དྲུག་པ་ཚོགས་ལམ་ཀྱི་ངོ་བོ་ཐར་པ་ཆ་མཐུན་བཤད་པ།

དྲུག་པ་ཚོགས་ལམ་ཀྱི་ངོ་བོ་ཐར་པ་ཆ་མཐུན་བཤད་པ་ལ།

མདོ་ལས། མཚན་མ་དང་བྲལ་བར་སྦྱིན་སོགས་སྦྱོང་ཞིང་སྒོམ་པ་ནི་ཐབས་མཁས་པའོ། །ཞེས་སོགས་ཀྱི་དོན་དང༌། རྩ་བར། མཚན་མེད་རབ་ཏུ་སྦྱིན་ལ་སོགས། །ཡང་དག་སྒྲུབ་ལ་མཁས་པ་ནི། །རྣམ་པ་ཐམས་ཅད་རྟོགས་འདི་ལ། །ཐར་པའི་ཆ་དང་མཐུན་པར་འདོད། །ཅེས་པའི་དོན་མདོ་ལུགས་མ་ལས། མཚ༷ན་མ་མེ༷ད་པའི་ར༷བ་ཏུ༷་སྦྱི༷ན་པ་དང༌། ཚུལ་ཁྲིམས་ལ༷་སོ༷གས་པ་ཡ༷ང་ད༷ག་པ་ཕྱིན་ཅི་མ་ལོག་པར་སྒྲུ༷བ་པའི་ཐབས་ལ༷་མཁ༷ས་པ༷་ཚོགས་ལམ་གྱི་ངོ་བོ་ནི༷།གཞི་ཤེར་ཕྱིན་ཆོས་ཀྱི་དབྱིངས་ཟབ་མོའི་རྣ༷མ་པ༷་བརྒྱ་དང་བདུན་ཅུ་རྩ་གསུམ་ཐ༷མས་ཅ༷ད་མངོན་སུམ་དུ་རྫོགས་པར་རྟོ༷གས་པའི་སྦྱོར་བ་སྟོན་པའི་སྐབས་འདི༷་ལ༷། ཐ༷ར་པ༷འི་ཆ༷་ད༷ང་མཐུ༷ན་པ༷ར་འདོ༷ད་ཅིང་བསྟན་ཏོ། །ཞེས་སོ། །དེའི་སྐབས་སུ་མདོའི་དངོས་བསྟན་གཙོ་བོའི་ཐར་ཆ་བཤད་པ་ཡིན་ལ། སྤྱིར་ཐར་བ་ཆ་མཐུན་བཤད་པ་ལ། སྤྱི་དོན་དང་མཐའ་རགས་ཙམ་དཔྱད་པ་གཉིས། དང་པོ་ལ་རྟེན་དང་བརྟེན་པ་གཉིས། དང་པོ་ལ་ལུས་རྟེན་དང་སེམས་རྟེན་གཉིས། དང་པོ་ནི།ལས་ཉོན་རྣམ་སྨིན་གསུམ་གྱི་སྒྲིབ་པ་ཅན་མ་གཏོགས་པའི་གླིང་གསུམ་གྱི་མི་ཁོ་ན་ལ་དང་པོར་སྐྱེ་ཞིང༌། སྐྱེས་ཟིན་འདོད་ལྷ་ལའང་ཡོད་པར་བྱེ་བྲག་ཏུ་སྨྲ་བ་འདོད་དོ། །མི་ཡི་ནང་ནས་འཕེན་པར་བྱེད། །ཅེས་གསུངས་སོ། །ཐེག་ཆེན་ལྟར་ན། སེམས་བསྐྱེད་སྐྱེར་རུང་གི་ལྷ་མི་དང་དུད་འགྲོ་སོགས་ལའང་དང་པོ་སྐྱེ་བ་ཡོད་དོ། ། གཉིས་པ་སེམས་རྟེན་ནི། ཐོས་བསམ་གཙོ་ཆེ་བས་འདོད་སེམས་ལ་གཙོ་ཆེར་བརྟེན་ཅིང༌། བསམ་གཏན་ས་དྲུག་ལ་བརྟེན་པའང་ཡོད་པར་འདོད་དེ། དེར་ཆོས་རྒྱུན་ཏིང་ངེ་འཛིན་འཐོབ་པ་ཡོད་པའི་ཕྱིར་རོ། །ཞེས་ཉ་ཊཱིཀ་ལས་སོ། །