གཉིས་པ་སྦས་དོན་གྱི་རིམ་པ་བཤད་པ།

གཉིས་པ་སྦས་དོན་གྱི་རིམ་པ་བཤད་པ་ལ།

སྟོབས་སོགས་རྣམ་པ་ཐམས་ཅད་མཁྱེན་པ་ཉིད་ཀྱི་རྣམ་པ་སོ་དགུའི་ལམ་ཆོས་ཅན། གཞན་དང་ཐུན་མོང་མ་ཡིན་པའི་ལམ་ཁོ་ན་ཡིན་ཏེ། ཤིན་ཏུ་ཕུལ་དུ་བྱུང་ཞིང་མཐར་ཕྱིན་པའི་ལམ་ཡིན་པའི་ཕྱིར་རོ། །དེ་ལ།ཡོན་ཏན་གྱི་དབྱེ་བ་དང༌། རང་བཞིན་དེ་བཞིན་ཉིད་དང༌། གང་གི་ཡིན་པ་རང་བྱུང༌། གང་གི་དོན་དུ་ཡིན་པ་སངས་རྒྱས་ཉིད་ཀྱི་རྣམ་པ་བཤད་པ་དང་བཞིའོ། །དང་པོ་ལ་ཡང་བཞི་སྟེ།སྟོབས་བཅུ། མི་འཇིགས་བཞི། སོ་སོ་ཡང་དག་རིག་བཞི། མ་འདྲེས་བཅོ་བརྒྱད་བཤད་པའོ། །དང་པོ་ནི། ཐུན་མོང་མིན་པའི་ལམ་གཅིག་པོ་དེ་ལ་སྟོབས་ལ་སོགས་པའི་དབྱེ་བ་ཡོད་པས་སྟོབས་ནི། རྣམ་མཁྱེན་གྱི་ཡེ་ཤེས་དངོས་མཚན་གཞི་དེ་པའི་སྟོབས་སུ་མཚོན། གཞན་གྱིས་ཚུར་ཅུང་ཟད་ཀྱང་བརྫི་བར་མི་ནུས་ཤིང་གཞན་རྣམས་ཤིན་ཏུ་ཟིལ་གྱིས་གནོན་པ་ཡང་དག་པར་འབྱོར་བའི་ཏིང་ངེ་འཛིན་དང་ཤེས་རབ་མཚུངས་ལྡན་ཅི་རིགས་པའི་མཐར་ཐུག་གི་མཁྱེན་པ་ཡིན་པ། ཞེས་རེ་རེ་ལ་སྦྱར་རོ། །བྱེ་བྲག་སོ་སོ་ལ་ཡང་འདོན་པ་བསྒྱུར་རོ། ། རྒྱུད་བླ་མ་ལས། གནས་དང་གནས་མིན་ལས་རྣམས་ཀྱི། །རྣམ་སྨིན་དང་ནི་དབང་པོ་དང༌། །ཁམས་རྣམས་དང་ནི་མོས་པ་དང༌། །ཀུན་འགྲོའི་ལམ་དང་བསམ་གཏན་སོགས། །ཉོན་མོངས་དྲི་མ་མེད་པ་དང༌། །གནས་ནི་རྗེས་སུ་དྲན་པ་དང༌། །ལྷ་ཡི་མིག་དང་ཞི་བ་དག །མཁྱེན་པའི་སྟོབས་ནི་རྣམ་པ་བཅུ། །ཞེས་གསུངས་པ་ལྟར་སྟོབས་བཅུ་ལས་སྟོབས་དང་པོ་གནས་དང་གནས་མིན་མཁྱེན་པའི་སྟོབས་ནི། ཉེས་སྤྱོད་ཀྱི་རྣམ་སྨིན་མི་འདོད་པ་གནས་འདོད་པ་གནས་མིན། སེར་སྣས་དབུལ་བ་གནས་ལོངས་སྤྱོད་ཆེན་པོ་གནས་མིན། སྦྱིན་པས་ལོངས་སྤྱོད་ཆེན་པོ་གནས་དབུལ་བ་གནས་མིན་ཞེས་སོགས་དང༌། བརྒྱད་པའི་གང་ཟག་རྒྱུན་ཞུགས་འབྲས་བུ་མ་ཐོབ་པར་སྟན་ལས་ལྡང་བ་གནས་མིན་ཐོབ་ནས་ལྡང་བ་གནས།ཞེས་སོགས་རྒྱ་ཆེར་མདོ་དང་གནོད་འཇོམས་སོགས་ལས་སོ། །དེ་ལྟར་མཁྱེན་པའི་མཐར་ཐུག་གི་སྟོབས་དེ་གནས་དང་གནས་མིན་མཁྱེན་པའི་སྟོབས་༡ཡིན་ནོ། །གནས་གནས་མིན་སྲིད་མི་སྲིད་ཅེས་སྒྲ་སྦྱོར་བམ་གཉིས་སོ། །རྒྱུ་དུས་གསུམ་གྱི་ལས་བསགས་པའི་འབྲས་བུ་གང་དང་གང་དུ་རྣམ་པར་སྨིན་པ་མཁྱེན་པའི་མཐར་ཐུག་གི་སྟོབས་དེ་ལས་དང་རྣམ་སྨིན་མཁྱེན་པའི་སྟོབས་༢དང༌། དེ་བསགས་པའི་རྒྱུ་དང་ཕྱོགས་གང་དུ་དེ་བྱེད་པའི་གནས་དང་བདེ་སྡུག་སོགས་རྣམ་སྨིན་དང་ཆགས་སྡང་རྨོངས་སོགས་ཉོན་མོངས་པ་རྣམས་རང་རང་ལ་གནས་ཤིང་རང་རང་ལ་མོས་པ་དང༌། རེ་རེ་ལ་གནས་ཤིང་གཞན་རེ་ལ་མོས་པ་དང༌། གཞན་གཉིས་སོགས་ལ་མོས་པ་སོགས་མཐུན་པ་དང༌། མི་མཐུན་པ་མི་དགེ་བ་ལ་གནས་ནས་དགེ་བ་ལ་མོས་སོགས་སྦྱོར་བ་ཆུང་ལ་མོས་པ་རྒྱ་ཆེ་བ་སོགས་མོས་པ་སྣ་ཚོགས་པ་མཁྱེན་པའི་རྒྱལ་བའི་སྟོབས་དེ་མོས་པ་སྣ་ཚོགས་མཁྱེན་པའི་སྟོབས་༣དང༌། འཇིག་རྟེན་གྱི་ཁམས་གཟུགས་གཟུགས་མེད་དག་མ་དག་གམ་བསོད་ནམས་བསོད་ནམས་མིན་པ་མི་གཡོ་བའི་ལས་སོགས་བསྐྱེད་པའི་འཇིག་རྟེན་གྱི་བསམ་པའི་ཁམས་སམ་རྟེན་དང༌། ཉོན་མོངས་རྣམ་བྱང་ས་ཆུ་སོགས་ཀྱི་འདུས་བྱས་མ་བྱས་ཀྱི་ཁམས་སོགས་མཁྱེན་པའི་རྒྱལ་བའི་ཡེ་ཤེས་དེ་ཁམས་སྣ་ཚོགས་མཁྱེན་པའི་སྟོབས་༤དང༌། དད་བརྩོན་སོགས་ཀྱི་དབང་བོ་མཆོག་སྟེ་རྣོན་པོ་དང་མཆོག་མིན་འབྲིང་དང་ཐ་མའོ་ཞེས་སོགས་རྒྱ་ཆེར་ཏེ་དེ་དག་མཁྱེན་པའི་རྒྱལ་བའི་སྟོབས་དེ་དབང་པོ་མཆོག་དང་མཆོག་མིན་མཁྱེན་པའི་སྟོབས་༥དང༌། ངན་སོང་མཐོ་རིས་བྱང་ཆུབ་གསུམ་པོ་ཐམས་ཅད་དུ་འགྲོ་བའི་ལམ་ལོག་པ། ཡང་དག་འདོད་ཆགས་ཀྱི་གཉེན་པོའི་ལམ་སོགས་དང༌། མངོན་ཤེས་མྱུར་ལ་སླ། བུལ་ལ་དཀའ་བའི་ལམ་སོགས་མཁྱེན་པའི་སྟོབས་དེ་ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་༦དང༌། བསམ་གཏན་རྣམ་ཐར་ཏིང་ངེ་འཛིན་སྙོམས་པར་འཇུག་པ་ཐམས་ཅད་ཀྱི་ཀུན་ནས་ཉོན་མོངས་པ་ཚུལ་མིན་ཡིད་ལ་བྱེད་པས་སྲིད་པའི་དོན་དུ་བསྔོ་བ་དང་རོ་མྱང་བ་དང་དམིགས་པར་ཡིད་བྱེད་དང་ལྷག་མཐོང་ངམ་སེམས་ཅན་སྨིན་པར་བྱེད་པའི་ཕྱིར་རམ་མངོན་ཤེས་སྒྲུབ་པའམ། མི་དམིགས་པར་ཡིད་ལ་བྱེད་པ་རྣམ་པར་བྱང་བ་དང༌། སེང་གེ་རྣམ་བསྒྱིངས་ཐོད་རྒལ་སོགས་ཀྱི་ལྡང་བ་མཁྱེན་པ་དེ་བསམ་གཏན་དང་རྣམ་ཐར་སོགས་མཁྱེན་པའི་སྟོབས་༧དང༌། སྔོན་གྱི་གནས་རང་གཞན་གྱི་སྐྱེ་བ་སྔ་མ་དུ་མ་དན་རྟགས་དང་བཅས་པར་རྗེས་སུ་དྲན་པའི་མཁྱེན་པ་དེ་སྔོན་གྱི་གནས་རྗེས་སུ་མཁྱེན་པའི་སྟོབས་༨དང༌། འཇིག་རྟེན་ཁམས་ཀྱི་འཇིག་ཆགས་དང་སྣང་མི་སྣང་གི་སེམས་ཅན་ཐམས་ཅད་ཀྱི་གང་ནས་འཆི་འཕོ་དང་གང་དུ་སྐྱེ་བ་མ་ལུས་པར་མཁྱེན་པ་དེ་ལྷའི་མིག་གི་མངོན་ཤེས་མཁྱེན་པའི་སྟོབས་སམ་འཆི་འཕོ་དང་སྐྱེ་བ་མཁྱེན་པའི་སྟོབས་༩དང༌།ཟག་པ་ཉོན་མོངས་པ་ཐམས་ཅད་བག་ཆགས་དང་བཅས་པར་ཟད་ཅིང་བྱང་བར་གཟིགས་པའམ་ཟག་པ་ཉོན་མོངས་རྣམས་ཟད་པ་དང་དེ་གང་གིས་ཟད་པའི་ལམ་གཉིས་ཀ་ཡང་ཟག་པ་ཟད་པ་མཁྱེན་པའི་མཐར་ཐུག་གི་ཡེ་ཤེས་དེ་ཟག་ཟད་མཁྱེན་པའི་སྟོབས་༡༠དང་སྟོབས་བཅུ་པོ་ཤེས་པར་བྱའོ། །དེ་དག་གིས་ལས་བཞི་བྱེད་དེ། ཕྱུགས་གསོད་པ་དང་མེར་འཇུག་པ་ལ་སོགས་པ་བདེ་འགྲོའི་ཐབས་སུ་སྟོན་པར་བྱེད་པས་བདེ་འགྲོའི་ཐབས་ལ་བསླུ་བར་བྱེད་པའི་བདུད་དེ་འཇོམས་པས། དང་པོས་བདེ་འགྲོའི་ཐབས་ལ་སླུ་བའི་བདུད་འཇོམས། གཉིས་པས་ལྷ་སོགས་སྐྱབས་མིན་པ་ལ་སྐྱབས་སུ་སླུ་བའི་བདུད་འཇོམས། བདུན་པས་ཟག་བཅས་ཀྱིས་འདག་པར་སྨྲ་བའི་བདུད་འཇོམས། གཞན་རྣམས་ཀྱིས་ལས་དང་པོ་བ་རྣམས་ལ་དེའི་མི་བསྔགས་པ་བསྒྲགས་པས་ཐེག་ཆེན་གྱིས་ངེས་པར་འབྱུང་བ་ལ་སླུ་བའི་བདུད་འཇོམས་སོ། །ཐབས་དང་སྐྱབས་དང་དག་པ་དང༌། ། ཐེག་ཆེན་ངེས་པར་འབྱུང་བ་ལ། །སེམས་ཅན་རྣམས་ནི་རབ་བསླུ་བའི། །བདུད་འཇོམས་ཁྱེད་ལ་ཕྱག་འཚལ་ལོ། །ཞེས་སོ། །སྟོབས་བཅུ་ལས