གསུམ་པ་སྒོམ་ཤེས་པ་ལམ་བྱེད་པ་དང་བཅས་པ་བཤད་པ།
གསུམ་པ་སྒོམ་ཤེས་པ་ལམ་བྱེད་པ་དང་བཅས་པ་བཤད་པ་ལ།
སྒོམ་ལམ་གྱི་བྱེད་པ་དང༌། བྱེད་པ་ཅན་གྱི་སྒོམ་ལམ་བཤད་པ་དང་གཉིས། དང་པོ་ནི། རྩ་བར། ཀུན་ནས་ཞི་དང་ཐམས་ཅད་ལ། །འདུད་དང་ཉོན་མོངས་ལས་རྒྱལ་དང༌། །གནོད་པས་རྫི་བ་མེད་ཉིད་དང༌། །བྱང་ཆུབ་དང་ནི་མཆོད་རྟེན་ཉིད། །ཅེས་སོ། །དེ་ལ་སྤྱི་དོན་དང་མཐའ་རགས་ཙམ་དཔྱད་པ་གཉིས། དང་པོ་སྤྱི་དོན་བཤད་པ་ལ། སྒོམ་ལམ་གྱི་བྱེད་པའི་མཚན་ཉིད། དབྱེ་བ། ས་མཚམས་གསུམ་ལས་དང་པོ་ནི། ཐེག་ཆེན་སྒོམ་ལམ་བློའི་ངོ་བོར་བསྐྱེད་ནས་བསྒོམས་སྟོབས་ཀྱིས་ཐོབ་པའི་འབྲས་བུ་ཁྱད་པར་བ། སྒོམ་ལམ་གྱི་བྱེད་པའི་མཚན་ཉིད་ཡིན་ཏེ། ཉ་ཊཱིཀ་ལས། སྒོམ་ལམ་གྱི་བྱེད་པའི་མཚན་ཉིད་ནི། སྒོམ་ལམ་གྱི་འབྲས་བུ་ཁྱད་པར་བ་སྟེ་བྱ་བ་དེ་བྱེད་པ་ལ་བྱེད་པ་ཞེས་བཞག་གོ །ཡང་ན་སེམས་དུལ་བ་ལ་སོགས་པའི་འབྲས་བུ་ཁྱད་པར་བ་བྱེད་པའོ། །ཞེས་གསུངས་པའི་ཕྱིར་རོ། །