བཞི་པ་སྔར་བཤད་པའི་མཁྱེན་པ་གསུམ་གྱི་མཇུག་བསྡུ།

བཞི་པ་སྔར་བཤད་པའི་མཁྱེན་པ་གསུམ་གྱི་མཇུག་བསྡུ་བ་ནི།

རྩ་བར། དེ་ལྟར་འདི་དང་ཡང་འདི་དང༌། །ཡང་འདི་ཡིན་ཏེ་རྣམ་གསུམ་པོ། །འདི་ནི་གནས་སྐབས་གསུམ་པོ་དག །རྫོགས་པར་ཡོངས་སུ་བསྟན་པ་ཡིན། །ཞེས་སྔར་བཤད་པ་དེ་ལྟར་རྣམ་པ་ཐམས་ཅད་མཁྱེན་ཉིད་འདི་དང༌། ཡང་ལམ་ཤེས་པ་ཉིད་འདི་དང་ཡང་ཐམས་ཅད་ཤེས་པ་ཉིད་འདི་ཡིན་ཏེ། མཁྱེན་པ་རྣམ་པ་གསུམ་པོ་ཡོངས་སུ་བསྟན་པ་འདི་ནི། མཁྱེན་པའི་གནས་སྐབས་གསུམ་པོ་དག་ཀྱང་རྫོགས་པར་ཡོངས་སུ་བསྟན་པ་ཡིན་པར་མདོ་ལུགས་མ་ལས་བཤད་དོ། །ཉ་ཊཱིཀ་གི་གསུང་ཟིན་ལ་དེ་དང་ཅུང་མི་འདྲ་སྟེ། ཇི་སྐད་དུ། རྩ་བ་ནི། གཞི་ཤེས་བཤད་པ་རྫོགས་རྗེས་སུ་རབ་འབྱོར་ཤེར་པ་འདི་ནི་ཆོས་གང་ཡང་ཐོབ་པར་བྱེད་པ་མ་ཡིན། སྟོན་པར་བྱེད་པ་མ་ཡིན། ཞེས་ནས། འདས་མ་འོངས་ད་ལྟར་བྱུང་བ་མ་ཡིན། ཞེས། དེ་ལྟར་ཚིག་བཅུ་དགུ་ཡང་ཡང་སྒྲ་དང་པོ་ལ་ཡང་ཞེས་དག་ལྡན་བསྟན་པ་འདི་དང༌། དེ་ལྟར་སོགས་ཀྱི་དོན་ཡིན་པས་གསུམ་པོ་དག་ལ་སྦྱར་རོ་ཞེས་པས། རབ་འབྱོར་ཤེར་པ་འདི་ནི་འདོད་པའི་ཁམས་ལས་འདའ་བར་བྱེད་པའམ་གནས་པར་བྱེད་པ་མ་ཡིན། ཞེས་སོགས། ཡང་བསྟན་པ་འདི་དང༌།རབ་འབྱོར་ཤེར་པ་འདི་ནི་སངས་རྒྱས་ཀྱི་ཆོས་རྣམས་སྟེར་བའམ་འཕྲོག་པར་བྱེད་པ་མ་ཡིན། ཞེས་སོགས་བཤད་པ་འདི་གང་ཡིན་པ་སྟེ། རིམ་པ་རྣམ་པ་གསུམ་པོ་འདི་ནི་གོ་རིམ་བཟློག་པས་གཞི་ཤེས་ལམ་ཤེས་རྣམ་མཁྱེན་གྱི་གནས་སྐབས་གསུམ་པོ་དག་མཇུག་རྫོགས་པར་ཡོངས་སུ་བསྟན་པ་མཇུག་སྡུད་ཡིན་ནོ་ཞེས་པ། ཨཱརྱ་དག་ལྡན་གྱི་དོན་དཔྱིས་ཕྱིན་པ་སྟེ་གཞན་གྱིས་བློ་ཁ་མ་ཕྱོགས་པར་སྣང་ངོ༌། །འགྲེལ་བ་ལ། བཤད་མ་ཐག་པའི་ཚུལ་དུའམ་བཤད་པ་ལྟར་གྱི་རིམ་པས་དོན་ཐམས་ཅད་ཡོངས་སུ་རྫོགས་པའི་རྣམ་པ་ཐམས་ཅད་མཁྱེན་པ་ཉིད་འདི་དང༌། ཆོས་ཐམས་ཅད་ལ་མི་གནས་པའི་ལམ་ཤེས་པ་ཉིད་འདི་དང༌། རྣམ་རྟོག་ཐམས་ཅད་བཀག་པའི་གཞི་ཐམས་ཅད་ཤེས་པ་ཉིད་འདི་སྟེ། རྣམ་པ་གསུམ་པོ་དག་སྔར་བཤད་པ་དེ་ལྟར་གྱི། རབ་འབྱོར། མཐའ་གཉིས་རྣམ་དག སྤྱོད་པ་ཁྱད་པར་གྱི་ལེའུ་གསུམ་གྱིས་ཡོངས་སུ་རྫོགས་པར་མཛད་པ་ཡིན་ནོ་ཞེས་སམ། དོན་བསྡུ་བའི་མདོ་གསུམ་གྱིས་ཞེས་འགོར་སྦྱར་ཏེ། ལེའུ་གསུམ་གྱི་དོན་མཁྱེན་གསུམ་ཞེས་སྦྱར་རོ། །ཞེས་གསུངས་པའི་ཕྱིར་རོ། །དངོས་པོ་བརྒྱད་ལས་གཞི་ཤེས་ཀྱི་དངོས་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པ་ཡིན་ནོ། །

