གཉིས་པ་རང་རྒྱལ་གྱི་ལམ་ཤེས་པའི་ལམ་ཤེས་བཤད་པ།

གཉིས་པ་རང་རྒྱལ་གྱི་ལམ་ཤེས་པའི་ལམ་ཤེས་བཤད་པ་ལ།

རྩ་བར། རང་བྱུང་བདག་ཉིད་རྟོགས་པའི་ཕྱིར། །ཞེས་པ་ནས། ཡང་དག་བསྡུས་པར་ཤེས་པར་བྱ། །ཞེས་གསུངས་སོ། །དེ་ལ་སྤྱི་དོན་དང༌། མཐའ་རགས་ཙམ་དཔྱད་པ་གཉིས། དང་པོ་ལ། རང་རྒྱལ་དང་དེའི་ལམ་གྱི་མཚན་ཉིད། དབྱེ་བ། རང་རྒྱལ་གསུམ་གྱི་ཁྱད་པར། ཉན་ཐོས་ལས་འཕགས་ཚུལ། རང་རྒྱལ་གྱི་ལམ་ཤེས་པའི་ལམ་ཤེས་དང་ལྔ། དང་པོ་ནི། ལམ་ལ་གནས་པའི་རང་བཞིན་གྱིས་དབང་འབྲིང་དུ་གྱུར་པའི་གང་ཟག རང་རྒྱལ་གྱི་མཚན་ཉིད། རང་རྒྱལ་གྱི་བྱང་ཆུབ་བགྲོད་པའི་གོ་སྐབས་ཕྱེ་ཤུལ་དུ་གྱུར་པའི་མངོན་རྟོགས། རང་རྒྱལ་གྱི་ལམ་གྱི་མཚན་ཉིད། ཡོན་ཏན་དུ་མའི་རྟེན་དུ་གྱུར་བའི་རང་རྒྱལ་གྱི་ཡེ་ཤེས། རང་རྒྱལ་གྱི་སའི་མཚན་ཉིད། རང་རྒྱལ་གྱི་རྣམ་པར་གྲོལ་བ་ལ་ཕྱིན་པའི་རང་རྒྱལ་གྱི་མངོན་རྟོགས། རང་རྒྱལ་གྱི་ཐེག་པའི་མཚན་ཉིད་ཡིན་ཏེ། ཉ་ཊཱིཀ་ལས། མཚན་ཉིད་ནི། ཐེག་པ་གསུམ་ལས་རང་བཞིན་གྱིས་དབང་བོ་འབྲིང་དུ་གྱུར་པའི་གང་ཟག་ནི། རང་རྒྱལ་གང་ཟག་གི་མཚན་ཉིད། རང་སངས་རྒྱས་ཀྱི་ས་ལ་བརྟེན་ནས་རང་བྱང་ཆུབ་ཏུ་བགྲོད་པའི་གོ་སྐབས་ཕྱེ་ཤུལ་དུ་གྱུར་པ། དེའི་ལམ་གྱི་མཚན་ཉིད་དོ། །ཞེས་དང༌། འདི་ལ་བདག་མེད་རྟོགས་པའི་བློ་གང་ཞིག་ཉན་ཐོས་ཀྱི་ལམ་གྱི་རྟེན་བྱེད་པ་ཉན་ཐོས་ཀྱི་ས། གང་ཞིག་རང་རྒྱལ་ལམ་གྱི་རྟེན་བྱེད་པ་རང་རྒྱལ་གྱི་སའོ། །ཞེས་དང༌། རང་རྒྱལ་ཐེག་པའི་མཚན་ཉིད་ནི། བློ་གྲོས་མི་ཟད་པས་བསྟན་པའི་མདོ་འགྲེལ་དུ། དབྱིག་གཉེན། རང་སངས་རྒྱས་དེ་དག་རྣམ་པར་གྲོལ་བའི་སར་ཕྱིན་པར་བྱེད་པའི་ཐེག་པ་ནི་རང་སངས་རྒྱས་ཀྱི་ཐེག་པ་སྟེ། ཞེས་པ་ལྟར་རོ། །ཞེས་གསུངས་པའི་ཕྱིར། མཚོན་བྱའི་སྒྲ་བཤད་ནི། བདག་ཉིད་གཅིག་པའི་དོན་ཏེ་རྒྱུ་མཚན་དུ་གྱུར་པར་བྱས་ནས་རང་ཉིད་བྱང་ཆུབ་པས་རང་སངས་རྒྱས་སོ། །

གཉིས་པ་དབྱེ་བ་ནི།

རང་རྒྱལ་གྱི་ཚོགས་ལམ་སོགས་ལམ་ལྔ་ཡོད་དོ། །གང་ཟག་གི་དབྱེ་བ་ལ། བསེ་རུ་ལྟ་བུ་དང་ཚོགས་སྤྱོད་པ་ཆེ་ཆུང་གཉིས་ཏེ་གསུམ་ཡོད།ཡང་ན་དང་པོ་ཉིད་ནས་འདོད་ཆགས་ཆུང་བ་སྙིང་རྗེ་ཆུང་བ། ང་རྒྱལ་སྤྱོད་པའི་རིགས་ཅན་གསུམ་དུ་རྟོག་གེ་འབར་བར་བཤད་དོ། །རིགས་ཀྱི་མཚན་ཉིད་གསུམ་ཡིན་ཏེ། རང་བཞིན་གྱིས་ནི་འབྱུང་བ་ཉིད། །དང་པོ་ཉིད་ནས་འདོད་ཆགས་ཆུང༌། །སྙིང་རྗེ་ཆུང་བའི་རིགས་ཅན་པ། །ཁྱད་འཕགས་ང་རྒྱལ་ལ་སྤྱོད་པ། །ཞེས་སོ། །