བཞི་བ་མི་སྐྱེ་བའི་རྒྱུ་སྐྱོན་བཤད་པ།

བཞི་བ་མི་སྐྱེ་བའི་རྒྱུ་སྐྱོན་བཤད་པ་ལ།

ད་ནི་ཐེག་པ་ལ་གསར་དུ་ཞུགས་པ་ཆོས་ཀྱི་རོ་མ་མྱོང་བས་ཡུམ་གྱི་ཆོས་སྤྱོད་ལ་བར་ཆད་ཀྱི་སྐྱོན་འབྱུང་བ་བཤད་པར་བྱ་སྟེ། སྡུད་པ་ལས། ཐེག་པ་གསར་དུ་ཞུགས་པའི་སེམས་ཅན་བློ་ཆུང་བ། །གང་ཞིག་དཀོན་པའི་རིན་ཆེན་འདི་ནི་མ་རྙེད་པ། །དེ་ལ་བར་ཆད་བྱ་ཕྱིར་བདུད་ནི་སྤྲོ་བར་འགྱུར། །ཞེས་དང༌། ཉི་ཁྲིའི་ལེའུ་སོ་གཅིག་པ་དང་སོ་གཉིས་པའི་སྐབས་ན་རིགས་ཀྱི་བུ་དང་བུ་མོ་བླ་མེད་བྱང་ཆུབ་ཏུ་སྤྱོད་པ་ལ་བར་ཆད་ཇི་ལྟ་བུ་མཆིས་ཞེས་སོགས་ཀྱི་དོན་འཆད་པ་ལ། རྩ་བར། སྐྱོན་ནི་བཅུ་ཚན་བཞིར་བཅས་པ། །དྲུག་ཏུ་ངེས་པར་རྟོགས་པར་བྱ། །ཞེས་སོ། །དེའི་དོན་མདོ་ལུགས་མ་ལས། དེས་ན་སྤོབས་པ་ཧ་ཅང་འཕྱིས་པ་དང༌། ཧ་ཅང་མྱུར་བ་དང༌། གླལ་བ་དང༌། རྒོད་པ་དང༌། ཕན་ཚུན་སྡིགས་པ་དང༌། གཡོ་བ་དང་ཡི་གེ་གཞན་ལ་ཆགས་པ་དང༌།འདིའི་རོ་མ་མྱོང་ནས། སྟན་ལས་ལངས་ཏེ། འགྲོ་བ་དང༌། གླལ་ཞིང་ལུང་འབོག་པ་ལ་སོགས་པ་ཆོས་སྤྱོད་པའི་བར་ཆད་ཀྱི་སྐྱོ༵ན་ནི༷་བཅུ༷་ཚ༷ན་བཞི༷་སྟེ། བཞི་བཅུར་བཅ༷ས་པ༷འི་སྟེང་དུ་དྲུག་དང་བཞི་བཅུ་རྩ་དྲུ༷ག་དུ༷་ངེ༷ས་པ༷ར་རྟོ༷གས་པ༷ར་བྱ༷་ཞིང་སྤངས་པར་བྱའོ། །བདུད་ལས་འདི་རྣམས་མ་སྤྲན་ན་སྐྱོན་གྱི་དབང་དུ་འགྲོ་ཞིང་སྤྲན་ན་མི་འགྲོ་བའི་གདུལ་བྱ་ལ། སངས་རྒྱས་ཀྱི་དགེ་བའི་བཤེས་གཉེན་གྱི་བྱ་བ་བདུད་ལས་སྤྲན་པར་མཛད་པ་ཡིན་ཏེ། དེ་ཡང་བྱང་ཆུབ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱ་སྟེ། སྤང་བར་བྱའོ། །ཞེས་གསུངས་པའི་ཕྱིར་རོ། །ཐེག་ཆེན་གྱི་སྦྱོར་བ་སྐྱེ་གནས་འཕེལ་བ་གསུམ་པོ་ཅི་རིགས་ལ་གེགས་བྱེད་པའི་བདུད་ལས་སུ་བཤད་པ་དེ། སྐབས་འདིའི་སྐྱོན་གྱི་མཚན་ཉིད་ཡིན་ཏེ།ཉ་ཊཱིཀ་ལས། སྦྱོར་བའི་སྐྱོན་ནི། སྦྱོར་བ་སྒོམ་པ་པོ་འགའ་ཞིག་གིས་སྦྱོར་བ་བསྒོམ་པའི་བར་དུ་གཅོད་བྱེད་ཀྱི་ལས། ཡང་ན་ཡུམ་ལ་ཐོས་བསམ་བསྒོམ་པ་གང་རུང་གི་བར་ཆད་དུ་གྱུར་པའི་ལས། དབྱེ་ན་ཞེ་དྲུག་གོ །ཞེས་གསུངས་པའི་ཕྱིར། སྐྱོན་འདི་དག་སྦྱོར་བའི་སྐྱོན་ཡིན་ཏེ། མཚན་ཉིད་དེའི་ཕྱིར། འདོད་ན། དེ་མི་རིགས་པར་ཐལ། མདོ་ལུགས་མ་ལས། སྐྱོན་འདི་དག་སྦྱོར་བའི་སྐྱོན་དུ་འཆད་པ་ནི་མདོ་དང་མི་མཐུན་ཏེ། མདོ་ལས། ཆོས་སྤྱོད་ཐམས་ཅད་ཀྱི་བར་ཆད་དུ་གསུངས་ཤིང་ཁྱད་པར་དཔོན་སློབ་མི་འགྲིག་པ་ཇི་སྙེད་འབྱུང་བ་ཐམས་ཅད་འཆད་ཉན་གྱི་སྐྱོན་དུ་གསུངས་བའི་ཕྱིར་རོ། །ཞེས་གསུངས་པའི་ཕྱིར་ཟེར་ན་དཔྱད། ས་མཚམས་ནི། ཉ་ཊཱིཀ་ལས། འདི་དག་ལས་དང་པོ་བའི་ས་ནས་སྒོམ་ལམ་ཕལ་བའི་བར་དུ་ལྡན་མོད་ཀྱི་གཙོ་ཆེར་ཚོགས་སྦྱོར་ལ་བཞག་ཅེས་ཆོས་བཤེས་སོ། །ཞེས་གསུངས་སོ། །ཉ་ཊཱིཀ་གི་འགྲེལ་བའི་དོན་བཤད་སྐབས་སུ་བསལ་བྱ་སྐྱོན་གྱི་དབྱེ་བ། དེ་སེལ་བྱེད་གཉེན་པོའོ། །དང་པོ་ལ་འགལ་རྐྱེན་ཉེ་བར་གནས་པ་ཉེར་གསུམ། མཐུན་རྐྱེན་མ་ཚང་བ་ཉེར་གསུམ་མོ། །དང་པོ་ནི། བཅུ་ཚན་དང་པོ་གཉིས་དང་ཐ་མ་གསུམ། གཉིས་པ་ནི་གཞན་རྣམས་སོ། ། ཞེས་གསུངས་ལ། དབྱེ་བ་རེ་རེ་ནས་ཤེས་པར་འདོད་ན་ཉ་ཊཱིཀ་སོགས་གཞན་དུ་ཤེས་པར་བྱའོ། །སྐྱོན་ཞེ་དྲུག་པོ་གང་རུང་ཡིན་ན་བདུད་ལས་ཡིན་པས་ཁྱབ་པར་ཐལ། མདོ་ལུགས་མ་ལས། དེ་ཡང་བྱང་ཆུབ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱ་སྟེ། སྤང་བར་བྱའོ། །ཞེས་གསུངས་པའི་ཕྱིར་ཟེར་ན་མ་ཁྱབ་སྟེ། བདུད་ལས་དང་བྱེད་ལས་འདྲ་བ་ཡོད་པས་བདུད་ལས་སུ་བཤད་པ་ལ་དགོངས་པ་ཡིན་པར་སྣང་བས་སོ། །སྦྱོར་བའི་སྐྱོན་དང་བར་ཆད་ཡིན་པའི་ཚད་ལ་དཔྱད་པར་བྱའོ། །