གཉིས་པ་ཡན་ལག་ཅན་ལམ་ཤེས་བཤད་པ།

གཉིས་པ་ཡན་ལག་ཅན་ལམ་ཤེས་བཤད་པ་ལ།

ཉན་ཐོས་དང༌། རང་རྒྱལ་དང༌། བྱང་སེམས་ཀྱི་ལམ་ཤེས་བཤད་པ་དང་གསུམ། དང་པོ་ཉན་ཐོས་ཀྱི་ལམ་ཤེས་པའི་ལམ་ཤེས་བཤད་པ་ལ། རྩ་བ་ལས། ལམ་ཤེས་ཉིད་ཀྱི་ཚུལ་ལ་ནི། །འཕགས་པའི་བདེན་པ་བཞི་དག་གི ། རྣམ་པ་མི་དམིགས་སྒོ་ནས་ནི། །ཉན་ཐོས་ལམ་འདི་ཤེས་པར་བྱ། །ཞེས་གསུངས་སོ། །དེ་ལ་སྤྱི་དོན་དང་མཐའ་རགས་ཙམ་དཔྱད་པ་གཉིས། དང་པོ་ལ། ཉན་ཐོས་ཀྱི་ལམ་དང༌། ཉན་ཐོས་ཀྱི་ལམ་ཤེས་པའི་ལམ་ཤེས་དངོས་དང༌། ཐེག་ཆེན་ངེས་འབྱེད་ཆ་མཐུན་གྱིས་ཉན་ཐོས་ཀྱི་ལམ་མི་དམིགས་པའི་ཚུལ་གྱིས་བསྡུས་པར་བཤད་པ་དང་གསུམ། དང་པོ་ནི། ཐེག་པ་གསུམ་གྱི་གང་ཟག་གི་ནང་ནས་རང་བཞིན་གྱིས་དབང་རྟུལ་གྱི་གང་ཟག ཉན་ཐོས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། ཐེག་པ་གསུམ་གྱི་ནང་ནས་རང་བཞིན་གྱིས་དབང་རྟུལ་གྱི་གང་ཟག་ཅེས་པ་མཚན་ཉིད་དོ། །ཞེས་གསུངས་པས་སོ། །ཉན་ཐོས་ཀྱི་མངོན་རྟོགས་ལ་བརྟེན་ནས་ཉན་ཐོས་ཀྱི་བྱང་ཆུབ་བགྲོད་པའི་གོ་སྐབས་ཕྱེ་ཤུལ་དུ་གྱུར་པ། ཉན་ཐོས་ཀྱི་ལམ་གྱི་མཚན་ཉིད། དབྱེ་ན་ཉན་ཐོས་ཀྱི་ཚོགས་ལམ་སོགས་ལྔ་ཡོད་དོ། །