ལྔ་པ་སྟོབས་ལྔ་བཤད་པ།

ལྔ་པ་སྟོབས་ལྔ་བཤད་ལ།

སྤྱི་དོན་དང༌། མཐའ་རགས་ཙམ་དཔྱད་པ་དང་གཉིས།དང་པོ་ལ། དམིགས་པ་དང༌། ངོ་བོ་དང༌། གྲོགས་དང༌། བསྒོམ་པ་དང༌། བསྒོམས་པའི་འབྲས་བུུ་བཤད་པ་དང་ལྔའོ། །དང་པོ་དམིགས་པ་ནི། སྔར་དབང་པོའི་སྐབས་དང་འདྲའོ། །གཉིས་པ་ངོ་བོའམ་མཚན་ཉིད་ནི། རང་གི་མི་མཐུན་ཕྱོགས་མ་དད་པ་སོགས་ངེས་པར་བསྲབས་པས་ཚུར་མི་བརྫི་ཞིང་ཕར་འཇོམས་ནུས་པར་གྱུར་པའི་རིགས་གནས་ཀྱི་ལམ་དེ། བྱང་ཕྱོགས་ནང་ཚན་གྱི་སྟོབས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། སྤྱིར་མཚན་ཉིད་ནི།དབང་བོ་ཉིད་མ་དད་པ་སོགས་མི་མཐུན་ཕྱོགས་ངེས་པར་བསྲབས་པས་ཚུར་མི་བརྫི་ཞིང་ཕར་འཇོམས་ནུས་པར་གྱུར་པའོ། །བྱེ་བྲག་ཏུ་འདིར་བཤད་སློབ་ལམ་བདུན་གྱི་ནང་ཚན་མངོན་པར་རྟོགས་པ་དང་འབྲེལ་བའི་ལམ་ཡིན་པའི་དེའི་མཚན་ཉིད། དེའི་སྟེང་དུ་བྱང་སེའི་སྦྱོར་ལམ་བཟོད་མཆོག་གང་རུང་གིས་བསྡུས་པའོ། །ཞེས་དང༌། རྒྱན་ལས། མི་མཐུན་ཕྱོགས་ཉམས་ཆུང་བས་ཡང༌། །དེ་དག་ཉིད་ལ་སྟོབས་ཞེས་བྱ། །ཞེས་དང༌། རྒྱན་གྱི་ས་འགྲེལ་ལས། མི༷་མཐུ༷ན་ཕྱོ༷གས་མ་དད་པ་དང་ལེ་ལོ་དང་བརྗེད་ངས་དང་རྣམ་གཡེང་དང་གཏི་མུག་རྣམས་ཉ༷མས་སྟོབས་ཆུ༷ང་བ༷ས་གཉེན་པོ་ལ་བརྫི་བར་མི་ནུས་ཤིང་གཉེན་པོས་སྤང་བྱ་དེ་རྣམས་ཟིལ་གྱིས་གནོན་པས། སྟོབས་ཀྱི་སྐབས་སུ་ཡ༷ང་ངོ་བོ་སྔར་བཤད་པ་དེ༷་ད༷ག་ཉི༷ད་ལ༷་དད་པའི་སྟོ༷བས་དང་བརྩོན་འགྲུས་ཀྱི་སྟོབས་དང་དྲན་པའི་སྟོབས་དང་ཏིང་ངེ་འཛིན་གྱི་སྟོབས་དང་ཤེས་རབ་ཀྱི་སྟོབས་ཞེ༷ས་བྱ༷་ཞིང༌། ཞེས་གསུངས་པའི་ཕྱིར་རོ། །མཚོན་བྱ་ནི། མི་མཐུན་ཕྱོགས་བསྲབས་པའི་གཉེན་པོ་སྟོབས་དང་ལྡན་པ་དེ་ཡིན་ཏེ། དབུས་མཐའ་ལས། མི་མཐུན་ཕྱོགས་ནི་བསྲབས་པའི་ཕྱིར། །ཞེས་གསུངས་པ་ལྟར་རོ། །ལྷའམ་བདུད་དམ་ཚངས་པ་ཡང་རུང་གང་གིས་ཀྱང་ཆོས་དང་མཐུན་པས་ཐུབ་པར་མི་ནུས་ཤིང་ཉོན་མོངས་པ་ཀུན་ནས་དཀྲིས་པས་ཀྱང་མི་ཚུགས་པར་གྱུར་པ་དེའི་ཚེ་སྟོབས་ཞེས་གནོད་འཇོམས་ལས་གསུངས་སོ། །མཚན་གཞི་ལ་གཉིས་ལས། དབྱེ་བ་ནི། མ་དད་པ་འཇོམས་པ་དད་པའི་སྟོབས། ལེ་ལོ་འཇོམས་པ་བརྩོན་འགྲུས་ཀྱི་སྟོབས། བརྗེད་ངས་འཇོམས་པ་དྲན་པའི་སྟོབས། རྣམ་གཡེང་འཇོམས་པ་ཏིང་ངེ་འཛིན་གྱི་སྟོབས། གཏི་མུག་འཇོམས་པ་ཤེས་རབ་ཀྱི་སྟོབས་ལྔའོ། །ངོ་བོ་གཅིག་གམ་ཐ་དད་དཔྱད་པ་སྔར་བཞིན་ནོ། །གྲངས་ངེས་ནི་སྤང་བྱ་མ་དད་པ་སོགས་ལྔ་ཡོད་པས་དེ་ལྟར་བཞག་གོ །

གཉིས་པ་ས་མཚམས་ནི།

སྦྱོར་ལམ་བཟོད་པ་ནས་སངས་རྒྱས་ཀྱི་བར་ཡོད་དེ།ཉ་ཊཱིཀ་ལས། དྲོ་བ་དང་སོགས་པ་རྩེ་མོ་ཐོབ་པ་ལ་བཟོད་པ་དང་ཆོས་མཆོག་འབྱུང་བས། སྔར་བཤད་ལྟར་གྱི་ཁྱད་ཆོས་ཅན་གྱི་སྟོབས་ལྔ་བཟོད་མཆོག་གི་ངོ་བོ་ཉིད་དོ། །དབུས་མཐར།དབང་བོ་རྣམས་དང་སྟོབས་རྣམས་ལ། །ངེས་འབྱེད་ཆ་མཐུན་གཉིས་གཉིས་སོ། །ཞེས་གསུངས་པའི་ཕྱིར་རོ། ། གསུམ་པ་དང་བཞི་བ་སྔར་དབང་པོའི་སྐབས་བཞིན་ནོ། །

ལྔ་བ་ནི། མི་མཐུན་ཕྱོགས་ལྔ་བོ་སྲབས་པ་དང་ས་ལ་འཇུག་པ་ཡིན་ཏེ། རྒྱན་ལས། དད་སོགས་ས་ལ་འཇུག་པ་སྟེ། །ཀུན་ནས་ཉོན་མོངས་ཅན་དུུ་འདོད། །ཅེས་སོ། །དེའི་ས་འགྲེལ་ལས། དེས་བཟོད་པ་དང་ཆོས་མཆོག་ཏུ་འབྱུང་བའི་སྟོབས་ལྔ་ནི། བཤད་མ་ཐག་པ་བྱང་ཆུབ་ལ་ད༷ད་པ་ལ་སོ༷གས་པ་ལྔ་པོ་དེ་ཉིད་ས༷་དང་པོ་ཐོབ་ཏུ་ཉེ་བས་ན་ས་ལ༷་འཇུ༷ག་པ༷་སྟེ༷། འོན་ཀྱང་མཐོང་སྤང་མ་སྤངས་ཤིང་འཇིག་རྟེན་པའི་ལམ་ཡིན་པས་ཀུ༷ན་ན༷ས་ཉོ༷ན་མོང༷ས་པ་ཅ༷ན་དུ༷འང་འདོ༷ད་ལ། ཞེས་གསུངས་པའི་ཕྱིར་རོ། །སྐབས་དེར་ཉ་ཊཱིཀ་མཆན་ལས། མ་དད་པ་སོགས་མེད་པར་འདོད་ཅེས་བློ་བརྟན་མར་བསྒྱུར་ཞིང་འཆད་དོ། །དབྱིག་གཉེན་དང་བཤད་སྦྱར་དུ་བཤད་པ་མེད་ཅིང་བློ་བརྟན་མར་བྱུང་བ་དང་འགལ་སྣང་ངོ༌། །ཞེས་གསུངས་སོ། །

