གཉིས་པ་ཇི་ལྟར་བསྒོམ་པའི་ཚུལ།
གཉིས་པ་ཇི་ལྟར་བསྒོམ་པའི་ཚུལ་ནི།
མདོ་ལས། ཤེར་ཕྱིན་ལ་ཇི་སྐད་བསྟན་པ་བཞིན་དུ་ཤེར་ཕྱིན་དང་ལྡན་པའི་གནས་ཟབ་མོ་འདི་དག་སེམས་པ་དང་འཇལ་བ་དང་རྟོགས་པར་བྱེད་ན་གྲངས་མེད་ཚད་མེད་དཔག་ཏུ་མེད་པའི་དགེ་བ་འཛིན་ཞེས་སོགས་ཀྱི་དོན། རྩ་བར། ངེས་འབྱེད་ཡན་ལག་དང་མཐོང་བའི། །ལམ་དང་བསྒོམ་པའི་ལམ་ཉིད་ལ། །ཡང་དང་ཡང་དུ་སེམས་པ་དང༌། །འཇལ་དང་ངེས་རྟོག་བསྒོམ་པའི་ལམ། །ཞེས་སོ། །དེའི་དོན་མདོ་ལུགས་མ་ལས། ངེས་འབྱེད་ཡན་ལག་གི་གནས་སྐབས་ཉིད་ལ་ཟབ་མོ་དེ་དག་ལ་ཡང་དང་ཡང་དུ་སེམས་པ་དང༌། མཐོང་བའི་ལམ་གྱི་གནས་སྐབས་སུ་ཟབ་མོ་དེ་དག་ཉིད་ལ་ཡང་དང་ཡང་དུ་འཇལ་བ་དང༌། སྒོམ་པའི་ལམ་གྱི་གནས་སྐབས་སུ་ཟབ་མོ་དེ་དག་ཉིད་ལ་ཡང་དང་ཡང་དུ་ངེས་པར་རྟོག་པའི་བྱེད་པ་ནི། གནས་སྐབས་དེ་དག་ཏུ་ཚུལ་ཇི་ལྟར་བསྒོམ་ན། དེ་ལྟར་སྒོམ་པའི་ལམ་ཡིན་ནོ། །ཞེས་གསུངས་སོ། །དེ་ལ་སྐབས་འདིའི་སེམས་པ་འཇལ་བ་ངེས་རྟོག་གསུམ་སྦྱོར་མཐོང་སྒོམ་གསུམ་སྦྱར་བ་མི་འཐད་པར་ཐལ། ཉ་ཊཱིཀ་ལས། ཐོས་བསམ་སྒོམ་པ་ལས་བྱུང་བའི་ཤེས་རབ་དག་གམ་ཏིང་ངེ་འཛིན་གྱི་སྦྱོར་དངོས་རྗེས་ལས་བྱུང་བའི་ཤེས་རབ་ཀྱིས་གོ་རིམ་བཞིན་དུ་ཡང་དང་ཡང་དུ་སེམས་པ་དང༌། ཡང་ཡང་འཇལ་བ་དང་ཡང་ཡང་ངེས་པར་རྟོག་པའི་ཟག་མེད་ཡེ་ཤེས་ཡིན་པས་སོ། །འདིས་ས་དང་པོ་ཡན་གྱི་ཐོས་བསམ་ཡང་སྒོམ་ལམ་དུ་བསྟན་པས་སྒོམ་ལམ་བསྒོམས་པས་མ་ཁྱབ་པས་སོ། ཞེས་དང༌། ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །