གཉིས་པ་ཤེར་ཕྱིན་ཟབ་མོ་དེ་ལ་རིང་བ་དང་ཉེ་བའི་ཁྱད་པར་བཤད་པ།

གཉིས་པ་ཤེར་ཕྱིན་ཟབ་མོ་དེ་ལ་རིང་བ་དང་ཉེ་བའི་ཁྱད་པར་བཤད་པ་ལ།

རྩ་བར། དེ་ནི་མཚན་མར་དམིགས་སྒོ་ནས། །ཐབས་མ་ཡིན་པས་རིང་བ་སྟེ། །དེ་ནི་ཐབས་ལ་མཁས་པ་ཡིས། །ཡང་དག་ཉེ་བ་ཉིད་དུ་བཤད། །ཅེས་སོ། །དེ་ལ་སྤྱི་དོན་དང་མཐའ་རགས་ཙམ་དཔྱད་པ་དང་གཉིས། དང་པོ་ལ་མཚན་ཉིད། དབྱེ་བ། ས་མཚམས་གསུམ། དང་པོ་ནི། མཚན་འཛིན་གྱིས་བཅིང་བའི་ཐེག་དམན་གྱི་གཞི་ཤེས་དེ། ཤེར་ཕྱིན་ལ་རིང་བའི་གཞི་ཤེས་ཀྱི་མཚན་ཉིད། ཐེག་ཆེན་གྱི་ཐབས་ཤེས་ཁྱད་པར་ཅན་གྱི་གཞི་ཤེས་དེ། ཤེར་ཕྱིན་ལ་ཉེ་བའི་གཞི་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། གསུམ་པ་འབྲས་ཡུམ་བསྐྱེད་པའི་ཐབས་མ་ཡིན་པས་འབྲས་ཡུམ་ལ་རིང་བའི་གཞི་ཤེས་ཀྱི་མཚན་ཉིད། མིང་དང་དངོས་པོའི་མཚན་མར་འཛིན་པའི་གཞི་ཤེས། བཞི་པ་འབྲས་ཡུམ་བསྐྱེད་པའི་ཐབས་སུ་གྱུར་པ་ཉིད་ཀྱིས་འབྲས་ཡུམ་ལ་རིང་བ་མིན་པའི་མཚན་ཉིད། ཐེག་ཆེན་གྱི་ཐབས་ཤེས་རབ་ཁྱད་པར་ཅན་གྱི་གཞི་ཤེས། ཞེས་གསུངས་པའི་ཕྱིར་རོ། །

གཉིས་པ་དབྱེ་བ་ནི།

ཤེར་ཕྱིན་ལ་རིང་བའི་གཞི་ཤེས་ལ་ཉན་རང་གི་རྒྱུད་ཀྱི་གཞི་ཤེས་གཉིས། ཤེར་ཕྱིན་ལ་ཉེ་བའི་གཞི་ཤེས་ལ་རང་ཡིན་གྱི་ཐབས་ཤེས་གཉིས་སོ། །

གསུམ་པ་ས་མཚམས་ནི། འབྲས་ཡུམ་ལ་རིང་བའི་གཞི་ཤེས་ནི། ཉན་རང་ཚོགས་ལམ་ནས་དམན་པའི་དགྲ་བཅོམ་ལྷག་མེད་པའི་བར་རོ། །

གཉིས་པ་མཐའ་རགས་ཙམ་དཔྱད་པ་ལ།

ཤེར་ཕྱིན་ལ་རིང་བའི་གཞི་ཤེས་ཉན་རང་ཁོ་ནའི་རྒྱུད་ལ་ཡོད་པ་མི་འཐད་པར་ཐལ། དེ་བྱང་སེམས་ཀྱི་རྒྱུད་ལ་ཡོད་པའི་ཕྱིར་ཏེ། མདོ་ལུགས་མ་ལས། མིང་དང་མཚན་མ་ལ་ཆགས་པའི་བྱང་ཆུབ་སེམས་དཔའ་དེ༷་ནི༷་ཤེར་ཕྱིན་ལ་མཚ༷ན་མ༷ར་དམི༷གས་པའི་སྒོ༷་ན༷ས་ཐ༷བས་ལ་མཁས་པ་མ༷་ཡི༷ན་པ༷ས། དུས་གསུམ་མཉམ་ཉིད་ཀྱི་ཤེར་ཕྱིན་དེ་རི༷ང་དུ་སྤོང་བ༷་སྟེ༷། ཤེར་ཕྱིན་དེའི་མི་མཐུན་ཕྱོགས་ལ་ཞུགས་པའི་ཕྱིར་རོ། །ཅིར་ཡང་མི་ཞེན་ཅིང་མི་རྟོག་པའི་ཚུལ་གྱིས་དུས་གསུམ་གཅིག་ཆར་ཤེས་པའི་བྱང་ཆུབ་སེམས་དཔའ་དེ༷་ནི༷་སྲིད་ཞི་དང་དུས་གསུམ་པ་མཉམ་པ་ཉིད་ཤེས་པའི་ཤེར་ཕྱིན་དང༌། ཉེ་བའི་ཐ༷བས་ལ༷་མཁ༷ས་པ༷་ཡི༷ས། ཤེར་ཕྱིན་དེ་དང་ཡ༷ང་ད༷ག་པར་ཉེ༷་བ༷་ཉི༷ད་དུ༷་བཤ༷ད་དོ། །ཞེས་དང༌། སྔོན་མེད་ལེགས་བཤད་ལས། གཉེན་པོའི་གཞི་ཤེས་ནི། མཁྱེན་གསུམ་གྱིས་ཟླས་ཕྱེ་བའི་གཞི་ཤེས་དངོས་སམ་བཏགས་པ་བ་གང་དུ་བཞག་ན་ལེགས་ཞེས་དཔྱོད་ལྡན་རྣམས་ཀྱིས་རྣམ་པར་དཔྱོད་ཅིག་དང༌། གཞི་ཤེས་ཀྱི་སྐབས་ཀྱི་མདོ་དང་བསྟན་བཅོས་ཀྱི། གཞུང་གི་དངོས་བསྟན་གྱི་བརྗོད་བྱའི་གཙོ་བོ་གཞི་ཤེས་ནི་གཉེན་པོའི་གཞི་ཤེས་འདི་ཁོ་ན་ཡིན་ལ། གཞུང་གི་དངོས་བསྟན་ལྟར་ན། མི་མཐུན་ཕྱོགས་ཀྱི་གཞི་ཤེས་ཀྱང་ཉན་རང་གི་དེ་གཙོ་མི་ཆེ་སྟེ། གཙོ་བོར་བྱང་ཆུབ་སེམས་དཔའ་སོ་སོ་སྐྱེ་བོ་དམིགས་པའི་ལྟ་བ་ཅན་རྣམས་ཡིན་ནོ། །ཞེས་གསུངས་པའི་ཕྱིར་ཟེར་ན། མ་ཁྱབ་པ་འདྲ་སྟེ། མི་མཐུན་ཕྱོགས་ཀྱི་གཞི་ཤེས་དངོས་བྱང་སེམས་ཀྱི་རྒྱུད་ལ་མེད་མོད་བྱང་སེམས་ཀྱི་རྒྱུད་ཀྱི་མཚན་འཛིན་གྱིས་བཅིང་བའམ་མཚན་མར་དམིགས་པའི་ལྟ་བ་ནི་ཐབས་ལ་མི་མཁས་པས་ཤེར་ཕྱིན་ལ་རིང་བྱེད་ཡིན་པར་བསྟན་ཏོ། །སྐབས་འདི་དག་ཏུ་འབྲས་ཡུམ་ལ་ཉེ་བའི་གཞི་ཤེས་དང་གཉེན་པོའི་གཞི་ཤེས་ལ་གཞི་ཤེས་མཚན་ཉིད་པ་མི་དགོས་ཏེ། མཁས་པ་འགའ་ཞིག་ལྟར་གཞི་ཤེས་མཚན་ཉིད་པ་དང་ཐེག་དམན་གྱི་རྟོགས་རིགས་ཞིག་མི་དགོས་པར་ལམ་རང་གི་གོལ་སའི་གཞི་ཤེས་ཀྱིས་མིང་གིས་དེ་དག་བཏགས་པའི་ཕྱིར་ཏེ། ཉ་ཊཱིཀ་ལས། གཉེན་པོ་གཞི་ཤེས་ཞེས་པ་ནི་སྤང་བྱའི་མིང་གིས་བཏགས་པ་སྟེ་འདོད་ཁམས་ཀྱི་ལམ་བདེན་བཞིན་ནོ། །ཞེས་གསུངས་སོ། །འབྲས་ཡུམ་ལ་རིང་བའི་གཞི་ཤེས་ཡིན་ན་བློ་དོན་མི་མཐུན་ཡིན་དགོས་པར་ཐལ། མཚན་འཛིན་གྱི་བློ་ཡིན་དགོས་པའི་ཕྱིར། ཉ་ཊཱིཀ་ལས། གཟུང་འཛིན་གྱིའམ་མིང་དང་དངོས་པོའི་མཚན་མར་དམིགས་པ་ཡིན་པའི་སྒོ་ནས་སོ། །མིང་ལས་ཀྱང་ཆགས་སོ། །མཚན་མ་ལས་ཀྱང་ཆགས་སོ། །ཞེས་སོ། །ཞེས་དང༌། རྒྱུ་མཚན་ནི། དེས་སྤང་བར་བྱ་བ་ཡིན་པའི་ཕྱིར། དེར་ཐལ། ཅི་རིགས་པར་བདག་འཛིན་སོགས་དང་སེར་སྣ་ལ་སོགས་པ་དེ་དག་གི་གཉེན་པོར་འགྱུར་སྲིད་པ་ཡིན་ན་ཡང་དེ་ལས་འཛིན་སྟངས་ཕྱིན་ཅི་ལོག་ཏུ་ཞུགས་པའི་འཛིན་པ་ཡིན་པ་ཉིད་ཀྱིས་སོ། །དེའི་རྒྱུ་མཚན་མཚན་མར་འཛིན་པའི་བློ་ཡིན་པས་སོ། །ཁྱབ་སྟེ། བྱང་པའི་ལམ་སྤྲོས་པ་དང་མཚན་མ་ཐམས་ཅད་མི་དམིགས་པའི་ཕྱིར་རོ། །ཞེས་དང༌། གཞི་ཤེས་ཀྱི་མཚན་ཉིད་ཀྱི་ཟུར་ལ་ཉ་ཊཱིཀ་ལས། མཚན་འཛིན་གྱི་བློ། ཞེས་གསུངས་པའི་ཕྱིར་ཟེར་ན་གཞི་ཤེས་ཀྱི་མཚན་ཉིད་ཀྱི་ཟུར་ལ་མཚན་འཛིན་གྱི་བློ་ཞེས་པ་དང༌། སྤྱིར་མཚན་འཛིན་གྱི་བློ་གཉིས་མི་འདྲ་བར་སྣང་སྟེ། སྤྱིར་མཚན་འཛིན་གྱི་བློ་ནི་བློ་དོན་མི་མཐུན་ཆོས་ཀྱི་བདག་འཛིན་ཞིག་དགོས་ལ། སྐབས་འདི་དག་ཏུ་མཚན་འཛིན་གྱི་བློ་ནི་སྔ་མའི་མཚན་འཛིན་གྱི་དབང་གིས་ཡུལ་མཚན་མར་སྣང་བ་དང་དེའི་རྩིས་ཟིན་པའི་བློ་ལ་བྱེད་པ་འདྲ་ལ། དཔེར་ན་དོན་སྤྱི་སྣང་བའི་རྟོག་པ་ལ་སྤྱི་འཛིན་རྟོག་པ་དང༌། སྒྲ་དོན་འཛིན་པའི་རྟོག་པ་ཞེས་བརྗོད་པ་བཞིན་ནོ། ། གསུམ་པ་མི་མཐུན་ཕྱོགས་དང་གཉེན་པོའི་གཞི་ཤེས་བཤད་པ་ལ། མདོ་ལས། གཟུགས་སྟོང་ཞེས་བྱ་བར་འདུ་ཤེས་ན་ཆགས་པའོ། །ཞེས་སོགས་དང༌། དུས་གསུམ་གྱི་ཆོས་རྣམས་ལ་འདས་པ་དང༌། མ་འོངས་པ་དང༌། ད་ལྟར་བྱུང་བའི་ཆོས་ཞེས་བྱ་བར་འདུ་ཤེས་ན་ཆགས་པའོ། །ཞེས་དང༌། དམིགས་པའི་ཚུལ་གྱིས་སྦྱིན་སོགས་དང༌། དྲན་པ་ཉེར་བཞག་སོགས་ལ་སྤྱོད་ན་ཆགས་པའོ། །ཞེས་པའི་དོན་རྩ་བར། གཟུགས་སོགས་ཕུང་པོ་སྟོང་ཉིད་དང༌། །དུས་གསུམ་གཏོགས་པའི་ཆོས་རྣམས་དང། ། སྦྱིན་སོགས་བྱང་ཆུབ་ཕྱོགས་རྣམས་ལ། །སྤྱོད་པའི་འདུ་ཤེས་མི་མཐུན་ཕྱོགས། །ཞེས་དང༌། མདོ་ལས། ཐབས་ལ་མཁས་པའི་བྱང་ཆུབ་སེམས་དཔའ་ཤེར་ཕྱིན་ལ་སྤྱོད་པ་ནི་འདི་སྙམ་དུ། བདག་གིས་སྦྱིན་པ་ཞིག་སྦྱིན་ནོ། །འདི་ལ་སྦྱིན་ནོ། །འདི་ལྟ་བུ་ཞིག་སྦྱིན་ནོ་སྙམ་དུ་སེམས་པ་མེད་དོ། །ཞེས་སོགས་ཀྱི་དོན་ནི། རྩ་བར། སྦྱིན་ལ་སོགས་ལ་ངར་འཛིན་མེད། །གཞན་དག་དེ་ལ་འཛུད་བྱེད་པ། །དེ་ནི་ཆགས་པའི་མཐའ་འགོག་པས། །རྒྱལ་ལ་སོགས་པ་ཆགས་པ་ཕྲ། །ཞེས་པ་ནས། དེ་ལྟར་ཀུན་ཤེས་ཉིད་ལུགས་ལ། །མི་མཐུན་གཉེན་པོའི་ཕྱོགས་དག་གི །རྣམ་པར་དབྱེ་བ་མ་ལུས་པ། །ཇི་སྐད་བཤད་པ་འདི་ཤེས་བྱ། །ཞེས་སོ། །དེ་ལ་སྤྱི་དོན་དང་མཐའ་རགས་ཙམ་དཔྱད་པ་གཉིས། དང་པོ་མཚན་ཉིད།དབྱེ་བ། ས་མཚམས་གསུམ། དང་པོ་ནི། བྱང་སེམས་ཀྱིས་རང་རྒྱུད་ལ་སྐྱེད་པར་བྱེད་པ་ལ་འདའ་བྱའི་དམན་པའི་གཞི་ཤེས་དེ། མི་མཐུན་ཕྱོགས་ཀྱི་གཞི་ཤེས་ཀྱི་མཚན་ཉིད། རང་གི་སྤང་བྱ་ཆགས་པའི་མཐའ་མ་ལུས་པ་འགོག་པའི་ཐབས་ཤེས་ཁྱད་པར་ཅན་གྱིས་ཟིན་པའི་མངོན་རྟོགས་དེ། གཉེན་པོའི་ཕྱོགས་ཀྱི་གཞི་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། ལྔ་བ་མི་མཐུན་ཕྱོགས་ཀྱི་གཞི་ཤེས་ཀྱི་མཚན་ཉིད། བྱང་སེའི་མཉམ་བཞག་གི་རྟོགས་པའི་སྤང་བྱར་གྱུར་པའི་གཞི་ཤེས། དེ་ལ་གཞི་ལམ་འབྲས་བུ་ལ་མཚན་འཛིན་གསུམ་མོ། །དྲུག་པ་གཉེན་པོའི་ཕྱོགས་ཀྱི་གཞི་ཤེས་ཀྱི་མཚན་ཉིད། རང་གི་སྤང་བྱ་ཆགས་པའི་མཐའ་མ་ལུས་པ་འགོག་པའི་གཞི་ཤེས་གང་ཞིག བྱང་སེའི་རྟོགས་པ་ཡིན་པའོ། །ཞེས་གསུངས་པས་སོ། །

གཉིས་པ་དབྱེ་བ་ནི།

མི་མཐུན་ཕྱོགས་ཀྱི་གཞི་ཤེས་ལ་དམན་པའི་ལམ་ལྔ་ཡོད། གཉེན་པོའི་གཞི་ཤེས་ལ་ཐེག་ཆེན་གྱི་ལམ་ལྔ་ཡོད་དོ། །

གསུམ་པ་ས་མཚམས་ནི། འབྲས་ཡུམ་ལ་ཉེ་རིང་དང་འདྲའོ། །

གཉིས་པ་མཐའ་རགས་ཙམ་དཔྱད་པ་ལ།

ཉ་ཊཱིཀ་ལས།གཞི་ལམ་ལ། འབྲས་བུ་ལ་མཚན་འཛིན་གྱི་སྤང་གཉེན། ཞེས་པ་ནས། གཉིས་པ་ལ། སྤང་གཉེན་གཉིས་ལས། དང་པོ་ལ། ཆགས་པ་ཕྲ་མོ་མི་མཐུན་ཕྱོགས་སུ་བསྟན། དེའི་སྒྲུབ་བྱེད་བསྟན་པའོ། །དང་པོ་ལ། རྩ་བ་ནི། རྒྱལ་བ་ལ་མཚན་མར་འཛིན་པ་དང་སོགས་པ་དགེ་བ་ཐམས་ཅད་མཚན་མར་གཟུང་མདོ་སྟེ་རྫོགས་བྱང་དུ་བསྔོ་བ་ཆོས་ཅན། བྱང་པའི་མཉམ་གཞག་གི་མི་མཐུན་ཕྱོགས་ཏེ། ཆགས་པ་ཕྲ་མོ་ཡིན་པས་སོ། །རྫོགས་པའི་སངས་རྒྱས་མཚན་མར་ཡིད་ལ་བྱེད་ན། ཇི་ཙམ་དུ་མཚན་མར་གྱུར་པ་དེ་ཙམ་དུ་ཆགས་པའོ། །ཞེས་སོགས་སོ། །ཞེས་རྒྱལ་ལ་སོགས་པ་ཆགས་པ་ཕྲ། །ཞེས་པ་འདི་མི་མཐུན་ཕྱོགས་ཀྱི་གཞི་ཤེས་སྟོན་བྱེད་དུ་བཞག་པ་མི་འཐད་དེ། རྩ་བར། སྤྱོད་པའི་འདུ་ཤེས་མི་མཐུན་ཕྱོགས། །ཞེས་པ་ཡན་གྱིས་མི་མཐུན་ཕྱོགས་ཀྱི་གཞི་ཤེས་བཤད་ཟིན་པའི་ཕྱིར་ཏེ། མདོ་ལུགས་མ་ལས། གཟུགས་སོགས་ཕུང་པོ་སྟོང་ཉིད་དང༌། དུས་གསུམ་གཏོགས་པའི་ཆོས་རྣམས་དང། །སྤྱིན་སོགས་བྱང་ཆུབ་ཕྱོགས་རྣམས་ལ། །སྤྱོད་པའི་འདུ་ཤེས་མི་མཐུན་ཕྱོགས། །ཞེས་པ་ནས། དེ་རྣམས་ཀྱིས་མི་མཐུན་ཞེས་པ་དེ་བཤད་ཟིན་ཏོ། །ད་ནི་མཚན་མར་འཛིན་པའི་འདུ་ཤེས་དེའི་གཉེན་པོའི་ཕྱོགས་བཤད་པར་བྱ་སྟེ། ཞེས་གསུངས་པའི་ཕྱིར་རོ། །ཡང་བདེན་པའི་རང་བཞིན་མེད་རྟོགས་ཀྱི་བློ་ཡིན་ན་སྐབས་འདིའི་གཉེན་པོའི་ཕྱོགས་ཡིན་པས་ཁྱབ་པར་ཐལ། ཉ་ཊཱིཀ་ལས། རྩ་འགྲེལ་ནི། ཉན་ཐོས་དང་སོགས་པ་རང་རྒྱལ་གྱི་ལམ་ཆོས་ཅན། མི་མཐུན་པའི་ཕྱོགས་ཡིན་ཏེ། མཚན་འཛིན་ཡིན་པའི་ཕྱིར།བྱང་པ་འཕགས་པའི་མཉམ་བཞག་ཡེ་ཤེས་དང་སོགས་པ་སངས་རྒྱས་ཀྱི་རྟོགས་པ་ཆོས་ཅན། མཚན་འཛིན་གྱི་གཉེན་པོའི་ཕྱོགས་ཡིན་ཏེ། ཆོས་ཐམས་ཅད་དོན་དམ་པར་བདེན་མེད་དུ་མངོན་སུམ་དུ་རྟོགས་པའི་ཡེ་ཤེས་ཡིན་པས་སོ། །ཞེས་གོ་རིམ་བཞིན་དུ་སྦྱར་བ་སྟེ།སྤྱིར་མངོན་པར་ཞེན་པའི་བློ་ཐམས་ཅད་འདིར་མི་མཐུན་ཕྱོགས་དང༌། ཞེན་མེད་ཀྱི་བློ་བདེན་པའི་རང་བཞིན་མེད་རྟོགས་ཐམས་ཅད་གཉེན་ཕྱོགས་སོ་ཞེས་པའི་རབ་ཏུ་དབྱེ་བ་མ་ལུས་པ།མདོ་ལས་ཇི་སྐད་བཤད་པ་བཞིན་དུ་བསྟན་བཅོས་འདིར་བཤད་པའི་ཚུལ་དེ་ལྟར་གྱི་སྒོ་ནས་ཐམས་ཅད་ཤེས་པ་ཉིད་ཀྱི་སྐབས་སུ་ཤེས་པར་བྱའོ། །ཞེས་གསུངས་པའི་ཕྱིར་ཟེར་ན་ཉན་རང་གི་རྒྱུད་ཀྱི་རང་བཞིན་མེད་རྟོགས་ཀྱི་བློ་སོགས་སྐབས་འདིའི་གཉེན་པོའི་ཕྱོགས་ཡིན་མིན་དང་གཞི་ཤེས་ཡིན་ན་མི་མཐུན་ཕྱོགས་ཀྱི་གཞི་ཤེས་ཡིན་པས་ཁྱབ་པ་ཡོད་མེད་དཔྱད་པར་བྱའོ། །