བཅུ་གཅིག་པ་ཐབས་ལ་མཁས་པའི་ངོ་བོ་ཡོངས་སུ་འདྲེས་པ་ཤེས་པའི་ཡེ་ཤེས་བཤད་པ།

བཅུ་གཅིག་པ་ཐབས་ལ་མཁས་པའི་ངོ་བོ་ཡོངས་སུ་འདྲེས་པ་ཤེས་པའི་ཡེ་ཤེས་བཤད་པ་ལ།

ཉི་ཁྲིའི་ལེའུ་ཞེ་བཞི་པ་ལས། བྱང་ཆུབ་སེམས་དཔའ་རྣམ་ཐར་གསུམ་ལ་སོགས་པ་སངས་རྒྱས་ཀྱི་ཆོས་རྣམས་ལ་ཇི་ལྟར་འདྲེས་པ་བགྱི་ཞིང་སྒོམ་པར་བགྱི་ཞེས་སོགས་ཞུ་བ་ལན་དང་བཅས་པའི་དོན། རྩ་བར། ཡུལ་དང་སྦྱོར་བ་ཅན་འདི་ནི། །དགྲ་རྣམས་ལས་ནི་འདས་པ་དང༌། །མི་གནས་ཇི་བཞིན་ཤུགས་དང་ནི། །ཐུན་མོང་མ་ཡིན་མཚན་ཉིད་དང༌། །མ་ཆགས་པ་དང་མི་དམིགས་དང༌། །མཚན་མ་སྨོན་ལམ་ཟད་པ་དང༌། །དེ་ཡི་རྟགས་དང་ཚད་མེད་པ། །ཐབས་ལ་མཁས་པ་རྣམ་པ་བཅུ། །ཞེས་སོ། །དེའི་དོན་མདོ་ལུགས་མ་ལས། གཞི་ཤེར་ཕྱིན་ཆོས་དབྱིངས་ཀྱི་ཡུ༷ལ་མཁྱེན་པ་གསུམ་ད༷ང༌། ཤེར་ཕྱིན་ཟབ་མོའི་རྣལ་འབྱོར་གཉིས་སྦྱོ༷ར་ཞིང་ཉམས་སུ་ལེན་པ༷་ཅ༷ན་གྱི་ཐབས་ལ་མཁས་པ་དང་བཅས་པ་འདི༷་ནི༷། སྐྱེས་བུ་དཔའ་པོ་དགྲ༷་རྣ༷མས་བཅོམ་ནས་གཉེན་བཤེས་དང་བཅས་པ་འབྲོག་དགོན་པ་ནས་ཐར་པའི་དཔེས། སེམས་ཅན་མ་བཏང་བའི་སྙིང་རྗེས་ཞི་བའི་དགྲ་དང༌། སྟོང་ཉིད་མ་བཏང་བའི་ཤེས་རབ་ཀྱིས་སྲིད་པའི་དགྲ༷་རྣ༷མས་ལ༷ས་ནི༷་འད༷ས་པའི་ཐབས་ལ་མཁས་པ༷་༡ད༷ང༌། བྱ་བར་སྣང་ལ་རྒྱུུ་བ་གནས་མེད་ཀྱང༌། གནས་པའི་དཔེས། སྟོང་ཉིད་ལ་སྤྱོད་ཀྱང་དེ་ལ་མི༷་གན༷ས་ཤིང་འདྲིས་པར་བྱེད་པའི་ཐབས་ལ་མཁས་པ་༢དང༌། འཕོང་ལ་ཤིན་ཏུ་གོམས་པའི་ཇི༷་ལྟར་འདོད་པ་བཞི༷ན་འཕེན་པའི་དཔེས་ཇི་སྲིད་དགེ་བ་རྣམས་བླ་མེད་བྱང་ཆུབ་ཏུ་མ་སྨིན་པ་དེ་སྲིད་ཡང་དག་པའི་མཐའ་མངོན་དུ་མི་བྱེད་ཅིང་སྨིན་པ་ན་མངོན་སུམ་དུ་བྱེད་པ་ཐབས་མཁས་པ་ཇི་ལྟ་བ་བཞིན་དུ་གོམས་པའི་ཤུ༷གས་ཀྱི་ཐབས་ལ་མཁས་པ་༣ད༷ང༌། ཤེས་རབ་ཀྱིས་ཡང་དག་པའི་མཐའ་ལ་སློབ་ཀྱང༌། བར་མ་དོར་ཞི་བར་མི་ལྟུང