས་པོ་རྣམས་གདོད་ནས་མ་གྲུབ་པའི་ཤུལ་ན། ཆོས་ཉིད་མི་གཡོ་ཞིང་བསྟན་པར་གནས་པའི་དོན་ནོ། །ཞེས་གསུངས་པའི་ཕྱིར་རོ། །ཡང་སྟོང་ཉིད་ཉི་ཤུ་དབྱེ་ན། སྔར་བཤད་ཟིན་པའི་བཅོ་བརྒྱད་ཀྱི་སྟེང་དུུ་རང་གི་ངོ་བོ་སྟོང་བ་ཉིད་དང༌། གཞན་གྱི་ངོ་བོ་སྟོང་བ་ཉིད་གཉིས་དང་ཉི་ཤུའོ། །དེ་གཉིས་ཀྱི་ཁྱད་པར་ནི། ཤེར་འགྲེལ་སྔོན་མེད་ལེགས་བཤད་ལས། དེ་བཞིན་དུ་སྟོང་ཉིད་ཉི་ཤུའི་དབང་དུ་བྱས་ན་རང་གི་ངོ་བོ་སྟོང་བ་ཉིད་ནི་དངོས་མེད་སྟོང་ཉིད་དང་གཅིག་ལ། གཞན་གྱི་ངོ་བོ་སྟོང་བ་ཉིད་ནི་དངོས་མེད་ངོ་བོ་ཉིད་དང་གཅིག་གོ །རྣམ་བཞག་འདི་ནི་ཤིན་ཏུ་གསལ་བར་སྔགས་ཀྱི་ཐེག་པ་བླ་ན་མེད་པའི་རྒྱུད་གཉིས་ལས་བྱུང་བ་དང༌། མདོ་ལུགས་ཀྱི་དབུས་མཐའ་རྣམ་འབྱེད་རྩ་འགྲེལ་དང༌། ཡུམ་གསུམ་གནོད་འཇོམས་དང༌། བརྒྱད་སྟོང་དོན་བསྡུས་སོགས་ལས་ཤེས་པར་བྱའོ། །ཞེས་གསུངས་པའི་ཕྱིར་རོ། །དེ་ལྟར་སྟོང་ཉིད་ཉི་ཤུ་ལས་དངོས་པོ་མེད་པའི་ངོ་བོ་ཉིད་སྟོང་བ་ཉིད་དང༌། ངོ་བོ་ཉིད་སྟོང་བ་ཉིད་དང༌། གཞན་གྱི་ངོ་བོ་སྟོང་བ་ཉིད་དང་གསུམ་གཞན་སྟོང་ཟབ་མོ་དོན་དམ་པའི་ཡོན་ཏན་ཐམས་ཅད་དབྱེར་མེད་པའི་བདག་ཉིད་ཡིན་ལ། དེ་གསུམ་ལས་གཞན་ཕལ་ཆེར་ནི། རང་སྟོང་དངོས་པོ་མེད་པའི་སྟོང་བ་ཉིད་ཡིན་ཏེ། རི་ཆོས་ངེས་དོན་རྒྱ་མཚོ་ལས། དཔལ་རྡོ་རྗེ་འཆང་ཆེན་པོས་རྒྱུད་སྡེ་རིན་པོ་ཆེ་རྣམས་སུ་གསང་བ་ཞེས་པ་དང༌། གསང་ཆེན་ཞཻས་པ་ལ་སོགས་པས་སྟོང་ཉིད་མཐར་ཐུག་གི་རྣམ་གྲངས་གསུངས་པ་རྣམས་ཀྱང་དངོས་པོ་མེད་པའི་ངོ་བོ་ཉིད་སྟོང་བ་ཉིད་གང་ཡིན་པ་སྟོང་གཞི་དོན་དམ་གཞན་སྟོང་ལ་ དགོངས་པ ་ཡིན་གྱི། དངོས་པོ་མེད་པ་སྟོང་ཉིད་ཙམ་གང་ཡིན་པ་རང་སྟོང་ལ་ནི་ དགོངས་པ ་མ་ཡིན་ཏེ། དེ་དང་དེ་རྣམ་གྲངས་སུ་མི་རུང་བའི་ཕྱིར་རོ། །ཞེས་དང༌། འདིར་གཞི་འབྲས་ངོ་བོ་དབྱེར་མེད་ཀྱི་ཤེར་ཕྱིན་སྟོང་ཉིད་དུ་གསུངས་པ་འདི་ཡང་རང་སྟོང་ནི་མ་ཡིན་གྱི་སྟོང་གཞི་དོན་དམ་གཞན་སྟོང་དངོས་པོ་མེད་པའི་ངོ་བོ་ཉིད་སྟོང་བ་ཉིད་ཡིན་ཏེ། ཤེར་ཕྱིན་ཡིན་ལ་ཆོས་ཉིད་ཀྱང་ཡིན་པའི་ཕྱིར། ཞེས་དང༌། འཁོར་ལོ་སྡོམ་པ་ཉུང་ངུའི་རྒྱུད་དུ་ཡང༌། །གསང་ཆེན་མཆོག་ཏུ་དགྱེས་པ་དང༌། ཀུན་གྱི་བདག་ཉིད་ན་རྟག་བཞུགས། ཞེས་པ་ལ་སོགས་པས་དངོས་པོ་མེད་པའི་ངོ་བོ་ཉིད་སྟོང་བ་ཉིད་དང༌། གཞན་གྱི་དངོས་པོ་སྟོང་བ་ཉིད་གང་ཡིན་པ་སྟོང་གཞི་དོན་དམ་གཞན་སྟོང་གི་རྣམ་གྲངས་མང་དུ་གསུངས་སོ། །ཞེས་གསུངས་པའི་ཕྱིར་རོ། །འོ་ན་མདོ་སྡེ་དང་བསྟན་བཅོས་དུ་མ་ལས་དོན་དམ་བདེན་པ་ཞེས་བྱ་བ་ནི་སྟོང་བ་ཉིད་བཅོ་བརྒྱད་གསུངས་པ་ཚུལ་ཇི་ལྟར་ཡིན་ཞེ་ན། དེ་ལྟར་གསུངས་པ་ནི་སྟོང་གཞི་བཅོ་བརྒྱད་ལ་ དགོངས་པ ་ཡིན་ཏེ། རི་ཆོས་ངེས་དོན་རྒྱ་མཚོ་ལས། དབུ་མ་རིན་ཆེན་སྒྲོན་མར་དོན་དམ་པའི་བདེན་པ་ཞེས་བྱ་ནི་སྟོང་པ་ཉིད་བཅོ་བརྒྱད་ཅེས་བཅོམ་ལྡན་འདས་ཀྱི་ལུང་དྲངས་ཏེ། དེ་དག་ནི་སྟོང་གཞི་བཅོ་བརྒྱད་ལ་ དགོངས་པ ་ཡིན་ནོ། །ཞེས་གསུངས་པའི་ཕྱིར། བཤད་ཚུལ་འདི་དག་མཁས་པ་གཞན་གྱི་བཤད་ཚུལ་དང་མི་མཐུན་ཡང་ཕར་ཕྱིན་མདོ་ལུགས་མ་དང༌།ཤེར་འགྲེལ་སྔོན་མེད་ལེགས་བཤད་དང༌། ཐེག་མཆོག་དབུ་མ་དང༌། རི་ཆོས་ངེས་དོན་རྒྱ་མཚོའི་གསུང་ཟིན་ཇི་ལྟ་བ་བཞིན་བྲིས་པ་ཡིན་ནོ། །
སྨྲས་པ། རབ་དཀར་ཚུལ་འདི་འབད་ལས་བསོད་ནམས་ག་བུར་ཆུ་རྒྱུན་གང་བྱུང་བ། །རབ་མང་སྙིང་གི་ཟ་མ་ཏོག་ཏུ་དྲི་མེད་དྭངས་གསལ་བསྐྱིལ་བའི་དཔལ། །རབ་ཏུ་རྒྱས་པའི་མཐུ་ལས་ལེགས་པར་བཤད་པའི་ཀུན་གསལ་བླ་བྲེ་ཡིས། །རབ་འབྱམས་ཞིང་གི་རྒྱན་སྤྲས་དགེ་ལེགས་འདོད་དགུར་འཇོ་བའི་མཐུ་གྲུབ་ཤོག །ཅེས་གཞན་སྟོང་སྐལ་བཟང་མིག་འབྱེད་ཅེས་བྱ་བ་འདི་ནི་བློ་ལྡན་དུ་མའི་ངོར་འབྲས་རབ་འབྱམས་པའི་མིང་ཙམ་འཛིན་པ་དངོས་གྲུབ་དཔལ་ནས་བྲིས་པའོ། །འདིས་ཀྱང་ངེས་གསང་དབུ་མའི་རྒྱལ་བསྟན་ཡུན་རིང་དུ་གནས་པའི་རྒྱུར་གྱུར་ཅིག ། དགེའོ།མངྒ་ལཾ།