གཉིས་པ་མཐའ་རགས་ཙམ་དཔྱད་པ །
གཉིས་པ་མཐའ་རགས་ཙམ་དཔྱད་པ་ལ།
ཉ་ཊཱིཀ་ལས། ཚུལ་ཇི་ལྟར་བསྟན་ན། མཐོང་ལམ་སྐད་ཅིག་བཅུ་དྲུག་ལས་མ་གཏོགས་པ་མེད་པར་ཤེས་པའི་དོན་དུ་ཕྱོགས་བཅུ་རེ་རེའི་སངས་རྒྱས་སྟོང་སྟོང་དཔང་བོར་མཛད་ནས་སོ། །ཞེས་གྲོལ་སྡེ་གཉིས་སོ། །ཞེས་པ་ལྟར་མཐོང་ལམ་ལ་སྐད་ཅིག་བཅུ་དྲུག་ལས་ལྷག་མེད་པར་བཤད་པ་ལ་དཔྱད་དོ། །ཡང་ཉ་ཊཱིཀ་ལས། དེས་ན་ཕྱི་རོལ་བས་རྟག་པ་སོགས་གང་ཟག་ཏུ་སྒྲོ་བཏགས་པ་བཅུ་དྲུགཉན་ཐོས་པས་མི་རྟག་སོགས་ཆོས་སུ་སྒྲོ་འདོགས་པ་བཅུ་དྲུག་དང་བྲལ་བའི་ཡེ་ཤེས་བཅུ་དྲུག་དངོས་བསྟན་གྱི་མཐོང་ལམ་མོ། །ཞེས་ཐེག་ཆེན་མཐོང་ལམ་ཡིན་ན་སྒྲོ་འདོགས་སོ་གཉིས་དང་བྲལ་བས་ཁྱབ་པ་ཡོད་མེད་དང༌། སྒྲོ་འདོགས་དང་བྲལ་ཞེས་པ་རང་རྒྱུད་ལྡན་གྱི་གང་ཟག་གི་རྒྱུད་ལ་མེད་པ་དང་སྤངས་པ་སོགས་གང་ཡིན་དཔྱད་པར་བྱའོ། །ཡང་སྐབས་འདིར་ཉ་ཊཱིཀ་ལས། མདོ་དང་རྒྱན་དུ་གཞི་ཤེས་མཐོང་ལམ་བསྟན་པ་རྫོགས་པའི་སྐབས་འདིར་ཆོས་ཅན། ཉན་ཐོས་ཀྱི་ཟག་མེད་སྒོམ་པའི་ལམ་ནི་དངོས་སུ་མ་བསྟན་པ་ལ་རྒྱུ་མཚན་ཡོད་དེ། ཉན་ཐོས་ཀྱི་ལམ་དང་འབྲས་བུ་ནི་དེའི་རིགས་ཅན་ལ་བསྟན་པའི་དོན་དུ་བྱང་པས་མ་ནོར་བར་ཡོངས་སུ་ཤེས་པར་བྱ་བ་ཡིན་གྱི་ཇི་བཞིན་རྒྱུད་ལ་བསྐྱེད་ནས་མངོན་དུ་བྱ་བ་མ་ཡིན་པའི་རྒྱུ་མཚན་གྱིས་དེ་དངོས་སུ་མ་བསྟན་པས་སོ། །ཉན་ཐོས་རྣམས་ལའང་དེའི་མཐོང་ལམ་བསྟན་པས་གོ་སླ་བས་དངོས་སུ་མ་བསྟན་ནོ་ཞེས་འགྲེལ་ཆེན་ནོ། །འདིར་དངོས་སུ་ནི་དེའི་མཐོང་ལམ་ཡང་མ་བསྟན། ཤུགས་ལ་ནི་མཐོང་ལམ་བསྟན་པས་དེའི་སྒོམ་ལམ་ཡང་བསྟན་པ་ཡིན་པས་སློབ་དཔོན་གྱི་འདི་ལ་སྙིང་བོ་ཙམ་མི་སྣང་བས་རྩོད་སྤོང་མང་བོ་བྱས་ནས་གཞུང་འདི་བཤད་བྱེད་རྣམས་ལ་བརྟག་མི་བཟོད་དོ། །ཞེས་ཉན་ཐོས་ཀྱི་ཟག་མེད་སྒོམ་ལམ་མ་བསྟན་པའི་རྒྱུ་མཚན་དེ་ལ་སེང་བཟང་སོགས་ཀྱི་ལུགས་ལ་ཁྱབ་པ་ཡོད་མེད་དང༌། རང་ལུགས་ལ་མ་བསྟན་པའི་རྒྱུ་མཚན་གང་ཡིན་དཔྱད་པར་བྱའོ། །