་བའི་རྒྱུ་སྙིང་རྗེས་སེམས་ཅན་མ་བཏང་བ་ནི་ཉན་རང་དང་ཐུ༷ན་མོ༷ང་མ༷་ཡི༷ན་པའི་མཚ༷ན་ཉི༷ད་ཀྱི་ཐབས་ལ་མཁས་པ་༤ད༷ང༌། གང་ཟག་གི་བདག་དང་ཕྱིན་ཅི་ལོག་བཞི་ལ་མ༷་ཆ༷གས་པའི་ཐབས་ལ་མཁས་པ༷་༥ད༷ང༌། སེམས་ཅན་ལ་སོགས་པ་གང་ཟག་གི་བདག་དང་གཟུགས་ལ་སོགས་པ་ཆོས་ཀྱི་བདག་མི༷་དམི༷གས་པའི་ཐབས་ལ་མཁས་པ་༦ད༷ང༌། སྐྱེས་པ་བུད་མེད་དང་ཕུང་པོ་ལ་སོགས་པའི་མཚ༷ན་མ༷་ཟད་པའི་ཐབས་ལ་མཁས་པ་༧དང༌། ཁམས་གསུམ་དུ་བརྒྱ་བྱིན་ལ་སོགས་པ་ལ་དགའ་བའི་སྨོ༷ན་ལ༷མ་ཟ༷ད་པའི་ཐབས་ལ་མཁས་པ༷་༨ད༷ང༌། ཐབས་ལ་མཁས་པའི་བྱང་ཆུབ་སེམས་དཔའ་དེ༷འི༷་སངས་རྒྱས་ཀྱིས་བླ་ན་མེད་པའི་བྱང་ཆུབ་ཏུ་ལུང་བསྟན་པའི་རྟ༷གས་རྟོགས་པ་སྟོང་ཉིད་ལ་འདྲེས་པར་བྱེད་པ་སྟོན་པའི་ཐབས་ལ་མཁས་པ་༩ད༷ང༌། ལུང་བསྟན་པ་དང་ལུང་མ་བསྟན་པ་དང་ཕྱིར་མི་ལྡོག་པའི་རྣམ་གྲངས་ཚ༷ད་མེ༷ད་པ་ཤེས་པའི་ཐབས་ལ་མཁས་པ་༡༠སྟེ། དེ་ལྟར་ཐ༷བས་ལ༷་མཁ༷ས་པ༷་རྣ༷མ་པ༷་བཅུ༷་ནི་རྣམ་རྫོགས་སྦྱོར་བའི་རང་བཞིན་འདྲེས་པའི་ཤེས་པའི་ཡེ་ཤེས་སྲིད་ཞི་མཉམ་པ་ཉིད་ཡིན་ནོ། །ཞེས་བཤད་དོ། །དེས་ན་མཚན་ཉིད་ནི། སྐབས་འདིའི་ཡུལ་མངོན་སུམ་དུ་བྱ་བ་ལ་དུས་དུས་མིན་ཤེས་པས་རང་འབྲས་སངས་རྒྱས་ཀྱི་འཕྲིན་ལས་ཕུན་ཚོགས་ཐོབ་ཕྱིར་དུ་སྒོམ་པའི་དག་སའི་སྦྱོར་བ་དེ། འདིར་བསྟན་ཐབས་མཁས་སྦྱོར་བའི་མཚན་ཉིད་ཡིན་ཏེ། ཉ་ཊཱིཀ་ལས། སེམས་ཅན་ཡོངས་སུ་སྨིན་པའི་ཡན་ལག་ཐབས་མཁས་སྦྱོར་གྱི་མཚན་ཉིད། རྣམ་སྦྱོར་གང་ཞིག ཡུལ་བཅུ་མངོན་སུམ་དུ་བྱ་བ་ལ་དུས་དུས་མིན་ཤེས་པས་སངས་རྒྱས་ཀྱི་འཕྲིན་ལས་ཕུན་ཚོགས་ཀྱི་རྒྱུར་གྱུར་པ་དབྱེ་ན་བཅུའོ། །ཞེས་གསུངས་པའི་ཕྱིར་རོ། ། སྦྱོར་བ་འདི་གསུམ་ལ་ཉ་ཊཱིཀ་ལས་ཆོས་སྐུའི་རྒྱུ་སྲིད་ཞི་མཉམ་ཉིད། གཟུགས་སྐུའི་རྒྱུ་ཞིང་་དག་པ། འཕྲིན་ལས་ཀྱི་རྒྱུ་ཐབས་མཁས་སྦྱོར་ཤེར་འབྱུང་ངོ༌། །ཞེས་གསུངས་ལ། གཞུང་ལ་ལར་ཕྱི་མ་གཉིས་ལ་རིམ་བཞིན་ལོངས་སྐུའི་རྒྱུ་ཞིང་དག་སྦྱོར་བ་སྤྲུལ་སྐུའི་རྒྱུ་ཐབས་མཁས་སྦྱོར་བ་ཞེས་བཤད་དོ། །ས་མཚམས་དག་ས་ལ་སྦྱར་དགོས་པ་འདིར་བསྟན་སྲིད་ཞི་མཉམ་ཉིད་ཀྱི་ས་མཚམས་ཀྱིས་གྲུབ་པའོ། །འོན་ཀྱང་ཉ་ཊཱིཀ་ལས་མཚན་ཉིད་བཞག་པ་དེ་དང༌། མདོ་ལུགས་མ་ལས། ད་ནི་ཐོག་མར་སྒོམ་པ་ནས་ཅི་སྲིད་བསྒོམ་པ་མཐར་ཐུག་གི་པར་དུ་སྦྱོར་བ་འདིའི་ལས་ལ་ཁྱབ་བྱེད་དུ་འཇུག་པར་བྱང་ཆུབ་སེམས་དཔའི་ཐབས་ལ་མཁས་པའི་ངོ་བོ་ཡོངས་སུ་འདྲེས་པ་ཤེས་པའི་ཡེ་ཤེས་བཤད་པར་བྱའོ། །ཞེས་སོགས་ཀྱི་སྒོ་ནས་ཅུང་ཟད་དཔྱད་རྒྱུར་སྣང་ངོ༌། །སྐབས་འདིའི་དུས་དང་དུས་མིན་ཤེས་ཞེས་པའི་དུས་དང་དུས་མིན་ནི། མདོ་ལུགས་མ་ལས། དུས་དང་དུས་མ་ཡིན་པ་ཤེས་པའི་ཐབས་ལ་མཁས་པ་ནི། སྟོང་པ་ཉིད་ལ་གནས་བཞིན་དུ་བླ་མེད་བྱང་ཆུབ་ཀྱི་ཚོགས་གཉིས་མ་སྨིན་གྱི་བར་དུ་སྟོང་ཉིད་དམ་པ་དེ་མངོན་སུམ་དུ་མི་བྱེད་པའི་ཚུལ། རྗེས་ཐོབ་ཀྱི་སེམས་ཀྱིས་རྣམ་ཀུན་མཆོག་ལྡན་གྱིས་སྟོང་པ་ཉིད་ལ་འདི་ནི་འདྲེས་པར་བྱ་བའི་དུས་ཡིན་གྱི། མངོན་སུམ་དུ་བྱ་བའི་དུས་མ་ཡིན་ནོ། །ཞེས་སོ་སོར་རྟོག་དང༌། སེམས་དམིགས་པ་ལ་འདོགས་ཏེ་དེས་བར་མ་དོར་སངས་རྒྱས་ཀྱི་ཆོས་ལས་མི་ཉམས་ལ། ཟག་པ་ཟད་པ་ཡང་མངོན་དུ་མི་བྱེད་དོ། །ཞེས་སོགས་དང༌། ཉ་ཊཱིཀ་ལས། དེ་མངོན་སུམ་དུ་བྱ་བའི་དུས་སངས་རྒྱས་པ་ན་དང་དུས་མ་ཡིན་པ་སློབ་པའི་སྐབས་ཏེ་དེ་ལྟར་ཤེས་པའི་ས་བཅུ་བའི་སྦྱོར་བ་ནི་ཐབས་ལ་མཁས་པའི་སྦྱོར་བ་ཡིན་ནོ། །དུས་དུས་མིན་ནི་དེ་ལྟར་མདོ་དོན་ནོ། །ཞེས་གསུངས་པ་ལྟར་རོ། །སྦྱོར་བའི་ཡུལ་བཅུ་ནི། ཉ་ཊཱིཀ་ལས། སྟོང་ཉིད་མཚན་མེད་སྨོན་མེད་གསུམ་བྱང་ཕྱོགས་སོ་བདུན་པོ་ཚན་པ་བདུན་དུ་བགྲང་པས་བཅུ་བོ་དེ་འདིའི་ཡུལ་ཡིན་ནོ། །ཞེས་གསུངས་