གཉིས་པ་རང་བཞིན་དེ་བཞིན་ཉིད་ཀྱི་རྣམ་པ།

གཉིས་པ་རང་བཞིན་དེ་བཞིན་ཉིད་ཀྱི་རྣམ་པ་ནི།

སངས་རྒྱས་བྱུང་བ་གང་ཡང་དེ་བཞིན་ཉིད་མི་སྟོན་པ་མེད་པས་དེ་ཐམས་ཅད་ཀྱིས་བཤད་པའི་དེ་བཞིན་ཉིད་འོག་ནས་བཤད་པའི་རང་བྱུང་གི་ཡེ་ཤེས་འདུས་མ་བྱས་དོན་དམ་པ་སྟེ། སྡོང་བོ་བཀོད་པར། འཇིག་རྟེན་ཁམས་ནི་ལ་ལ་དག །བསམ་གྱིས་མི་ཁྱབ་ཚིག་གྱུར་ཀྱང༌། །ནམ་མཁའ་འཇིག་པར་འགྱུར་བ་མེད། །རང་བྱུང་ཡེ་ཤེས་དེ་བཞིན་ནོ། །ཞེས་གསུངས་སོ། ། གསུམ་པ་གང་གི་ཡིན་པ་རང་བྱུང་གི་རྣམ་པ་ནི། ཆོས་ནི་འདུས་བྱས་མ་བྱས་སོ། །དེ་ཐམས་ཅད་ལ་དབང་བསྒྱུར་བ་ནི་སྤང་བ་དང་མངོན་དུ་བྱ་བ་དང་བསྟན་པ་དང་བཅབ་པ་དང༌། བསྐྱེད་པ་དང་དགག་པ་དང་བསྐལ་བ་སྐད་ཅིག་ཏུ་བྱ་བ་དང་སྐད་ཅིག་བསྐལ་བར་བྱིན་གྱིས་རློབ་པ་ལ་སོགས་པའོ། །དེ་ནི་རང་བྱུང་གི་མཐུའོ། །རང་བྱུང་གང་ཞེ་ན། རང་བྱུང་གི་ཡེ་ཤེས་སོ། །དེ་ཡང་གཉིས་ཏེ། ཆོས་དབྱིངས་དང་དེ་ཇི་བཞིན་ཐུགས་སུ་ཆུད་པ་སྲིད་པ་ཐ་མ་པས་ཐོབ་པའི་རྣམ་མཁྱེན་གྱི་ཡེ་ཤེས་སོ། །དེ་ལ་རང་བྱུང་དང་པོ་སྔར་བསྟན་པ་སངས་རྒྱས་ཐམས་ཅད་ཀྱིས་བཤད་པའི་དེ་བཞིན་ཉིད་དོ། །འདིར་གཉིས་པ་གཟུང་སྟེ། ཚེ་དེ་ལ་སློབ་དཔོན་མེད་པར་རང་ཉིད་ཀྱིས་བརྙེས་པས་རང་བྱུང་སྟེ། མདོ་ལས། ཉེར་འགྲོ་ང་ནི་སངས་རྒྱས་ཏེ། །ང་ལ་སློབ་དཔོན་སུ་ཡང་མེད། །ཅེས་པ་ལྟར་རོ། །སྐབས་འདིར་དེ་ཙམ་གྱིས་རང་བྱུང་དུ་བཞག་གི་རྒྱུ་རྐྱེན་གྱིས་མ་བྱས་པར་བྱུང་བ་མིན་པས་རང་བྱུང་རྗེས་མཐུན་པའོ། །དེ་སྔར་བཤད་ལྟར་མངའ་བསྒྱུར་བ་སྟེ་བསྐལ་བ་མང་པོར་གོམས་པའི་མཐུ་ལས་ཏེ། གོམས་ན་སླ་བར་མ་གྱུར་པའི། །དངོས་དེ་གང་ནའང་ཡོད་མ་ཡིན། །ཞེས་པ་ལྟར་རོ། །ཡུན་དེ་སྲིད་དུ་བསོད་ནམས་བསགས་པའི་མཐུ་ལས་ཀྱང་སྟེ། རྒྱ་རོལ་དུ། བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། །ཅེས་པ་ལྟར་རོ། །འདིས་རང་བྱུང་དང་པོ་ཤེས་པས་དེའི་མཐུས་ཇི་ལྟར་བཞེད་པ་ལྟར་མངའ་བསྒྱུར་བས་ཆོས་དབྱིངས་ཤེས་པ་མངའ་བསྒྱུར་བའི་གཙོ་བོའོ། །ཡང་ན་གཉིས་ཀ་མངའ་བསྒྱུར་མཚན་ཉིད་པ་དང་དང་པོ་རང་བྱུང་མཚན་ཉིད་པར་ཡང་ཤེས་པར་བྱའོ། །དེ་བཞིན་ཉིད་ཀྱི་ཤེས་རྣམ་ལ་དེ་བཞིན་ཉིད་རྟོགས་པའི་མཐར་ཐུག་གི་ཡེ་ཤེས་དེ་འཇོག་གམ་དཔྱད་དོ། །བཞི་བ་གང་གི་དོན་དུ་ཡིན་པ་སངས་རྒྱས་ཉིད་ཀྱི་རྣམ་པ་ནི། ཇི་སྙེད་པའི་རྣམ་པ་ཐམས་ཅད་མངོན་པར་ཏེ་མངོན་སུམ་དུ་རྫོགས་པའི་སྐད་དོད་ཡང་དག་པར་ལ་འཇུག་པའི་ཡང་དག་པར་ཆུབ་པ་སྟེ་རྟོགས་ཤིང་ཁོང་དུ་ཆུབ་པ་ནི་སངས་རྒྱས་ཉིད་ཀྱི་རྣམ་པ་སྟེ། ཞེས་པ་རྣམས་ཆོས་བཤེས་སོ། །དེས་ན་ཐ་མ་འདི་ཇི་སྙེད་པ་མཁྱེན་པ་སྟེ་སྔ་མ་གཉིས་དང་རྣམ་པ་ཐ་མ་གསུམ་སྟེ། དེ་ལྟར་ན་སྟོབས་སོགས་ཀྱི་རྣམ་པ་རྣམས་ཇི་ལྟར་རབ་ཏུ་དབྱེ་བ་དང་འདི་རྣམས་ཀྱི་ངོ་བོའམ་རང་བཞིན་གང་ཡིན་པ་དེ་བཞིན་ཉིད་དང༌། དེ་རྣམས་ལ་མངའ་བསྒྱུར་བ་གང་ཡིན་པ་རང་བྱུང་དང༌། གང་གི་དོན་དུ་ཡིན་པ་ཆོས་ཐམས་ཅད་ཀྱི་རྣམ་པ་ཐམས་ཅད་མངོན་པར་རྫོགས་པར་བྱང་ཆུབ་པ་སྟེ།སངས་རྒྱས་རྣམས་ཀྱིས་རྣམ་མཁྱེན་གྱི་ལམ་གྱི་རྟེན་ཅན་གྱི་ཐུན་མོང་མིན་པའི་རྣམ་པ་སུམ་ཅུ་རྩ་དགུའོ། །ཞེས་ཉ་ཊཱིཀ་ལས་བཤད་དོ། །

གསུམ་པ་དོན་བསྡུ་ནི།

མདོར་ན་རྣམ་པ་རྣམས་ཕྱོགས་གཅིག་ཏུ་བསྡོམས་ན་རྣམ་པ་བརྒྱ་བདུན་ཅུ་རྩ་གསུམ་ཡོད་དོ། །དོན་རྣམ་ཤེས་རྣམ་ཕྱེ་ན་དེ་གཉིས་འགྱུར་རོ། །སྐབས་འདིར་ཉ་ཊཱིཀ་ལས་འགྲེལ་བའི་དོན་བཤད་སྐབས་རྣམ་པའི་དོན་བསྡུ་ཟག་བཅས་ཟག་མེད་ཀྱི་སྒྲ་སྦྱར་ནས་གསུངས་ཀྱང་འདིར་མ་སྤྲོས་སོ། །གཉིས་པ་རྗེས་སུ་སྒྲུབ་པའི་སྦྱོར་བ་བཤད་པ་ལ་གཉིས་ཏེ། སྦྱོར་པ་པོ་གང་ཟག སྦྱོར་བའི་ངོ་བོ་བཤད་པའོ། །དང་པོ་ནི། རྣམ་པའི་འོག་ཏུ་སྦྱོར་བ་འཆད་པ་ནི། རྣམ་པ་རྣམས་སྒོམ་དགོས་ན་སྦྱོར་བས་སྒོམ་དགོས་པས་སྦྱོར་བ་འཆད་ལ། དེ་ཡང་སྦྱོར་བ་སྒོམ་པ་པོའི་གང་ཟག་མེད་པར་སྒོམ་མི་ནུས་པའི་རྒྱུ་མཚན་གྱིས་སྦྱོར་བ་སྒོམ་པ་པོའི་གང་ཟག་འཆད་དོ། །དེ་ཡང་མདོ་ལུགས་མ་ལས། ད་ནི་གཞི་ཤེར་ཕྱིན་གྱི་ཡུལ་མཁྱེན་པ་གསུམ་པོ་དེ་ལ་རྒྱུ་སྦྱོར་བ་བཞིའི་སློབ་པ་པོའི་གང་ཟག་ཤེར་ཕྱིན་གྱི་གཞུང་ཉན་པ་ལ་སོགས་པའི་སྣོད་ལྡན་ལ་བཤད་པར་བྱའོ། །ཉི་ཁྲིའི་ལེའུ་སུམ་ཅུ་པ་ལས། ཤེར་ཕྱིན་འདི་གང་གི་རྣ་ལམ་དུ་གྲགས་པ་དེ་ནི་སྔོན་གྱི་རྒྱལ་བ་ལ་བསྙེན་བཀུར་པ་དང༌། དགེ་བའི་རྩ་བ་བསྐྱེད་པའོ། །ཞེས་སོགས་ཀྱི་དོན། སངས་རྒྱས་རྣམས་ལ་ལྷག་པར་བྱས། །དེ་ལ་དགེ་བའི་རྩ་བ་བསྐྲུན། །དགེ་བའི་བཤེས་ཀྱི་མགོན་བཅས་པ། །འདི་མཉན་པ་ཡི་སྣོད་ཡིན་ནོ། །ཞེས་ཤེར་ཕྱིན་མཉན་པའི་སྣོད་ནི། སྔོན་གྱི་ས༷ངས་རྒྱ༷ས་རྣ༷མས་ལ༷་ལྷ༷ག་པ༷ར་བསྙེན་བཀུར་བྱ༷ས་པ་དང༌། སངས་རྒྱས་དེ༷་ལ༷ས་དགེ༷་བའི༷་རྩ༷་བ༷་བསྐྲུ༷ན་ཅིང་བསྐྱེད་པ་དང༌། དགེ༷་བ༷འི་བཤེ༷ས་གཉེན་གྱི༷ས་ཡོངས་སུ་ཟིན་པའི་སྒོ་ནས་མགོ༷ན་དང་བཅ༷ས་པ༷་ནི་ཤེར་ཕྱིན་ཟབ་མོ་འདི༷་མཉ༷ན་པ༷འི༷་སྣོ༷ད་ལྡན་གྱི་གང་ཟག་ཡི༷ན་ནོ༷། ། ཤེར་ཕྱིན་ཟབ་མོ་འདི་ཐོས་ནས་མི་སྐྲག་ཅིང་སློབ་པའི་སྣོད་དུ་རུང་བའི་རྒྱུ་གང་ཞེ་ན། སངས་རྒྱས་བསྟེན་དང་ཀུན་འདྲི་དང༌། སྦྱིན་དང་ཚུལ་ཁྲིམས་སོགས་སྤྱོད་པས། །ལེན་དང་འཛིན་པ་ལ་སོགས་པའི། །སྣོད་དུ་དམ་པ་རྣམས་བཞེད་དོ། །ཞེས་པ་ལ་སྔོན་གྱི་ས༷ངས་རྒྱ༷ས་རྣམས་དགེ་བའི་བཤེས་གཉེན་དུ་བསྟེ༷ན་པ་ད༷ང༌། དེ་དག་ལ་ཤེར་ཕྱིན་གྱི་དོན་ཀུ༷ན་མ་ཤེས་པར་ལ་འདྲི༷་ཞིང་ནུས་པའི་སྒོ་ནས་ཤེས་པ་ད༷ང༌། སྐལ་པ་མང་པོར་སྦྱི༷ན་པ་ད༷ང་ཚུ༷ལ་ཁྲི༷མས་ལ་སོ༷གས་པ་ཕར་ཕྱིན་རྣམས་ལ་སྔར་སྤྱོ༷ད་པ༷༷འི་རྒྱུས། ད་ལྟ་མི་སྐྲག་ཅིང་དད་པས་དང་དུ་ལེན་པ་དང༌། ཚིག་དོན་འཛིན་པ་དང༌། ལ་སོགས་པ་དོན་ཁོང་དུ་ཆུད་པར་བྱེད་པ་དང༌། སྒོམ་པའི་སྣོ༷ད་དུ༷་རུང་བར་ད༷མ་པ༷་སངས་རྒྱས་ལ་སོགས་པ་རྣ༷མས་བཞེ༷ད་དོ༷། །ཞེས་གསུངས་པ་ལྟར་རོ། །ཉ་ཊཱིཀ་ལས་ཤོ་ལོ་ཀ་སྔ་མས་ད་ལྟ་ཤེར་ཕྱིན་ཉན་པས་སྣོད་རུང་ཡིན་པས་སངས་རྒྱས་རྣམས་ལ་ལྷག་པར་བྱས་པ་སོགས་ཡིན་པ་དང༌། ཤོ་ལོ་ཀ་ཕྱི་མས་ད་ལྟ་ལེན་པ་མི་བརྗེད་པ། ཚུལ་བཞིན་ཡིད་ལ་བྱེད་པའི་སྣོད་ཡིན་པས་གོ་རིམ་བཞིན་སྔོན་སངས་རྒྱས་བརྟེན་པ་དང་དོན་ཀུན་འདྲི་བ་དང་སྦྱིན་སོགས་ལ་སྤྱོད་པ་ཡིན་པར་གསུངས་སོ། །དེས་ན་སྔོན་གྱི་བསོད་ནམས་ཀྱིས་སྟོབས་ཀྱིས་ཡུམ་ཉན་པ་ལ་སོགས་པའི་སྣོད་དུ་གྱུར་པའི་སྐྱེས་བུ་དེ། སྦྱོར་བ་སྒོམ་རུང་གི་གང་ཟག་གི་མཚན་ཉིད། དབྱེ་ན་བཞི་ཡོད་དེ། ཉ་ཊཱིཀ་ལས། ཡུམ་གྱི་སྦྱོར་བ་པོ་གང་ཟག་ནི་སྔོན་དུ་ཚོགས་བསགས་པས་ཡུམ་ཉན་པ་ལ་སོགས་པའི་སྣོད་དུ་གྱུར་པའི་སྐྱེས་བུ་སྟེ། དབྱེ་ན་ཉན་པ། འཛིན་པ། མི་བརྗེད་པ། ཚུལ་བཞིན་ཡིད་ལ་བྱེད་པའི་སྣོད་བཞིའོ། །ཞེས་གསུངས་པའི་ཕྱིར། སངས་རྒྱས་རྣམས་ལ་ལྷག་པར་བྱས། །ཞེས་པའི་དོན་ཉ་ཊཱིཀ་ལས་སྔོན་གྱི་སངས་རྒྱས་རྣམས་ལ་གཙུག་ལག་ཁང་འབུལ་བ་ལ་སོགས་པ་བསྙེན་བཀུར་བྱས་པ་ཡིན་ཏེ། ཞེས་དང༌། སངས་རྒྱས་བསྟེན་དང་ཞེས་པའི་དོན་སྔོན་སངས་རྒྱས་མང་བོ་ལ་ལུས་སོགས་ཀྱི་བསྙེན་བཀུར་གྱིས་མཉེས་པར་བྱས་ནས་བསྟེན་པ་ཡིན་ཏེ། ཞེས་གསུངས་པས་དེ་གཉིས་ལ་ཁྱད་ཡོད་མེད་དང་ཤེར་ཕྱིན་མཉན་པ་དང་ལེན་པ་དང་མི་བརྗེད་པར་འཛིན་པ་དང་ཚུལ་བཞིན་ཡིད་ལ་བྱེད་པའི་སྣོད་རུང་རྣམས་ཡིན་ཁྱབ་མཉམ་ཡིན་མིན་དང་ཚིག་དོན་འཛིན་པ་དང་དོན་ཁོང་དུ་ཆུད་པར་བྱེད་པ་དང་ཚུལ་བཞིན་ཡིད་ལ་བྱེད་པ་གསུམ་གྱི་ཁྱད་པར་གང་ཡིན་དང་མི་བརྗེད་པ་དང་ཚིག་དོན་འཛིན་པ་གཉིས་ཀྱི་ཁྱད་ཡོད་མེད་ཉ་ཊཱིཀ་ལས། ཉན། ལེན། མི་བརྗེད། ཚུལ་བཞིན་ཡིད་ལ་བྱེད་པའི་སྣོད་དོ། །ཞེས་དང༌། མདོ་ལུགས་མ་ལས། ད་ལྟ་མི་སྐྲག་ཅིང་དད་པས་དང་དུ་ལེན་པ་དང༌། ཚིག་དོན་འཛིན་པ་དང༌། ལ་སོགས་པ་དོན་ཁོང་དུ་ཆུད་པར་བྱེད་པ་དང༌། སྒོམ་པའི་སྣོ༷ད་དུ༷་རུང་བར་ད༷མ་པ༷་སངས་རྒྱས་ལ་སོགས་པ་རྣ༷མས་བཞེ༷ད་དོ༷། །ཞེས་སོགས་ཀྱིས་དཔྱད་པར་བྱའོ། །