བདུན་པ་ས་མཚམས།

བདུན་པ་ས་མཚམས་ནི།

སྤྱིར་མོས་པ་ཙམ་ལམ་མ་ཞུགས་སོགས་ན་ཡོད་ཀྱང་མོས་པ་སྒོམ་ལམ་ནི། སྒོམ་ལམ་ཐོབ་མ་ཐག་ནས་རྒྱུན་མཐའི་བར་དུ་ཡོད་དེ། ཉ་ཊཱིཀ་ལས། ཚོགས་སྦྱོར་མཐོང་ལམ་གྱི་སྐབས་རྣམས་ནའང་ཅི་རིགས་པར་ཡོད་པ་ཡིན་ན་ཡང༌། སྐབས་འདིར་བཤད་མོས་པ་ནི། དེ་དག་ན་མེད་དེ། འཕགས་པའི་སྒོམ་པའི་ལམ་གྱི་དབང་དུ་བྱས་པའི་ལམ་ཡིན་པ་ལས་ཏེ་དེའི་ཕྱིར། ཞེས་གསུངས་པས་སོ། །མོས་པའི་དབྱེ་བ་སོགས་དོན་ཚན་དྲུག་གི་སྒོ་ནས་དབུ་མ་མདོ་སྡེ་རྒྱན་ལེའུ་བཅུ་གཅིག་པ་ཡོངས་སུ་ཚོལ་བའི་ལེའུ་ལས་བཤད་པ་ལྟར་ཤེས་པར་བྱའོ། །