ལ། དེ་ལྟར་གནོད་འཇོམས་ལས་གསུངས་ཏེ། ཉ་ཊཱིཀ་མཆན་ལས། ཨཱརྱ་དག་ལྡན་རད་ཀིར་ཏེ། གནོད་འཇོམས་ཡང་སྟེ་རྒྱས་འབྲིང་གི་མདོ་དངོས་སོ། །ཞེས་དང༌། གནོད་འཇོམས་ལས། གནས་བརྟན་རབ་འབྱོར་གྱིས་རྣམ་པར་ཐར་བའི་སྒོ་གསུམ་བསྒོམ་པ་དང༌།བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་བསྒོམ་པ་ལ་ཇི་ལྟར་བྱ་བ་ཉན་ཐོས་དང་རང་སངས་རྒྱས་རྣམས་ཀྱིས་རྣམ་པར་གྲོལ་བ་སྤངས་ཏེ་བསྒོམ་ཞུས་པའོ། །ཞེས་སོ། །དེ་མི་རིགས་པར་ཐལ། མདོ་ལུགས་མར་ཉི་ཁྲིའི་མདོ་བཀོད་པ་ལས། ཉི་ཁྲིའི་ལེའུ་ཞེ་བཞི་པར། བྱང་ཆུབ་སེམས་དཔའ་རྣམ་ཐར་གསུམ་ལ་སོགས་པ་སངས་རྒྱས་ཀྱི་ཆོས་རྣམས་ལ་ཇི་ལྟར་འདྲེས་པ་བགྱི་ཞིང་སྒོམ་པར་བགྱི། ཞེས་དང༌། ཉ་ཊཱིཀ་མཆན་ལས། འབུམ་ཊཱིཀ་ཏུ། སྟོང་ཉིད་སྨོས་ཤིང་བཤད་ནས་མ་འདྲེས་པ་བཅོ་བརྒྱད་ཀྱི་བར་དུ་སྦྱོར་རོ། །ཞེས་མ་འདྲེས་པའི་ཆོས་བཅོ་བརྒྱད་བར་གསུངས་པའི་ཕྱིར་ཟེར་ན་བརྟག་པར་བྱའོ། །ཡང་རྩ་བར། དགྲ་རྣམས་ལས་ནི་འདས་པ་དང༌། །ཞེས་པའི་དོན་མདོ་ལུགས་མ་ལས། སེམས་ཅན་མ་བཏང་བའི་སྙིང་རྗེས་ཞི་བའི་དགྲ་དང༌། སྟོང་ཉིད་མ་བཏང་བའི་ཤེས་རབ་ཀྱིས་སྲིད་པའི་དགྲ༷་རྣ༷མས་ལ༷ས་ནི༷་འད༷ས་པའི་ཐབས་ལ་མཁས་པ༷་ད༷ང༌། ཞེས་གསུངས་སོ། །དེ་མི་རིགས་པར་ཐལ། ཉ་ཊཱིཀ་ལས། སྐྱེ་བ་གཅིག་གིས་ཐོགས་པའི་བྱང་པའི་སྦྱོར་བ་ཆོས་ཅན། བར་དུ་གཅོད་པའི་དགྲ་རྣམས་ལས་འདས་པའི་སྦྱོར་བ་ཡིན་ཏེ། ལྷ་ལ་སོགས་པའི་བདུད་གཞན་གསུམ་ལས་འདའ་བྱེད་ཀྱི་དགེ་བ་ལ་བར་དུ་གཅོད་པ་ལྷའི་བུའི་བདུད། །སྲོག་འགགས་པ་འཆི་བདག་གི་བདུད་དེ་ཚེ་ལ་བར་གཅོད་དོ། །སྡུག་བསྔལ་གྱི་ཕུང་བོ་འདི་ཕུང་བོའི་བདུད་དེ་ལྷག་མེད་ཀྱི་བར་གཅོད་དོ། །ཁམས་གསུམ་གྱི་ཉོན་མོངས་ནི་ཉོན་མོངས་པའི་བདུད་དེ། ལྷག་བཅས་ཀྱི་མྱང་འདས་ལ་བར་གཅོད་དོ། །བདུད་བཞི་