ལྔ་པ་སྒོམ་ལམ་གྱི་བྱེད་ལས་བཤད་པ།
ལྔ་པ་སྒོམ་ལམ་གྱི་བྱེད་ལས་བཤད་པ་ལ།
དྲི་བ་ཞུས་པ་དང་ལན་གཉིས་ལས། དང་པོ་མདོ་ལས། བརྗོད་དུ་མེད་པའི་སྟོང་ཉིད་དེ་ལ་འཕེལ་འགྲིབ་མེད་ན། དེས་སྦྱིན་སོགས་འཕེལ་འགྲིབ་མེད་པར་འགྱུར་རོ། །དེ་ལྟ་ན་རྣམ་མཁྱེན་མེད་པར་འགྱུར་རོ། །རྣམ་མཁྱེན་མེད་ན་སུ་ཞིག་འཚང་རྒྱ་བར་འགྱུར་ཞེས་ཞུས་པའི་དོན་ནི། རྩ་བར། དངོས་པོ་བརྗོད་དུ་མེད་པ་ལ། །ཉམས་པ་དང་ནི་འཕེལ་མི་རུང༌། །སྒོམ་ཞེས་བྱ་བའི་ལམ་གྱིས་ནི། །ཅི་ཞིག་ཉམས་ཤིང་ཅི་ཞིག་འཐོབ། །ཅེས་སོ། །སྟོང་ཉིད་ཟབ་མོ་དངོས་པོར་བརྗོད་དུ་མེད་ཅིང་མ་གྲུབ་པ་ལ་ཆོས་ནག་པོའི་དབང་གིས་ཉམས་པ་དང་ནི་དཀར་པོའི་དབང་གིས་འཕེལ་བ་ཡང་མི་རུང་བས། དེས་གཟུང་བའི་སྦྱིན་སོགས་ཡང་འཕེལ་འགྲིབ་མེད་ན། འོ་ན་སྟོང་ཉིད་དེ་སྒོམ་པ་ཞེས་བྱ་བའི་ལམ་གྱིས་ནི་སྤང་བྱ་ཇི་ཞིག་ཉམས་ཤིང་གཉེན་པོ་ཇི་ཞིག་འཕེལ་བའི་སྒོ་ནས་བླ་མེད་བྱང་ཆུབ་ཅི་ཞིག་འཐོབ་ཅེས་ཞུས་པ་དང༌། གཉིས་པ་དེའི་ལན་ནི་མདོ་ལས། ཐབས་མཁས་པའི་བྱང་ཆུབ་སེམས་དཔའ་སྦྱིན་སོགས་འཕེལ་ལོ་སྙམ་དུ་མི་སེམས་ཤིང་མིང་ཙམ་མོ་སྙམ་དུ་སྤྱོད་པའི་ཚེ་སེམས་བསྐྱེད་པ་དེ་དང་དགེ་བ་དེ་དག་བླ་ན་མེད་པའི་བྱང་ཆུབ་ཇི་ལྟ་བ་བཞིན་དུ་བསྔོའོ། །ཞེས་པའི་དོན་ནི། རྩ་བར། བྱང་ཆུབ་ཇི་ལྟ་དེ་བཞིན་དུ། །འདིས་ནི་འདོད་པའི་དོན་སྒྲུབ་བྱེད། །བྱང་ཆུབ་དེ་བཞིན་ཉིད་མཚན་ཉིད། །དེ་ཡང་དེ་ཡི་མཚན་ཉིད་བཞེད། །ཅེས་སོ། །དེའི་དོན་མདོ་ལུགས་མ་ལས། སྐབས་འདིའི་བསྔོ་བ་ནི། སྒོམ་ལམ་གྱི་ངོ་བོ་ཡིན་པའི་ཕྱིར། ཐབས་མཁས་པས་རྨི་ལམ་ལྟ་བུའི་དགེ་བ་དེ་དག་བྱང་ཆུབ་ཇི་ལྟ་བ་དེ་བཞིན་དུ་བསྔོ་བའི་སྒོམ་ལམ་དེས་ནི་འདོད་པའི་དོན་གྱི་མཆོག་ཏུ་བླ་མེད་བྱང་ཆུབ་བསྒྲུབ་ཅིང་ཐོབ་པར་བྱེད་པ་ཡིན་ནོ། །ཞེས་གསུངས་པའི་ཕྱིར་རོ། །མདོར་ན་ཆོས་དབྱིངས་དང་སྒོམ་ལམ་གང་ལ་ཡང་དོན་དམ་པར་སྤང་བྱ་ཉམས་པ་དང་གཉེན་པོ་འཕེལ་བ་མེད་ཀྱང་ཐ་སྙད་དུ་སྒོམ་ལམ་གྱིས་སྤང་བྱ་ཉམས་པར་བྱེད་པ་དང་གཉེན་པོ་སྒོམ་ལམ་འཕེལ་བ་འཐད་དོ། །ཉ་ཊཱིཀ་ཏུ་རྩ་བར། སེམས་ནི་སྔ་མའི་བྱང་ཆུབ་པར། །ཞེས་པ་ནས། རྣམ་པ་བརྒྱད། །ཅེས་པ་བྱེད་པའི་ས་བཅད་འདིར་བསྡུས་ནས་གོང་དུ་བྱང་ཆུབ་ཐ་སྙད་དུ་ཐོབ་ཅེས་ལན་གསུངས་པ་ལ་ཐ་སྙད་དུ་བྱང་ཆུབ་ཐོབ་པ་མི་རིགས་པའི་རྩོད་ལན་ལ་སྦྱར་ནས་བཤད་པས་དཔྱད་པར་བྱའོ། །