གསུམ་པ་མཐའ་རགས་ཙམ་དཔྱད་པ།

གསུམ་པ་མཐའ་རགས་ཙམ་དཔྱད་པ་ལ།

མདོ་ལུགས་མ་ལས། གཉིས་པ་འབྲས་བུའི་མཁྱེན་པ་གསུམ་དེ་ཐོབ་བྱེད་ཀྱི་ལམ་ཁྱད་པར་ཅན་གྱི་ཁྱད་པར་གྱི་མཚན་ཉིད་བཤད་པ་ལ། ཞེས་པའི་འབྲས་བུའི་མཁྱེན་གསུམ་དེ་གཞི་ཤེས་ཉན་རང་དང་ལམ་ཤེས་བྱང་སེམས་ཁོ་ནའི་རྒྱུད་ལ་འཇོག་པའི་ལུགས་ལ་གང་འཇོག་དཔྱད། ཡང་རྩ་བར། འཕགས་པ་ཀུན་སྡུད་མཁས་པ་ཡིས། །རིག་བྱ་ཐུན་མོང་མིན་ཤེས་ཉིད། །ཅེས་དང༌། མདོ་ལུགས་མ་ལས།བདེན་པ་བཞིའི་ཡུལ་ལ་སྤྱོད་པའི་ཡུལ་ཅན་གྱི་སྐད་ཅིག་མ་ནི་བཅུ་དྲུག་མདོ་ལས་བཤད་པ་དག་གིས་ཐེག་དམན་ཀྱིས་ལམ་ལས་ཁྱད་པར་དུ་བྱེད་པའི་ཆོས་ཀྱི་མཚན་ཉིད་དམ་རང་བཞིན་བཤད་པ་ཡིན་ནོ། །ཞེས་སོགས་ཀྱིས་ཁྱད་མཚན་བཅུ་དྲུག་གི་ཡུལ་ལ་ཆོས་ཉིད་ཀྱིས་ཁྱབ་པ་ཡོད་མེད་དཔྱད། ཡང་མདོ་ལུགས་མ་ལས། གྲུ་ཞིག་པ་ཤིང་དུམ་ལ་བརྟེན་པ་དང༌།བུམ་པ་སོ་བཏང་པའི་དཔེ་གཉིས་ཀྱིས་ཉན་རང་གི་ས་གཉིས་ལས་འདའ་བའི་སླད་དུ་ཤེར་ཕྱིན་ལ་ལྷག་པའི་དམིགས་པའི་ཁྱད་པར་དེ་བཞི་ནི་འགོག་པའི་བདེན་པའི་ཡུལ་ཅན་གྱི་སྐད་ཅིག་མ་བཞིའོ། །གྲུ་ལེགས་པར་བཅོས་པ་དང༌། མི་རྒད་པོ་སྐྱེས་བུ་གཉིས་ལ་རྟེན་པའི་གཉིས་ཀྱིས་ཤེར་ཕྱིན་དང་ཐབས་མཁས་པ་གཉིས་ཀྱིས་རྟེན་དང་བཅས་པས་ས་གཉིས་ལས་འདའ་བའི་དང༌། ཞེས་ཁྱད་མཚན་བཅུ་གཉིས་པ་དང་བཅུ་གསུམ་པ་གཉིས་ལ་དཔེ་གཉིས་གཉིས་གསུངས་ལ། དེ་གཉིས་ལ་དཔེ་རེ་རེ་ལས་ལྷག་ཉ་ཊཱིཀ་ལས་མ་གསུངས་ཏེ།དེ་ལས། ཆོས་ཐམས་ཅད་ལ་ཅིར་ཡང་རྣམ་པར་མི་རྟོག་པར་དམིགས་པ་སྟེ། གྲུ་ཞིག་པ་ཤིང་ལེབ་སོགས་འཛིན་ན་རྒྱ་མཚོ་ལས་ཐར་བའི་དཔེས། འཁོར་བའི་རྒྱ་མཚོ་ལས་རྒལ་བའི་དོན་གྱིས་གསུངས་སོ། །ཞེས་ཨཱརྱའོ། །བར་མ་དོར་བྱང་ཆུབ་ལས་ཉམས་པར་མི་འགྱུར་རོ། །ཞེས་སོགས་སོ། །ལམ་ལ་ཆོས་བཟོད་སོགས་ནི། ལམ་གྱི་རྟེན་བྱང་པ་སྟེ་ཤེར་ཕྱིན་དང་ཐབས་མཁས་སོགས་ཀྱིས་སེམས་ཅན་སྨིན་པའི་རིམ་གྱིས་འཚང་རྒྱ་བར་འགྱུར་བ་སྟེ་བུམ་པ་ལེགས་པར་ཚོས་པར་ཆུ་བླུགས་ཏེ་ཁྱིམ་དུ་སོང་ན་བར་མ་དོར་མི་འཇིག་པ་བཞིན་ཞེས་དག་ལྡན་ཏེ་རད་ཀིར་ཡང་ངོ༌། །ཞེས་སོགས་གསུངས་སོ། །ཁྱད་མཚན་འདི་མཁྱེན་གསུམ་གྱི་སྐབས་ལ་སོ་སོར་མ་བཤད་པའི་རྒྱུ་མཚན་གཞི་ཤེས་སོགས་ཐེག་དམན་ལས་ཁྱད་པར་མ་འཕགས་པའི་རྒྱུ་མཚན་གྱིས་ཡིན་ན་སྐབས་འདིའི་ཤེས་མཚན་ལ་གཞི་ཤེས་མཚན་ཉིད་པ་ཞིག་མེད་ལ་བཏགས་པ་བའི་དབང་དུ་བྱས་ན་ཁྱད་མཚན་དུ་གྱུར་པའི་གཞི་ཤེས་བཏགས་པ་བ་ཡོད་པས་ཤེས་མཚན་དང་རྒྱུ་མཚན་མཚུངས་པ་ཡིན་མིན་དཔྱད་པར་བྱའོ། །