ལྔ་བ་ཤེས་བྱ་མཚན་ཉིད་བཤད་པ།

ལྔ་བ་ཤེས་བྱ་མཚན་ཉིད་བཤད་པ་ལ།

བསྡུས་ཏེ་མདོར་བསྟན་པ་དང༌། ཕྱེ་སྟེ་རྒྱས་པར་བཤད་པ་གཉིས་ལས། དང་པོ་ནི། རྩ་བར། གང་གིས་མཚོན་དེ་མཚན་ཉིད་དུ། །ཤེས་བྱ་དེ་ཡང་རྣམ་པ་གསུམ། །ཤེས་པ་ཁྱད་པར་བྱེད་པ་སྟེ། །ངོ་བོ་ཉིད་གང་མཚོན་བྱ་ཡང༌། །ཞེས་སོ། །དེ་ལ་སྤྱི་དོན་དང་མཐའ་རགས་ཙམ་དཔྱད་པ་གཉིས། དང་པོ་ལ་ནི། ཉ་ཊཱིཀ་ལྟར་ན། ལམ་ཅི་རིགས་ཀྱི་རྟོགས་པ་ཁྱད་པར་ཅན་འཕྲིན་ལས་ངོ་བོ་ཉིད་གང་རུང་མཚོན་བྱེད་དམ་གོ་བྱེད་ཀྱི་ཐེག་ཆེན་གྱི་ཡོན་ཏན་དེ། སྐབས་འདིར་བསྟན་གྱི་སྦྱོར་བའི་མཚོན་པར་བྱེད་པའི་མཚན་ཉིད་ཡིན་ཏེ། ཉ་ཊཱིཀ་ལས། ལྔ་བ་སྦྱོར་བའི་མཚན་ཉིད་ནི།སྦྱོར་བ་རྣམས་ཀྱི་རྟོགས་པ་ཁྱད་པར་ཅན་འཕྲིན་ལས་ངོ་བོ་ཉིད་གང་ཡང་རུང་བ་མཚོན་བྱེད་ཡིན་པ། ཡང་ན་སྦྱོར་བ་རྣམས་རྒྱུའམ་ཁྱད་པར་ཅན་ནམ་སྦྱོར་བའི་ངོ་བོ་མཚོན་བྱེད་གང་ཡང་རུང་བ། དབྱེ་ན་དགུ་བཅུ་རྩ་གཅིག་གོ །ཞེས་གསུངས་སོ། །སྤྱི་རིགས་ནས་གང་གིས་གང་མཚོན་པར་བྱེད་པ་དེ་དེའི་མཚན་ཉིད་ཅེས་སྒྲས་བརྗོད་པར་ཤེས་པར་བྱ་ཞིང༌། དེ་ལ་ཚུལ་དུ་མ་ཡོད་དེ། རང་ཉིད་ཐུན་མོང་མིན་པར་མཚོན་པར་བྱེད་པ་རང་གི་མཚན་ཉིད་དང༌།དེ་དང་གཞན་ཐུན་མོང་དུ་མཚོན་པར་བྱེད་པ་སྤྱིའི་མཚན་ཉིད་དེ། རིམ་བཞིན་ཚ་སྲེག་གིས་མེ་དང་མི་རྟག་བདག་མེད་སོགས་ཀྱིས་དུ་མ་མཚོན་པ་བཞིན་ནོ། །ཡང་གསུང་རབ་སྤྱི་དང་བསྟུན་ན་རང་བཞིན་གྱི་མཚན་ཉིད་ནི། མི་རྟག་པ་འདུས་བྱས་ཀྱི་མཚན་ཉིད་ཡིན་པ་སོགས་དང༌། དེ་མ་ཡིན་ལས་འབྱེད་པའི་མཚན་ཉིད་སྐད་ཅིག་མས་མི་རྟག་པ་མཚོན་པ་ལྟ་བུ་སྟེ་རྟག་པ་ལས་འབྱེད་པ་ལྟ་བུའོ། །དེ་རྣམས་ལས་སྐབས་འདིར་རང་བཞིན་གྱི་མཚན་ཉིད་གཟུང་ངོ༌། །དེ་ལ་བྱེད་སྒྲུབ་བམ་སྐབས་འདིའི་མཚན་ཉིད་དང༌། ལས་སྒྲུབ་བམ་སྐབས་འདིའི་མཚོན་བྱ་གཉིས་ལས། དང་པོ་ནི། སྐབས་འདིའི་གང་གིས་མཚོན་པར་བྱེད་པའི་མཚན་ཉིད། དེ་ཡང་རྣམ་པ་གསུམ་སྟེ། ཤེས་མཚན། ཁྱད་མཚན། བྱེད་མཚན་རྣམས་སོ། །དེ་ཡང་སློབ་ལམ་གྱི་ཤེས་པ་ཞེ་བརྒྱད་པོ་དེ་ཆོས་ཅན། ཐེག་ཆེན་གྱི་མཁྱེན་གསུམ་སྦྱོར་བའི་ཤེས་མཚན་ཡིན་ཏེ། དེའི་ཐུན་མོང་མིན་པའི་རྟོགས་པ་མཚོན་པར་བྱེད་པས་སོ། །དེ་ཡིན་ཏེ། དེས་རྒྱལ་བའི་ཡུམ་གྱི་ཆེ་བའི་ཡོན་ཏན་ཤེས་པར་དོན་མཐུན་དུ་རྟོགས་པར་བྱེད་པས་སོ། །ཚུལ་ཇི་ལྟར་མཚོན་ཚུལ་ནི། ཐེག་ཆེན་གྱི་མཁྱེན་གསུམ་སྦྱོར་བའམ་ཐེག་ཆེན་གྱི་དེ་གསུམ་རེ་རེ་ཆོས་ཅན། རྒྱལ་ཡུམ་གྱི་ཆེ་བའི་ཡོན་ཏན་ཤེས་པའམ་རྟོགས་པའི་ཁྱད་པར་དང་ལྡན་ཏེ། ཡུམ་ཤེར་ཕྱིན་འདི་ནི་དེ་པ་བསྐྱེད་པ་ཞེས་སོགས་ཤེས་ཤིང་རྟོགས་པ་ཡིན་པའི་ཕྱིར། ཡུམ་ཤེར་ཕྱིན་རྒྱུར་ཡོད་པ་ལས་དེ་པས་སྟོང་ཉིད་སོགས་མཁྱེན་ཞེས་སོགས་ཤེས་ཤིང་རྟོགས་པ་ཡིན་པའི་ཕྱིར། དེ་རྒྱུར་ཡོད་པ་ལས་དེ་པ་བདེ་བར་གནས་ཞེས་སོགས་ཤེས་ཤིང་རྟོགས་པ་ཡིན་པའི་ཕྱིར། རིམ་བཞིན་ཆོས་ཅན་གསུམ་ལ་སྦྱར་རོ། །ཐེག་ཆེན་སློབ་ལམ་གྱི་ཤེས་པ་བཅུ་དྲུག་པ་ཕྲག་གཉིས་ཀྱིས་རིམ་བཞིན་བྱང་སེའི་གཞི་ཤེས་ལམ་ཤེས་དང༌། སངས་རྒྱས་སའི་བཅུ་དྲུག་གིས་རྣམ་མཁྱེན་གྱི་རྟོགས་པ་མཚོན་པས་དེ་དང་དེའི་ཤེས་མཚན་དུ་སྦྱར་ལ་བསྙད་དོ། །དེ་དང་དེའི་རྟོགས་པའི་ཆ་ཉིད་ལ་ཤེས་པའི་མཚན་ཉིད་ཅེས་ཏེ་ཤེས་པ་ཡང་ཡིན་ལ་མཚོན་པར་བྱེད་པ་ཡང་ཡིན་པས་ཤེས་མཚན་ནམ་སྐབས་འདིའི་ཤེས་པ་མཚོན་པར་བྱེད་པས་ན་ཤེས་མཚན་ནོ། །གཞན་གསུམ་ལའང་ཚུལ་དེའོ། །ཡང་བསམ་གྱིས་མི་ཁྱབ་སོགས་བཅུ་དྲུག་གིས་ཁྱད་པར་དུ་བྱས་པའི་ཤེས་བཟོད་སྐད་ཅིག་བཅུ་དྲུག་ཆོས་ཅན། ཐེག་ཆེན་མཐོང་ལམ་གྱི་ཁྱད་པར་གྱི་མཚན་ཉིད་ཡིན་ཏེ། དེ་ཐེག་དམན་མཐོང་ལམ་ལས་ཁྱད་པར་འཕགས་པར་མཚོན་པར་བྱེད་པས་སོ། །ཚུལ་ཇི་ལྟར་མཚོན་པ་ནི། ཐེག་ཆེན་མཐོང་ལམ་ཆོས་ཅན། ཐེག་དམན་མཐོང་ལམ་ལས་ཁྱད་པར་དུ་འཕགས་ཏེ། དེ་འདྲའི་ཤེས་བཟོད་བཅུ་དྲུག་ཅན་གྱི་མཐོང་ལམ་ཡིན་པས་སོ། །ཞེས་པའི་ཚུལ་གྱིས་སོ། །དེ་དངོས་སུ་བསྟན་པས་ཐེག་ཆེན་སྒོམ་ལམ་དང་མཐར་ཕྱིན་པའི་ལམ་ཁྱད་པར་འཕགས་པར་དོན་གྱིས་འགྲུབ་པོ། །ཡང་ཕན་བདེ་སྐྱོབ་པ་སོགས་བཅུ་གཅིག་ཆོས་ཅན། ཐེག་ཆེན་གྱི་མཁྱེན་གསུམ་མམ་དེའི་སྦྱོར་བའི་བྱེད་མཚན་ཡིན་ཏེ། དེ་འབྲས་བུ་འབྱིན་ནུས་སམ་འཕྲིན་ལས་ཁྱད་པར་བ་དང་ལྡན་པར་མཚོན་པར་བྱེད་པས་སོ། །ཇི་ལྟར་མཚོན་ན། དེ་གསུམ་ཆོས་ཅན། འབྲས་བུ་འབྱིན་པའི་ནུས་པའམ་འཕྲིན་ལས་ཁྱད་པར་བ་དང་ལྡན་ཏེ། ཕན་བདེ་སྐྱོབ་པ་སོགས་བཅུ་གཅིག་བསྒྲུབ་པར་མཛད་པས་སོ། །ཞེས་པའི་ཚུལ་གྱིས་སོ། །དེས་ན་ཤེས་ཁྱད་བྱེད་པ་ཆོས་ཅན། དེ་གསུམ་གྱི་བྱེད་སྒྲུབ་གྱི་མཚན་ཉིད་ཡིན་ཏེ། རིམ་པ་བཞིན་དུ་དེའི་རྟོགས་པ་དང༌། ཁྱད་པར་འཕགས་པའི་ཆ་དང༌། དེའི་མཛད་པ་མཚོན་པར་བྱེད་པས་སོ། ། གཉིས་པ་ལས་སྒྲུབ་ནི། དེར་མ་ཟད་སྐབས་འདིའི་མཚོན་པར་བྱ་བ་གང་ཡིན་པ་དེའོ། །དེ་ཡང་ངོ་བོ་ཉིད་ཅེས་བྱ་བ་སྟེ་མཚན་ཉིད་བཞིའོ་ཞེས་དག་ལྡན་ནོ། །ངོ་བོ་ཉིད་མཚན་ཆོས་ཅན། མཁྱེན་གསུམ་མམ་དེའི་སྦྱོར་བའི་མཚན་ཉིད་ཡིན་ཏེ། དེའི་ཐུན་མོང་མིན་པའི་རང་བཞིན་གྱི་ཆོས་ཡིན་པས་སོ། །སྔ་མ་གསུམ་ལའང་ཚུལ་དེ་སྦྱར་རོ། །ཞེས་ཉ་ཊཱིཀ་ལས་སོ། །དེ་ཡང་ཉོན་མོངས་རྟགས་སོགས་ཀྱིས་དབེན་པ་སོགས་བཅུ་དྲུག་ཆོས་ཅན། དེ་གསུམ་གྱི་ངོ་བོ་ཉིད་མཚན་ཡིན་ཏེ། དེའི་རང་བཞིན་བྱེད་སྒྲུབ་ཀྱིས་ཐུན་མོང་མིན་པར་མཚོན་པར་བྱ་བའི་གཞིར་མཚོན་པར་བྱེད་པས་སོ། ། ཇི་ལྟར་ན། དེ་གསུམ་གྱི་སྦྱོར་བ་ཆོས་ཅན།སྦྱོར་བའི་ངོ་བོ་ཉིད་དང་ལྡན་ཏེ། དབེན་པ་བཞི་ལ་སོགས་པའི་ངོ་བོ་ཉིད་བཅུ་དྲུག་ཅན་ཡིན་པས་སོ། ། ཞེས་པའི་ཚུལ་གྱིས་སོ། །ཤེས་མཚན་སངས་རྒྱས་ཁོ་ན་ལ་ཡོད་པ་མ་ཡིན་ཏེ། ཉ་ཊཱིཀ་མཆན་ལས། སངས་རྒྱས་ཁོ་ནར་མི་འཐད་ཅིང་སངས་རྒྱས་ལ་ཡང་ཡོད་པ་འཐད་དོ། །ཞེས་གསུངས་པའི་ཕྱིར། མདོ་ལུགས་མའི་གསུངས་ཟིན་ལ་སངས་རྒྱས་ཁོ་ན་ལ་སྦྱར་ནས་བཤད་དོ། །སྐབས་འདིའི་མཚོན་སྦྱོར་གྱི་རྟགས་དེ་ལ་འབྲས་རྟགས་དང་རང་བཞིན་གྱི་རྟགས་གཉིས་ཡོད་དེ། ཉ་ཊཱིཀ་ལས། འོན་ཀྱང་ཁོ་བོས་བཤད་པ་དང་ཚུལ་གཉིས་ཀ་ཤེས་དགོས་སོ། །ཞེས་གསུངས་པའི་ཕྱིར། མཐར་ཐུག་གི་ཤེས་པ་ཞེ་བརྒྱད་ཆོས་ཅན། མཁྱེན་གསུམ་སྦྱོར་བའི་མཚན་ཉིད་ཡིན་ཏེ། རང་རྒྱུ་སྦྱོར་བས་ཁྱོད་བསྐྱེད་ནུས་སུ་མཚོན་པར་བྱེད་པས་སོ། །ཚུལ་ཇི་ལྟར་མཚོན་པ་ནི། མཐར་ཐུག་གི་ཤེས་པ་ཞེ་བརྒྱད་ཆོས་ཅན། རང་རྒྱུ་སྦྱོར་བ་དང་བཅས་པ་ཡིན་ཏེ། དེ་བཞིན་གཤེགས་པ་འབྱུང་བ་སོགས་ཅི་རིགས་ཤེས་པའི་མི་སློབ་ལམ་ཡིན་པའི་ཕྱིར། ཡང་ན་རང་རྒྱུ་སྦྱོར་བ་ལ་ཁྱོད་བསྐྱེད་པའི་ནུས་པ་ཡོད་དེ། ཞེས་ཆོས་ཅན་དང་རྟགས་སྔར་ལྟར་བཀོད་དོ། །མཁྱེན་གསུམ་མམ་དེའི་སྦྱོར་བའི་མཚན་ཉིད་ནི་རྣམ་པ་བཞིར་ཤེས་པར་བྱའོ། །བཞི་གང་ན། བྱེད་སྒྲུབ་གསུམ་དང༌། ལས་སྒྲུབ་ཀྱི་མཚན་ཉིད་གཅིག་ལས། དང་པོ་ནི། ཤེས་པ་དང་ཁྱད་པར་དང་བྱེད་པ་ཆོས་ཅན། དེ་གསུམ་གྱི་བྱེད་པར་སྒྲུབ་པའི་མཚན་ཉིད་ཡིན་ཏེ། འདིས་གསུམ་གྱི་སྦྱོར་བ་རྣམས་རིམ་བཞིན་རྟོགས་པ་ཁྱད་པར་བ། ཁྱད་པར་འཕགས་པ། མཛད་པ་ཁྱད་པར་བ་ཅན་དུ་མཚོན་པར་བྱེད་པས་སོ། །ཚུལ་ཇི་ལྟར་མཚོན་ན་སྔར་བཤད་ལྟར་རོ། །དེ་ཡང་ལས་སུ་བྱ་བ་དེ་མཚོན་པར་བྱེད་པས་བྱེད་སྒྲུབ་ཀྱི་མཚན་ཉིད་དོ། །དག་ལྡན་ལས། འདིས་མཚོན་པར་བྱེད་པས་ན་ཞེས་བྱ་བ་བྱེད་པར་སྒྲུབ་པའི་མཚན་ཉིད་གསུམ། ཞེས་སོ། ། གཉིས་པ་ལས་སྒྲུབ་ནི། ཡང་ལས་སུ་སྟེ་བྱ་བའི་ཡུལ་དུ་བསྒྲུབ་པར་བྱ་བ་ཡིན་པས་མཁྱེན་གསུམ་གྱི་སྦྱོར་བ་རྣམས་བྱེད་སྒྲུབ་ཀྱིས་མཚོན་པར་བྱ་བ་ཡིན་པས་ངོ་བོ་ཉིད་ཀྱི་མཚན་ཉིད་དེ་བཞིའོ། །ངོ་བོ་ཉིད་མཚན་ཆོས་ཅན། ལས་སུ་བསྒྲུབ་པའི་མཚན་ཉིད་ཡིན་ཏེ། གསུམ་པོ་དེ་རྣམས་བྱེད་སྒྲུབ་ཀྱི་མཚན་ཉིད་ཀྱིས་མཚོན་བྱར་མཚོན་པར་བྱེད་པས་སོ། །མཚོན་པར་བྱེད་པ་དང་རྣམ་པར་འཇོག་པར་བྱེད་ཅེས་པ་ནི། ཤེས་ཤིང་གོ་བར་བྱེད་པ་ལ་མིང་བརྟགས་པ་ཡིན་ལ་གོ་བར་བྱེད་ཚུལ་སྔར་བཞིན་མི་འདྲ་བ་མང་ངོ། ། གཉིས་པ་མཐའ་རགས་ཙམ་དཔྱད་པ་ལ། སྐབས་འདིའི་མཚན་ཉིད་ཡིན་ན་མཚན་ཉིད་དགོས་པར་ཐལ། ཉ་ཊཱིཀ་ལས། སྔ་རབས་དག མཚན་ཉིད་ཡིན་ན་རིགས་མི་མཐུན་ལས་འབྱེད་པ་ཁོ་ནར་རྣམ་བཞག་བྱས་པ་སོགས་ནོར་བའི་ཕྲེང་བ་དུ་མ་སྣང་སྟེ།དེང་སང་ཡང་དེ་ཉིད་མཆོག་ཏུ་རློམས་ཏེ་མཁས་པར་ང་རྒྱལ་བ་དག་ནི་ཕྱག་དར་ཁྲོད་ཀྱི་མི་གཙང་བའི་གོང་བུ་ཞིག་ཡིད་བཞིན་གྱི་ནོར་བུར་རློམ་པ་དང་ཁྱད་མེད་དོ། །ཞེས་དང༌།ཀུན་བཏུས་ས་འགྲེལ་ལས། འགའ་ཞིག་མཚན་ཉིད་ཅེས་བྱ་བ་དེ་མིན་ལས་འབྱེད་པ་ཁོ་ནའོ་ཞེས་འདོད་པ་ནི་མི་འཐད་དེ། ཞེས་གསུངས་པའི་ཕྱིར་ན་མ་ཁྱབ་སྟེ། ལུང་དེ་དག་གི་དོན་ནི་སྤྱིར་མཚན་ཉིད་ཅེས་པའི་སྒྲ་སྦྱར་བ་དང་རྣམ་གྲངས་པའི་མཚན་ཉིད་ལ་མཚན་མཚོན་གཞི་གསུམ་དུ་ཕྱེ་བས་མཚན་ཉིད་དང་རིགས་མི་མཐུན་པ་ལས་འབྱེད་པའི་མཚན་ཉིད་ཡིན་པས་མ་ཁྱབ་པའི་དོན་ཡིན་པར་སྣང་བའི་ཕྱིར་ཏེ། ཀུན་བཏུས་ས་འགྲེལ་ལས། གསུང་རབ་དང་དགོངས་འགྲེལ་རྣམས་སུ་མཚན་ཉིད་ཀྱི་རྣམ་གྲངས་སྣ་ཚོགས་པ་གསུངས་པའི་ཕྱིར་རོ། །ཞེས་དང༌། ཉ་ཊཱིཀ་ལས། མཁས་པའི་དབང་བོ་བཅོམ་རལ་དང་དཔང་ལོ་ཙཱ་བ་ནི། མཚན་མཚོན་གཞི་གསུམ་བྱ་བ་མི་འཐད་དེ། རྒྱ་གར་མཁས་པས་མཚོན་བྱ་མཚན་གཞི་གཅིག་ཏུ་བཤད་པ་དང༌། སྐད་དོད་གཅིག་པ་དང་དོན་འདྲ་བས་སོ་གསུང་ངོ༌། །མ་ཁྱབ་ཁྱབ་ཆེས་མི་སྲིད་གསུམ་དང་བྲལ་བའི་མཚན་ཉིད་ཀྱི་དབང་དུ་བྱས་ན་གསུམ་དུ་རིགས་ཏེ་སྐད་ཅིག་མ་དེ་བུམ་པའི་སྐྱོན་གསུམ་བྲལ་གྱི་མཚན་ཉིད་མིན་པས་སོ། །ཞེས་གསུངས་པའི་ཕྱིར་རོ། །དེས