བཞི་པ་གྲོགས།

བཞི་པ་གྲོགས་ནི།

ཤེས་རབ་དང་སེམས་པ་ལ་སོགས་པའོ། ། ལྔ་བ་བྱེད་ལས་ནི། སོམ་ཉི་བཟློག་པ་སྟེ།རང་གི་གྲུབ་མཐའ་ལས་གཞན་གྱིས་འཕྲོག་པར་མི་ནུས་པས་སོ། ། དྲུག་པ་དབྱེ་བ་ནི། སྒོམ་ལམ་མོས་པ་དབྱེ་གཞི། དབྱེ་བ་ནི། དེ་ལ་མོ༷ས་པ༷་ར༷ང་གི༷་དོ༷ན་ད༷ང་ནི༷་ར༷ང་གཞ༷ན་དོ༷ན་དེ་གཉིས་དོན་ད༷ང༌། གཞ༷ན་དོ༷ན་ད༷ང་རྣ༷མ་པ་གསུ༷མ་དུ་ཤེ༷ས་པར་བྱ༷་ཞིང་གསུམ་པོ་དེ༷་རེ་རེ་ཡ༷ང་ནི༷་ཆུ༷ང་ད༷ང་འབྲི༷ང་ད༷ང་ཆེ༷ན་པོ༷་གསུམ་གསུམ་དུ་ཕྱེ་སྟེ༷་སོ༷་སོ༷ར་རྣ༷མ་པ༷་གསུ༷མ་གསུམ་དུ་འདོ༷ད་དོ། །ཆུ༷ང་ངུ་ལ་ཡང་ཆུ༷ང་ངུ༷འི་ཆུ༷ང་ངུ་དང༌། ཆུང་ངུའི་འབྲིང་དང༌། ཆུང་ངུ་ཆེན་པོ་དང༌། འབྲིང་པོའི་ཆུང་ངུ་དང༌། འབྲིང་གི་འབྲིང་དང༌། འབྲིང་གི་ཆེན་པོ་དང༌། ཆེན་པོའི་ཆུང་ངུ་ལ་སོ༷གས་པར་དབྱེ༷་བ༷་ཡི༷ས། ཆུང་ངུ་ལ་སོགས་དེ༷་ཡ༷ང་སོ་སོར་རྣ༷མ་པ་གསུ༷མ་གསུམ་དུ་ཕྱེ་བ་སྟེ་དེ༷་ལྟ༷་ན༷་རང་དོན་དགུ་དང་གཉིས་དོན་དགུ་དང༌། གཞན་དོན་དགུ་སྟེ། བསྡོམས་པས་རྣ༷མ་པ༷་ཉི༷་ཤུ༷་རྩ༷་བདུ༷ན་འདོ༷ད་དོ། །