དྲུག་པ་འགོག་པ་ལ་སྙོམས་པར་འཇུག་པའི་དུས་ཇི་སྲིད་དུ་སྙོམས་པར་འཇུག་པ་བཤད་པ།
དྲུག་པ་འགོག་པ་ལ་སྙོམས་པར་འཇུག་པའི་དུས་ཇི་སྲིད་དུ་སྙོམས་པར་འཇུག་པ་བཤད་པ་ནི།
ཉི་མའི་སྙིང་བོར་བྱང་སེམས་ནི་ཉི་མ་གཅིག་ནས་བདུན་གྱི་བར་དུ་སྙོམས་པར་འཇུག་སྟེ་དུས་རིང་མོ་ཞིག་ཏུ་སྙོམས་པར་ཞུགས་པ་ན་བྱང་ཆུབ་སེམས་པའི་སྤྱོད་པ་ལས་དམན་པར་འགྱུར་རོ། །ཞེས་བཤད་པས་ཞག་བདུན་པས་ལྷག་པ་མི་འཇུག་ཟེར་རོ། །སྙིང་རྗེ་པད་དཀར་ལས། སྐྱེ་བ་གཅིག་གིས་ཐོགས་པའི་བྱང་སེམས་འགོག་པ་ལ་སྙོམས་པར་ཞུགས་པའི་སེམས་ཀྱིས་བར་གྱི་བསྐལ་བ་བཅུ་བོ་འདི་དག་འདའ་བར་བྱེད་དོ། །ཞེས་བཤད་པ་དང་འགལ་ཞིང་སྔར་གྱི་ལུང་ནི། འགོག་པ་སེམས་མེད་དུ་འདོད་པ་རྣམས་དྲངས་པའི་དོན་ཡིན་ཞེས་ཉ་ཊཱིཀ་ལས་བཤད་ལ། དེ་ལ་བརྟེན་ནས་འགོག་པ་སེམས་མེད་དུ་འདོད་པ་རྣམས་དྲངས་ཚུལ་ལ་དཔྱད། དེས་ན་ཉན་ཐོས་ལྟར་ན། བློ་ཡིས་ཇི་ཙམ་འཕངས་པ་དེ་ཙམ་དུ་འཇུག སངས་རྒྱས་བྱང་སེམས་ཇི་ལྟར་བཞེད་པ་བཞིན་དུ་འཇུག་གོ །ཐེག་པ་ཆེ་ཆུང་གི་འགོག་སྙོམས་མིང་འདྲ་ཡང་དོན་མི་འདྲ་བའི་ཁྱད་གནམ་ས་བཞིན་ནོ། །ཞེས་ཉ་ཊཱིཀ་ལས་སོ། །