གཉིས་པ་སྦས་དོན་གྱི་རིམ་པ།

གཉིས་པ་སྦས་དོན་གྱི་རིམ་པ་ནི།

ཉ་ཊཱིཀ་ལས། ལམ་ཤེས་པ་ཉིད་ཀྱི་རྣམ་པ་ལའང་བྱང་པའི་དང༌། སངས་རྒྱས་ཀྱི་གཉིས་ཡོད་པ་ལ། རྒྱུའི་རྣམ་པ་དང་འབྲས་བུའི་རྣམ་པར་གོ་བར་བྱ་ཞིང༌། དང་པོའི་དབང་དུ་བྱས་པ་ལ་ལམ་དྲུག་སྟེ། ཞེས་གསུངས་པ་ལྟར་གཉེན་པོའི་ལམ་མམ་རྣམ་ཐར་སྒོ་གསུམ་དང༌། སྤྲུལ་བའི་ལམ་གསུམ་དང༌། མཐོང་ཆོས་ལ་བདེར་གནས་ཀྱི་ལམ་ལྔ་དང༌། འཇིག་རྟེན་ལས་འདས་པའི་ལམ་དགུ་དང༌། སྤོང་བའི་ལམ་བཞི་དང༌། སངས་རྒྱས་ཉིད་ཀྱི་ལམ་གྱི་རྣམ་པ་བཅུ་བཤད་པ་དང་དྲུག དང་པོ་ལ་སྤྱི་དོན་དང་མཐའ་རགས་ཙམ་དཔྱད་པ་དང་གཉིས། དང་པོ་ནི། ཉ་ཊཱིཀ་ལས། རྣམ་པར་ཐར་བའི་སྒོ་གསུམ་སྟེ། མྱ་ངན་ལས་འདའ་བར་འགྱུར་ཞིང་འཁོར་བ་ལས་ཐར་བའི་སྒོ་ཡིན་པས་རྣམ་པར་ཐར་བའི་སྒོ་ཞེས་སྒྲ་སྦྱོར་བམ་གཉིས་ལས་སོ། །ཞེས་གསུངས་སོ། ། དེ་གསུམ་ནི། བདེན་བཞི་མི་རྟག་བཅུ་དྲུག་ལ་གོ་རིམ་བཞིན་དུ་སྦྱར་ན་ཕུང་བོའི་སྟོང་བ་དང་བདག་མེད་པའི་རྣམ་པ་མངོན་སུམ་དུ་རྟོགས་པའི་བྱང་འཕགས་དབང་རྣོན་གྱི་ཏིང་ངེ་འཛིན་ཆོས་ཅན། རྣམ་པར་ཐར་བའི་སྟོང་ཉིད་ཀྱི་ཏིང་ངེ་འཛིན་ཡིན་ཏེ། ཕུང་བོའི་སྟོང་བ་དང་བདག་མེད་པའི་རྣམ་པ་མངོན་སུམ་དུ་རྟོགས་པའི་བྱང་འཕགས་ཀྱི་ཏིང་ངེ་འཛིན་ཡིན་པའི་ཕྱིར། དེ་ཆོས་ཅན། བདག་ཏུ་ལྟ་བ་དང་དེས་བྱས་པ་བདག་གིར་ལྟ་བའི་གཉེན་པོ་ཡིན་ཏེ། རྟགས་སྔ་མ་ལྟར་བཀོད་པའོ། །ཕུང་བོའི་སྟོང་བ་དང་བདག་མེད་གཉིས་ཆོས་ཅན། རྣམ་པར་ཐར་པའི་སྒོ་སྟོང་བ་ཉིད་ཡིན་ཏེ། ཐ་དད་དང་གཅིག་པའི་བདག་གིས་སྟོང་བའི་སྟོང་ཉིད་ཡིན་པས་སོ། །དེ་མངོན་སུམ་དུ་རྟོགས་ན་ཐར་བར་འགྱུར་བས་རྣམ་ཐར་གྱི་སྒོ་ཞེས་བྱའོ། །ཐེག་ཆེན་འགོག་བདེན་གྱི་རྣམ་པ་བཞི་ཆོས་ཅན། རྣམ་པར་ཐར་བའི་སྒོ་མཚན་མ་མེད་པ་ཡིན་ཏེ། གཟུང་འཛིན་བདེན་འཛིན་གྱི་རྣམ་རྟོག་གི་མཚན་མ་ཅི་རིགས་ལམ་བདེན་གྱིས་མེད་པར་བྱས་པའི་སྤངས་པ་ཕུན་ཚོགས་ཡིན་པས་སོ། །ཐེག་ཆེན་ལམ་བདེན་གྱི་རྣམ་པ་བཞི་ཆོས་ཅན། རྣམ་ཐར་ཀྱི་སྒོ་མཚན་མེད་ཡིན་ཏེ། གཟུང་འཛིན་བདེན་འཛིན་གྱི་རྣམ་རྟོག་གི་མཚན་མ་སེལ་བྱེད་ཀྱི་ཟག་མེད་ཡེ་ཤེས་ཀྱི་ཆ་ཡིན་པས་སོ། །ཐེག་ཆེན་འགོག་ལམ་གྱི་རྣམ་པ་ལ་སེམས་རྩེ་གཅིག་ཏུ་གནས་པའི་བྱང་འཕགས་ཀྱི་ཏིང་ངེ་འཛིན་དེ་ཆོས་ཅན། རྣམ་པར་ཐར་བའི་སྒོ་མཚན་མེད་ཀྱི་ཏིང་ངེ་འཛིན་ཡིན་ཏེ། རྣམ་རྟོག་གི་མཚན་མ་མེད་པའི་བྱང་འཕགས་ཀྱི་ཏིང་ངེ་འཛིན་ཡིན་པས་སོ། །དེ་ཆོས་ཅན། བདག་ལྟ་རྒྱུར་ཡོད་པ་ཅན་ནམ་འབྲས་བུར་ཡོད་པ་ཅན་གྱི་གཟུང་འཛིན་བདེན་འཛིན་གྱི་རྣམ་རྟོག་གི་གཉེན་པོ་ཡིན་ཏེ། དེ་འདྲའི་རྣམ་རྟོག་གི་མཚན་མ་ཞི་བའི་ཐེག་ཆེན་འཕགས་པའི་རྟོགས་པ་ཡིན་པས་སོ། །ཟག་བཅས་ཀྱི་མི་རྟག་པ་དང་སྡུག་བསྔལ་གྱི་རྣམ་པ་དང༌། ཀུན་འབྱུང་བདེན་པའི་རྣམ་པའི་ངོ་བོ་ཉིད་དེ་སྡུག་བསྔལ་གྱི་རྒྱུ་ཀུན་འབྱུང་སོགས་ཆོས་ཅན། རྣམ་པར་ཐར་སྒོ་སྨོན་མེད་ཀྱི་དམིགས་པ་ཡིན་ཏེ། སྐྱོན་དང་བཅས་པས་དོར་བྱ་ཡིན་པས་སོ། །དེ་རྣམས་མངོན་སུམ་དུ་རིག་པའི་བྱང་འཕགས་དབང་རྣོན་གྱི་ཏིང་ངེ་འཛིན་ཆོས་ཅན། རྣམ་པར་ཐར་བའི་སྒོ་སྨོན་མེད་ཀྱི་ཏིང་ངེ་འཛིན་ཡིན་ཏེ། དེ་འདྲའི་བྱང་འཕགས་ཀྱི་ཏིང་ངེ་འཛིན་ཡིན་པའི་ཕྱིར། དེ་ཆོས་ཅན། ཁམས་གསུམ་པ་ལ་བླང་བྱར་སྨོན་པའི་གཉེན་པོ་ཡིན་ཏེ། ཁམས་གསུམ་སྡུག་བསྔལ་དུ་མངོན་སུམ་དུ་རིག་པའི་སློབ་ལམ་ཡིན་པའི་ཕྱིར། དེ་ལྟར་བདེན་བཞི་མི་རྟག་སོགས་བཅུ་དྲུག་ལ་སྦྱར་ནས་བཤད་པ་དེ་ཀུན་བཏུས་སུ་གསུངས་པ་འཕགས་པས་ཉི་སྣང་དུ་བཤད། དེ་བཞིན་དུ་འགྲེལ་ཆུང་དོན་གསལ་དང་ཉ་ཊཱིཀ་ལས་བཤད་དོ། །དེ་ཡང་མངོན་པ་ཀུན་བཏུས་ལས། རྣམ་པ་བཅུ་དྲུག་ནང་ནས་སྟོང་བ་ཉིད་ཀྱི་རྣམ་པ་དུ་ཞེ་ན་གཉིས་སོ། །སྨོན་པ་མེད་པའི་རྣམ་པ་དུ་ཞེ་ན་དྲུག་གོ །མཚན་མ་མེད་པའི་རྣམ་པ་དུ་ཞེ་ན་བརྒྱད་དོ། །ཞེས་སོ། །རྒྱན་ལྟར་ན་རྒྱན་དང་དེའི་ས་འགྲེལ་ལས། སྤྱོད་ཡུལ་གྱི་དབྱེ་བ་ནི། ཏིང་འཛིན་གསུམ་གྱི་སྤྱོད་ཡུལ་ནི། །བདག་མེད་རྣམ་པ་གཉིས་པོ་དང༌། །བདག་ཏུ་འཛིན་པའི་རྟེན་དང་ནི། །དེ་རྟག་ཉེར་ཞི་ཡིན་ཤེས་བྱ། །སྟོང་པ་ཉིད་དང་སྨོན་པ་མེད་པ་དང་མཚན་མ་མེད་པ་སྟེ། ཏིང་ངེ་འཛིན་གསུམ་གྱི་སྤྱོད་ཡུལ་ལམ་དམིགས་པ་ནི་གོ་རིམ་བཞིན་དུ། སྟོང་པ་ཉིད་ཀྱི་ཏིང་ངེ་འཛིན་ནི་ཀུན་བཏགས་གང་ཟག་དང་ཆོས་ཀྱི་བདག་མེད་པ་རྣམ་པ་གཉིས་པོ་ལ་དམིགས་པ་དང༌། སྨོན་པ་མེད་པའི་ཏིང་ངེ་འཛིན་ནི་བདག་ཏུ་འཛིན་པའི་རྟེན་ནམ་འཁྲུལ་པའི་གནས་གཞན་དབང་ཉེར་ལེན་གྱི་ཕུང་པོ་ལྔ་སྨོན་པར་བྱ་བའི་གནས་མ་ཡིན་པ་དང་ནི། མཚན་མ་མེད་པའི་ཏིང་ངེ་འཛིན་ནི་ཀུན་བཏགས་གཞན་དབང་དེ་དག་རྟག་ཏུ་ཉེ་བར་ཞི་བ་ཡོངས་གྲུབ་ཆོས་ཀྱི་དབྱིངས་དེ་བཞིན་ཉིད་སྤྲོས་པའི་མཚན་མ་ཐམས་ཅད་དང་བྲལ་བ་ལ་དམིགས་ནས་འཇུག་པ་ཡིན་པར་ཤེས་པར་བྱའོ། །འཛིན་ཚུལ་གྱི་དབྱེ་བ་ནི། དེ་ནི་གཟུང་འཛིན་ངོ་བོའི་ཕྱིར། །རྣམ་པ་གསུམ་དུ་ཤེས་པར་བྱ། །རྣམ་པར་མི་རྟོག་རྒྱབ་ཀྱིས་ཕྱོགས། །རྟག་ཏུ་དགའ་དང་ལྡན་པའོ། །ཏིང་འཛིན་གསུམ་པོ་དེ་ནི་བདག་མེད་གཉིས་དང