གསུམ་པ་སྐབས་བསྡུ་བ་ནི།

ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་སྐབས་གསུམ་པའི་སྤྱི་དོན་དང་མཐའ་རགས་ཙམ་དཔྱད་པའི་སྒོ་ནས་བཤད་ཟིན་ཏོ། །

སྨྲས་པ། ཐབས་ཤེས་ཉི་ཟླས་སྲིད་ཞིའི་མུན་པ་འཇོམས། །འབྲས་ཡུམ་ཉེ་རིང་སྤང་གཉེན་བླང་དོར་ལམ། །གཞི་ཤེས་སྦྱོར་བ་དེ་ཡི་མཉམ་པ་ཉིད། །བདེན་མཐོང་དངོས་པོ་བརྗོད་པའི་འདབ་བརྒྱའི་དཔྱིད། །བློ་ལྡན་སྐལ་ལྡན་ཚོགས་རྣམས་མགྲོན་དུ་འབོད། །ཐབས་ཤེས་ཆོས་ཀྱི་ལམ་བརྟག་ལ་ཞུགས་ནས། །སྐུ་བཞིའི་འབྲས་བུ་གཡུར་དུ་ཟ་བ་ཉིད། །མངོན་དུ་བྱས་ནས་འགྲོ་རྣམས་དོན་བརྩོན་སྨོན། །ཞེས་བར་སྐབས་ཀྱིས་ཚིགས་སུ་བཅད་པའོ། །

གཉིས་པ་མཁྱེན་གསུམ་གཏན་ལ་ཕེབས་ནས་ཉམས་སུ་ལེན་པའི་འཇུག་པ་སྦྱོར་བ་བཤད་པ་ལ།

དེ་ལྟར་ཡུམ་གྱི་མཚན་ཉིད་མཁྱེན་གསུམ་གཏན་ལ་ཕབ་ནས། དེའི་རྟོགས་པ་རྒྱུད་ལ་སྐྱེད་པའི་ཐབས་སུ་ཡུམ་གྱི་རྣལ་འབྱོར་ཉམས་སུ་ལེན་པའི་སྦྱོར་བ་བཤད་པ་ལ། དབང་ཐོབ་པའི་དོན་དུ་བསྒོམ་པ་རྣམ་ཀུན། དབང་ཐོབ་པའི་ཚུལ་གྱིས་བསྒོམ་པ་རྩེ་སྦྱོར། བརྟན་པ་ཐོབ་པའི་དོན་དུ་བསྒོམ་པ་མཐར་གྱིས་པ། བརྟན་པ་མཐར་ཕྱིན་པ་སྐད་ཅིག་མའི་དངོས་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པ་དང་བཞིའོ། །

དང་པོ་རྣམ་པ་ཀུན་མངོན་པར་རྫོགས་པར་རྟོགས་པའི་དངོས་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པ་ལ།

སྐབས་ཀྱི་མཚམས་སྦྱར། སྦྱོར་བའི་ཆོས་རྒྱས་པར་བཤད།སྐབས་བསྡུ་བའོ། །དང་པོ་ནི། དེ་ལྟར་ཐམས་ཅད་མཁྱེན་པ་ཉིད་གསུམ་བཤད་ཟྀན་ནས། ད་ནི་མཁྱེན་གསུམ་གྱི་རྣམ་པ་རྣམས་རྫོགས་པར་སྒོམ་པ་ལ་དབང་ཐོབ་པའི་ཆེད་དུ་རྣམ་ཀུན་མངོན་པར་རྫོགས་པར་བསྒོམ་དགོས་པས་དེ་འཆད་པར་བྱའོ། །མཁྱེན་པ་གསུམ་ལ་དབང་བསྒྱུར་ཐོབ་པའི་ཕྱིར་དུ་མཁྱེན་གསུམ་བསྡུས་ནས་བསྒོམ་པའི་བྱང་ཆུབ་སེམས་དཔའི་སྦྱོར་བ་དེ། རྣམ་རྫོགས་སྦྱོར་བའི་མཚན་ཉིད། དབྱེ་ན་སློབ་ལམ་བཞིའམ་སྦྱོར་བ་ཉི་ཤུ། ས་མཚམས་ནི་ཚོགས་ལམ་ནས་རྒྱུན་མཐའི་བར་ཆད་མེད་ལམ་བར་ནའོ། །དེ་ལྟར་འཐད་དེ། ཉ་ཊཱིཀ་ཡིད་ཀྱི་མུན་སེལ་ལས། དེས་ན་ཐེག་ཆེན་ཚོགས་ལམ་ནས་རྒྱུན་མཐའི་བར་ན་ཡོད། ཅེས་དང༌། དེས་ན་མཚན་ཉིད། མཚོན་བྱ། གཞི་གསུམ་ལས། དང་པོ་ནི། མཁྱེན་པ་གསུམ་ལ་དབང་གྱུར་ཐོབ་པའི་ཕྱིར་དུ་མཁྱེན་གསུམ་བསྡུས་ནས་བསྒོམ་པའི་བྱང་ཆུབ་སེམས་དཔའི་སྦྱོར་བ། ཞེས་དང༌། གསུམ་པ་ནི། ཐེག་ཆེན་སློབ་ལམ་བཞིའམ་སྦྱོར་བ་ཉི་ཤུའོ། །ཞེས་གསུངས་སོ། །སྐབས་འདིར་ཉ་ཊཱིཀ་ལས། དེ་ལྟར་ཐམས་ཅད་མཁྱེན་པ་ཉིད་གསུམ་ཐོས་བསམ་གྱི་ཤེས་རབ་ཀྱིས་བསྡུས་པ་དང་རྒྱས་པར་ཡོངས་སུ་ཤེས་པར་གྱུར་པའི་གང་ཟག་གིས་ཐམས་ཅད་མཁྱེན་པ་ཉིད་གསུམ་གྱི་དོན་སྒོམ་པར་བྱེད་དགོས་སོ། །ཅིའི་དོན་དུ་ན་ནི་སྟེ་ངེས་པར་དབང་དུ་བྱ་བས་དེ་བསྒོམས་པས་རང་གི་རྒྱུད་ལ་བསྐྱེད་པས་རྟོགས་པ་རང་དབང་ཐོབ་པར་བྱ་བའི་ཕྱིར་དུ་སྟེ་ཐོས་བསམ་གྱི་ཤེས་རབ་མི་བརྟན་པས་རང་དབང་ཅན་མིན་ལ། བསྒོམས་པ་ལས་རང་དབང་དུ་འགྱུར་བས་སོ། །དེ་ལྟར་ཤེས་རབ་གསུམ་འབྲེལ་བར་བྱ་དགོས་ཏེ། མི་ཕམ་པའི་ཞལ་སྔ་ནས། གལ་ཏེ་ཐོས་པ་ཙམ་གྱི་དོན། །མཐོང་འགྱུར་བསྒོམ་པ་དོན་མེད་འགྱུར། །གལ་ཏེ་བསྒོམས་པས་དོན་མཐོང་འགྱུར། །དེ་ཚེ་ཐོས་པ་དོན་མེད་འགྱུར། །ཞེས་དང༌། མཁྱེན་པ་གསུམ་ལ་དབང་གྱུར་ཐོབ་པའི་ཕྱིར་དུ་མཁྱེན་གསུམ་བསྡུས་ནས་བསྒོམ་པའི་བྱང་ཆུབ་སེམས་དཔའི་སྦྱོར་བ་སྟེ། ཞེས་པའི་དོན་ལ་སྔར་མཁྱེན་གསུམ་གྱི་སྐབས་སུ་ཐོས་བསམ་ལས་སྒོམ་དགོས་པ་བསྟན་མ་བསྟན་དང༌།མཁྱེན་གསུམ་གྱི་རྣམ་པ་སྒོམ་པ་ལ་དབང་གྱུར་ཐོབ་རྗེས་ཀྱི་རྣམ་རྫོགས་སྦྱོར་བ་དེ། དབང་གྱུར་ཐོབ་ཕྱིར་དུ་སྒོམ་པ་ཡིན་མིན་དཔྱད། ཡང་ཉ་ཊཱིཀ་ལས། དེ་ལྟར་ན་མཁྱེན་པ་གསུམ་ལ་དབང་གྱུར་ཐོབ་པའི་ཕྱིར་དུ་མཁྱེན་གསུམ་བསྡུས་ནས་བསྒོམ་པའི་སྦྱོར་བ་ནི། རྣམ་པ་ཀུན་མངོན་པར་རྫོགས་པར་རྟོགས་པའི་སྦྱོར་བ་ཡིན་པས་འདིར་འཆད་དོ། །ཞེས་གསུངས་པའི་བསྡུས་སྒོམ་གྱི་དོན་ནི། མཁྱེན་གསུམ་གྱི་རྣམ་པ་འཛིན་སྟངས་ཀྱི་ཡུལ་དུ་བསྡུས་ནས་བསྒོམ་པའི་རིགས་གནས་ཀྱི་བྱང་སེམས་ཀྱི་མངོན་རྟོགས་དེ་ཡིན་ནོ། །