གསུམ་པ་མཐོང་ཆོས་ལ་བདེར་གནས་ཀྱི་ལམ་ལྔ།
གསུམ་པ་མཐོང་ཆོས་ལ་བདེར་གནས་ཀྱི་ལམ་ལྔ་ནི།
གཞན་དོན་གྱི་ཆེད་དུ་བྱ་བ་ཅན་རང་དོན་མཐོང་བའི་ཆོས་ཚེ་འདི་ལ་སེམས་སམ་ལུས་བདེ་བར་གནས་པའི་ལམ་ལ་གཟུགས་མེད་ཀྱི་རྣམ་ཐར་བཞི་དང་འགོག་པའི་རྣམ་ཐར་དང་གཉིས་ལས། དང་པོ་བཞི་ནི། ཐར་བ་འཕགས་པའི་ཟག་མེད་ཀྱི་བློ་དང་རང་རང་གི་རོ་མྱང་བ་ལས་གྲོལ་བར་མཐུན་པར་གནས་པའི་ལམ་གྱི་རང་བཞིན་ལ་གཟུགས་མེད་པའི་སྙོམས་པར་འཇུག་པའི་རྣམ་པར་ཐར་བ་བཞི་སྟེ། སྦྱོར་བའི་དུས་སུ་གཟུགས་མེད་ཞི་བའི་རྣམ་ཐར་ལ་ཆགས་ཤིང་རོ་མྱང་བའི་སྒྲིབ་པ་ལས་གྲོལ་བའི་ཕྱིར་དུ་བསྒོམས་པས་དེ་ལས་གྲོལ་བས་ཟག་མེད་དང་རྗེས་སུ་མཐུན་པ་ཡིན་ནོ། །