གཉིས་པ་ཁྱད་མཚན་རྒྱས་པར་བཤད་པ།
གཉིས་པ་ཁྱད་མཚན་རྒྱས་པར་བཤད་པ་ལ།
སྤྱི་དང༌། བྱེ་བྲག་ཏུ་བཤད་པ་དང༌།མཐའ་རགས་ཙམ་དཔྱད་པ་དང་གསུམ། དང་པོ་ནི། རྩ་བར། བསམ་མི་ཁྱབ་སོགས་ཁྱད་པར་གྱིས། །ཁྱད་ཞུགས་བདེན་པའི་སྤྱོད་ཡུལ་ཅན། །སྐད་ཅིག་མ་ནི་བཅུ་དྲུག་གིས། །ཁྱད་པར་མཚན་ཉིད་བཤད་པ་ཡིན། །ཞེས་སངས་རྒྱས་ཀྱི་དོན་བས༷མ་གྱིས་མི༷་ཁྱ༷བ་པའི་དོན་དུ་ཉེ་བར་གནས་པ་ལ་སོ༷གས་པ་ཁྱ༷ད་པ༷ར་དུ་བྱེད་པའི་ཆོས་རྣམས་ཀྱི༷ས་ཁྱ༷ད་བཞུ༷གས་པའི་ཐེག་ཆེན་གྱི་ལམ། བདེ༷ན་པ༷་བཞིའི་ཡུལ་ལ་སྤྱོ༷ད་པའི་ཡུ༷ལ་ཅ༷ན་གྱི་སྐ༷ད་ཅི༷ག་མ༷་ནི༷་བཅུ༷་དྲུ༷ག་མདོ་ལས་བཤད་པ་དག་གི༷ས་ཐེག་དམན་ཀྱིས་ལམ་ལས་ཁྱ༷ད་པ༷ར་དུ་བྱེད་པའི་ཆོས་ཀྱི་མཚ༷ན་ཉི༷ད་དམ་རང་བཞིན་བཤ༷ད་པ༷་ཡི༷ན་ནོ། །བྱང་སེམས་ཀྱི་མཐོང་ལམ་ཆོས་ཅན། ཉན་རང་མཐོང་ལམ་ལས་ཁྱད་པར་འཕགས་ཏེ། བསམ་གྱིས་མི་ཁྱབ་པ་དང་མི་མཉམ་པ་ལ་སོགས་པ་བཅུ་དྲུག་གི་ཁྱད་པར་གྱིས་ཁྱད་ཞུགས་པའི་སྡུག་བསྔལ་ལ་སོགས་པའི་བདེན་པའི་སྤྱོད་ཡུལ་ཅན་ཆོས་ཤེས་པའི་བཟོད་པ་དང་ཆོས་ཤེས་པ། རྗེས་སུ་ཤེས་པའི་བཟོད་པ་དང་རྗེས་སུ་ཤེས་པའི་མཚན་ཉིད་ཀྱི་སྐད་ཅིག་མ་ནི་བཅུ་དྲུག་ཅན་ཡིན་པའི་ཕྱིར་རོ། ། གཉིས་པ་ཁྱད་མཚན་བཅུ་དྲུག་བྱེ་བྲག་ཏུ་བཤད་པ་ནི། མདོ་ལས། ཤེར་ཕྱིན་འདི་སངས་རྒྱས་ཀྱི་དོན་བསམ་གྱིས་མི་ཁྱབ་པ་དང་མི་མཉམ་པ་དང་མཉམ་པ་དང་གཞལ་དུ་མེད་པ་དང༌། བགྲང་དུ་མེད་པའི་དོན་དུ་ཉེ་བར་གནས་ཞེས་སོགས་ཀྱི་དོན། རྩ་བར། བསམ་མི་ཁྱབ་དང་མི་མཉམ་དང༌། །གཞལ་དང་བགྲང་ལས་ཡང་དག་འདས། །འཕགས་པ་ཀུན་སྡུད་མཁས་པ་ཡིས། །རིག་བྱ་ཐུན་མོང་མིན་ཤེས་ཉིད། །ཤེས་མྱུར་བྲི་དང་གང་མེད་དང༌། །སྒྲུབ་དང་ཡང་དག་འགྲུབ་པ་དང༌། །དམིགས་པ་རྟེན་དང་བཅས་པ་དང། །མཐའ་དག་པ་དང་ཡོངས་འཛིན་དང༌། །རོ་མྱང་མེད་དང་ཁྱད་པར་ནི། །བཅུ་དྲུག་བདག་ཉིད་ཤེས་བྱ་སྟེ། །གང་གིས་ལམ་ནི་གཞན་དག་ལས། །ཁྱད་དུ་འཕགས་པས་ཁྱད་འཕགས་ལམ། །ཞེས་སོ། །བྱེ་བྲག་སོ་སོ་ལ། བསམ༷་གྱིས་མི༷་ཁྱ༷བ་པའི་ཆོས་ཉིད་མངོན་སུམ་དུ་རྟོགས་པ་དེ༡། བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་དེ་ཉན་རང་གི་མཐོང་ལམ་སྡུག་བསྔལ་ཆོས་བཟོད་ལས་ཁྱད་པར་འཕགས་པར་སྒྲུབ་པར་བྱེད་པའོ། །གཞན་ལ་རིགས་འདྲ། སྡུག་བདེན་གྱི་མི་མཉམ་པའི་ཆོས་ཉིད་རྟོགས་པའི་ཡེ་ཤེས༢། སྡུག་བདེན་གྱི་ཆོས་ཉིད་ཚད་གཞ༷ལ་བ་ལས་འདས་པའི་ཆོས་ཉིད་རྟོགས