གཉིས་པ་འགོག་པའི་རྣམ་ཐར།

གཉིས་པ་འགོག་པའི་རྣམ་ཐར་ནི།

ཆགས་སོགས་སམ་སེམས་སེམས་བྱུང་རགས་པ་ཉེ་བར་ཞི་བར་གནས་པའི་ལམ་གྱི་རང་བཞིན་ལ་ཚོགས་བདུན་འཁོར་གྱི་འདུ་ཤེས་དང་ཚོར་བའི་སྒྲིབ་པ་འགོག་པས་བདུན་འཁོར་བཅས་བཀག་པར་འགྱུར་པའི་འགོག་པའི་རྣམ་པར་ཐར་བ་སྟེ་སྦྱོར་བའི་དུས་དེ་འདྲ་དེ་འགོག་པའི་སྒྲིབ་པ་ལས་ཐར་བའི་ཕྱིར་དུ་འདུ་ཤེས་མེད་འདུ་ཤེས་མེད་མིན་གྱི་རྣམ་ཐར་ལ་བརྟེན་ཏེ་ཕྱིས་དེ་ལ་གནས་པ་ལས་འདས་ནས་ཐར་བ་དང་མཐུན་པར་གནས་པ་ཚོགས་བདུན་འཁོར་བཅས་འགོག་པའི་རྣམ་ཐར་གྱི་རྣམ་པ་གཅིག་སྟེ་དེ་ལྟར་ན་མཐོང་ཆོས་བདེ་བར་གནས་པའི་ལམ་མམ་རྣམ་ཐར་ལྔའོ། ། སྔ་མ་གསུམ་དང་བསྡོམས་པས་རྣམ་པར་ཐར་བ་བརྒྱད་དོ། །འདི་དང་འགོག་སྙོམས་ཀྱི་ཁྱད་ནི་འདི་དེའི་སྒྲིབ་པ་ལས་གྲོལ་བའི་ཆ་ལ་བཞག འགོག་སྙོམས་ནི་དེ་གཉིས་བཀག་པ་ལ་ཞུགས་པའི་ཆ་སྟེ་དོན་གཅིག་ཅེས་ཉ་ཊཱིཀ་ལས་གསུངས་སོ། །སེ་ར་རྗེ་བཙུན་པ་སོགས་ཀྱིས་དེ་གཉིས་དོན་མི་གཅིག་པར་བཤད་དོ། །འགོག་སྙོམས་ཀྱི་དེ་གཉིས་དོན་གཅིག་ཀྱང་གཟུགས་མེད་ཀྱི་རྣམ་ཐར་དང་གཟུགས་མེད་ཀྱི་སྙོམས་འཇུག་ཁྱད་ཡོད་དེ། ཉ་ཊཱིཀ་ལས། སྤྱིར་རྣམ་ཐར་དུ་སྨོས་པའི་གཟུགས་མེད་བཞི་དང༌། གཟུགས་མེད་ཀྱི་སྙོམས་འཇུག་བཞིའི་ཁྱད་ནི། སྔ་མ་རྣམ་གྲོལ་ལམ་དག་པ་ཁོ་ན་དང༌། ཕྱི་མ་ལ་བར་ཆད་མེད་ལམ་དང་ཉོན་མོངས་ཅན་ཡང་ཡོད་དོ། །ཞེས་གསུངས་པའི་ཕྱིར། ཉོན་མོངས་ཅན་ཡོད་མེད་དཔྱད། སྤྱིར་ལུས་ཀྱི་འབྱུང་བ་ཆེན་པོའམ་སེམས་སེམས་བྱུང་དམིགས་པ་ལ་ཆ་མཉམ་དུ་བྱེད་པས་སྙོམས་འཇུག་དང༌། རང་སའི་ཀུན་དཀྲིས་ལས་ཐར་ཞིང་དེ་དང་མ་འདྲེས་པའི་ཆ་ནས་རྣམ་ཐར་འཇོག་པའོ། ། བཞི་བ་འཇིག་རྟེན་ལས་འདས་པའི་ལམ་ལ་མཐར་གནས་སྙོམས་འཇུག་དགུའོ། །འཇིག་རྟེན་ལས་འདས་པའི་ལམ་ཡིན་པའི་སྙོམས་འཇུག་དགུ་བོ་ཉིད་འདིར་གཟུང་ངོ༌། །ཐ་མ་གཉིས་ཡིན་པའི་འདས་ལམ་མི་སྲིད་དམ་སྙམ་ན་སངས་རྒྱས་སར་སྙོམས་འཇུག་དགུ་བཤད་ཅིང༌། སེང་གེ་རྣམ་བསྒྱིངས་ཀྱི་མཐོང་ལམ་རྩེ་མོ་ལའང་དགུ་བཤད་ལ། དེ་ཟག་བཅས་ཞེས་ནི་མི་རུང་སྟེ་བརྗོད་པར་བྱེད་པའི་ལུང་མེད་པའི་ཕྱིར་རོ། །ཁྱད་པར་འགོག་སྙོམས་ཀྱི་རྒྱུ་མཚན་འོག་ཏུ་འཆད་དོ། །དགུ་གང་ཞེ་ན། བསམ་གཏན་བཞི་དང་གཟུགས་མེད་བཞི་སྟེ་ངོ་བོ་ཙམ་སྔར་བཤད་ཟིན་ཅིང་འདས་ལམ་ཡིན་པའི་བརྒྱད་དོ། །སྤྱིར་རྣམ་ཐར་དུ་སྨོས་པའི་གཟུགས་མེད་བཞི་དང༌། གཟུགས་མེད་ཀྱི་སྙོམས་འཇུག་བཞིའི་ཁྱད་ནི།སྔ་མ་རྣམ་གྲོལ་ལམ་དག་པ་ཁོ་ན་དང༌། ཕྱི་མ་ལ་བར་ཆད་མེད་ལམ་དང་ཉོན་མོངས་ཅན་ཡང་ཡོད་དོ། །ཞེས་ཉ་ཊཱིཀ་ལས་གསུངས་སོ། ། འགོག་པའི་སྙོམས་པར་འཇུག་པ་བཤད་པ་ལ། གང་ཟག་གང་གིས་སྙོམས་པར་འཇུག་པ་བཤད་པ། སེམས་གང་ལས། ཡིད་བྱེད་གང་གིས། དགག་བྱ་གང་འགོག ངོ་བོ། དུས་ཇི་སྲིད་དུ། རྟེན་གང་གིས་སྙོམས་པར་འཇུག་པ་བཤད་པ་དང་བདུན། དང་པོ་ནི། མཛོད་ལྟར་ན། ཕྱིར་མི་འོང་ལུས་མངོན་བྱེད་དམ་དགྲ་བཅོམ་གཉིས་ཀའི་ཆ་ལས་རྣམ་གྲོལ་ཀྱིས་ཏེ། མཛོད་དུ། འགོག་པ་ཐོབ་པའི་ཕྱིར་མི་འོང༌། །ལུས་ཀྱིས་མངོན་སུམ་བྱེད་པར་འདོད། །ཅེས་དང༌། འགོག་ཐོབ་གཉིས་ཀ་ལས་རྣམ་གྲོལ། །ཞེས་སོ། །སོ་སྐྱེ་རྒྱུན་ཞུགས་ཕྱིར་འོང༌། སྲིད་རྩེའི་སེམས་མ་ཐོབ་པའི་ཕྱིར་མི་འོང༌། དགྲ་བཅོམ་ཤེས་རབ་ཀྱིས་རྣམ་གྲོལ་རྣམས་ཀྱིས་འཇུག་མི་ནུས་ཏེ། སྲིད་རྩེའི་སེམས་དང་འཕགས་ལམ་ཚོགས་པ་མེད་པས་སོ། །ཐེག་ཆེན་ལྟར་ན། ཐེག་ཆེན་འཕགས་པའི་གང་ཟག་ཅི་རིགས་ཀྱིས་འཇུག་སྟེ་མཐོང་ལམ་ནའང་རྣམ་ཐར་བརྒྱད་ཡོད་པར་རྩེ་སྦྱོར་དུ་བཤད་དོ། །འོ་ན་ས་བཅུ་བར། ཀྱེ་རྒྱལ་བའི་སྲས་བྱང་ཆུབ་སེམས་དཔའ་ས་དྲུག་པ་ཡན་ཆད་འགོག་པ་ལ་སྙོམས་པར་འཇུག་ལ་ས་བདུན་པ་ལ་ནི་སེམས་ཀྱི་སྐད་ཅིག་གཅིག་ལ་འཇུག་སྟེ་འགོག་པ་མངོན་དུ་བྱས་པ་ཞེས་ནི་མི་བྱའོ། །ཞེས་པ་དང་འགལ་ཞེ་ན། དེ་ནི་སྤྲོས་པ་ཐམས་ཅད་བཀག་པའི་དེ་བཞིན་ཉིད་ལ་འབད་པ་ཆུང་ངུས་འཇུག་མི་འཇུག་གི་དབང་དུ་བྱས་པས་མི་འགལ་ལོ། །ཐུབ་དགོངས་ཀྱི་དོན་ནོ། །ཞེས་ཉ་ཊཱིཀ་ལས་གསུངས་མོད་ས་བདུན་པར་འབད་པ་ཆུང་ངུས་དེ་ལ་འཇུག་ནུས་མི་ནུས་དཔྱད་པར་བྱའོ། །