་དྲུག་དང་གསུམ་དང་གཅིག་གིས་རིམ་བཞིན་དུ་ཤེས་བྱའི་སྒྲིབ་པ་དང་སྙོམས་འཇུག་གི་སྒྲིབ་པ་དང་ཉོན་མོངས་པའི་སྒྲིབ་པ་གསུམ་སེལ་བ་ཡིན་ཏེ། རྒྱུད་བླ་མ་ལས། སྟོབས་སོགས་རྣམས་ལས་སྟོབས་དྲུག་དང༌། །གསུམ་དང་གཅིག་གིས་རིམ་པ་བཞིན། །ཤེས་བྱ་སྙོམས་པར་འཇུག་པ་དང༌། །བག་ཆགས་བཅས་པ་ཀུན་བསལ་བས། །གོ་ཆ་བརྩིགས་པ་ཤིང་བཞིན་དུ། །ཕུག་དང་གཞིག་དང་གཅད་ཕྱིར་རོ། །ཞེས་དང༌། རྒྱུད་བླ་ས་འགྲེལ་ལས། རྒྱལ་བའི་སྟོབས་བཅུ་པོ་གང་ཡིན་པ་དེ་རྣམས་ནི་རྫས་ཀྱི་དངོས་པོ་རྡོ་རྗེ་ཇི་ལྟ་བ་བཞིན་ནོ་ཞེས་བྱ་སྟེ། དེ་ཡང་འཆད་པར་འགྱུར་བ་ལྟར་གནས་དང་གནས་མ་ཡིན་པ་མཁྱེན་པ་ལ་སོགས་པའི་སྟོབས་དང་པོ་དྲུག་གིས་ཤེས་བྱའི་སྒྲིབ་པ་གོ་ཆ་སྲ་བ་དང་འདྲ་བ་རྣམས་འབིགས་པར་བྱེད་པའི་ཕྱིར་རྡོ་རྗེ་དང་མཚུངས་ཤིང༌། བསམ་གཏན་ལ་སོགས་པ་མཁྱེན་པ་དང༌། སྔོན་གྱི་གནས་རྗེས་སུ་དྲན་པ་དང༌། ལྷའི་མིག་གི་མངོན་པར་ཤེས་པའི་སྟོབས་གསུམ་གྱིས་སྙོམས་པར་འཇུག་པའི་སྒྲིབ་པ་རྩིག་པ་བརྟན་པོ་དང་འདྲ་བ་འཇིག་པར་བྱེད་པའི་ཕྱིར་ན་རྡོ་རྗེ་དང་མཚུངས། ཟག་པ་ཟད་པ་མཁྱེན་པའི་སྟོབས་གཅིག་གིས་ཉོན་མོངས་པའི་སྒྲིབ་པ་ཤིང་ནགས་ཐིབས་པོ་དང་འདྲ་བ་རྣམས་གཅོད་པར་བྱེད་པའི་ཕྱིར་རྡོ་རྗེ་དང་མཚུངས་སོ་ཞེས་བྱ་བའི་དོན་ནོ། །ཞེས་གསུངས་པའི་ཕྱིར། སྟོབས་བཅུའི་སེལ་བྱ་སོ་སོར་སྦྱར་བའི་རྒྱུ་མཚན་གང་ཡིན་དཔྱད་པར་བྱའོ། །

གཉིས་པ་མི་འཇིགས་པ་བཞི་ནི།

རྒྱུད་བླ་མ་ལས། ཆོས་ཀུན་རྫོགས་པར་བྱང་ཆུབ་དང༌། །གེགས་ནི་འགོག་པར་བྱེད་པ་དང༌། །ལམ་སྟོན་པ་དང་འགོག་སྟོན་ལ། །མི་འཇིགས་པ་ནི་རྣམ་པ་བཞི། །ཞེས་པ་ལྟར་མི་འཇིགས་པ་བཞི་ལས། མངོན་པར་རྫོགས་པར་བྱང་ཆུབ་པ་ལ་མི་འཇིགས་པ་ནི། སངས་རྒྱས་ཀྱིས་བསམ་གཏན་ལ་བརྟེན་ནས་རང་དོན་ལས་བརྩམས་ཏེ་ཀྱེ་མ་ང་ནི་མངོན་པར་རྫོགས་པར་སངས་རྒྱས་སོ་ཞེས་ཤེས་བྱ་ཀུན་མཁྱེན་པར་བདག་ཉིད་ཀྱིས་ཞལ་གྱིས་འཆེས་པ་ལ་ཆོས་མཐུན་གྱི་རྒོལ་བ་པོ་མེད་པ་ཡང་དག་པར་འབྱོར་བའི་མཐར་ཐུག་གི་ཡེ་ཤེས་དེའོ། ། དེ་རྟོགས་པ་ཕུན་ཚོགས་སུ་དམ་བཅས་པའོ། །མདོ་ལས། ཀྱེ་མ་མངོན་པར་རྫོགས་པར་སངས་རྒྱས་སོ་ཞེས་བྱ་བ་འདི་ལ་ཆོས་འདི་དག་མངོན་པར་སངས་མ་རྒྱས་སོ་ཞེས་འདི་ན་དགེ་སྦྱོང་ངམ་བྲམ་ཟེའམ་ལྷའམ་བདུད་དམ་ཚངས་པའམ་གཞན་སུ་ཡང་རུང་བ་ཆོས་དང་མཐུན་པར་རྒོལ་བའམ་རྒོལ་པའི་མཚན་མ་ཡང་དག་པར་རྗེས་སུ་མ་མཐོང་བས་བདག་བདེ་བ་ཐོབ་པ་དང་བག་ཚ་བ་མེད་པ་དང་མི་འཇིགས་པ་རྣམ་པར་སྤྱོད་པས་ཁྱུ་མཆོག་རླབས་པོ་ཆེའི་གནས་སུ་དམ་འཆའའོ། །འཁོར་གྱི་ནང་དུ་སེང་གེའི་སྒྲ་སྒྲོག་གོ །ཞེས་སོ། །ཟག་པ་ཟད་པའམ་སྤངས་པ་ཕུན་ཚོགས་ལ་མི་འཇིགས་པ་ནི། བསམ་གཏན་ལ་བརྟེན་ནས་རང་དོན་ལས་བརྩམས་ཏེ་བདག་ཉིད་ཀྱི་ཟག་པའམ་སྒྲིབ་པ་ཀུན་ཟད་པ་ཉིད་དུ་ཞལ་གྱིས་བཞེས་པ་ལ་ཟག་པ་འདི་དག་མ་ཟད་དོ། །ཞེས་ཆོས་མཐུན་གྱི་རྒོལ་བ་པོ་མེད་པའི་མཐར་ཐུག་གི་ཡེ་ཤེས་དེའོ། །དེ་གཉིས་རང་དོན་གྱི་དམ་བཅའའོ། །བར་ཆད་ཀྱི་ཆོས་ལ་མི་འཇིགས་པ་ནི། བསམ་གཏན་ལ་བརྟེན་ནས་གཞན་དོན་ལས་བརྩམས་ཏེ། འདོད་ཆགས་ལ་སོགས་པའི་ཉོན་མོངས་པ་ཐར་བའི་བར་ཆད། ཤེས་སྒྲིབ་ཀུན་མཁྱེན་པའི་བར་ཆད་བྱེད་པ་ཉིད་དུ་བརྗོད་པ་ལ་ཆོས་མཐུན་གྱི་རྒོལ་བ་གཞན་མེད་པའི་མཐར་ཐུག་གི་ཡེ་ཤེས་དེའོ། །ངེས་པར་འབྱུང་བའི་ལམ་བསྟན་པ་ལ་མི་འཇིགས་པ་ནི། བསམ་གཏན་ལ་བརྟེན་ནས་གཞན་དོན་ལས་བརྩམས་ཏེ། ཐམས་ཅད་ཤེས་པ་ཉིད་ཀྱི་ལམ་ཉན་རང་བྱང་ཆུབ་ཏུ། ལམ་ཤེས་རྫོགས་བྱང་དུ་ངེས་པར་འབྱུང་བའི་ལམ་བསྟན་པ་ལ་ཆོས་མཐུན་གྱི་རྒོལ་བ་གཞན་མེད་པའི་མཐར་ཐུག་གི་ཡེ་ཤེས་དེའོ། །དེ་གཉིས་གཞན་དོན་ནོ། །རྒྱན་ལས། རང་གཞན་དོན་དུ་ཡེ་ཤེས་དང༌། །སྤངས་དང་ངེས་འབྱུང་གེགས་བྱེད་པ། །སྟོན་མཛད་མུ་སྟེགས་གཞན་དག་གིས། །མི་བརྫི་ཁྱོད་ལ་ཕྱག་འཚལ་ལོ། །ཞེས་སོ། །