གསུམ་པ་སྐྱེ་རྒྱུ་ཡོན་ཏན་བཤད་པ།
གསུམ་པ་སྐྱེ་རྒྱུ་ཡོན་ཏན་བཤད་པ་ལ།
སྦྱོར་བའི་ཡོན་ཏན་རྣམས་ཤེས་ན་སྦྱོར་བ་གོམས་པར་བྱེད་པས་ན་སྦྱོར་བའི་ཡོན་ཏན་བཤད་པར་བྱའོ། །དེ་ཡང་མདོ་ལས། བྱང་ཆུབ་སེམས་དཔའ་ཤེར་ཕྱིན་ཟབ་མོ་འདི་འདྲི་ཀློག་ཁ་ཏོན་བྱེད་སྒོམ་པ་ལ་བར་ཆད་བྱེད་པར་མི་ནུས་སོ། །ཞེས་སོགས་ཀྱི་དོན།བདུད་ཀྱི་མཐུ་བཅོམ་ལ་སོགས་པ། །ཡོན་ཏན་རྣམ་པ་བཅུ་བཞིའོ། །ཞེས་གསུངས་སོ། །ཐེག་ཆེན་གྱི་སྦྱོར་བ་སྒོམ་སྟོབས་ཀྱིས་ཐོབ་པའི་ཐེག་ཆེན་ལམ་ཞུགས་ཀྱི་རྒྱུད་ཀྱི་ཡོན་ཏན་དེ། ཐེག་ཆེན་སྦྱོར་བའི་ཡོན་ཏན་གྱི་མཚན་ཉིད་ཡིན་ཏེ། ཉ་ཊཱིཀ་ལས། སྦྱོར་བའི་ཡོན་ཏན་ནི། སྦྱོར་བ་བསྒོམ་པའི་གནས་སྐབས་སམ། མཐར་ཐུག་གི་ཐོབ་བྱའི་འབྲས་བུ། དབྱེ་ན་བཅུ་བཞིའོ། །ཞེས་གསུངས་པའི་ཕྱིར། སྐབས་འདིའི་ཡོན་ཏན་དེ་སྦྱོར་བའི་རྒྱུ་དང་འབྲས་བུ་གཉིས་ལ་སྦྱར་མཁན་ཡོད་ཀྱང་རང་ལུགས་ལ་མདོ་ལུགས་མ་ལས། ཡོན་ཏན་འདི་དག་ཡུམ་གྱི་ཆོས་སྤྱཽད་ཐམས་ཅད་ཀྱི་ཕན་ཡོན་དུ་མདོ་ལས་གསུངས་པ་སྟེ། བདུད་ཀྱི་མཐུ་བཅོམ་ཞིང་ནུས་པ་མེད་པ་དང་སངས་རྒྱས་ཐམས་ཅད་ཀྱིས་དགོངས་པས་མཁྱེན་ཅིང་ལ་སོགས་པ་ཡོན་ཏན་རྣམ་པ་བཅུ་བཞིའོ། །ཞེས་གསུངས་པས་སྦྱོར་བ་སྒོམ་པའི་ཕན་ཡོན་ནམ་ལེགས་པའི་འབྲས་བུ་བཤད་དགོས་སོ། ། དབྱེ་ན། སྦྱོར་བ་སྒོམ་པའི་གང་ཟག་ལ་བདུད་རྣམས་ཀྱིས་བར་ཆད་ཀྱི་ལས་ཅི་རྩོམ་ཀྱང་དེ་ལ་སངས་རྒྱས་དང་བྱང་སེམས་དང་དཀར་ཕྱོགས་ཀྱི་ལྷ་རྣམས་ཀྱིས་དགོངས་པས་བདུ༷ད་རྣམས་ཀྱི༷་གནོད་པས་མི་ཚུགས་ཤིང་དེ་དག་གི་མཐུ༷་སྟོབས་བཅོ༷མ་པའི་ཡོན་ཏན་༡དང༌། སངས་རྒྱས་ཀྱིས་བྱིན་གྱིས་རླབས་པ་དང་ཐུགས་ཀྱིས་དགོངས་ཤིང་མཁྱེན་པའི་ཡོན་ཏན་༢དང༌། སངས་རྒྱས་དང་འཕྲད་ནས་དངོས་སུ་བྱིན་གྱིས་རླབས་པ་མངོན་སུམ་དུ་མཛད་ཅིང་གཟིགས་པའི་ཡོན་ཏན་༣དང༌། ཡང་དག་པར་རྫོགས་པའི་བྱང་ཆུབ་དང་ཉེ་བའི་ཡོན་ཏན་༤དང༌། དོན་ཆེན་པོ་སོགས་ཀྱི་ཡོན་ཏན་༥དང༌། བྱང་ཕྱོགས་ནས་བྱང་ཕྱོགས་སུ་བརྒྱུད་དེ་རྒྱ་མཚོའི་བར་དུ་དར་བར་ལུང་བསྟན་པ་ལྟ་བུ་སྦྱོར་བ་སྒོམ་པའི་གང་ཟག་དེ་གང་དུ་སྐྱེ་བའི་ཡུལ་དེ་སངས་རྒྱས་ཀྱིས་ལུང་བསྟན་པ་དེར་སྐྱེ་ཞིང་ཡུལ་དེར་ཤེར་ཕྱིན་དར་བར་བྱེད་པ་ནི་ཡུལ་དཔྱད་པའི་ཕན་ཡོན་༦དང༌། སྦྱོར་བ་སྒོམ་པས་ཚུལ་ཁྲིམས་དང་ཏིང་ངེ་འཛིན་སོགས་ཟག་མེད་ཀྱི་ཡོན་ཏན་ཐམས་ཅད་རང་རྒྱུད་ལ་མ་ཐོབ་པ་རྫོགས་པར་འགྱུར་བ་ནི་ཡོན་ཏན་རྫོགས་པའི་ཡོན་ཏན་༧དང༌། གདུལ་བྱ་ཐེག་དམན་དུ་མི་ལྟུང་བར་ཐེག་ཆེན་དུ་གཞུག་པའི་ཐབས་སྟོན་པ་ལ་མཁས་པ་ནི་སྨྲ་བའི་སྐྱེས་བུ་ཉིད་ཀྱི་ཡོན་ཏན་༨དང༌། རྣམ་མཁྱེན་དང་ཐེག་ཆེན་གྱི་ལམ་ལས་སེམས་མི་ཕྱེད་པའི་ཡོན་ཏན་༩དང་དགུ། ད་ལྟ་ཤེར་ཕྱིན་ནམ་སྦྱོར་བ་སྒོམ་པ་ལ་དགའ་བ་རྒྱ་ཆེན་པོ་ཐོབ་པས་སྐྱེ་བོ་མང་པོ་ལ་བླ་མེད་རྫོགས་བྱང་གི་དགེ་རྩ་བསྐྲུན་པར་བྱེད་པ་ནི་ཉན་རང་དང་དགེ་རྩ་ཐུན་མོང་མ་ཡིན་པའི་ཡོན་ཏན་༡༠དང༌། སེམས་ཅན་གྱི་དོན་སྒྲུབ་པའི་དམ་བཅའ་སྒྲུབ་པའི་ཡོན་ཏན་༡༡དང༌། སེམས་ཅན་མ་ལུས་པའི་དོན་སྒྲུབ་པ་དང༌། སྤངས་རྟོགས་མཐར་ཐུག་པ་དང༌། འབྲས་བུ་རྒྱ་ཆེན་པོ་འཛིན་པའི་ཡོན་ཏན་༡༢དང༌། ཚེ་རབས་གཞན་དུ་སྔར་གྱི་དམ་བཅའ་དྲན་ནས་ཕར་ཕྱིན་དྲུག་གི་སྒོ་ནས་སེམས་ཅན་གྱི་དོན་སྒྲུབ་པ་ཐོབ་པ་ནི་སེམས་ཅན་གྱི་དོན་སྒྲུབ་པའི་ཡོན་ཏན་༡༣དང༌། སྦྱོར་བ་ཉམས་སུ་ལེན་པ་ལ་བརྩོན་པ་མ་དོར་བའི་མཐུས་ཚེ་རབས་གཞན་རྣམས་སུ་ཤེར་ཕྱིན་རྙེད་པར་འགྱུར་བ་ནི་འདོད་དོན་ངེས་པར་ཐོབ་པའི་ཡོན་ཏན་༡༤ཏེ། སྦྱོར་བའི་ཡོ༷ན་ཏ༷ན་རྣ༷མ་པ༷་བཅུ༷་བཞི༷འོ༷། །ས་མཚམས་ཐེག་ཆེན་ཚོགས་ལམ་ནས་སངས་རྒྱས་ཀྱི་སར་ཡོད་དོ། །ཉ་ཊཱིཀ་གིས་འགྲེལ་བའི་དོན་བཤད་སྐབས་སུ། འོག་མ་རྒྱུའི་ཡོན་ཏན་བཅུ་བཞི་གོང་མ་འབྲས་བུའི་ཡོན་ཏན་བཅུ་བཞི་གྲངས་བཞིན་དུ་སྦྱར་ན། སྦྱོར་བ་བསྒོམ་པའི་སྐབས་སུ་ཞེས་རྒྱུ་ཀུན་གྱི་མགོར་སྦྱར། ཡོན་ཏན་ཞེས་པ་གཉིས་ཀའི་མཇུག་ཏུ་སྦྱར་རོ། །སྦྱོར་ལམ་རྩེ་མོ་པའི་བྱང་སེ་ཆོས་ཅན། ཡུམ་བསྒྲུབ་པ་ལ་བདུད་ཀྱིས་བར་ཆད་བྱེད་པའི་ནུས་མཐུ་བཅོམ་པའི་ཡོན་ཏན་འཐོབ་ཏུ་རུང་སྟེ། དེ་མི་འབྱུང་བར་ཕྱོགས་བཅུའི་སངས་རྒྱས་རྣམས་ཀྱིས་བྱིན་གྱིས་བརླབས་པའི་བྱང་སེ་ཡིན་པས་སོ། ། ཞེས་སོགས་སོ། །ཞེས་པ་ནས། བཅུ་བཞི་ཚན་པ་གཉིས་པོ་དེ་དག་ཕྱིན་ཅི་མ་ལོག་པའི་ཡུམ་གྱི་སྦྱོར་བ་ལ་མངོན་པར་དགའ་བའི་སྔར་བཤད་སྒོམ་པ་པོ་ལ་རྒྱུའི་ཡོན་ཏན་བཅུ་བཞི་ཐོབ་པས་འབྲས་བུའི་ཡོན་ཏན་བཅུ་བཞི་འབྱུང་ཞིང་དེ་ཡང་རྗེས་སུ་མཐུན་པར་བསླབ་པར་བྱ་བས་ཡོན་ཏན་གྲངས་རྣམ་པ་བཅུ་བཞིའོ། །ཞེས་རྒྱུ་དང་འབྲས་བུ་གཉིས་ལ་སྦྱར་ཚུལ་གསུངས་མོད་རང་ལུགས་འཐད་ལྡན་མ་ཡིན་ནམ་དཔྱད་པར་བྱའོ། །