གསུམ་པ་སོ་སོ་ཡང་དག་རིག་བཞི།

གསུམ་པ་སོ་སོ་ཡང་དག་རིག་བཞི་ནི།

ཆོས་རྣམས་ཀྱི་མིང་གི་རྣམ་གྲངས་མཐའ་ཡས་པ་རྣམས་ཐོགས་པ་མེད་པར་ཤེས་པ་ཆོས་སོ་སོ་ཡང་དག་པར་རིག་པ་དང༌། ཆོས་རྣམས་ཀྱི་རང་དང་སྤྱིའི་མཚན་ཉིད་དང་དགོངས་པའི་དོན་རྣམས་ཐོགས་པ་མེད་པར་ཤེས་པ་དོན་སོ་སོ་ཡང་དག་པར་རིག་པ་དང༌། ཡུལ་སོ་སོའི་སྐད་རིགས་མི་འདྲ་བ་སྣ་ཚོགས་པ་དང་ཆོས་ཀྱི་ངེས་པའི་ཚིག་རྣམས་ཤེས་པ་ངེས་ཚིག་སོ་སོ་ཡང་དག་པར་རིག་པ་དང༌། རྫས་ཡོད་བཏགས་ཡོད་ལ་སོགས་པ་ཆོས་ཀྱི་རབ་ཏུ་དབྱེ་བ་རྣམས་ཐོགས་པ་མེད་པར་ཤེས་པས་སྤོབས་པ་སོ་སོ་ཡང་དག་པར་རིག་པ་རྣམས་སོ། །ཞེས་རྒྱན་གྱི་ས་འགྲེལ་ལས་གསུངས་སོ། །རྒྱན་ལས། རྟེན་དང་བརྟེན་པ་བཤད་བྱ་དང༌། །གསུང་དང་མཁྱེན་པ་འཆད་བྱེད་ལ། །བློ་གྲོས་རྟག་ཐོགས་མི་མངའ་བ། །ལེགས་སྟོན་ཁྱོད་ལ་ཕྱག་འཚལ་ལོ། །ཞེས་རྟེན་མིང་གི་རྣམ་གྲངས་མཐའ་ཡས་པའི་ཆོས་དང༌། བརྟེན་པ་རང་རང་གི་མཚན་ཉིད་དམ་དགོངས་པའི་དོན་སོ་སོ་ཡང་དག་པར་རིག་པ་གཉིས་ནི་བཤད་པར་བྱ་བ་དང༌། གསུང་ངེས་པའི་ཚིག་སྣ་ཚོགས་པ་དང་མཁྱེན་པ་སྤོབས་པ་སོ་སོ་ཡང་དག་པར་རིག་པ་གཉིས་ནི་འཆད་པར་བྱེད་པ་ཡིན་ལ། དེ་དག་ལ་བློ་གྲོས་རྟག་ཏུ་ཐོགས་པ་མི་མངའ་བའི་སྒོ་ནས་དམ་པའི་ཆོས་ལེགས་པར་སྟོན་པ་ཁྱོད་ལ་ཕྱག་འཚལ་ལོ་ཞེས་པའོ། །