གཉིས་པ་བྱེད་པ་ཅན་གྱི་སྒོམ་ལམ་བཤད་པ།

གཉིས་པ་བྱེད་པ་ཅན་གྱི་སྒོམ་ལམ་བཤད་པ་ལ།

སྤྱིར་བཤད་པ་དང༌། སྐབས་འདིར་ཡུམ་དང་རྒྱན་ལས་བསྟན་པའི་མོས་བསྔོ་སོགས་བཤད་པ་དང་གཉིས། དང་པོ་ལ་དངོས་དང༌། མཐའ་རགས་ཙམ་དཔྱད་པ་གཉིས། དང་པོ་ལ་རྟེན་དང་བརྟེན་པ་གཉིས་ལས། དང་པོ་རྟེན་ལ་ཡང་གཉིས་ལས། ལུས་རྟེན་ནི། གླིང་གསུམ་འདོད་ལྷ་དང་གཟུགས་གཟུགས་མེད་ཀྱི་ལུས་རྟེན་ལ་སྐྱེ་བ་ཡོད་དོ། །སེམས་རྟེན་ནི། ས་དགུའི་སེམས་ལ་བརྟེན་པ་ཡོད་དོ། ། གཉིས་པ་བརྟེན་པ་སྒོམ་ལམ་བཤད་པ་ལ། མཚན་ཉིད་དང༌། མཚོན་བྱའི་སྒྲ་བཤད། དབྱེ་བ། ས་མཚམས། སྤང་བྱ་བཤད་པ་དང་ལྔ་ལས། དང་པོ་ནི། རྗེས་ལ་མངོན་པར་རྟོགས་པའི་གནས་སྐབས་ཀྱིས་བསྡུས་པའི་མྱ་ངན་ལས་འདས་པར་བགྲོད་པའི་མངོན་རྟོགས་དེ། སྒོམ་ལམ་གྱི་མཚན་ཉིད། ཐེག་ཆེན་རྗེས་ལ་མངོན་པར་རྟོགས་པའི་གནས་སྐབས་ཀྱིས་བསྡུས་པའི་མྱ་ངན་ལས་འདས་པར་བགྲོད་པའི་མངོན་རྟོགས་དེ། ཐེག་ཆེན་སྒོམ་ལམ་གྱི་མཚན་ཉིད། ཐེག་པ་གཞན་གཉིས་ཀྱི་སྒོམ་ལམ་གྱི་མཚན་ཉིད་རིགས་འདྲ་སྦྱར། མཚན་ཉིད་དེ་ལྟར་འཐད་དེ། ཀུན་བཏུས་ས་འགྲེལ་ལས། མྱ་ངན་ལས་འདས་པར་བགྲོད་པའི་གཞི་གང་ཞིག རྗེས་ལ་མངོན་པར་རྟོགས་པའི་གནས་སྐབས་ཀྱི་བསྡུས་པའོ། །ཞེས་དང༌། ཉ་ཊཱིཀ་ལས། ཤེས་བྱ་ཐེག་ཆེན་འཕགས་པའི་སྒོམ་ལམ་གྱི་མཚན་ཉིད། མཐོང་ལམ་གྱི་རྗེས་ཀྱི་ཉོན་མོངས་པའི་ཟག་མེད་ཡེ་ཤེས་གང་ཞིག བྱང་ཆེན་དུ་ཕྱིན་བྱེད་ཀྱི་སློབ་ལམ་མོ། །ཞེས་གསུངས་པའི་ཕྱིར་རོ། ། གཉིས་པ་མཚོན་བྱའི་སྒྲ་བཤད་པ་ནི། རྒྱན་གྱི་ས་འགྲེལ་ལས། ངེས་ཚིག་ནི་ཆོས་ཉིད་མཐོང་ཟིན་གོམས་པར་བྱེད་ཅིང་ཐར་བར་འགྲོ་བའི་གཞི་ཡིན་པས་ན་སྒོམ་ལམ་ཞེས་བྱའོ། །ཞེས་དང༌། ཉ་ཊཱིཀ་ལས། མཐོང་ལམ་གྱིས་མཐོང་བ་ཁོ་ན་རྒྱུན་དུ་གོམས་པར་བྱེད་པས་སྒོམ། ཐར་བར་བགྲོད་པས་ལམ་མོ། །ཞེས་གསུངས་པའི་ཕྱིར་རོ། ། གསུམ་པ་དབྱེ་བ་ནི། ངོ་བོས་ཕྱེ་ན་མཉམ་རྗེས་གཉིས་དང༌། རྣམ་པས་ཕྱེ་ན་ཆེ་འབྲིང་དགུ་དང༌། ཐེག་པས་ཕྱེ་ན་ཉན་ཐོས་ཀྱི་སྒོམ་ལམ་སོགས་གསུམ་དང། ནུས་པས་ཕྱེ་ན་བཞི་སྟེ། ཀུན་བཏུས་ས་འགྲེལ་ལས། ནུས་པས་ཕྱེ་བ་བཞི་ལས། སྦྱོར་བའི་ལམ་གང་ཞེ་ན། ལམ་གང་བསྒོམས་པ་དག་གིས་སྤང་བྱ་ཉོན་མོངས་པ་ཆེན་པོའི་ཆེན་པོ་ལ་སོགས་པའི་ས་བོན་གྱི་ཆ་ཤས་རེ་རེ་དང་བྲལ་བ་ལས་རིམ་གྱིས་གནས་འགྱུར་བའི་ཚུལ་གྱིས་སྤོང་བའི་སྦྱོར་བ་རྩོམ་པའོ། །བར་ཆད་མེད་པའི་ལམ་གང་ཞེ་ན། སྤང་བར་བརྩམས་པ་གང་གི་འོག་ཏུ་གེགས་ཀྱི་བར་ཆད་བྱེད་པ་ནི་དང་པོར་ཉོན་མོངས་པའི་རྣམ་པ་གང་ཡིན་པ་དེའི་ས་བོན་མ་ལུས་པ་དང་བྲལ་བས་ཐམས་ཅད་གནས་གྱུར་པའི་ཚུལ་གྱིས་སྤོང་བའོ། །རྣམ་པར་གྲོལ་བའི་ལམ་གང་ཞེ་ན། ལམ་གང་གིས་སྤང་བྱ་ཉོན་མོངས་པ་ས་བོན་དང་བཅས་པ་མ་ལུས་པར་སྤངས་ནས་ཀྱང་དེའི་སྒྲིབ་པ་ལས་རྣམ་པར་གྲོལ་བའི་གནས་གྱུར་དག་པ་སོ་སོ་རང་རིག་པའི་ཚུལ་གྱིས་མངོན་སུམ་དུ་མྱོང་བར་བྱེད་པའོ། །ཁྱད་པར་གྱི་ལམ་གང་ཞེ་ན། གསུམ་ལས། དང་པོ་སྤང་བྱ་སྤོང་བའི་སྒོ་ནས་གཞག་པ་ནི། བསྡུ་བར་རྣམ་པ་གཞན་གྱིས་སྦྱོར་བའི་ལམ་གང་ཡིན་པ་དེ་ནི་སྔ་མའི་ཁྱད་པར་གྱི་ལམ་མོ་ཞེས་གསུངས་པ་ལྟར་ཉོན་མོངས་པའི་རྣམ་པ་ཆེན་པོ་དེ་ལས་གཞན་ཆེན་པོའི་འབྲིང་བོ་ལ་སོགས་པ་ལ་སྤོང་བའི་སྦྱོར་བ་རྩོམ་པ་དང༌། བརྩམས་པ་སྔར་བར་ཆད་མེད་པ་སྤོང་བ་དང༌། སྤངས་ནས་ཀྱང་རྣམ་པར་གྲོལ་བ་མྱོང་བར་བྱེད་པའི་ལམ་ནི་སྔར་གྱི་སྤོང་བའི་དེ་ལ་ལྟོས་ནས་ཁྱད་པར་གྱི་ལམ་མོ་ཞེས་བྱ་སྟེ་དེ་བཞིན་དུ་གཞན་ལ་ཡང་རིག་པར་བྱའོ། །གཉིས་པ་ཤེས་བྱ་ཤེས་པའི་སྒོ་ནས་གཞག་པ་ནི། ཉོན་མོངས་པ་མ་སྤངས་པ་སྤོང་བའི་སྦྱོར་བ་དེ་རེ་ཞིག་བསལ་ཞིང་བཏང་སྙོམས་སུ་བཞག་ནས་མདོ་ལ་སོགས་པ་གསུང་རབ་ཀྱི་ཆོས་ལ་ཚུལ་བཞིན་སེམས་པའོ། །སྔར་ཞུགས་ཏེ་བསམས་ཤིང་རྟོགས་པའི་ཆོས་ལ་སོ་སོར་རྟོག་པས་གནས་པའམ། སྙོམས་འཇུག་གཞན་ལ་སྙོམས་པར་འཇུག་པའི་ཁྱད་པར་གྱི་ལམ་གང་ཡིན་པའོ། །གསུམ་པ་ཡོན་ཏན་སྒྲུབ་པའི་སྒོ་ནས་གཞག་པ་ནི། ཡང་མངོན་པར་ཤེས་པ་ལ་སོགས་པའི་ཡོན་ཏན་ཁྱད་པར་ཅན་རྣམས་སྔར་མེད་པ་མངོན་པར་སྒྲུབ་པའམ། གྲུབ་ཟིན་པ་ལ་གནས་པའི་ལམ་གང་ཡིན་པའོ། །ཞེས་གསུངས་པས་སོ། །སྒྲས་བརྗོད་ཀྱིས་ཕྱེ་ན་འཇིག་རྟེན་པའི་སྒོམ་ལམ་དང་འདས་ལམ་སྒོམ་ལམ་གཉིས་ཡོད་དེ། ཉ་ཊཱིཀ་ལས། གོམས་པར་བྱ་བའི་ལམ་གང་ཞིག རང་གི་སྤང་བྱ་སྒོམ་སྤང་གི་གཉེན་པོར་གྱུར་པ། སྒོམ་ལམ་ཙམ་གྱི་མཚན་ཉིད་དོ། །སྒོམ་ལམ་གང་ཞིག ཁམས་གསུམ་གྱིས་བསྡུས་པ། འཇིག་རྟེན་སོ་སྐྱེའི་སྒོམ་ལམ་གྱི་མཚན་ཉིད་དོ། །གང་ཞིག ཉོན་མོངས་པའི་ཟག་མེད་ནི། འདས་པའི་མཚན་ཉིད་དོ། །ཞེས་གསུངས་པས་སོ། རང་ལུགས་ལ་སྒོམ་ལམ་ལ་འདས་ལམ་སྒོམ་ལམ་གྱིས་ཁྱབ་ཀྱང་ཀུན་བཏུས་ཀྱི་གསུངས་ཟིན་ལ་སྒོམ་ལམ་བཤད་སྐབས་འཇིག་རྟེན་སྒོམ་ལམ་དང་འདས་ལམ་སྒོམ་ལམ་གཉིས་རིམ་བཞིན་བཤད་པས་ཉ་ཊཱིཀ་སོགས་ལས་དེ་གཉིས་ལ་ཁྱབ་པའི་མཚན་ཉིད་སོགས་བཞག་པར་སྣང་ངོ༌། །