་ཉེར་ལེན་ཕུང་པོ་ལྔ་དང་དེ་དག་ཉེ་བར་ཞི་བ་གསུམ་ནི་གཟུང་བ་ཡུལ་གྱི་ངོ་བོ་དང༌། སྟོང་པ་ཉིད་དང་སྨོན་པ་མེད་པ་དང་མཚན་མ་མེད་པ་གསུམ་ནི་འཛིན་པ་ཡུལ་ཅན་གྱི་ངོ་བོ་ཡིན་པའི་ཕྱིར་ཡུལ་གསུམ་པོ་དེ་རྣམས་ཀྱི་གནས་ལུགས་ཕྱིན་ཅི་མ་ལོག་པར་རྟོགས་པའི་ཡུལ་ཅན་ཏིང་ངེ་འཛིན་རྣམ་པ་གསུམ་དུ་ཤེས་པར་བྱ་ཞིང༌། དེ་དག་ཀྱང་རིམ་པ་བཞིན་དུ་སྟོང་པ་ཉིད་ཀྱི་ཏིང་ངེ་འཛིན་ནི་ཀུན་བཏགས་བདག་གཉིས་ཀྱིས་སྟོང་བར་རྟོགས་ནས་གང་ཟག་དང་ཆོས་ཀྱི་བདག་གཉིས་སུ་རྣམ་པར་མི་རྟོག་པ་དང༌། སྨོན་པ་མེད་པ་ནི་བདག་ཏུ་འཛིན་པའི་རྟེན་གཞན་དབང་ཉེར་ལེན་གྱི་ཕུང་པོ་སྡུག་བསྔལ་གྱི་རང་བཞིན་ལ་ཆགས་པ་མེད་པར་རྒྱབ་ཀྱིས་ཕྱོགས་ཏེ་མི་སྨོན་པ་དང༌། མཚན་མ་མེད་པ་ནི་དེ་དག་ཉེ་བར་ཞི་བ་ཡོངས་གྲུབ་ཆོས་ཀྱི་དབྱིངས་དྲི་མ་དང་བྲལ་བའི་མྱ་ངན་ལས་འདས་པ་ལ་དུས་རྟག་ཏུ་དགའ་བ་དང་མཚུངས་པར་ལྡན་པའོ། །དེ་དག་གི་དགོས་པ་ནི། ཡོངས་སུ་ཤེས་དང་སྤང་བ་དང༌། །མངོན་སུམ་དུ་ནི་བྱ་བའི་ཕྱིར། །སྟོང་ཉིད་ལ་སོགས་ཏིང་འཛིན་རྣམས། །དོན་རྣམ་གསུམ་དུ་ཡོངས་སུ་བསྒྲགས། །ཞེས་ཀུན་ཏུ་བརྟགས་པའི་བདག་ཉིད་མེད་པར་ཡོ༷ངས་སུ༷་ཤེ༷ས་པར་བྱ་བ་ད༷ང༌། བདག་ཏུ་འཛིན་པའི་རྟེན་གཞན་དབང་ཉེར་ལེན་གྱི་ཕུང་པོ་སྤ༷ང་བར་བྱ་བ༷འི་ཕྱིར་ད༷ང༌། དེ་དག་ཉེ་བར་ཞི་བ་ཡོངས་གྲུབ་ཀྱི་ཆོས་ཀྱི་དབྱིངས་དྲི་མ་དང་བྲལ་བ་མངོ༷ན་སུ༷མ་དུ༷་ནི༷་བྱ༷་བ༷འི་ཕྱི༷ར་སྟོ༷ང་པ་ཉི༷ད་དང་ལ༷་སོ༷གས་པ་སྟེ་སྨོན་པ་མེད་པ་དང་མཚན་མ་མེད་པའི་ཏི༷ང་ངེ༷་འཛི༷ན་རྣམས་དོ༷ན་རྣ༷མ་པ་གསུ༷མ་པོ་འགྲུབ་པའི་ཆེད་དུ༷་ཡོ༷ངས་སུ༷་བསྒྲ༷གས་པ་ཡིན་ནོ། །ཞེས་གསུངས་པའི