དང་ས་གཉིས་ལས་འདས་པས་སོ། །ཞེས་གསུངས་པའི་ཕྱིར་ན་མ་ཁྱབ་སྟེ། སྲིད་ཞིའི་དགྲ་ལས་ལོགས་སུ་བདུད་བཞི་མེད་པའི་ཕྱིར་རོ། །དེ་ལྟར་སྦྱོར་བ་དང་པོའི་སྐབས་སུ་འདའ་བྱའི་བདུད་བཞི་ལ་ཕྲ་རགས་གཉིས་གཉིས་ཡོད་པར་སྣང་སྟེ། ལས་ཀྱིས་འཕངས་པའི་ཟག་བཅས་ཉེར་ལེན་གྱི་ཕུང་པོ་ནི་ཕུང་པོའི་བདུད་རགས་པ་དང༌། མ་རིག་བག་ཆགས་ཀྱི་ས་དང་ཟག་མེད་ཀྱི་ལས་ཀྱིས་བླངས་པའི་ཡིད་ལུས་ནི་ཕུང་པོའི་བདུད་ཕྲ་མོ་དང༌། ཉོན་མོངས་པ་ས་བོན་དང་བཅས་པ་ནི་ཉོན་མོངས་པའི་བདུད་རགས་པ་དང༌། ཉོན་མོངས་པའི་བག་ཆགས་ཕྲ་མོ་ཤེས་སྒྲིབ་ཏུ་གྱུར་པ་དེ་ནི་ཉོན་མོངས་པའི་བདུད་ཕྲ་མོ་དང༌། ལས་ཉོན་གྱིས་རང་དབང་མེད་པར་སྲོག་དབང་འགག་པའི་ཆ་ནི་འཆི་བདག་གི་བདུད་རགས་པ་དང༌། དག་ས་བ་དང་ལྷག་མེད་དགྲ་བཅོམ་པས་ལུས་དང་སྐྱེ་བ་གཞན་ལེན་པའི་ཚེ་མ་རིག་བག་ཆགས་ཀྱི་ས་དང་སྐྱེ་བ་དེ་ལ་ཡིད་གཏད་ཙམ་གྱི་རྩོལ་བའི་སེམས་པའི་དབང་གིས་སྔ་མའི་ལུས་ཀྱི་རྣམ་པ་བཏང་བའི་ཆ་ནི་འཆི་བདག་གི་བདུད་ཕྲ་མོ་དང་བསམ་གྱིས་མི་ཁྱབ་པའི་འཆི་འཕོའོ། །ཕུང་པོ་དང་ཉོན་མོངས་དང་འཆི་བདག་གི་བདུད་རགས་པ་གསུམ་ལས་འདའ་བར་བྱེད་པ་ལ་བར་དུ་གཅོད་པའི་འདོད་ལྷ་དང་དེའི་བྱེད་པ་ནི་ལྷའི་བུའི་བདུད་རགས་པ་དང༌། དེ་གསུམ་ཕྲ་མོ་ལས་འདའ་བར་བྱེད་པ་ལ་བར་དུ་གཅོད་པའི་འདོད་ལྷ་དང་དེའི་བྱེད་པ་གཉིས་ནི་ལྷའི་བུའི་བདུད་ཕྲ་མོ་ཡིན་ནོ། །བདུད་བཞི་ལ་ཕྲ་རགས་གཉིས་གཉིས་འཇོག་པ་མི་རིགས་པར་ཐལ། གོང་བཀོད་པའི་ཉ་ཊཱིཀ་མཆན་དང༌། གླེང་གཞིའི་ཟག་པ་ཐམས་ཅད་ཟད་པ་ཞེས་པའི་སྐབས་སུ། གནོད་འཇོམས་༦ལས། འདོད་པའི་ཟག་པ་སྤངས་པས་ལྷའི་བུའི་བདུད་ཆོམས་སོ། །སྲིད་པའི་ཟག་པ་སྤངས་པས་འཆི་བའི་བདུད་ཆོམས་སོ། །མ་རིག་པའི་ཟག་པ་སྤངས་པས་ཉོན་མོངས་པའི་བདུད་ཆོམས་སོ། །ལྟ་བའི་ཟག་པ་སྤངས་པས་ཕུང་པོའི་བདུད་ཆོམས་ཏེ། ཞེས་དང༌། ཉན་ས་ལས།དེ་ལ་ཕུང་པོའི་བདུད་ནི། ཉེ་བར་ལེན་པའི་ཕུང་པོའོ། །ཉོན་མོངས་པའི་བདུད་ནི། ཁམས་གསུམ་ན་སྤྱོད་པའི་ཉོན་མོངས་པ་རྣམས་སོ། །འཆི་བའི་བདུད་ནི་སེམས་ཅན་དེ་དང་དེ་དག་སེམས་ཅན་གྱི་རིས་དེ་དག་དེ་དག་ནས་འཆི་བའི་དུས་བྱེད་པ་གང་ཡིན་པའོ། །ལྷའི་བུའི་བདུད་ནི་ཕུང་པོ་ཉོན་མོངས་པ་དང་འཆི་བདག་གི་བདུད་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་ཕྱོགས་ལ་རབ་ཏུ་བརྩོན་པ་དེ་ལ་བར་ཆད་བྱ་བ་དང་རྣམ་པར་གཡེང་བར་བྱ་བའི་ཕྱིར་འདོད་པའི་ཁམས་སུ་སྐྱེས་པའི་ལྷའི་བུ་དབང་ཕྱུག་ཐོབ་པ་དག་ཉེ་བར་འོང་བ་གང་ཡིན་པ་སྟེ་དེ་ནི་ལྷའི་བུའི་བདུད་ཅེས་བྱའོ། །ཞེས་པ་རྣམས་སུ་བདུད་བཞི་ཕྲ་བ་ཞིག་མ་གསུངས་པའི་ཕྱིར་ཟེར་ན་མ་ཁྱབ་སྟེ། འདུལ་བ་ལུང་ལས། ཁྱོད་ཀྱི་བྱང་ཆུབ་པ་དང་དུས་མཉམ་དུ་བདུད་བཞི་བཅོམ་པ་ལེགས་སམ། ཞེས་དང༌། ཉ་ཊཱིཀ་ལས། བདུད་བཞི་བཅོམ་པ་དང་ལྡན་པས་ཐོགས་མེད་ཡེ་ཤེས་ཞབས་སམ། ཉོན་མོངས་ལས་སྐྱེ་བའི་ཉོན་མོངས་གསུམ་མམ་སྒྲིབ་གཉིས་བཅོམ་པ་དང་ལྡན་པས་བཅོམ་ལྡན་ཏེ། རྒྱུད་རྡོ་རྗེ་རྩེ་མོ་ལས།ཉོན་མོངས་ལས་དང་དེ་བཞིན་སྐྱེ། །ཉོན་མོངས་ཤེས་བྱའི་སྒྲིབ་དེ་བཞིན། །གང་ཡང་མི་མཐུན་ཕྱོགས་ཆོས་བཅོམ། །དེ་འདིར་བཅོམ་ལྡན་འདས་སུ་བཤད། །ཅེས་སོ། །ཞེས་དང༌།རྒྱུད་བླ་མ་ལས། འཆི་མེད་ཞི་བའི་གནས་ཐོབ་ལ། །འཆི་བདུད་རྒྱུ་བ་མེད་པའི་ཕྱིར། །ཞེས་དང༌། རྒྱུད་བླ་ས་འགྲེལ་ལས། དེ་བཞིན་གཤེགས་པ་རྣམས་ཀྱི་སྐུ་མངོན་སུམ་དུ་གྱུར་པ་སྟེ། གཉེན་པོ་མཐར་ཕྱིན་པའི་སྒོ་ནས་ཀྱང་མི་འགྱུར་ཞིང་རྟག་པ་ཡིན་ཏེ། ལས་དང་ཉོན་མོངས་པས་འཆི་འཕོ་བ་མེད་ཅིང་སྐྱེ་འགག་མ་ལུས་པ་ཉེ་བར་ཞི་བའི་མྱ་ངན་ལས་འདས་པ་མཆོག་ལ་གནས་པའི་གོ་འཕང་ཐོབ་པ་འཆི་བདག་གི་བདུད་ནམ་ཡང་རྒྱུ་བ་མེད་པའི་ཕྱིར་རོ། །ཞེས་གསུངས་པའི་ཕྱིར་རོ། །བདུད་བཞི་འཇོག་པའི་རྒྱུ་མཚན་ནི། ཉན་ས་ལས། དེ་ལ་གང་དུ་འཆི་བ་དང་གང་གིས་འཆི་བ་དང་འཆི་བ་དེ་གང་ཡིན་པ་དང་བར་ཆད་ཀྱི་དངོས་པོ་གང་གིས་འཆི་བ་ལས་ཡང་དག་པར་མི་འདའ་བར་བྱེད་པ་དེ་དག་གི་དབང་དུ་བྱས་ནས་བདུད་བཞི་རྣམ་པར་བཞག་པ་ཡིན་ཏེ། ཞེས་གསུངས་སོ། །རྩ་བར། ཚད་མེད་པ། །ཞེས་པའི་དོན་མདོ་ལུགས་མ་ལས། གོང་དུ་བཤད་ཟིན་ལྟར་ཡིན་ལ། ཉ་ཊཱིཀ་ལས། ཡུལ་ཚད་མེད་པའི་ཐབས་མཁས་སྦྱོར་ཏེ། རིག་པའི་ཡུལ་ཏེ་གནས་ལྔ་སྒྲ། གཏན་ཚིགས། བཟོ། གསོ་བ། ནང་རིག་སྟེ་རིག་གནས་ཆེ་བ་ལྔ། བསྙན་ངག བཟློས་གར། ཚིག་རྒྱན། མངོན་བརྗོད། སྒྲ་རིག་སྟེ་རིག་གནས་ཆུང་བ་ལྔའོ། །ཐམས་ཅད་ཤེས་པའི་ས་བཅུ་བའི་སྦྱོར་བ་ཡིན་པ་ཉིད་ཀྱིས་སོ། །ཞེས་གསུངས་སོ། །དངོས་པོ་བརྒྱད་ལས་རྣམ་ཀུན་མངོན་རྫོགས་རྟོགས་པའི་དངོས་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པ་ཡིན་ནོ། །གསུམ་པ་སྐབས་བསྡུ་བ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་སྐབས་བཞི་བའི་སྤྱི་དོན་དང་མཐའ་རགས་ཙམ་དཔྱད་པའི་སྒོ་ནས་རྣམ་ཀུན་གྱི་དངོས་པོ་བཤད་ཟིན་ཏོ། །སྨྲས་པ། མཁྱེན་གསུམ་རྣ༷མ་པ༷་ཤེས་བྱའི་སྐར་ཚོགས་ཀུན། །མ་འདྲེས་མཁྱེན་པའི་ཀུན་གསལ་མཁའ་དབྱིངས་ལ། །སེམས་དཔའི་སྦྱོ༷༷ར་བ༷འི་ཆུ་འཛིན་ཕུང་པོ་འཁྲིགས། །རྨད་བྱུང་ཡོ༷ན་ཏ༷ན་རྣམ་མང་འཇའ་ཚོན་བཀྲ །ཉེས་པའི་སྐྱོ༷ན་ཀྱི་དྲི་མ་ནག་ནོག་བྲལ། །མཚ༷ན་ཉི༷ད་བཞི་ཡི་ཆུ་གཏེར་ཕྲེང་བས་མཛེས། །ཐ༷ར་ད༷ང་ངེ༷ས་འབྱེ༷ད་ཆ༷་མཐུ༷ན་སྐྱ་རངས་ལས། །ཕྱི༷ར་མི༷་ལྡོ༷ག་པ༷འི་འོད་སྟོང་མངོན་པར་འཚེར། །སྲི༷ད་ཞི༷་མཉ༷མ་ཉི༷ད་ལ་སོགས་སྦྱོར་གསུམ་གྱི། །ལྷ་ཡི་ཁང་བཟང་ངོ་མཚར་སྟོང་གིས་བརྒྱན། །ཞེས་བར་སྐབས་ཀྱི་ཚིགས་བཅད་དུ་སྨྲས་པའོ། །གཉིས་པ་དབང་ཐོབ་པའི་ཚུལ་གྱིས་བསྒོམ་པ་རྩེ་མོར་ཕྱིན་པའི་དངོས་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པ་ལ། སྐབས་ཀྱི་མཚམས་སྦྱར། རྩེ་སྦྱོར་གྱི་དངོས་པོས་རྒྱས་པར་བཤད་པ། སྐབས་བསྡུ་བའོ། །དང་པོ་ནི། རྣམ་པ་ཐམས་ཅད་མངོན་རྫོགས་རྟོགས་པ་ཐོབ་པའི་བྱང་སེམས་ལ་བསྡུས་བསྒོམ་རབ་ཏུ་གྱུར་པའི་རྩེ་སྦྱོར་གྱི་རྟོགས་པ་འབྱུང་བས་རྩེ་མོའི་མངོན་རྟོགས་འཆད་དོ། །ཚུལ་གང་གིས་ན། རྟགས་དང་ལོག་སྒྲུབ་ལ་སོགས་པ་བསྙད་པ་སྔོན་དུ་འགྲོ་བའི་སྒོ་ནས་སོ། །དེའི་དགོས་པ་ཅི་ཞེ་ན། རྩེ་སྦྱོར་གོ་སླ་བར་བྱ་བའི་ཕྱིར་དུའོ། །ཞེས་ཉ་ཊཱིཀ་ལས་སོ། །ཆོས་ཉིད་ལ་སྒོམ་བྱུང་ཐོབ་པའི་བྱང་སེམས་ཀྱི་རྒྱུད་ཀྱི་མཁྱེན་གསུམ་བསྡུས་སྒོམ་རབ་ཏུ་གྱུར་པའི་རིགས་གནས་ཀྱི་མངོན་རྟོགས་དེ། རྩེ་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས། གསུམ་བསྡུས་བསྒོམ་རབ་ཏུ་གྱུར་པའི་སྦྱོར་བ་སྟེ། དེ་རབ་ཅེས་དང༌། རྩེ་མོའི་མངོན་རྟོགས་ནི། ཐམས་ཅད་མཁྱེན་པ་ཉིད་གསུམ་གྱི་རབ་ཀྱི་གནས་སྐབས་སོ་ཞེས་འདིར་བཤད་དོ། །ཞེས་གསུངས་པའི་ཕྱིར་རོ། ། ས་མཚམས་ནི། ཐེག་ཆེན་སྦྱོར་ལམ་དྲོད་ནས་རྒྱུན་མཐའི་བར་ན་ཡོད་དེ། ཉ་ཊཱིཀ་ལས། བདུན་ཡོད་ལ་ས་མཚམས་དྲོད་ནས་རྒྱུན་མཐའི་བར་ན་ཡོད་དེ་འོག་ཏུ་འཆད་དོ། །ཞེས་གསུངས་སོ། །སྔོན་མེད་ལེགས་བཤད་ལས། ཚོགས་ལམ་ན་རྣམ་རྫོགས་ཡོད་ཀྱི་རྩེ་མོ་མེད་དོ། །བྱང་ཞིང་འཕེལ་བ་སྦྱོར་ལམ་དྲོད་རྩེ་གཉིས་ནས་ཡོད་ཀྱང༌། རྣམ་པ་མང་པོས་རྣམ་པ་མང་པོ་ལ་རྒྱས་ཐེབས་པ་དེ་ན་མེད་པས། རྩེ་སྦྱོར་ཡོད་ཀྱང་མཐར་གྱིས་པ་མེད་དོ། །བཟོད་པ་ནས་ནི་རྒྱས་ཐེབས་ཚུལ་དེ་ཡོད་པའི་ཕྱིར་མཐར་གྱིས་པ་ཡང་ཡོད་དེ། དེ་ནས་བརྩམས་ཏེ་གསུམ་ཀ་སྤེལ་མར་འབྱུང་ངོ༌། །ཞེས་གསུངས་པའི་ཕྱིར་རོ། །