གཉིས་པ་སྦས་དོན་གྱི་རྣམ་པ།

གཉིས་པ་སྦས་དོན་གྱི་རྣམ་པ་ལ།

ཀུན་འབྱུང་གི་རྣམ་པ་བརྒྱད་དང༌། ལམ་གྱི་རྣམ་པ་བདུན་དང༌། སྡུག་བདེན་གྱི་རྣམ་པ་ལྔ་དང༌། འགོག་བདེན་གྱི་རྣམ་པ་བཅུ་དྲུག་བཤད་པ་དང་བཞི། དང་པོ་སྤང་གཉེན་གྱི་སྒོ་ནས་བཤད་པ་ལ། ཉ་ཊཱིཀ་ལྟར་ན་འདོད་པའི་ཡོན་ཏན་ཟག་བཅས་མ་ཐོབ་པ་ཐོབ་པར་འདུན་པ་དང༌། ཟག་བཅས་ཀྱི་ཡུལ་ད་ལྟར་བ་ལ་མངོན་པར་ཞེན་པའི་འདོད་ཆགས་དང༌། འཁོར་བའི་ཡང་སྲིད་ལ་མངོན་པར་དགའ་བའི་སྲེད་པ་སྟེ་ཀུན་འབྱུང་གི་རྒྱུའི་རྣམ་པ་གསུམ་མོ། །དང་པོ་དངོས་འབྲས་བཀག་ནས་དངོས་རྒྱུ་འགོག་པ། གཉིས་པ་རྒྱུ་བཀག་ནས་འབྲས་བུ་འགོག་པ་ཡིན་པར་ཉ་ཊཱིཀ་ལས་གསུངས་སོ། །ཕྱི་ནང་གི་དངོས་པོ་ལ་ལྷག་པར་ཆགས་པའི་འདོད་ཆགས་དང༌། མནར་སེམས་པའི་ཞེ་སྡང་དང༌། དེ་ཁོ་ན་དང་རྒྱུ་འབྲས་ལ་རྨོངས་པའི་གཏི་མུག་དང་ཀུན་འབྱུང་བའི་རྣམ་པ་གསུམ་མོ། །ཉོན་མོངས་པ་རྟོག་པ་སྟེ་རབ་སྐྱེའི་རྣམ་པ་གཅིག་གོ །རྟག་གཅིག་སོགས་ཀྱི་སེམས་ཅན་དུ་མངོན་པར་ཞེན་པའི་འཇིག་ལྟ་ནི། རྐྱེན་གྱི་རྣམ་པ་ཡིན་ནོ། །རྣམ་པ་དེ་བརྒྱད་ཀྱི་ཞེན་ཡུལ་མེད་པར་རྟོགས་པའི་གཉེན་པོའི་རྣམ་པ་བརྒྱད་ཡོད་དོ། །དེ་ལྟར་ན་སྡུག་བསྔལ་ཀྱི་རྒྱུ་ཀུན་འབྱུང་བའི་བདེན་པའི་རྣམ་པ་དངོས་འདུན་པ་སོགས་བརྒྱད་དང༌། དེའི་གཉེན་པོའི་ཤེས་རྣམ་བརྒྱད་ཡོད་དོ། ། གཉིས་པ་ལམ་བདེན་གྱི་རྣམ་པ་བདུན་ནི། རབ་ཏུ་སྤངས་པའི་ལམ་གྱི་རྣམ་པ་དང༌། འཁོར་འདས་ཀྱི་མཐའ་གཉིས་དང་མ་འབྲེལ་བས་མཐའ་གཉིས་མི་དམིགས་པའི་རྟོགས་པ་ལམ་གྱི་རྣམ་པ་དང༌། ཆོས་ཐམས་ཅད་ཀྱི་ཆོས་དབྱིངས་ཐ་མི་དད་པ་མངོན་སུམ་དུ་རྟོགས་པའི་ཤེས་རྣམ་ནི། གཉེན་པོ་མ་ལུས་པར་རྟོགས་པའི་རིག་པའི་རྣམ་པ་དང༌། ཉན་རང་གི་ས་ལ་མཆོག་ཏུ་འཛིན་པ་མེད་པར་དེ་ལས་འདའ་བར་བྱེད་པའི་ཟག་མེད་ཡེ་ཤེས་རིག་པའི་རྣམ་པ་དང། ཆོས་གང་ལ་ཡང་ཅིར་ཡང་མི་རྟོག་པའི་ཟག་མེད་ཡེ་ཤེས་ནི། རྟོགས་བྱའི་ཡུལ་ཇི་བཞིན་རྟོགས་པར་བྱེད་པའི་སྒྲུབ་པའི་རྣམ་པ་དང༌། དོན་དམ་པར་ཆོས་ཐམས་ཅད་ཚད་མས་གཞལ་དུ་མེད་པར་རྟོགས་པའི་ཟག་མེད་སྒྲུབ་པའི་རྣམ་པ་དང༌། རྟོགས་པ་དེ་དང་དེ་ལ་ནམ་མཁའ་ལྟར་ཆགས་པ་མེད་པའི་ཟག་མེད་ཀྱི་ཤེས་རྣམ་ནི། མྱང་འདས་སུ་ངེས་པར་འབྱིན་པའི་རྣམ་པའོ། །དེ་ལྟར་ལམ་གྱི་རྣམ་པ་གཉིས་དང༌། རིག་པའི་གཉིས་དང༌།སྒྲུབ་པའི་གཉིས་དང༌། ངེས་འབྱིན་གྱི་གཅིག་སྟེ། དེ་ལྟར་ན་ལམ་གྱི་བདེན་པའི་རྣམ་པ་བདུན་ཡིན་ནོ། །དེ་ཡང་ཉ་ཊཱིཀ་ལས། སྦྱོར་ཊཱིཀ་ལྟར་ཏེ་མདོ་དང་མཐུན་ཏེ། སྔ་མ་གསུམ་ལ་དམ་བཅའ་སྔ་ཕྱི་གཉིས་རེ་དང་རྟགས་གཉིས་རེ་སྣང་ལ། ངེས་འབྱིན་གྱི་ཐད་དུ་དམ་བཅའ་གཅིག་དང་རྟགས་གཅིག་སྣང་ངོ༌། །ཁ་ཅིག་གི་ལྟར་ན། ཕྱི་མ་ལ་རྟགས་མི་ཐོབ་པར་འགྱུར་རོ། །ཞེས་གསུངས་པ་ལྟར་བཤད་ན་ལེགས་པའོ། ། གསུམ་པ་སྡུག་བདེན་གྱི་རྣམ་པ་ལྔ་ནི། ཉ་ཊཱིཀ་ལས། མི་རྟག་སོགས་བཞི་ངོ་བོ་ཉིད་ཀྱི་རྣམ་པ་བཞི་དང༌། ལྔ་བ་དེ་བཞི་དོན་དམ་པར་བདེན་པའི་མཚན་ཉིད་མེད་པའི་རྣམ་པའི་ངོ་བོ་ཉིད་རྣམ་གྲངས་ཀྱི་རྣམ་པ་གཅིག་རྣམས་ཏེ། དེ་ལྟར་ན་སྡུག་བདེན་གྱི་རྣམ་པ་ལྔ་ཡོད་པ་ཡིན་ནོ། །ཞེས་སོ། །