གཉིས་པ་སྦྱོར་བའི་ངོ་བོ་བཤད་པ།

གཉིས་པ་སྦྱོར་བའི་ངོ་བོ་བཤད་པ་ལ།

སྤྱི་དོན་དང་མཐའ་རགས་ཙམ་དཔྱད་པ་གཉིས། མདོ་ལས། བྱང་ཆུབ་སེམས་དཔའ་ཤེར་ཕྱིན་ལ་སྤྱོད་པའི་ཚེ། གཟུགས་ལ་མི་གནས་ཏེ། གང་གི་ཚེ་གཟུགས་ལ་མི་གནས་དེའི་ཚེ་གཟུགས་ལ་བརྩོན་པར་བྱེད་དོ། །ཞེས་སོགས་ཀྱི་དོན་རྩ་བར། གཟུགས་ལ་སོགས་ལ་མི་གནས་ཕྱིར། དེ་ལ་སྦྱོར་བ་བཀག་པའི་ཕྱིར། །དེ་ཡི་དེབཞིན་ཉིད་ཟབ་ཕྱིར། །དེ་རྣམས་གཏིང་དཔག་དཀའ་བའི་ཕྱིར། །དེ་དག་ཚད་ནི་མེད་ཕྱིར་དང༌། །ཚེགས་ཆེན་ཡུན་རིང་རྟོགས་པའི་ཕྱིར། །ལུང་བསྟན་ཕྱིར་མི་ལྡོག་ཉིད་དང༌། །ངེས་འབྱུང་བར་ཆད་མེད་བཅས་དང༌། བྱང་ཆུབ་ཉེ་དང་མྱུར་བ་དང༌། །གཞན་དོན་འཕེལ་མེད་འགྲིབ་མེད་ཕྱིར། །ཆོས་དང་ཆོས་མིན་སོགས་མི་མཐོང༌། །གཟུགས་སོགས་བསམ་མི་ཁྱབ་མི་མཐོང༌། །གཟུགས་སོགས་དེ་ཡི་མཚན་མ་དང༌། །དེ་ཡི་ངོ་བོར་རྣམ་མི་རྟོག །འབྲས་བུ་རིན་ཆེན་སྦྱིན་བྱེད་དང༌། དེ་ནི་དག་པ་མཚམས་དང་བཅས། །ཞེས་སོ། ། རང་ཡུལ་གྱི་བསྒོམ་བྱའི་རྣམ་པ་སྒོམ་པའི་སེམས་དཔའི་མངོན་རྟོགས་དེ། སྐབས་འདིའི་སྦྱོར་བའི་མཚན་ཉིད། དེ་ལ་དབྱེ་ན་ཉི་ཤུ་ཡོད་དེ། ཉ་ཊཱིཀ་ལས། སྦྱོར་བ་ནི། གསུམ་ལ་དབང་གྱུར་ཐོབ་པའི་ཕྱིར་དུ་བསྒོམ་བྱའི་རྣམ་པ་རྣམས་བསྡུས་ཏེ་སྒོམ་པའི་རྣལ་འབྱོར་རོ། །དབྱེ་ན་ཉི་ཤུའོ། །ཞེས་གསུངས་པའི་ཕྱིར། ཉ་ཊཱིཀ་ལྟར་ན་རང་བཞིན་གྱི་ལྔ། གནས་སྐབས་ཀྱི་བཅོ་ལྔའོ། །དང་པོ་ནི། སྦྱོར་ལམ་པའི་ཡུམ་སྦྱོར་ཆོས་ཅན།༡གཟུགས་སོགས་ལ་མི་གནས་པའི་སྦྱོར་བ་ཡིན་ཏེ། གནས་བྱ་གཟུགས་ལ་སོགས་པ་ལ་བདེན་པའི་ངོ་བོ་ཉིད་མེད་ཅིང་སྟོང་བས་དེ་ལ་ཞེན་ནས་མི་གནས་པ་སྟེ་གནས་པ་བཀག་སྟེ་བསྒོམ་པའི་ཡུམ་སྦྱོར་ཡིན་པའི་ཕྱིར། གཞན་ལ་རིགས་འདྲ།༢གཟུགས་ལ་སོགས་པ་ལ་དེ་ཁོ་ནར་མི་སྦྱོར་བའི་སྦྱོར་བ་འམ་རྣལ་འབྱོར་བཀག་པའི་སྦྱོར་བ། ༣ གཟུགས་སོགས་དེའི་དེ་བཞིན་ཉིད་ཟབ་པར་རྟོགས་པའི་སྦྱོར་བ། ༤གཟུགས་སོགས་ཀྱི་རང་བཞིན་དེ་བཞིན་ཉིད་གཏིང་དཔག་དཀའ་བའི་སྦྱོར་བ། ༥དེ་བཞིན་ཉིད་ཚད་མེད་པ་རྟོགས་པའི་སྦྱོར་བ་སྟེ་རང་བཞིན་གྱི་སྦྱོར་བ་ལྔའོ། ། རང་བཞིན་གྱི་སྦྱོར་བ་ལྔར་བུདྡྷ་ཤྲཱི་དང་འབྲོམ་སོགས་ཀྱིས་བཤད་པའི་ལུགས་ལྟར་བྱས་པའོ། །ཨཱརྱ་ཕྱི་མ་འདི་གསུམ་ཆུང་འབྲིང་ཆེན་པོར་བཤད་ཅིང༌། འགྲེལ་ཆེན་དུ་ཡང་ཨཱརྱས་དེ་ལྟར་བཤད་དོ་ཞེས་གྲངས་སོ། །ཞེས་ཉ་ཊཱིཀ་ལས་སོ། །གཉིས་པ་གནས་སྐབས་ཀྱི་བཅོ་ལྔ་ལས། དང་པོ་ཉ་ཊཱིཀ་ལས། ཆོས་སྤོང་གི་ལས་འབྲིང་བོ་ཙམ་མ་སྤངས་པའི་ཚོགས་ལམ་ཕལ་བའི་ཡུམ་སྦྱོར་ཆོས་ཅན། ༦ཚེགས་ཆེན་པོས་ཡུན་རིང་མོ་ཞིག་ནས་རྟོགས་པ་སྟེ་མངོན་པར་རྫོགས་པར་འཚང་རྒྱ་བར་རུང་བའི་སྦྱོར་བ་ཡིན་ཏེ། ཡུམ་ཟབ་གཏིང་དཔག་དཀའ་ཚད་མེད་པ་ལ་ཟབ་པས་དང་པོ་དངང་ཞིང་སྐྲག་པ་དང༌། གཏིང་དཔག་བཀའ་བས་དེ་ལྷག་པར་འཕེལ་ནས་ཀུན་ཏུ་སྐྲག ཚད་མེད་པས་བདེན་ཞེན་ངེས་པར་གནས་ནས་གཏིང་ཚུགས་པས་སྐྲག་པས་ཟིན་པར་འགྱུར་སྲིད་པའི་ལས་དང་པོ་བའི་ཡུམ་སྦྱོར་ཡིན་པས་སོ། །ཨཱརྱའོ། །དེ་འཕགས་པས་ལས་དང་པོ་བར་བཤད་དོ། །ཞེས་གསུངས་སོ།༧ལུང་བསྟན་པ་འཐོབ་པའི་སྦྱོར་བ། ༨ཕྱིར་མི་ལྡོག་པ་ཉིད་ཀྱི་སྦྱོར་བ། ༩ངེས་པར་འབྱུང་བའི་སྦྱོར་བ། ༡༠བར་ཆད་མེད་པའི་སྦྱོར་བ། ༡༡ཡང་དག་པར་རྫོགས་པའི་བྱང་ཆུབ་ལ་ཉེ་བའི་སྦྱོར་བ། ༡༢མྱུར་དུ་མངོན་པར་རྫོགས་པར་བྱང་ཆུབ་པའི་སྦྱོར་བ། ༡༣གཞན་དོན་གྱི་སྦྱོར་བ། ༡༤འཕེལ་བ་དང་འགྲིབ་པ་མེད་པའི་སྦྱོར་བ། ༡༥ཆོས་དང་ཆོས་མ་ཡིན་པ་ལ་སོགས་པར་མི་མཐོང་ཞིང་མི་དམིགས་པའི་སྦྱོར་བ། ༡༦གཟུགས་ལ་སོགས་པ་བསམ་གྱིས་མི་ཁྱབ་པོ་ཞེས་པའི་རྣམ་པ་འགོག་པའི་སྦྱོར་བ། ༡༧གཟུགས་ལ་སོགས་པའི་དངོས་པོར་རྣམ་པར་མི་རྟོག་པའི་སྦྱོར་བ། ༡༨འདི་ལྔ་ངོ་བོ་གཅིག་ལ་ལྡོག་པ་ཐ་དད