བཞི་བ་སྒྲུབ་པ་སྒོམ་ལམ་བཤད་པ།

བཞི་བ་སྒྲུབ་པ་སྒོམ་ལམ་བཤད་པ་ལ།

རྩ་བར། དེ་ཡི་ངོ་བོ་ཉིད་མཆོག་ཉིད། །ཀུན་ལ་མངོན་པར་འདུ་མི་བྱེད། །ཆོས་རྣམས་དམིགས་པ་མེད་པར་ནི། །གཏོད་པར་བྱེད་པ་དོན་ཆེན་ཉིད། །ཅེས་སོ། །དེ་ལ་སྤྱི་དོན་དང༌། མཐའ་རགས་ཙམ་དཔྱད་པ་གཉིས་སོ། །དང་པོ་ལ། མཚན་ཉིད། དབྱེ་བ། ས་མཚམས་གསུམ། དང་པོ་ནི། མཉམ་བཞག་ཡེ་ཤེས་སུ་གྱུར་པའི་ཐེག་ཆེན་སྒོམ་ལམ་དེ། ཐེག་ཆེན་སྒྲུབ་པ་སྒོམ་ལམ་གྱི་མཚན་ཉིད་ཡིན་ཏེ། ཉ་ཊཱིཀ་ལས། འོན་ཀྱང་སྒྲུབ་པ་ནི་ས་དགུའི་མཉམ་གཞག་དང༌། རྣམ་དག་ནི་ས་བཅུ་གཅིག་གི་སྤངས་པ་འགོག་བདེན་ཡིན་གྱི་སྒོམ་ལམ་དངོས་མིན་ཞེས་པ། མདོ་དང་རྗེ་བཙུན་གྱི་དགོངས་པའོ། །ཞེས་དང༌། སྔོན་མེད་ལེགས་བཤད་ལས། འདི་ནི་མཉམ་བཞག་སྒྲུབ་པ་སྒོམ་ལམ་ཞེས་བྱ་ཞིང༌། རྗེས་ཐོབ་ཏུ་མོས་པ་དང༌། ཞེས་སོགས་གསུངས་པའི་ཕྱིར་རོ། །

གཉིས་པ་དབྱེ་བ་ནི།

ས་བཅུའི་སྒྲུབ་པ་སྒོམ་ལམ་བཅུ་དང༌། ཡང་ན་ཐེག་ཆེན་སྒོམ་ལམ་བར་ཆད་མེད་ལམ་དང༌། རྣམ་གྲོལ་ལམ་དང་མཉམ་བཞག་ཕུང་སུམ་པ་དང་གསུམ་ཡོད་དོ། །