་པ༣། གྲངས་ཀྱིས་བགྲ༷ང་བ་ལ༷ས་ཡ༷ང་ད༷ག་པར་འད༷ས་པའི་ཆོས་ཉིད་རྟོགས་པ༤། ཀུན་འབྱུང་ཆོས་བཟོད་སོགས་ནི། འཕ༷གས་པ༷འི་གང་ཟག་གི་ཡོན་ཏན་ཀུ༷ན་སྡུ༷ད་པར་བྱེད་པ༥། ཇི་ལྟ་ཇི་སྙེད་ཤེས་པའི་མཁས་པ་རིག་བྱའི་ཀུན་འབྱུང་གི་ཆོས་ཉིད་ཤེས་པ༦། ཉན་རང་སོགས་དང་ཐུ༷ན་མོ༷ང་མི༷ན་པའི་སྤྱོད་ཡུལ་གྱི་ཀུན་བདེན་གྱི་ཆོས་ཉིད་ཡོངས་སུ་ཤེ༷ས་པ༧། ཐེག་ཆེན་རང་གི་ལུགས་ཀྱི་དབང་དུ་བྱས་པའི་མངོན་པར་ཤེ༷ས་དང་རྣམ་མཁྱེན་གྱི་ཡེ་ཤེས་མྱུ༷ར་དུ་སྒྲུབ་པ༨། འགོག་པ་ཆོས་བཟོད་སོགས་ནི། ཡུམ་ལས་ཐེག་པ་གསུམ་གྱི་འབྲས་བུ་འབྱུང་ཡང་རང་བཞིན་གྱི་མི་རྟོག་ཅིང་མི་འགྱུར་བ་བྲི་༷ག༷ང་མེ༷ད་པའི་ཆོས་ཉིད་ཤེས་པ༩། ཆོས་སྨྲ་བ་མི་གཏོང་ཞིང་འཁོར་གསུམ་རྣམ་པར་དག་པའི་ཤེས་རབ་ཀྱིས་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དྲག་ཏུ་རབ་ཏུ་བསྒྲུ༵བ་པ༡༠། ཡང་དག་པའི་སྦྱོར་བས་བསྐལ་བ་དུ་མར་བསྒྲུབས་པའི་བསོད་ནམས་དང་ཡེ་ཤེས་ཡང་དག་པར་འགྲུབ་པ༡༡། ཆོས་ཐམས་ཅད་ལ་ཅིར་ཡང་རྣམ་པར་མི་རྟོག་པར་དམི༷གས་པ༷༡༢། ལམ་ལ་ཆོས་བཟོད་སོགས་ནི། ཤེར་ཕྱིན་དང་ཐབས་མཁས་སོགས་ཀྱིས་སེམས་ཅན་སྨིན་པའི་རིམ་གྱིས་འཚང་རྒྱ་བར་འགྱུར་བའི་ལམ་གྱི་སེམས་ཀྱི་ཆོས་དབྱིངས་དེ་བྱང་སེམས་ཀྱི་ལམ་གྱི་རྟེ༷ན་བཅས་པ༡༣། སྨོན་ལམ་དང་ཡེ་ཤེས་ལ་སོགས་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་རྒྱུའི་ཚོགས་པ་མཐ༷འ་ད༷ག་ཚང་བ༡༤། ཐེག་ཆེན་དགེ་བའི་བཤེས་གཉེན་གྱི་ཐབས་མཁས་ཀྱིས་སྲིད་ཞི་ལས་ཡོ༷ངས་སུ་འཛི༷ན་པ༡༥། དོན་དམ་པར་ཆོས་ཐམས་ཅད་ངོ་བོ་ཉིད་མེད་པས་ཆགས་ཤིང་མངོན་པར་ཞེན་པ་མེད་ཅིང་སྦྱིན་སོགས་ལ་འཁོར་གསུམ་གྱི་རོ༷་མྱ༷ང་བ་མེ༷ད་པའི་རྟོགས་པ༡༦་སྟེ། དེ་ལྟར་བཅུ་དྲུག་གི་བདག་ཉིད་ཅེས་བྱ་བ་ནི་གོ་རིམ་བཞིན་དུ་སྡུག་བསྔལ་ལ་སོགས་པའི་བདེན་པ་བཞིའི་ཡུལ་ཅན་གྱི་ཤེས་བཟོད་སྐད་ཅིག་མ་བཅུ་དྲུག་རྣམས་ཀྱི་ཁྱད་པར་གྱི་ཆོས་ཡིན་པས་དེས་ཁྱད་པར་དུ་བྱས་པའི་ཤེས་བཟོད་བཅུ་དྲུག་རིམ་བཞིན་ཤེས་པར་བྱ་ཞེས་ཉ་ཊཱིཀ་ལས་གསུངས་སོ། །ཁྱད་པར་གྱི་ཆོས་གང་གིས་བྱང་ཆུབ་སེམས་དཔའི་ལམ་ནི་གཞན་ཉན་རང་དག་གི་ལམ་ལས་ཆོས་བཅུ་དྲུག་གིས་ཁྱད་པར་དུ་འཕགས་པས་ཉན་རང་ལས་ཁྱད་པར་ཆེ་བའི་ལམ་ཡིན་ནོ། །འདིར་ཐེག་ཆེན་གྱི་མཐོང་ལམ་ཁྱད་འཕགས་སུ་བསྟན་པས་སྒོམ་ལམ་ཁྱད་འཕགས་སུ་དོན་གྱིས་གོ་བ་ཡིན་པར་མདོ་ལུགས་མ་ལས་གསུངས་སོ། །