་ན་སྤྱིར་མཚན་ཉིད་ཅེས་པའི་སྒྲ་སྦྱར་བ་དུ་མ་ཡོད་དེ། ཀུན་བཏུས་འགྲེལ་བ་ཤེས་བྱ་རབ་གསལ་སྣང་བ་ལས། མཚན་ཉིད་ཅེས་བྱ་བ་རང་རང་གི་མཚོན་བྱ་དེ་ཇི་ལྟར་རིགས་པར་ཐུན་མོང་དང་ཐུན་མོང་མ་ཡིན་པར་མཚོན་པར་བྱེད་པ་ཡིན་ལ། ཞེས་དང༌། ཉ་ཊཱིཀ་ལས། སྤྱི་རིགས་ནས་གང་གིས་གང་མཚོན་པར་བྱེད་པ་དེ་དེའི་མཚན་ཉིད་དུ་ཤེས་པར་བྱ་ཞིང༌། དེ་ལ་ཚུལ་དུ་མ་ཡོད་དེ། ཞེས་དང༌། གཞི་ལམ་འབྲས་གསུམ་དྲིས་ལན་ཡིད་ཀྱི་མུན་སེལ་ལས། མཚོན་པར་བྱེད་པའི་མཚན་ཉིད་དེ་མཚོན་ཞེས་པ་གོ་བའམ་རྟོགས་སམ་ཤེས་ཟེར་བའི་དོན་ཡིན། དཔེར་ན་ཤེས་པར་བྱེད། གོ་བར་བྱེད། རྟོགས་པར་བྱེད་པས་མཚན་ཉིད་ཅེས་པའི་བརྡའ་བྱས་པ་ཡིན། གོ་བའམ་ཤེས་པར་བྱེད་ཚུལ་མང་པོ་ཡོད་པས་མཚན་ཉིད་ཅེས་པ་མང་བོ་ལ་བཤད་དེ། ཆོས་ཐ་དད་པ་མང་པོ་ཐུན་མོང་དུ་ཤེས་པར་བྱེད་པས་སྤྱིའི་མཚན་ཉིད། ཆོས་སོ་སོ་བ་རང་རང་ཐུན་མོང་མ་ཡིན་པར་གོ་བར་བྱེད་པ་རང་གི་མཚན་ཉིད། རང་རང་གནས་ཚུལ་ལྟར་གྱི་གནས་ལུགས་དེ་དང་དེར་ཤེས་པར་བྱེད་པ་རང་བཞིན་གྱི་མཚན་ཉིད། ཆོས་ཅན་རེ་རེའང་རིགས་མ་ཡིན་དུ་མ་ལས་ལོག་པའི་ཆོས་དུ་མར་ཤེས་པར་བྱེད་པ་རྣམ་པར་དབྱེ་བའི་མཚན་ཉིད་དོ། །ཞེས་གསུངས་པའི་ཕྱིར་རོ། །ཡང་ཐེག་ཊཱིཀ་ལས། ད་ལྟ་སྤྱི་ལ་གྲགས་པའི་མ་ཁྱབ་པ་དང༌། ཁྱབ་ཆེས་པ་དང༌། མི་སྲིད་པའི་སྐྱོན་གསུམ་དང་བྲལ་བའི་ངོ་བོ་ལ་སྒྲོ་འདོགས་གཅོད་པའི་མཚན་ཉིད། ཅེས་དང༌། ཉ་ཊཱིཀ་ལས། མ་ཁྱབ་ཁྱབ་ཆེས་དོན་ལྡོག་མི་སྲིད་གསུམ་དང་བྲལ་བའི་མཚན་ཉིད་ཀྱི་དབང་དུ་བྱས་ན་གསུམ་དུ་རིགས་ཏེ་སྐད་ཅིག་མ་དེ་བུམ་པའི་སྐྱོན་གསུམ་བྲལ་གྱི་མཚན་ཉིད་མིན་པས་སོ། །ཞེས་པའི་རིགས་པའི་བསྟན་བཅོས་སུ་མ་ཁྱབ་ཁྱབ་ཆེས་མི་སྲིད་གསུམ་དང་བྲལ་བའི་མཚན་ཉིད་དང་མཚོན་བྱའི་མཚན་ཉིད་ནི། གཏན་ཚིགས་ཀྱི་དོན་བསྡུས་ལས། མཚན་ཉིད་དང་མཚོན་བྱ་ལ། མཚན་ཉིད་ནི་རིམ་པ་ལྟར། རྣམ་འཇོག་ཆོས་གསུམ་ཚང་བ་དང༌། རྣམ་བཞག་ཆོས་གསུམ་ཚང་བའོ། །ཞེས་གསུངས་སོ། །སྐབས་འདིའི་མཚན་ཉིད་དེ་སྦྱོར་བའི་མཚན་ཉིད་ལ་འཆད་པ་དང༌། ཤེས་ཁྱད་བྱེད་གསུམ་སྐབས་འདིའི་མཚན་ཉིད་བཤད་པ་མི་འཐད་པར་ཐལ། མདོ་ལུགས་མ་ལས། ཆོས་གང་གིས་མཚན་གཞི་གང་མཚོན་པར་བྱེད་པ་དེ་མཚོན་བྱ་དེའི་མཚན་ཉིད་དུ་ཤེས་པར་བྱའོ། །གང་གིས་མཚོན་དེ་མཚན་ཉིད་དུ། །ཤེས་བྱ་དེ་ཡང་རྣམ་པ་གསུམ། །ཤེས་པ་ཁྱད་པར་བྱེད་པ་སྟེ། །ངོ་བོ་ཉིད་གང༌། ཞེས་པ་ལ་ཆོས་ག༷ང་གི༷ས་མཚན་གཞི་གང་མཚོ༷ན་པར་བྱེད་པ་དེ༷་མཚོན་བྱ་དེའི་མཚ༷ན་ཉི༷ད་དུ༷་ཤེ༷ས་པར་བྱ༷འོ། །འདིར་མཚོན་བྱ་དེ༷་ཡ༷ང་རྣ༷མ་པ༷་གསུ༷མ་ཡོད་པ་ནི་ཤེ༷ས་པ༷་དང༌། ཁྱ༷ད་པ༷ར་དང་བྱེ༷ད་པ༷་སྟེ༷། མཚོ༷ན་བྱའོ། །མཚན་ཉིད་བཞི། གང་གིས་ངོ༷་བོ༷་ཉི༷ད་དུ་མཚོན་པ་ག༷ང་ཡིན་པ་དེ་ཡ༷ང་མཚོ༷ན་བྱ༷་བཞི་པར་བཞེད་པ་ཡིན་ནོ། །མཚན་ཉིད་འདི་དག་སྦྱོར་བའི་མཚན་ཉིད་དུ་འཆད་པ་ནི་བྱམས་མགོན་དང་དངོས་སུ་འགལ་ཞིང་མདོ་དང་མི་མཐུན་ལ། རྟོག་དཔྱོད་མི་ལྡན་པ་རྣམས་རྨོངས་པར་བྱེད་པས་བཤད་པར་བས་སོ། །བྱམས་པ་མགོན་པོས་ནི་མཚན་ཉིད་བཞི་པོ་འདི། མཚོན་བྱ་བཞི་པོ་ཤེས་པ་དང༌། ཁྱད་པར་དང༌། བྱེད་པ་དང༌། ངོ་བོ་ཉིད་ཡིན་པར་ཤིན་ཏུ་གསལ་བར་གསུངས་པ་དེ་བོར་ནས། འདི་དག་སྦྱོར་བའི་མཚན་ཉིད་ཏུ་སྟོན་པ་དེ་རིགས་སམ་ཤེས་ལྡན་དག རྒྱལ་བ་རྒྱལ་ཚབ་དག་ལ་ཡིད་ཆེས་པར་གྱིས་ལ་རྟོག་དཔྱོད་མཛོད་ཅིག ཁོ་བོ་ནི་སངས་རྒྱས་དང་ས་བཅུ་པ་རྣམས་དང༌། མི་མཐུན་ན་སུ་ལ་ཡང་ཡིད་རྟོན་པ་མ་ཡིན་ནོ། །ཞེས་གསུངས་པའི་ཕྱིར། འདོད་མི་ནུས་ཏེ། ཉ་ཊཱིཀ་གི་སྐབས་སུ་ཤེས་ཁྱད་བྱེད་གསུམ་སྐབས་འདིའི་མཚན་ཉིད་ལ་བཤད་པའི་ཕྱིར། དེར་ཐལ།ཉ་ཊཱིཀ་ལས། རྩ་བ་ལ། སྤྱི་རིགས་ནས་ག༷ང་གི༷ས་གང་མཚོ༷ན་པར་བྱེད་པ་དེ༷་དེའི་མཚ༷ན་ཉི༷ད་དུ༷་ཤེ༷ས་པ༷ར་བྱ༷་ཞིང༌། ཞེས་པ་ནས། དེ་རྣམས་ལས་སྐབས་འདིར་རང་བཞིན་གྱི་མཚན་ཉིད་གཟུང་ངོ༌། །དེ་ལ་བྱེད་སྒྲུབ་དང༌། ལས་སྒྲུབ་གཉིས་ལས། དང་པོ་ལ། གང་གིས་མཚོན་པར་བྱེད་པའི་མཚན་ཉིད་དེ༷་ཡ༷ང་རྣ༷མ་པ༷་གསུ༷མ་སྟེ། གང་ན་ཤེ༷ས་པ༷་ཁྱ༷ད་པ༷ར་བྱེ༷ད་པ༷་སྟེ༷་དེ་རྣམས་སོ། །ཞེས་པ་ནས། དེར་མ་ཟད་མཚོ༷ན་པར་བྱ༷་བ་གང་ཡིན་པ་དེ་ཡ༷ང་མཚན་ཉིད་དེ་ལས་སུ་སྒྲུབ་པའོ། །དེ་ཡང་ངོ༷་བོ༷་ཉི༷ད་ཅེས་བྱ་བ་སྟེ་མཚན་ཉིད་བཞིའོ་ཞེས་དག་ལྡན་ནོ། །ཞེས་གསུངས་པའི་ཕྱིར་ཟེར་ན་རྩ་བའི་ཚིག་དོན་བཤད་ཚུལ་གཉིས་ཀ་རང་ལུགས་སུ་བཞག་པ་ལ་འགལ་བ་མེད་དམ་དཔྱད་དོ། །ཡང་ཉ་ཊཱིཀ་ལས། ཤེས་པ་ཞེ་བརྒྱད་ཆོས་ཅན། མཁྱེན་གསུམ་སྦྱོར་བའི་མཚན་ཉིད་ཡིན་ཏེ། དེ་ཁྱོད་སྐྱེད་བྱེད་དུ་མཚོན་པར་བྱེད་པས་སོ། །དེའི་རྒྱུ་མཚན་ནི་ཁྱོད་དེའི་འབྲས་བུར་གོ་བར་བྱེད་པས་སོ། །ཞེས་ཁྱོད་དེའི་འབྲས་བུར་གོ་བར་བྱེད་ན་དེ་ཁྱོད་སྐྱེད་བྱེད་དུ་མཚོན་དགོས་པ་ཡིན་མིན་དཔྱད། ཡང་ཉ་ཊཱིཀ་ལས། ཇི་ལྟར་ན། ཆོས་ཅན། དེའི་འབྲས་བུའི་ཐ་སྙད་བྱར་རུང་སྟེ། དེས་ཕན་བཏགས་ནས་དེའི་རྗེས་སུ་འགྲོ་ལྡོག་བྱེད་པས་སོ། །ཞེས་པས་ཏེ་སངས་རྒྱས་ས་ན་ཤེས་པ་དེ་དག་ཡོད་པར་མཐོང་བ་ན་རྒྱུ་མེད་དུ་མི་འབྱུང་བས་རྒྱུ་མཁྱེན་གསུམ་སྦྱོར་བ་ལས་སྐྱེ་བར་ཤེས་པའོ། །བྱེད་མཚན་ལའང་ཚུལ་དེ་ལྟར་བཞེད་དོ། །ཞེས་པའི་མཚོན་ཚུལ་དེ་འབྲས་རྟགས་ཀྱིས་མཚོན་ཚུལ་ཡིན་མིན་དཔྱད་དོ། །ཡང་ཉ་ཊཱིཀ་ལས། དེ་ཡང་ལས་སུ་བྱ་བ་དེ་མཚོན་པར་བྱེད་པས་བྱེད་སྒྲུབ་ཀྱི་མཚན་ཉིད་དོ། །དག་ལྡན་ལས། འདིས་མཚོན་པར་བྱེད་པས་ན་ཞེས་བྱ་བ་བྱེད་པར་སྒྲུབ་པའི་མཚན་ཉིད་གསུམ་ཞེས་སོ། །ཞེས་སྤྱིར་མཚོན་བྱེད་དམ་གོ་བྱེད་ཡིན་ན་བྱེད་སྒྲུབ་ཡིན་པས་ཁྱབ་པ་ཡོད་མེད་དཔྱད། དེ་བཞིན་དུ་མཚོན་པར་བྱ་བ་ཡིན་ན་ལས་སྒྲུབ་ཡིན་པས་ཁྱབ་པ་ཡོད་མེད་དཔྱད་པར་བྱའོ།