གསུམ་པ་ས་མཚམས་ནི། ས་དང་པོའི་སྒོམ་ལམ་ཐོབ་པ་ནས་རྒྱུན་མཐའི་བར་དུ་ཡོད་དོ། །

གཉིས་པ་མཐའ་རགས་ཙམ་དཔྱད་པ་ལ།

སྒྲུབ་པ་སྒོམ་ལམ་ལ་བར་ཆད་མེད་ལམ་གྱིས་ཁྱབ་པར་ཐལ། ཉ་ཊཱིཀ་ལས། ཐེག་ཆེན་གྱི་སྒྲུབ་པ་སྒོམ་ལམ་གྱི་མཚན་ཉིད། ཐེག་ཆེན་འཕགས་པའི་ཟག་མེད་སྒོམ་ལམ་གང་ཞིག་བར་ཆད་མེད་ལམ་དུ་གྱུར་པའོ། །ཞེས་གསུངས་པའི་ཕྱིར་ཟེར་ན་དེ་ནི་སེང་བཟང་གི་ལུགས་ཡིན་པར་སྣང་ངོ༌། །ལུས་རྣམ་བཞག་གི་སྐབས་ཉ་ཊཱིཀ་ལས། དེའི་ཁྱད་ཆོས་ལྔ་ཡོད་དོ། །ཞེས་གསུངས་པ་དང༌། སྐབས་འདིར་ཉ་ཊཱིཀ་ལས། དེ་སྒྲུབ་པ་སྒོམ་ལམ་གྱི་ངོ་བོ་དང༌། ལྷག་པ་བཞི་ཁྱད་ཆོས་ཡིན་ནོ། །ཞེས་གསུངས་པའི་དོན་མཐུན་པ་ཡིན་ནམ་དཔྱད། སྐབས་འདིར་མདོ་ལུགས་མ་ལས། ཤེར་ཕྱིན་ཟབ་མོ་དེ༷འི༷་ངོ་བོ་ནི་སྐྱོན་དང་མུན་པ་ཐམས་ཅད་བསལ་བས་ཤིན་ཏུ་རྣམ་པར་དག་ཅིང་སྣང་བར་བྱེད་པའི་ངོ༷་བོ༷་ཉི༷ད་དང༌། ཤེར་ཕྱིན་དེ་ཕར་ཕྱིན་གཞན་རྣམས་དང་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་ནང་ནས་མཆོ༷ག་ཉི༷ད་དང༌། གཟུགས་སོགས་སྒྲུབ་པ་མེད་པ་ནི་གཟུགས་སོགས་ཀུ༷ན་ལ༷་མངོ༷ན་པ༷ར་འདུ༷་མི༷་བྱེ༷ད་ཅིང་ཆོས་གང་ཡང་ཐོབ་པར་མི་བྱེད་པའི་ཤེར་ཕྱིན་དེ་བསྒྲུབ་པ་དང༌། ཤེར་ཕྱིན་དེས་དམིགས་པའི་ཚུལ་གྱིས་ཆོས་གང་ཡང་ཐོབ་པར་མི་བྱེད་ཀྱི། ཆོ༷ས་རྣ༷མས་དམི༷གས་པ༷་མེད༷་པ༷ར་རྣལ་འབྱོར་པའི་རྒྱུད་གང་ཡིན་པ་དེ་ལ་ཅི་གཏོ༷ད་ཅིང་ཐོབ་པ༷ར་བྱེ༷ད་པ༷་དང༌། བྱང་ཆུབ་སེམས་དཔའ་ཤེར་ཕྱིན་ལ་ཡིད་ཆེས་པས་གཟུགས་སོགས་བཏགས་པའི་ཆོས་ཐམས་ཅད་ལ་ཡིད་མི་ཆེས་ཤིང༌། བཏགས་པའི་ཆོས་ཐམས་ཅད་མི་དམིགས་པས་ཤེར་ཕྱིན་ལ་ཡིད་ཆེས་པའི་ཕྱིར་ཤེར་ཕྱིན་དེ་ནི་དོ༷ན་དམ་ཆེ༷ན་པོ་ཉི༷ད་ཡིན་ནོ། །ཞེས་ཤེར་ཕྱིན་ཟབ་མོའི་ངོ་བོ་དང༌། ཤེར་ཕྱིན་དེ་ཆོས་རྣམས་ཀྱི་ནང་ནས་མཆོག་ཉིད་སོགས་ཤེར་ཕྱིན་ཟབ་མོ་ལ་སྦྱར་ནས་གསུངས་ལ། མདོ་ལུགས་མའི་གསུང་ཟིན་ལ་ཤེར་ཕྱིན་ནི་རང་བཞིན་ཤེར་ཕྱིན་ལ་བཤད་པས་སྐབས་འདིའི་རྩ་བས་སྒྲུབ་པ་སྒོམ་ལམ་བསྟན་ཚུལ་གང་ཡིན་ཚོལ་དགོས་སོ། །འོན་ཀྱང་ཉ་ཊཱིཀ་ལས་སྒྲུབ་པ་སྒོམ་ལམ་གྱི་ངོ་བོ་དང་དེའི་ཁྱད་ཆོས་བཞི་ལ་བཤད་དེ། དེ་ལས། རྩ་འགྲེལ་གཉིས་ལ། ཐེག་ཆེན་གྱི་སྒྲུབ་པ་སྒོམ་ལམ་ཆོས་ཅན། དེའི་ངོ་བོ་ཡེ་ཤེས་ཀྱི་ངོ་བོ་ཉིད་ཡིན་ཏེ། གཟུགས་ལ་སོགས་པའི་ཆོས་ཐམས་ཅད་བདེན་དངོས་ཀྱིས་སྟོང་བར་ཕྱིན་ཅི་མ་ལོག་པར་མཐོང་བའི་ཟག་མེད་ཀྱི་ཤེས་རབ་ཡིན་པས་སོ། །ཤེར་པ་ནི་རྣམ་པར་དག་པས་ན་སྣང་བ་བགྱིད་པའོ། །ནས། དངོས་པོ་མེད་པའི་ངོ་བོ་ཉིད་སྟོང་བ་ཉིད་ཀྱི་སླད་དུ་ཆོས་ཐམས་ཅད་ཀྱི་ངོ་བོ་ཉིད་སྟོན་པའོ། །ཞེས་པའི་བར་རོ། །དེ་སྒྲུབ་པ་སྒོམ་ལམ་གྱི་ངོ་བོ་དང༌། ལྷག་པ་བཞི་ཁྱད་ཆོས་ཡིན་ནོ། །ཞེས་སོགས་གསུངས་སོ། །སྐབས་འདིར་མདོ་ལུགས་མ་ལྟར་ན་སངས་རྒྱས་བསྟེན་དང་སྦྱིན་སོགས་དང༌། །ཞེས་སོགས་ཚིགས་སུ་བཅད་པ་གཉིས་སྒྲུབ་པ་སྒོམ་ལམ་བཤད་པའི་ས་ཁོངས་སུ་བསྡུས་ནས་ཤེར་ཕྱིན་ལ་མོས་པའི་རྒྱུ་སོགས་བཤད་དེ། མདོ་ལུགས་མ་ལས། ཤིན་ཏུ་ཟབ་པས་མོས་པར་དཀའ་བའི་ཤེར་ཕྱིན་དེ་ལ་མོས་པའི་རྒྱུ་གང་ཞེ་ན། སངས་རྒྱས་བསྟེན་དང་སྦྱིན་སོགས་དང༌། །ཐབས་ལ་མཁས་པ་གང་ཡིན་པ། །འདི་ལ་མོས་པའི་རྒྱུ་དག་ཡིན། །ཞེས་སེམས་དང་པོ་བསྐྱེད་ཕྱིན་ཆད་དགེ་བའི་བཤེས་གཉེན་སངས་རྒྱས་གྲངས་མེད་པ་བསྟེན་ཅིང་བསྙེན་བཀུར་བ་དང༌། སྦྱིན་སོགས་ཕ་རོལ་ཕྱིན་དྲུག་སྤྱད་པ་ནི། བསྐལ་པ་དཔག་ཏུ་མེད་པ་ནས་བླ་མེད་བྱང་ཆུབ་ཏུ་ཞུགས་པའི་བྱང་ཆུབ་སེམས་དཔའ་ཤེར་ཕྱིན་ཟབ་མོ་འདི་ལ་མོས་རྒྱུ་དང༌།སྦྱིན་སོགས་ལ་མི་དམིགས་པའི་ཚུལ་གྱིས་བརྩོན་ཅིང་ཆོས་ཐམས་ཅད་ཀྱི་འཕེལ་འགྲིབ་མ་མཐོང་བའི་ཐབས་ལ་མཁས་པ་གང་ཡིན་པ། དེ་ནི་བྱང་ཆུབ་སེམས་དཔའ་དབང་རྣོན་ལ་ལས་སེམས་དང་པོ་བསྐྱེད་མ་ཐག་ནས་ཤེར་ཕྱིན་ཟབ་མོ་འདི་ལ་མོས་པའི་རྒྱུ་དག་ཡིན་ནོ། །འོ་ན་མ་མོས་ཤིང་ཤེར་ཕྱིན་ཟབ་མོའི་ཆོས་ཀྱིས་ཕོངས་པའི་རྒྱུ་གང་ཡིན་ཞེ་ན། ཆོས་ཀྱིས་ཕོངས་པའི་རྒྱུ་དག་ནི། །བདུད་ཀྱི་ཐིབས་ཀྱིས་ནོན་པ་དང༌། །ཟབ་མོའི་ཆོས་ལ་མ་མོས་དང༌། །ཕུང་པོ་ལ་སོགས་མངོན་ཞེན་དང༌། །སྡིག་པའི་གྲོགས་པོས་ཡོངས་ཟིན་པའོ། །ཞེས་པ་འདིས་དམ་པའི་ཆོས་སྤོང་བ་ལ་སོགས་པའི་རྒྱུ་བཞི་བསྟན་ཏེ། བདུད་ཀྱི་ཐིབས་ཀྱིས་ནོན་ཞིང་བྱིན་གྱིས་བརླབས་པ་དང༌། དེ་བཞིན་ཉིད་ལ་སོགས་པ་ཡོངས་གྲུབ་ཟབ་མོའི་ཆོས་ལ་ཡིད་མ་ཆེས་ཤིང་མ་མོས་པ་དང༌། ཕུང་པོ་ལ་སོགས་པ་ལ་བདེན་པའི་དངོས་པོར་མངོན་པར་ཞེན་པ་དང༌། སྡིག་པའི་གྲོགས་པོས་ཡོངས་སུ་ཟིན་པ་དང་བཞིའོ། །མདོ་ལས། ཕུང་པོ་ལ་སོགས་མངོན་པར་ཞེན་པ་དང༌། སྡིག་པའི་གྲོགས་པོས་ཟྀན་པ་གཉིས་གཅིག་ཏུ་བྱས་ནས། བདག་བསྟོད་ཅིང་གཞན་སྨོད་པ་ལ་རྒྱུ་བཞི་པར་བྱས་སོ། །བདུད་ཀྱིས་བྱིན་གྱིས་བརླབས་པའི་ངོ་བོ་ནི་བདུད་ལས་འབའ་ཞིག་ལ་དགའ་བའི་སེམས་ཡིན་ནོ། །སྡིག་པའི་གྲོགས་པོས་ཟིན་པའི་ངོ་བོ་ཡང་ཆོས་སྤོང་ལ་སོགས་པའི་སྡིག་པའི་གྲོགས་དེས་ཇི་ལྟར་བསྟན་པ་བཞིན་ཉམས་སུ་ལེན་པའི་སེམས་ཡིན་ནོ། །ཤེར་ཕྱིན་ཟབ་མོ་ལ་མོས་མ་མོས་ཀྱི་རྒྱུ་སྟོན་པའི་སྐབས་དོན་ལས་གྲོལ་པའི་བཤད་པ་བྱས་ཡོད་དོ། །འདི་དག་ཉི་ཁྲིའི་ལེའུ་ཉེར་དྲུག་པའི་ཕྱེད་སྔ་མས་སྟོན་ནོ། །ཞེས་གསུངས་པའི་ཕྱིར་རོ། །ཉ་ཊཱིཀ་ལས་ཚིགས་སུ་བཅད་པ་གཉིས་པོ་འདི་རྣམ་དག་འཆད་པའི་ས་ཁོངས་ལ་མར་སྦྱར་ནས་བཤད་དེ། དེ་ལས། གཉིས་པ་ལ། དེའི་མཐུན་རྐྱེན་འགལ་རྐྱེན་བཤད། འབྲས་བུ་རྣམ་པར་དག་པ་བཤད་པའོ། །ཞེས་སོགས་གསུངས་པའི་དགོངས་པ་ཚོལ་དགོས་སོ། །ཡང་ཉ་ཊཱིཀ་ལས། མོས་པའི་རྒྱུར་བཤད་པས་རྣམ་དག་གི་ཡང་རྒྱུར་གྲུབ་ཀྱི། མོས་པ་ཞེས་པ་རྣམ་དག་ལ་འཆད་པ་ནི་ནོར་བ་ཁོ་ནའོ། །ཞེས་མོས་པའི་རྒྱུར་བཤད་པས་རྣམ་དག་གི་རྒྱུར་གྲུབ་ཚུལ་དང༌། རྣམ་དག་གི་རྒྱུ་ཡོད་མེད་དཔྱད། ཡང་ཉ་ཊཱིཀ་ལས། སྤྱིར་བདུད་ནི་དྲི་མ་དང་བཅས་པའི་སེམས་མ་དག་པ་ལ་གསུངས་ཀྱང༌། འདིར་ནི་གཞན་འཕྲུལ་དབང་བྱེད་ཀྱི་བདག་པོ་བདུད་སྡིག་ཅན་གྱྀ་ཐིབས་ཀྱིས་ནོན་པ་སྟེ་བྱིན་གྱིས་བརླབས་པ་སྟེ། ཞེས་གསུངས་པ་ལ་དྲི་བཅས་ཀྱི་སེམས་ཡིན་ན་བདུད་ཡིན་པས་ ཁྱབ་པ་ཡོད་མེད་དཔྱད་པར་བྱའོ། །