གཉིས་པ་མཐའ་རགས་ཙམ་དཔྱད་པ་ལ།

ཐེ་ཚོམ་མི་དལ་ཟད་པ་དང༌། །ཞེས་པའི་ཐེ་ཚོམ་ཟད་པའི་ཕྱིར་མི་ལྡོག་པའི་རྟགས་ཐོབ་པའི་སྦྱོར་ལམ་དྲོད་པ་བའི་རང་གི་མི་མཐུན་ཕྱོགས་ཟད་པའི་དད་པ་ཆོས་ཅན། དད་པའི་སྟོབས་ཡིན་པར་ཐལ། དབང་བོ་ཉིད་མ་དད་པ་མི་མཐུན་ཕྱོགས་ངེས་པར་བསྲབས་པས་ཚུར་མི་བརྫི་ཞིང་ཕར་འཇོམས་ནུས་པར་གྱུར་པ་ཡིན་པའི་ཕྱིར། ཁྱབ་སྟེ། བློ་བརྟན་འགྲེལ་ཆེན་ལས། མི་མཐུན་པའི་ཕྱོགས་ཀྱིས་མ་འདྲིས་པར་གཉེན་པོ་འབའ་ཞིག་འབྱུང་བ་ནི་སྟོབས་ཞེས་བྱའོ། །ཞེས་དང༌། ཉ་ཊཱིཀ་ལས།སྤྱིར་མཚན་ཉིད་ནི། དབང་བོ་ཉིད་མ་དད་པ་སོགས་མི་མཐུན་ཕྱོགས་ངེས་པར་བསྲབས་པས་ཚུར་མི་བརྫི་ཞིང་ཕར་འཇོམས་ནུས་པར་གྱུར་པའོ། །ཞེས་གསུངས་པའི་ཕྱིར་ཟེར་ན་དཔྱད། མི་མཐུན་ཕྱོགས་བསྲབས་པའི་དོན་མངོན་གྱུར་དུ་མི་འབྱུང་བ་ལ་བྱེད་དགོས་ཏེ།ཀུན་བཏུས་ས་འགྲེལ་ལས། ལྔ་བོའི་མི་མཐུན་པའི་ཕྱོགས་མ་དད་པ་དང༌། ལེ་ལོ་དང་བརྗེད་ངེས་དང་གཡེང་བ་དང༌། ཤེས་བཞིན་མེད་པ་རྣམས་ངེས་པར་བསྲབས་ཏེ་མངོན་གྱུར་དུ་མི་འབྱུང་བས་གཉེན་པོ་ལ་མི་རྫི་བའི་ཕྱིར། དད་པ་དང་བརྩོན་འགྲུས་དང་དྲན་པ་དང་ཏིང་ངེ་འཛིན་དང་ཤེས་རབ་ཀྱི་སྟོབས་ཞེས་བྱ་བ་རྣམས་སོ། །ཞེས་གསུངས་པའི་ཕྱིར་ཟེར་ན། འོ་ན་སྦྱོར་ལམ་བཟོད་པའི་དབང་པོ་ལ་སྟོབས་ཀྱིས་མ་ཁྱབ་པར་ཐལ། དེའི་དབང་པོའི་མི་མཐུན་ཕྱོགས་རྣམ་བྱང་གཟུང་རྟོག་མངོན་དུ་གྱུར་པ་ཡོད་པའི་ཕྱིར་ཟེར་ན་དཔྱད་པར་བྱ།སྦྱོར་ལམ་བཟོད་པ་ཐོབ་མ་ཐག་ནས་སྟོབས་ལྔ་མེད་པར་ཐལ། དེ་ལྔ་རིམ་བཞིན་ཐོབ་དགོས་པའི་ཕྱིར། དེར་ཐལ། རྒྱན་གྱི་ས་འགྲེལ་ལས། དེ་རྣམས་ཀྱང་སྔ་མ་སྔ་མ་ལས་ཕྱི་མ་ཕྱི་མ་འབྱུང་བ་སྟེ། དབུས་མཐའ་ལས་ཀྱང༌། མི་མཐུན་ཕྱོགས་ནི་བསྲབས་པའི་ཕྱིར། །སྟོབས་ལྡན་འབྲས་བུ་ཕྱི་མ་ཡིན། །ཞེས་གསུངས་པའི་ཕྱིར། གོང་དུ་འདོད་མི་ནུས་ཏེ། སྦྱོར་ལམ་བཟོད་པ་ཐོབ་མ་ཐག་པའི་དད་སོགས་ལྔ་ལ་སྟོབས་ཀྱིས་མཚན་ཉིད་ཚང་བའི་ཕྱིར་ཟེར་ན་དཔྱད་པར་བྱའོ། །