གཉིས་པ་མཐའ་རགས་ཙམ་དཔྱད་པ་ལ།

ཁ་ཅིག་མོས་པ་སྒོམ་ལམ་དང་བསྔོ་བ་སྒོམ་ལམ་རྗེས་སུ་ཡི་རང་སྒོམ་ལམ་གསུམ་ལ་ཟག་བཅས་དགོས་པར་ཐལ། ཉ་ཊཱིཀ་ལས། དགེ་བ་གསོག་བྱེད་ཀྱི་ཐེག་ཆེན་སྒོམ་ལམ་མོས་པའི་མཚན་ཉིད། འཕགས་པའི་སྒོམ་ལམ་ཟག་བཅས་གང་ཞིག ཡུམ་ཤེར་ཕྱིན་ཡོན་ཏན་ཅན་ལ་ཡོན་ཏན་ཅན་དུ་ངེས་ནས་འཛིན་པ་སྟེ། ཞེས་སོགས་ཀྱིས་མོས་བསྔོ་སོགས་ཀྱི་མཚན་ཉིད་ཀྱི་ཟུར་ལ་ཟག་བཅས་སྒོམ་ལམ་ཞེས་བཤད་པ་དང༌། དེ་ལས། གཟུང་འཛིན་དུ་སྣང་བའི་རྟོག་པའི་ཟག་བཅས་དང་དེ་མེད་པ་ཟག་པ་མེད་པའི་བྱེ་བྲག་གིས་རྣམ་པ་གཉིས་སོ། །ཞེས་གསུངས་པའི་ཕྱིར་ཟེར་ན། དེ་དག་ལ་ཟག་བཅས་དགོས་པ་མི་རིགས་ཏེ། མདོ་ལུགས་མ་ལས། མོས་བསྔོ་དང་རྗེས་སུ་ཡི་རང་འདི་དག་ཟག་བཅས་སུ་འཆད་པ་ནི་མདོ་དང་འགལ་ཞིང་ཟག་བཅས་བཏགས་པ་པར་བཤད་པ་ལ་ཡང་དགོས་པ་མེད་དོ། །མདོ་ལས་མོས་སོགས་འདི་དག་ཟག་པ་མེད་པ་དང༌། མཚན་མ་མེད་པ་དང༌། དམིགས་པ་མེད་པ་དང༌། ཁམས་གསུམ་ལས་འདས་པར་གསུངས་པའི་ཕྱིར་རོ། །ཞེས་གསུངས་པའི་ཕྱིར་ཟེར་ན། དེ་དག་གི་མཚན་ཉིད་ཀྱི་ཟུར་གྱི་ཟག་བཅས་དང་སྤྱིར་ཟག་བཅས་འདྲ་བ་ཡིན་མིན་དང༌། དེ་དག་ལ་གཟུང་འཛིན་དུ་སྣང་བའི་རྟོག་པས་ཁྱབ་པ་ཡོད་མེད་དང༌། དེ་དག་མཉམ་བཞག་ན་ཡོད་མེད་དང༌། མོས་པ་སྒོམ་ལམ་གྱི་ཡུལ་ལ་ཡུམ་གྱི་ཁྱབ་པ་ཡོད་མེད་རྣམས་ལེགས་པར་དཔྱད་པར་བྱའོ། །ཡང་ཉ་ཊཱིཀ་ལས། དབྱེ་ངོ་ནི། རང་དོན་དངོས་སུ་སྒྲུབ་ཅིང་གཞན་དོན་ཆེད་དུ་བྱ་བས་བསྒྲུབ་པའི་སྒོམ་ལམ་ཟག་བཅས་རང་གི་དོན་གྱི་མོས་པ་དང༌། གཉིས་དོན་སྦྱོར་བ་བར་བཅས་སུ་བསྒྲུབ་པའི་སྒོམ་ལམ་ཟག་བཅས་རང་གཞན་གཉིས་ཀའི་དོན་གྱི་མོས་པ། གཞན་དོན་ཁོ་ན་སྦྱོར་བ་བར་མེད་དུ་བསྒྲུབ་པའི་སྒོམ་ལམ་ཟག་བཅས་གཞན་དོན་མོས་པ་དང་རྣམ་པ་གསུམ་དུ་ཤེས་པར་བྱའོ། །ཞེས་གསུངས་པའི་སྒོ་ནས་མོས་པ་སྒོམ་ལམ་ལ་གཞན་དོན་ཁོ་ན་ལ་སྦྱོར་བས་ཁྱབ་པ་ཡོད་མེད་དང༌། གཉིས་དོན་མོས་པ་ལ་སྦྱོར་བ་བར་བཅས་དང༌། གཞན་དོན་མོས་པ་ལ་བར་མེད་དུ་བསྒྲུབ་པས་ཁྱབ་པ་ཡོད་མེད་དཔྱད་དགོས་སོ། །ཡང་མོས་པ་སྒོམ་ལམ་གྱི་ཕན་ཡོན་སྟོན་བྱེད་ལས་མོས་པ་སྒོམ་ལམ་སྟོན་བྱེད་ཀྱི་མདོ་ལོགས་སུ་མེད་པར་ཐལ། མདོ་ལུགས་མ་ལས། ཤེར་ཕྱིན་ལ་བསྟོད་བཀུར་བསྔགས་པ་ལས་མོས་པ་སྟོན་པའི་མདོ་གུད་དུ་བཙལ་པར་མི་བྱ་སྟེ། གང་དང་གང་ལ་མོས་པ་ནི་སེམས་ཀྱི་འགྱུ་བ་ཡིན་པས་དེ་དང་དེ་བསྟོད་སོགས་ཀྱི་སྒོ་ནས་དེ་དང་དེ་ལ་མོས་པར་གཞན་གྱིས་ཤེས་དགོས་པའི་ཕྱིར་རོ། །དཔེར་ན་འཇིག་རྟེན་ན་ཡང་བསྟོད་ར་དང་བཀུར་སྟི་ལ་སོགས་པའི་སྒོ་ནས་མོས་གུས་ཆེ་ཆུང་གཞན་གྱིས་རིག་པ་བཞིན་ནོ། །ཞེས་གསུངས་པའི་ཕྱིར་ཟེར་ན་དེ་ལ་དཔྱད་པར་བྱ་བ་འདི་ཡོད་དེ། ཆོས་རྗེ་ཀུན་མཁྱེན་གྱི་སྟོང་ཕྲག་ཉི་ཤུ་ལྔ་བའི་བཤད་པ་ལས། རང་གི་དོན་གྱི་མོས་པ་ཆུང་ངུའི་ཆུང་ངུ་ནི། བརྒྱ་བྱིན་གྱིས་གསོལ་པ། ཞེས་པ་ནས། བྱེ་བྲག་མི་དམིགས་སོ། །དེ་རྣམས་ཀྱིས་ནི་མོས་པ་དང༌། ཞེས་དོན་དྲུག་པ་གསུང་ཟིན་ཏོ། །ཞེས་དང༌། བསྟོད་པ་དང་པོ་ནི། ཞེས་པ་ནས། ལེའུ་སྟེ་ཉི་ཤུ་གསུམ་པའོ། །དེ་རྣམས་ཀྱིས་ནི། བསྟོད་དང་བཀུར་དང་བསྔགས་པ་དང༌། །ཞེས་པ་དོན་བདུན་པ་བཤད་ཟིན་ཏོ། །ཞེས་གསུངས་པའི་ཕྱིར་ཟེར་ན། ལུང་སྔ་མའི་དོན་ནི། བསྟོད་བཀུར་བསྔགས་པ་ལས་མོས་པ་གོ་བྱེད་ལ་སྐབས་འདིར་རྟགས་གཞན་སྟོན་པའི་མདོ་མེད་པའི་དོན་ཡིན་པར་སྣང་ངོ༌། །