་པ་ས་བརྒྱད་པ་ན་ཡོད་དེ། སྦྱོར་བ་ངོ་བོ་གཅིག་ཉིད། གཞན་དོན་བྱེད་པ། འཕེལ་འགྲིབ་མེད་པར་རྟོགས་པ། མཐའ་གཉིས་ལ་མི་གནས་པ། ཆོས་ཉིད་དུ་མི་རློམ་པ། ཆོས་ཅན་དུ་མི་རྟོག་པའི་ཆ་ནས་ཕྱེ་བའོ། །འབྲས་བུ་རིན་པོ་ཆེ་སྦྱིན་པའི་སྦྱོར་བ། ༡༩རྣམ་པར་དག་པའི་སྦྱོར་བ། ལས་དང་པོ་བའི་ཡུམ་སྦྱོར་ཆོས་ཅན། ༢༠ས་མཚམས་ཀྱི་སྦྱོར་བ་ཡིན་ཏེ། རིན་པོ་ཆེ་ལ་བར་ཆད་མང་བའི་དཔེས་ལོ་བསྐོར་དུ་དང་ཟླ་བ་དང་ཞག་ལ་སོགས་པར་དུས་ཚིགས་བཅད་ནས་ཡུམ་བྲི་བསྒོམ་སོགས་ལ་མངོན་པར་བརྩོན་པ་མི་འདོར་བའི་སྦྱོར་བ་ཡིན་པས་སོ། །དེ་ལྟར་ན་བཅོ་ལྔ་སྟེ་སྦྱོར་བ་དེ་ནི་ཉི་ཤུ་ཡིན་ནོ། །ཤཱནྟི་བས་ཉེར་གསུམ་དུ་བཤད་དེ། ཟབ་སྦྱོར་སོགས་གསུམ་ལ་རྣལ་འབྱོར་བཀག་པ་རེ་རེ་དང་བཅས་པའོ། །ས་མཚམས་ལ་དང་པོ་ལྔ་སྦྱོར་ལམ་ནས་དང༌། དེ་ནས་གཅིག་ཚོགས་ལམ། དེ་ནས་བཞི་རིམ་བཞིན་དྲོད་སོགས་བཞི་ལ། དེ་ནས་གཅིག་མཐོང་ལམ། དེ་ནས་གཅིག་ས་གཉིས་པ། དེ་ནས་ལྔ་ས་བརྒྱད་པ། དེ་ནས་གཅིག་ས་དགུ་བ། དེ་ནས་གཅིག་རྒྱུན་མཐའ། དེ་ནས་གཅིག་ལས་དང་པོ་ནས་བཞག་པར་བུདྡྷ་ཤྲཱིས་གསུང་སྒྲོས་བར་མ་ཆད་དུ་ཡིན་པ་དང༌། ཆོས་བཤེས་ནི། ངེས་འབྱེད་ཆ་མཐུན་བཞི་ཅར་གྱི་ཐུན་མོང་དུ་སྦྱར་རོ། །ཞེས་སོ། །ཤེར་འབྱུང་གིས། སྦྱོར་ལམ་ལ་ལྔ། མཐོང་ལམ་ལ་གཅིག སྒོམ་ལམ་ལ་ཆུང་ངུ་སོགས་ཀྱིས་དགུ ཁྱད་པར་ལམ་ལ་གསུམ། བར་ཆད་མེད་ལམ་ལ་གཉིས་ཏེ་ལམ་ལྔས་བསྡུས། ཞེས་སོ། །དེ་ལ་ལྔ་ནི་ཚོགས་ལམ་གྱིས་བསྡུས་ལ། བཅོ་ལྔ་ནི་སྦྱོར་ལམ་ནས་ས་བཅུ་བའི་བར་གྱིས་བསྡུས་སོ། །ཞེས། ཁ་ཆེ་གཞོན་ནུ་དཔལ་ལོ། །ས་མཚམས་བཞག་ཚུལ་གྱི་འདོད་པ་དེ་དག་ཉ་ཊཱིཀ་ལས་སོ། །

གཉིས་པ་མཐའ་རགས་ཙམ་དཔྱད་པ་ལ།

