གཉིས་པ་སོ་སོར་ཕྱེ་སྟེ་བཤད་པ།
གཉིས་པ་སོ་སོར་ཕྱེ་སྟེ་བཤད་པ་ལ།
སྦྱོར་ལམ་ཕྱིར་མི་ལྡོག་པ་དང༌། མཐོང་ལམ་ཕྱིར་མི་ལྡོག་པ་དང༌། སྒོམ་ལམ་གྱི་རང་བཞིན་བཤད་པ་དང་གསུམ། དང་པོ་ལ་མདོར་བསྟན་པ་དང༌། རྒྱས་པར་བཤད་པ་གཉིས་ལས། དང་བོ་ནི། རྩ་བར། གཟུགས་ལ་སོགས་ལས་ལྡོག་སོགས་རྟགས། །རྣམ་པ་ཉི་ཤུ་བརྗོད་པ་ཡིས། །ངེས་འབྱེད་ཡན་ལག་ལ་གནས་པའི། །ཕྱིར་མི་ལྡོག་པའི་མཚན་ཉིད་འདི། །ཞེས་པའི་དོན་མདོ་ལུགས་མ་ལས། གཟུ༷གས་ལ༷་སོ༷གས་པ་ལ༷ས་ལྡོ༷ག་པ་དང༌། ཐེ་ཚོམ་དང༌། མི་ཁོམ་པ་ཟད་པ་ལ་སོ༷གས་པའི་རྟ༷གས་རྣ༷མ་པ༷་ཉི༷་ཤུ༷་མདོ་ལས་བརྗོ༷ད་ཅིང་བསྟན་པ༷་ཡི༷ས། ངེ༷ས་འབྱེ༷ད་ཡ༷ན་ལ༷ག་ལ༷་གན༷ས་པ༷འི་བྱང་ཆུབ་སེམས་དཔའ་བླ་མེད་བྱང་ཆུབ་ལས་ཕྱི༷ར་མི༷་ལྡོ༷ག་པ༷འི་མཚ༷ན་ཉི༷ད་འདི༷་བསྟན་པ། ཞེས་གསུངས་སོ། ། གཉིས་པ་རྒྱས་པར་བཤད་པ་ནི། མདོ་ལས་གཟུགས་སོགས་ཕུང་པོ་དང་ཁམས་དང་སྐྱེ་མཆེད་དང་རྟེན་འབྲེལ་ལས་ལྡོག་པ་དེ་ནི་བྱང་ཆུབ་སེམས་དཔའི་ཕྱིར་མི་ལྡོག་པར་རིག་པར་བྱའོ། །ཞེས་སོགས་ཀྱི་དོན། རྩ་བར། གཟུགས་ལ་སོགས་ལས་ལྡོག་པ་དང༌། །ཐེ་ཚོམ་མི་དལ་ཟད་པ་དང༌། །བདག་ཉིད་དགེ་བ་ལ་གནས་ཤིང༌། །གཞན་དག་དེ་ལ་འགོད་པ་དང༌། །ཞེས་པ་ནས། རྟགས་ནི་ཉི་ཤུ་དེ་དག་གིས། །དྲོད་དང་རྩེ་མོ་བཟོད་བཅས་དང༌། །ཆོས་མཆོག་རྣམས་ལ་གནས་པ་ནི། །རྫོགས་པའི་བྱང་ཆུབ་ལས་མི་ལྡོག ། ཅེས་གསུངས་སོ། །མདོ་ལས། རྣམ་པ་དེ་དག་དང་རྟགས་དེ་དག་དང་མཚན་མ་དེ་དག་དང་ལྡན་པའི་བྱང་ཆེན་ནི་ཕྱིར་མི་ལྡོག་པར་རིག་པར་བྱའོ། །ཞེས་བྱང་ཆེན་ཙམ་ལས་ཚིག་ཟིན་ལ་མ་གསུངས་ཀྱང་རྗེ་བཙུན་བྱམས་པས་སྦྱོར་ལམ་ནས་སྒོམ་ལམ་བར་གསུངས་སོ། །དེའི་སྐབས་སུ་བསྟན་པའི་ཐེག་ཆེན་སྦྱོར་ལམ་ཕྱིར་མི་ལྡོག་པའི་རྟགས་ཉི་ཤུ་ཡོད་དེ། གཟུ༷གས་ལ༷་སོ༷གས་པ་ལ་དངོས་པོར་ཞེན་པ་ལས་ལྡོ༷ག་པ༷་༡ད༷ང༌། ཕྱི་རོལ་པའི་ལྟ་བ་ལ་བཟང་པོ་ཡིན་ནམ་སྙམ་པའི་ཐེ༷་ཚོ༷མ་༢དང༌། མི༷་ད༷ལ་བ་དམྱལ་བ་སོགས་མི་ཁོམ་པའི་འགྲོ་བར་སྐྱེ་བ་ཟ༷ད་པ༷་༣ད༷ང༌། བད༷ག་ཉི༷ད་དགེ༷་བ༷་བཅུ་ལ༷་གན༷ས་ཤི༷ང་གཞ༷ན་ད༷ག་དགེ་བ་དེ༷་ལ༷་འགོ༷ད་པ༷་ད༷ང་༤། གཞ༷ན་གྱི༷་དོན་ལ་རྟེ༷ན་པ་ཅ༷ན་གྱི་སྦྱི༷ན་སོ༷གས་སྤྱོད་པ་ད༷ང༌། གཤིས་ལུགས་ཟ༷བ་མོ༷འི་དོ༷ན་ལ༷འང་སོ༷མ་ཉི༷་མེ༷ད་པ་༦དང༌། བྱ༷མས་པའི་ལུ༷ས་ངག་ཡིད་གསུམ་དང་དེའི་ལས་དང་ལྡན་པ་༧དང༌། འདོད་པ་ལ་མོས་པ་དང༌། གནོད་སེམས་དང༌། གཉིད་རྨུགས་དང༌། རྒོད་འགྱོད་ཐེ་ཙོམ་གྱི་སྒྲི༷བ་པ༷་རྣ༷མ་པ༷་ལྔ༷་ད༷ང་མི༷་འགྲོ༷གས་པ་༨ད༷ང༌། བ༷ག་ལ༷་ཉ༷ལ་བ་ཀུ༷ན་འཇོ༷མས་ཤིང་ཐམས་ཅད་དུ་མེད་པ༷་༩ད༷ང༌། འགྲོ་འོང་ལ་སོགས་པ་ཐམས་ཅད་ཀྱི་ཚེ་དྲ༷ན་པ༷་ད༷ང་ཤེ༷ས་བཞི༷ན་གྱིས་ཟིན་པ་༡༠ད༷ང༌། གོ༷ས་ཚགས་ལ༷་སོ༷གས་པ་གཙ༷ང་སྦྲ་དང་ནད་ཉུང་ཞིང་དྲི་ང་བ་མེད་པས་གཙང་བ༷་༡༡ད༷ང༌། ལུ༷ས་ལ༷་སྲི༷ན་བུ༷འི་རིགས་སྟོང་ཕྲག་བརྒྱད་ཅུ་རྣ༷མས་མི༷་འབྱུ༷ང་བ་༡༢དང༌། །ལུས་ངག་སེམས་གསུམ་རྣམ་པར་དག་ཅིང་ཐེག་པ་འོག་མར་གྱ༷་གྱུ༷་མེ༷ད་པའི་སེ༷མས་༡༣དང༌། སྦྱ༷ངས་པའི་ཡོན་ཏན་བཅུ་གཉིས་ནི༷། དགོན་པ་དང༌། བསོད་སྙོམས་པ་དང༌། ཕྱག་དར་ཁྲོད་བ་དང༌། གདན་གཅིག་པ་དང༌། ཟས་ཕྱིས་མི་ལེན་པ་དང༌།དུར་ཁྲོད་པ་དང༌། བླ་གབ་མེད་པ་དང༌། ཤིང་དྲུང་པ་དང༌། ཙོག་བུ་པ་དང༌། གཞི་ཇི་བཞིན་པ་དང༌། ཆོས་གོས་གསུམ་པ་དང༌། ཕྱིང་བ་པ་རྣམས་དེ་དག་དང་དུ་ལེ༷ན་ཅིང་སྤྱོད་པ་༡༤ད༷ང༌། སེ༷ར་སྣ༷་ལ་སོགས་པ་ཕར་ཕྱིན་དྲུག་གི་མི་མཐུན་ཕྱོགས་ཀྱི་སེམས་མེ༷ད་པ་༡༥ད༷ང༌། ཆོས་དང་འཇིག་རྟེན་གྱི་བྱ་བ་ཐམས་ཅད་ཤེར་ཕྱིན་ལ་བརྟེན་ནས་ཆོ༷ས་ཉི༷ད་ཀྱི་ངང་ཚུལ་དང་ལྡ༷ན་པ༷ར་འགྲོ༷་ཞིང་སྦྱོར་བ་ཉི༷ད་༡༦ད༷ང༌། ལས་ཀྱི་དབང་གིས་ངན་འགྲོར་མི་སྐྱེ་ཡང་སེ༷མས་ཅ༷ན་གྱི་དོ༷ན་དུ་༷དམྱ༷ལ་བ་ཚོ༷ལ་བར་བྱེད་པ༡༧དང༌། བདུད་དང་བདུད་ཀྱི་སྤྲུལ་པས་ལམ་ལོག་པར་བཀྲི༷་བ༷ར་མི༷་བཏུ༷བ་པ་༡༨ད༷ང༌། ཐེག་ཆེན་གྱི་ལ༷མ་ལས་གཞ༷ན་དམན་པའི་ལམ་ཉེ༷་བ༷ར་སྟོ༷ན་པའི་བདུ༷ད་ཀྱི་སྤྲུལ་བ་དགེ་སློང་གི་ཆ་བྱད་ལ་སོགས་པ་ལ༷་བདུ༷ད་ཅེ༷ས་བྱ༷་བ༷ར་རྟོ༷གས་པ༷་༡༩ད༷ང༌། ས༷ངས་རྒྱ༷ས་དགྱེ༷ས་པ༷འི་སྤྱོ༷ད་པ༷་དེ་བཞིན་གཤེགས་པས་ཇི་སྐད་བསྟན་པ་ལྟར་སྤྱོད་ཅིང་སྦྱིན་སོགས་ལས་མི་ཉམས་པར་བདུད་ལས་ཐམས་ཅད་རིག་པ་༢༠སྟེ། དེ་ལྟར་བསྟན་པའི་རྟ༷གས་ནི༷་ཉི༷་ཤུ༷་པོ་དེ༷་ད༷ག་གང་རུང་ངམ་ཕལ་ཆེར་ཚང་པ་དག་གི༷ས་སྦྱོར་ལམ་དྲོ༷ད་ད༷ང་རྩེ༷་མོ༷་བཟོ༷ད་པ་དང་བཅ༷ས་པ་ད༷ང་ཆོ༷ས་མཆོ༷ག་རྣ༷མས་ལ༷་གན༷ས་པའི་བྱང་ཆུབ་སེམས་དཔའ་ནི༷་བླ་མེད་རྫོ༷གས་པ༷འི་བྱ༷ང་ཆུ༷བ་ལ༷ས་ཕྱིར་མི༷་ལྡོ༷ག་པར་སྒྲུབ་ཅིང་རྟོགས་པར་བྱ་ཞེས་མདོ་ལུགས་མ་ལས་གསུངས་སོ། །ཉ་ཊཱིཀ་ལས་ཐེག་ཆེན་སྦྱོར་ལམ་དྲོད་ཕྱིར་མི་ལྡོག་པའི་རྟགས་བཅུ་གཅིག རྩེ་མོར་དྲུག བཟོད་པ་གཉིས། ཆོས་མཆོག་ལ་གཅིག་སྟེ་སོ་སོར་སྦྱར་ནས་བཤད་པ་མི་འཐད་པར་ཐལ། མདོ་ལུགས་མ་ལས། ཁ་ཅིག་རྟགས་འདི་རྣམས་བགོས་ནས་དྲོད་སོགས་ལ་སོ་སོར་སྦྱོར་བ་ནི་ཡིད་ཆེས་པའི་ཤེས་བྱེད་མི་སྣང་ངོ༌། །ཞེས་གསུངས་པའི་ཕྱིར་ཟེར་ན་ཉ་ཊཱིཀ་ལས་སེང་བཟང་དང་མཐུན་ཙམ་བཤད་པ་ཡིན་པར་སྣང་ངོ། །ཐེག་ཆེན་སྦྱོར་ལམ་པ་ལ་གཟུགས་སོགས་བདེན་ཞེན་ལྡོག་པ་ཡོད་པར་ཐལ། རྩ་བར། གཟུགས་ལ་སོགས་ལས་ལྡོག་པ་དང༌། །ཞེས་གསུངས་པའི་ཕྱིར་ན་མ་ཁྱབ། ཁ་ཅིག་དེ་ནི་གཟུགས་སོགས་ལ་བདེན་ཞེན་མངོན་གྱུར་ལྡོག་པའི་དོན་ཡིན་ཏེ། ཉ་ཊཱིཀ་ལས། གཟུགས་སོགས་ལ་བདེན་ཞེན་མངོན་གྱུར་ལྡོག་པ་ལ་སོགས་པ་ཉི་ཤུ་བོ་དེ་རྟོགས་པ་སྟེ་ཐོབ་པའི་སྒོ་ནས་གནས་པས་སོ། །ཞེས་གསུངས་པའི་ཕྱིར་ན་མ་ཁྱབ་སྟེ། དེའི་རྒྱུད་ལ་གཟུགས་སོགས་ལ་བདེན་ཞེན་མངོན་གྱུར་གྱི་སྒོམ་སྤང་ཡོད་པའི་ཕྱིར། མཐོང་སྤང་ལ་བྱས་ན་ཐེག་ཆེན་སྦྱོར་ལམ་དྲོད་སོགས་བཞིས་རིམ་བཞིན་མཐོང་སྤང་རྟོག་པ་བཞི་མངོན་གྱུར་ཉམས་པར་བྱེད་དགོས་ལ། གཟུགས་སོགས་བདེན་ཞེན་ཞེས་པའི་གཟུགས་སོགས་ལ་གཟུགས་ནས་རྣམ་མཁྱེན་བར་ཡོད་པ་བཤད་བྱ་རྩ་བའི་མདོ་ལས། བྱང་ཆུབ་སེམས་དཔའ་ཆེན་པོ་གང་གཟུགས་ལས་ཕྱིར་ལོག་པ་དང༌། ནས། རྫོགས་བྱང་ལས་ཕྱིར་མི་ལྡོག་པ་དེ་ནི་ཕྱིར་མི་ལྡོག་པར་རིག་པར་བྱའོ། །ཞེས་གསུངས་པས་གྲུབ། དེ་ལྟ་ན་དེ་དག་ལ་ཞེན་པའི་རྟོག་པ་མཐོང་སྤང་རྟོག་པ་བཞི་ཡོད་པར་གྲུབ། དེ་ཡོད་ན་ཐེག་ཆེན་སྦྱོར་ལམ་དྲོད་ཀྱིས་དེ་བཞི་མངོན་གྱུར་པ་ལྡོག་པར་བྱེད་མི་ནུས་པའི་ཕྱིར་ཟེར་ན་དཔྱད་དོ། །ཡང་རྩ་བར། ཐེ་ཚོམ་མི་དལ་ཟད་པ་དང༌། །ཞེས་པའི་ཐེ་ཚོམ་དེ་མདོ་ལུགས་མ་ལས། ཕྱི་རོལ་པའི་ལྟ་བ་ལ་བཟང་པོ་ཡིན་ནམ་སྙམ་པའི་ཐེ་ཚོམ། ཞེས་བཤད། ཉ་ཊཱིཀ་ལས། དཀོན་མཆོག་གསུམ་ཀྱི་ཡོན་ཏན་ལ་ཤེས་ནས་མི་ཕྱེད་པའི་དད་པ་ཐོབ་པས། སྐྱབས་གནས་ཐེ་ཚོམ་ཟད། ཅེས་པས་ཐེ་ཚོམ་མངོན་གྱུར་པ་ཟད་པ་ལམ་མ་ཞུགས་དང་ཚོགས་ལམ་ནས་ཡོད་མེད་དཔྱད། རྟགས་འདི་དག་གང་རུང་ངམ་ཕལ་ཆེར་ཚངས་པས་ནི་དྲོད་སོགས་གང་ལ་གནས་ཀྱང་ཕྱིར་མི་ལྡོག་ཏུ་བསྒྲུབ་ནུས་ཏེ། མདོ་ལས། རྟགས་རེ་རེ་སྨོས་པའི་རྗེས་སུ་ཡང་རྣམ་པ་དང་ཚུལ་དང་མཚན་མ་དེ་དག་ལྡན་པའི་བྱང་ཆུབ་སེམས་དཔའ་ཕྱིར་མི་ལྡོག་ཅེས་པ་རེ་རེ་བྱུང་བའི་ཕྱིར་རོ། །