བཞི་བ་རྒྱུན་ཆགས་པའི་རྟེན་འབྲེལ་བཤད་པ།

བཞི་བ་རྒྱུན་ཆགས་པའི་རྟེན་འབྲེལ་བཤད་པ་ལ།

ཉ་ཊཱིཀ་ལྟར་མཚན་ཉིད། ཡན་ལག་རྣམ་པར་དབྱེ་བ། ཡན་ལག་མདོར་བསྡུ་བ། སྒྲ་དོན། ས་མཚུངས། གོ་རིམ། ལུགས་མཐུན་ལུགས་མི་མཐུན་བཤད་པ་དང་བདུན། དང་པོ་ནི། རྐྱེན་གསུམ་ལས་བྱུང་བ་དེ།འདུས་བྱས་རྟེན་འབྲེལ་གྱི་རང་བཞིན་ནམ་མཚན་ཉིད་ཡིན་ཏེ། རྣམ་པར་འབྱེད་པའི་མདོ་ལས། འདི་ཡོད་པས་འདི་འབྱུང༌། འདི་སྐྱེས་པའི་ཕྱིར་འདི་སྐྱེ་བ་སྟེ། འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད་ཅེས་སོགས་དང༌། ཀུན་བཏུས་ལས། མཚན་ཉིད་ཀྱིས་ཇི་ལྟ་བུ་ཞེ་ན། གཡོ་བ་མེད་པའི་རྐྱེན་ལས་བྱུང་བ་དང༌། མི་རྟག་པའི་རྐྱེན་ལས་བྱུང་བ་དང༌། ནུས་པའི་རྐྱེན་ལས་བྱུང་བའི་ཕྱིར་རོ། །ཞེས་དང༌། ཉ་ཊཱིཀ་ལས། རིགས་མི་མཐུན་ལས་འབྱེད་པའི་མཚན་ཉིད་སྔར་ལྟར་ཏེ། འདིར་ནི་རང་བཞིན་ལ་མཚན་ཉིད་དུ་བརྗོད་པའོ། །དེ་ཡང་རྐྱེན་གསུམ་ལས་བྱུང་བ་སྟེ། ཞེས་གསུངས་པའི་ཕྱིར་རོ། །རྐྱེན་གསུམ་ལས་དང་པོ་ནི། འབྲས་བུ་འབྱུང་བར་བྱ་བའི་ཕྱིར་དུ་བློ་སྔོན་དུ་བཏང་བའི་རྐྱེན་མེད་ཀྱང༌། རྐྱེན་ཡོད་ན་འབྲས་བུ་འབྱུང་བ་སྟེ། དེས་དབང་ཕྱུག་སོགས་ཀྱིས་བློ་སྔོན་དུ་བཏང་ནས་བྱས་པ་སེལ། གཉིས་པ་ནི། རྐྱེན་རྟག་པ་ལས་འབྲས་བུ་མི་འབྱུང་གི སྔར་མེད་དུ་བྱུང་བའི་མི་རྟག་པའི་རྐྱེན་ལས་བྱུང་བ་སྟེ། དེས་གཙོ་བོ་རྟག་པ་སོགས་ཀུན་གྱི་རྒྱུ་ཡིན་པ་བསལ་ལོ། །གསུམ་པ་ནི། གཡོ་བ་མེད་ཅིང་མི་རྟག་ཀྱང་རྐྱེན་གང་རུང་ལས་འབྲས་བུ་ཐམས་ཅད་མི་འབྱུང་གི འབྲས་བུ་དེ་བསྐྱེད་ནུས་པའི་རྐྱེན་མ་རིག་པའི་རྐྱེན་གྱིས་འདུ་བྱེད་འབྱུང་བ་ལྟ་བུ་སྟེ། དེས་ཐམས་ཅད་ཐམས་ཅད་ཀྱི་རྒྱུར་འཛིན་པའི་རྟོག་པ་སེལ་ལོ། །