སྦྱོར་བ་ཉི་ཤུ་བཤད་པ་མི་འཐད་པར་ཐལ། མདོ་ལུགས་མ་ལས། འདི་ཐམས་ཅད་སྦྱོར་བར་འཆད་པ་མདོ་དང་མི་མཐུན་ནོ། །མདོ་ལ་སྦྱོར་བ་གཅིག་དང་ལྷག་མ་སྦྱོར་བ་དང་འབྲེལ་ཞིང་སྐབས་སུ་བབ་པའི་གཞན་དང་གཞན་རྣམས་བསྟན་པའི་ཕྱིར་རོ། །སྐབས་འདིའི་སྦྱོར་བ་ནི་ཤེར་ཕྱིན་ཟབ་མོ་རྣལ་འབྱོར་ཡིན་ལ་དེ་ལ་ཉིན་མཚན་གྱི་རྣལ་འབྱོར་དུ་བྱེད་པ་ཙམ་མ་གཏོགས་པ་རིགས་མི་འདྲ་བ་དུ་མ་ནི། གསུང་རབ་ཁྱད་འཕགས་རྣམས་སུ་གསུངས་པ་མེད་དོ། ། དེས་ན་འདིར་གཟུགས་ལ་སོགས་ལ་མི་གནས་ཞེས་སོགས་ཚིག་རྐང་པ་གཉིས་ཀྱི་སྦྱོར་བ་དང༌། དེའི་དེ་བཞིན་ཉིད་ཞེས་པ་ནས་ཚད་ནི་མེད་ཕྱིར་དང་ཞེས་པའི་བར་གྱིས་བསྒོམ་པའི་ཤེར་ཕྱིན་དེ་ཟབ་པ་དང༌།གཏིང་དཔག་དཀའ་བ་དང༌། ཚད་མེད་པར་སྟོན་ལ། ཚེགས་ཆེན་ཞེས་པའི་ཚིག་རྐང་གཅིག་གིས་ཤེར་ཕྱིན་ཟབ་མོ་དེ་སྣོད་མིན་ལ་བསྟན་པའི་ཉེས་དམིགས་དང་ལུང་བསྟན་ཞེས་པ་ནས་གཞན་དོན་ཞེས་པའི་བར་གྱིས་སྣོད་ལྡན་གྱིས་ཉམས་སུ་བླངས་པའི་ཕན་ཡོན་དང༌།འཕེལ་མེད་ནས་བསམ་མི་ཁྱབ་མི་མཐོང་གི་བར་གྱིས་ཤེར་ཕྱིན་བསྒོམ་པ་ཡོངས་སུ་རྫོགས་པར་བྱེད་པའི་ཚད་དང༌། གཟུགས་སོགས་ནས་རྣམ་པར་མི་རྟོག་གི་བར་གྱིས་ཡུན་རིང་བོ་ནས་ཕར་ཕྱིན་དྲུག་ལ་སྦྱང་པའི་རྟགས་དང༌། འབྲས་བུ་རིན་ཆེན་སྦྱིན་བྱེད་ཀྱིས་ཤེར་ཕྱིན་དེས་སངས་རྒྱས་ཀྱི་ཆོས་རིན་པོ་ཆེ་སྦྱིན་པར་བྱེད་པ་དང༌། དེ་ནི་དག་པ་ཞེས་པས་ཤེར་ཕྱིན་དེ་ཆོས་དག་པ་ཐམས་ཅད་ཀྱི་ཕུང་པོ་ཡིན་པ་དང༌། མཚམས་དང་བཅས་ཞེས་པས་ཤེར་ཕྱིན་ལ་ཆོས་སྤྱོད་ཀྱི་རིམ་པ་ལ་སོགས་པའི་དུས་མཚམས་བསྟན་པ་ཡིན་ནོ། །ཞེས་གསུངས་པའི་ཕྱིར་ཟེར་ན་མ་ཁྱབ་པ་ཡིན་པར་སྣང་སྟེ། མདོ་དང་མངོན་རྟོགས་རྒྱན་གྱི་ཚིག་ཟིན་ལ་ཤེར་ཕྱིན་ཟབ་མོའི་རྣལ་འབྱོར་གཅིག་ལས་མ་གསུངས་པ་ལ་དགོངས་པའི་ཕྱིར། དེ་ལྟ་མ་ཡིན་ན་སྦྱོར་བ་ཉི་ཤུ་དང་སྦྱོར་བའི་དབྱེ་བ་མེད་དགོས་པ་ལ་དེ་མི་རིགས་ཏེ། སྦྱོར་བ་ཉི་ཤུ་ལས་གནས་པ་བཀག་པའི་སྦྱོར་བ་སོགས་རེ་རེ་ནས་ཡོད་པ་དང་མི་རྟག་པ་རྟོགས་པའི་སྦྱོར་བ་སོགས་སྦྱོར་བ་དུ་མ་ཡོད་པའི་ཕྱིར་རོ། །ཉ་ཊཱིཀ་ལས། རྩ་འགྲེལ་ལྷན་གཅིག་སྟེ། རང་བཞིན་གྱི་ལྔ། གནས་སྐབས་ཀྱི་བཅོ་ལྔའོ། །ཞེས་དང་པོ་ལྔ་རང་བཞིན་གྱི་དབྱེ་བ་དང་ཕྱི་མ་བཅོ་ལྔ་གནས་སྐབས་ཀྱི་དབྱེ་བ་ཡིན་པའི་རྒྱུ་མཚན་ལ་དཔྱད། ཡང་ཉ་ཊཱིཀ་ལས། སྦྱོར་ལམ་པའི་ཡུམ་སྦྱོར་ཆོས་ཅན། གཟུགས་སོགས་ལ་མི་གནས་པའི་སྦྱོར་བ་ཡིན་ཏེ། གནས་བྱ་གཟུགས་ལ་སོགས་པ་ལ་བདེན་པའི་ངོ་བོ་ཉིད་མེད་ཅིང་སྟོང་བས་དེ་ལ་ཞེན་ནས་མི་གནས་པ་སྟེ་གནས་པ་བཀག་སྟེ་བསྒོམ་པའི་ཡུམ་སྦྱོར་ཡིན་པའི་ཕྱིར། ཞེས་པའི་རྟགས་བཀོད་པ་ལྟར་ན་གཟུགས་སོགས་བདེན་མེད་རྟོགས་པའི་བྱང་སེམས་ཚོགས་ལམ་པ་ལ་ཡོད་པ་འདྲའོ། །ཡང་ཉ་ཊཱིཀ་ལས། ཚེགས་ཆེན་པོས་ཡུན་རིང་མོ་ཞིག་ནས་རྟོགས་པ་སྟེ། མངོན་པར་རྫོགས་པར་འཚང་རྒྱ་བར་རུང་བའི་སྦྱོར་བ་ཡིན་ཏེ། ཡུམ་ཟབ་གཏིང་དཔག་དཀའ་ཚད་མེད་པ་ལ་ཟབ་པས་དང་པོ་དངང་ཞིང་སྐྲག་པ་དང༌། གཏིང་དཔག་བཀའ་བས་དེ་ལྷག་པར་འཕེལ་ནས་ཀུན་ཏུ་སྐྲག ཚད་མེད་པས་བདེན་ཞེན་ངེས་པར་གནས་ནས་གཏིང་ཚུགས་པས་སྐྲག་པས་ཟིན་པར་འགྱུར་སྲིད་པའི་ལས་དང་པོ་བའི་ཡུམ་སྦྱོར་ཡིན་པས་སོ། །དེ་ལྟ་བུ་ལ་སྟོང་ཉིད་རྟོགས་པའི་སྦྱོར་བ་ཡོད་མེད་དཔྱད། ཡང་ཉ་ཊཱིཀ་ལས། བྱང་སེ་མཐོང་ལམ་པ་དབང་རྣོན་གྱི་ཡུམ་སྦྱོར་ཆོས་ཅན། ཡང་དག་པར་རྫོགས་པའི་བྱང་ཆུབ་ལ་ཉེ་བའི་སྦྱོར་བ་ཡིན་ཏེ།ཞེས་གསུངས་པས་བྱང་སེམས་དབང་རྣོན་མཐོང་ལམ་དེ་རྫོགས་བྱང་ལ་ཉེ་བ་ཡིན་ནམ་དཔྱད། ཡང་ཉ་ཊཱིཀ་ལས། ས་མཚམས་དེ་དག་བུདྡྷ་ཤྲཱིའི་གསུང་སྒྲོས་བར་མ་ཆད་དུ་སྣང་ངོ༌། །ཞེས་ས་མཚམས་དེ་ལྟར་རང་ལུགས་འཐད་དམ་ཅི། མི་འཐད་ན་ཉ་ཊཱིཀ་ལས་རྩ་འགྲེལ་གྱི་དོན་བཤད་སྐབས་དེ་ལྟར་བཤད་པའི་རྒྱུ་གང་ཡིན། འཐད་ན་གོང་དུ་བཤད་པ་ལྟར་སྦྱོར་བ་དང་པོ་སོགས་ཚོགས་ལམ་ནས་མེད་དགོས་པ་ལ་དེ་ཡང་མི་རིགས་པའི་ཕྱིར་ཟེར་ན་དཔྱད་པར་བྱའོ། །