བཞི་པ་ཉན་ཐོས་ཀྱི་ལམ་ལས་ཁྱད་པ།

བཞི་པ་ཉན་ཐོས་ཀྱི་ལམ་ལས་ཁྱད་པར་པ་ནི།

སྲིད་པ་ཐ་མའི་ཚེ་སློབ་དཔོན་གཞན་ལ་མི་བརྟེན་པར་བྱང་ཆུབ་མངོན་དུ་བྱེད་པ་ཡིན་ཏེ། རྩ་བར། རང་བྱུང་བདག་ཉིད་རྟོགས་པའི་ཕྱིར། །གཞན་གྱིས་བསྟན་ཡང་མི་དགོས་ལ། །བསེ་རུ་ལྟ་བུའི་ཡེ་ཤེས་ནི། །ཟབ་པ་ཉིད་དུ་མངོན་པར་བརྗོད། །ཅེས་དང༌། བྱང་ཆུབ་སེམས་དཔའི་ས་ལས། ཉན་ཐོས་རྣམས་དང་རང་སངས་རྒྱས་ཀྱི་བྱེ་བྲག་ནི་འདི་ཡིན་ཏེ། སྲིད་པ་ཐ་མ་ལ་ལུས་ཐ་མ་ཐོབ་པར་གྱུར་པ་ན། སློབ་དཔོན་མེད་པར་སྔོན་གོམས་པའི་དབང་གིས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་རྣམས་བསྒོམས་པས་ཉོན་མོངས་པ་ཐམས་ཅད་སྤངས་པའི་དགྲ་བཅོམ་པ་ཉིད་མངོན་སུམ་དུ་བྱ་སྟེ། དེ་ལྟ་བས་ན་རང་སངས་རྒྱས་ཞེས་བྱའོ། །ཞེས་གསུངས་པའི་ཕྱིར། དེས་ན་རང་རྒྱལ་གྱི་ལམ་དེ་ཉན་ཐོས་ཀྱི་ལམ་ལས་ཁྱད་པར་འཕགས་ཏེ། ཉ་ཊཱིཀ་ལས། རྩ་བ་ནི། ར༷ང་བྱུ༷ང་སྟེ་རང་སངས་རྒྱས་ཀྱི་ལམ་ཆོས་ཅན། ཉན་ཐོས་ཀྱི་ལམ་ལས་ཁྱད་པར་འཕགས་ཏེ། སྲིད་པ་ཐ་མ་བའི་ཚེ་སློབ་དཔོན་སོགས་གཞ༷ན་གྱི༷ས་ཆོས་བསྟ༷ན་པ་ལ་ལྟོས་ཡ༷ང་མི༷་དགོ༷ས་པར་འདོད་ཁམས་སུ་རང་གི་སྨོན་ལམ་དང་ཤེས་རབ་ཀྱི་སྟོབས་ཀྱིས་རང་གི་བྱང་ཆུབ་རྟོ༷གས་ཤིང་ཐོབ་པ༷འི་ལམ་ཡིན་པའི་ཕྱི༷ར། ཞེས་དང༌། ཡང་བསེ་རུ་ལྟ་བུའི་ཞེས་པ་མཚོན་པ་སྟེ། རང་རྒྱལ་གྱི་ལམ་ཆོས་ཅན། ཆོས་འདྲ། རང་འབྲས་དམན་པའི་བྱང་ཆུབ་ཐོབ་ནས་ངག་གིས་སྒྲ་མེད་དུ་ཆོས་སྟོན་པར་ནུས་པའི་ཡེ་ཤེས་ནི་ཟབ་པ་ཉིད་ཅན་གྱི་ལམ་ཡིན་པས་སོ། །ཞེས་གསུངས་པས་སོ། །