་ཕྱིར་རོ། །ཡང་མཛོད་ལྟར་ན་ཇི་སྐད་དུ། མཚན་མེད་ཞི་བའི་རྣམ་པ་ཅན། །སྟོང་ཉིད་བདག་མེད་སྟོང་ཉིད་དུ། །འཇུག་པའོ་སྨོན་པ་མེད་པ་ནི། །དེ་ལས་གཞན་བདེན་རྣམ་པ་དང༌། །ཞེས་པའི་དོན་ནི། མདོ་ལས། སྟོང་ཉིད་དང༌། མཚན་མེད་དང༌། སྨོན་མེད་ཀྱི་ཏིང་ངེ་འཛིན་གསུམ་གསུངས་ན། དེ་གང་ཞེ་ན། ཡུལ་མྱང་འདས་སམ་འགོག་བདེན་ནི་ཡུལ་ལྔ་དང་ཕོ་མོ་དང་འདུས་བྱས་ཀྱི་མཚན་ཉིད་གསུམ་མམ་བཞིའི་མཚན་མ་སྟེ་བཅུ་དང་བྲལ་བས་མཚན་མེད་ཡིན་ལ། དེ་ལ་དམིགས་པའི་ཏིང་ངེ་འཛིན་ཡིན་པས་མཚན༷་མ་མེད༷་པའི་ཏིང་ངེ་འཛིན་ནི་མཚན་མ་ཐམས་ཅད་ཞི༷་བ་འགོག་བའི༷་རྣམ༷་པ༷་བཞི་དང་མཚུངས་པར་ལྡན་པ་དང༷༌། སྟོང༷་པ་ཉིད༷་ཀྱི་ཏིང་ངེ་འཛིན་ནི་སྟོང་བའམ་བདག༷་མེད༷་ལ་དམིགས་ནས་སྡུག་བསྔལ་གྱི་བདེན་པའི་བདག་མེད་པ་དང་སྟོང༷་པ་ཉིད༷་དུ༷་འཇུག༷་པའི་རྣམ་པ་ཉིད་དང་མཚུངས་པར་ལྡན་པ༷འོ༷། །སྨོན༷་པ༷་མེད༷་པ༷འི་ཏིང་ངེ་འཛིན་ནི༷་ཡུལ་སྨོན་བྱ་མ་ཡིན་པའི་འདུས་བྱས་ལ་དམིགས་ནས་ཡིད་འབྱུང་པའི་རྣམ་པ་ཅན་ཡིན་ལ། སྟོང་པ་དང་བདག་མེད་པས་ཀྱང་སྡུག་བསྔལ་གྱི་བདེན་པ་ལ་སྟོང་པ་དང་བདག་མེད་ཀྱིས་རྣམ་པར་དམིགས་མེད་ཀྱི་དེ་གཉིས་ནི་ཆོས་ཐམས་ཅད་ཀྱི་མཚན་ཉིད་ཡིན་པས་མྱང་འདས་ཀྱི་མཚན་ཉིད་ཀྱང་ཡིན་ན། དེ་དག་གིས་མྱང་འདས་ལས་ཡིད་མི་འབྱུང་བ་ལྟར་སྡུག་བསྔལ་ལས་ཀྱང་ཡིད་མི་འབྱུང་ལ་འགོག་བདེན་གྱིས་ཀྱང་ཡིད་མི་འབྱུང་གི མི་རྟག་པ་དང་སྡུག་བསྔལ་གྱི་རྣམ་པ་གཉིས་དང་ཀུན་འབྱུང་གི་བདེན་པ་དང་དེ་དག་མ་ཟད་ལམ་གྱི་བདེན་པའང་རེ་ཞིག་བླང་བྱ་ཡིན་ཡང་འདུས་བྱས་ཡིན་པས་ཆུར་བརྒལ་བའི་གཟིངས་ལྟར་ལྷག་མེད་དུ་འཇུག་པ་ན། ངེས་པར་འདོད་པས་སྤང་བྱར་གསུངས་པས་སྡུག་བསྔལ་གྱི་བདེན་པའི་རྣམ་པ་ཕྱི་མ་གཉིས་དང༌། འགོག་བདེན་གྱི་རྣམ་པ་བཞི་སྟེ་དྲུག་པོ་དེ༷་དག་ལས༷་གཞན༷་པ་སྡུག་བསྔལ་གྱི་བདེན༷་པའི་རྣམ༷་པ་དང་པོ་གཉིས་དང༌། ཀུན་འབྱུང་དང་ལམ་གྱི་བདེན་པའི་རྣམ་པ་བརྒྱད་དེ་རྣམ་པ༷་བཅུ་དང༷་མཚུངས་པར་ལྡན་པའི་ཏིང་ངེ་འཛིན་ནི་སྨོན་མེད་ཀྱི་ཏིང་ངེ་འཛིན་ནོ། །གནོད་འཇོམས་སྐབས་སུ། ཀུན་བརྟགས་པ་རྣམས་མཚན་ཉིད་མེད་པར་མཐོང་བ་ནི་སྟོང་བ་ཉིད་ཀྱི་ཏིང་ངེ་འཛིན་ཏོ། ། ཡོངས་སུ་གྲུབ་པ་ལ་ཞི་བའི་མཚན་ཉིད་དུ་མཐོང་བ་ནི་མཚན་མ་མེད་པའི་ཏིང་ངེ་འཛིན་ཏོ། །གཞན་གྱི་དབང་ལ་མི་མཐུན་པར་མཐོང་བ་ནི་སྨོན་པ་མེད་པའི་ཏིང་ངེ་འཛིན་ཏོ། །ཞེས་པ་ལྟར་མདོ་ལུགས་མ་ལས། རྣམ་པར་ཐར་པའི་སྒོ་གསུམ་ནི། ཀུན་བཏགས་པའི་ཆོས་ཐམས་ཅད་རང་གི་མཚན་ཉིད་མེད་པའི་ཕྱིར་ཡོངས་སུ་གྲུབ་པ་སྟོང་པ་ཉིད་དུ་སོ་སོར་རྟོག་པའི་རྩེ་གཅིག་ཏུ་གནས་པ་ནི་རྣམ་པར་ཐར་པའི་སྒོ་སྟོང་པ་ཉིད་ཀྱི་ཏིང་ངེ་འཛིན་ཏོ། །ཡོངས་སུ་གྲུབ་པའི་ཆོས་ཐམས་ཅད་སྤྲོས་པའི་མཚན་མ་མེད་པར་སོ་སོར་རྟོག་པའི་སེམས་རྩེ་གཅིག་ཏུ་གནས་པ་ནི་རྣམ་པར་ཐར་པའི་སྒོ་མཚན་མ་མེད་པའི་ཏིང་ངེ་འཛིན་ཏོ། །ཆོས་ཉིད་རང་བཞིན་གྱིས་དག་པ་ལ་བསོད་ནམས་དང༌། བསོད་ནམས་མ་ཡིན་པ་དང༌། མི་གཡོ་བའི་ལས་འདུ་བྱེད་པ་མེད་པར་སོ་སོར་རྟོག་པའི་སེམས་པ་རྩེ་གཅིག་པ་ནི་རྣམ་པར་ཐར་པའི་སྒོ་སྨོན་པ་མེད་པའི་ཏིང་ངེ་འཛིན་ཏོ། །དེ་ལ་ཀུན་བཏགས་པ་རྣམས་མཚན་ཉིད་མེད་པར་མཐོང་བ་ནི་སྟོང་པ་ཉིད་ཀྱི་ཏིང་ངེ་འཛིན་ཏོ། །ཡོངས་སུ་གྲུབ་པ་ལ་ཞི་བའི་མཚན་ཉིད་དུ་མཐོང་བ་ནི་མཚན་མ་མེད་པའི་ཏིང་ངེ་འཛིན་ཏོ། །ཞེས་གསུངས་སོ། །རྒྱུ་འབྲས་ངོ་བོ་གསུམ་ལ་སྦྱར་བ་དང་བྱ་བྱེད་ལས་གསུམ་ལ་སྦྱར་བ་ཡོད་དེ། མཐོང་ལམ་ཕྱིར་མི་ལྡོག་པའི་སྐབས་སུ་ཉ་ཊཱིཀ་ལས། ཆོས་ཐམས་ཅད་དོན་དམ་པར་ངོ་བོ་རྒྱུ་འབྲས་ཀྱིས་སྟོང་བའི་རྣམ་ཐར་སྒོ་གསུམ་གྱི་ངོ་བོ་སྟེ་སྟོང་ཉིད་མཚན་མེད་སྨོན་མེད་ཡིན་པས། ཞེས་དང༌། འཕགས་པ་ཡུལ་འཁོར་སྐྱོང་གི་ཞུས་པའི་མདོ་ལས། སྟོང་བ་ཞི་བ་སྐྱེ་བ་མེད་པའི་ཚུལ། །མི་ཤེས་པས་ནི་འགྲོ་བ་འཁྱམས་གྱུར་པས། །དེ་དག་ཐུགས་རྗེ་མངའ་བས་ཐབས་ཚུལ་གྱིས། །རིགས་པ་བརྒྱ་དག་གིས་ནི་འཛུད་པར་མཛད། །ཅེས་སོགས་རྣམ་ཐར་སྒོ་གསུམ་བཤད་ཚུལ་མང་ངོ༌། །གཏན་ལ་དབབ་པ་བསྡུ་བ་ལས། གང་དུ་སྟོང་བ་ཉིད་དང་སྨོན་པ་མེད་པ་དང༌། མཚན་མ་མེད་པ་བྱེ་བྲག་མེད་པར་གསུངས་པ་དེར་ནི་དེ་དག་ཐོས་པ་དང་བསམ་པ་དང་སྒོམ་པ་ལས་བྱུང་བ་ཉིད་ཡིན་པར་བལྟ་བར་བྱའོ། །གང་དུ་དེ་དག་ཏིང་ངེ་འཛིན་གྱི་སྒྲ་ཁོ་ནར་གསུངས་པ་དེར་ནི་དེ་དག་བསྒོམས་པ་ལས་བྱུང་བ་འཇིག་རྟེན་པ་དང་འཇིག་རྟེན་ལས་འདས་པ་ཉིད་ཡིན་པར་བལྟ་བར་བྱའོ། །གང་དུ་དེ་དག་རྣམ་པར་ཐར་བའི་སྒོའི་སྒྲར་གསུངས་པ་དེར་ནི་དེ་དག་འཇིག་རྟེན་ལས་འདས་པ་ཉིད་ཡིན་པར་བལྟ་བརབྱའོ། །ཞེས་ཏིང་ངེ་འཛིན་དང་རྣམ་ཐར་གྱི་སྒྲ་སྦྱར་མ་སྦྱར་གྱི་ཁྱད་ཡོད་པར་བཤད་དོ། །

གཉིས་པ་མཐའ་རགས་ཙམ་དཔྱད་པ་ལ།

ཉ་ཊཱིཀ་ལས། མདོ་བསྟན་བཅོས་གཞན་གྱི་ལུགས་དང༌། མདོ་དང་བསྟན་བཅོས་འདིའི་ལུགས་གཉིས་སོ། །ཞེས་སོགས་ཀྱིས་མདོ་སྡེ་རྒྱན་གྱི་བཤད་ཚུལ་དེ། མདོ་བསྟན་བཅོས་གཞན་གྱི་ལུགས་ཡིན་པའི་རྒྱུ་མཚན་དང༌།འགྲེལ་བ་དོན་གསལ་ལས་བཤད་ཚུལ་དང་ཡུམ་གསུམ་གནོད་འཇོམས་ལས་བཤད་པ་དེ་མདོ་བསྟན་བཅོས་འདིའི་ལུགས་ཡིན་པའི་རྒྱུ་མཚན་གང་ཡིན་དང་རྒྱན་དང་གནོད་འཇོམས་གཉིས་ཀར་མཚན་ཉིད་གསུམ་ལ་སྦྱར་བ་ཙམ་འདྲ་བ་ཡིན་མིན་སོགས་སྐབས་འདིའི་བཤད་བྱ་རྩ་བའི་མདོ་དང་ཡུམ་གསུམ་གནོད་འཇོམས་སོགས་ལ་ལྟ་ནས་དཔྱད་པར་བྱའོ། །ཡང་ཉ་ཊཱིཀ་ལས། ཡུལ་རྣམ་ཐར་སྒོ་གསུམ་ཞེས་གསུང་བ་ནི་ཤིན་ཏུ་ནོར་ཏེ། ཉེར་ལེན་ཕུང་བོ་རྣམ་པར་ཐར་བའི་སྒོར་ཅི་ལྟར་རིགས། འགྲེལ་བ་གང་ལས་བཤད། ཅེས་གསུངས་པ་ལ་ཡུལ་དེ་ལ་ཡུལ་ཅན་གྱི་མིང་གིས་བཏགས་མི་རིགས་པའི་རྒྱུ་མཚན་ཡོད་མེད་དཔྱད། ཡང་ཉ་ཊཱིཀ་ལས། རྣམ་པར་ཐར་བའི་སྒོ་གསུམ་སྟེ། མྱ་ངན་ལས་འདའ་བར་འགྱུར་ཞིང་འཁོར་བ་ལས་ཐར་བའི་སྒོ་ཡིན་པས་རྣམ་པར་ཐར་བའི་སྒོ་ཞེས་སྒྲ་སྦྱོར་བམ་གཉིས་ལས་སོ། །ཞེས་རྣམ་པར་ཐར་བའི་སྒོ་དུ་མ་གསུང་བ་མི་འཐད་པར་ཐལ། དབུ་མ་བཞི་བརྒྱ་བ་ལས། ཞི་སྒོ་གཉིས་པ་མེད་པ་དང༌། ཞེས་གསུངས་པའི་ཕྱིར་ཟེར་ན་རྣམ་ཐར་གྱི་སྒོ་ཡིན་པའི་ཚད་ལ་དཔྱད། ཡང་ཉ་ཊཱིཀ་ལས། རྣམ་པར་ཐར་བའི་སྟོང་ཉིད་ཀྱི་ཏིང་ངེ་འཛིན་ཡིན་ཏེ། དེ་ལྟར་གྱི་བྱང་འཕགས་ཀྱི་ཏིང་ངེ་འཛིན་ཡིན་པས་སོ། །ཞེས་སོགས་ཀྱིས་བྱང་འཕགས་ཀྱི་ཏིང་ངེ་འཛིན་ལ་སྦྱར་བའི་རྒྱུ་མཚན་ལ་དཔྱད། ཡང་ཉ་ཊཱིཀ་ལས། གཏན་ལ་དབབ་པ་བསྡུ་བར། སྟོང་ཉིད་མཚན་མེད་སྨོན་མེད་ཅེས་པ་ཙམ་གསུངས་པ་ནི་ཐོས་བསམ་སྒོམ་པ་གང་རུང་གིས་ཤེས་པ་དང༌། སྟོང་ཉིད་ཀྱི་ཏིང་ངེ་འཛིན་ཞེས་སོགས་ཀྱིས་གསུངས་པ་ནི་སྒོམ་བྱུང་འཇིག་རྟེན་འདས་མ་འདས་གང་རུང་ཁོ་ནས་ཤེས་པ་དང༌། རྣམ་ཐར་གྱི་སྒྲས་གསུངས་པ་ནི་སྒོམ་བྱུང་འདས་པ་ཁོ་ནར་བཤད་དོ། །ཞེས་པས་རྣམ་ཐར་ལ་འདས་ལམ་དགོས་མིན་དཔྱད་དོ། །