གཉིས་པ་འདུ་བྱེད་ཀྱི་ལས་བཤད་པ།

གཉིས་པ་འདུ་བྱེད་ཀྱི་ལས་བཤད་པ་ལ།

སྤྱིར་ལས་ནི་རང་གི་རིགས་འདྲ་ཕྱི་མ་དང་བདེ་སྡུག་ཅི་རིགས་བསྐྱེད་ནུས་ཀྱི་བྱ་བའི་བདག་ཉིད་དུ་གྱུར་པའི་སྐྱེས་བུའི་ཤེས་རྒྱུད་ཀྱིས་བསྡུས་པའི་ཆོས་དེ། ལས་ཀྱི་ངོ་བོ་ཡིན་ལ། དེ་ལ་དབྱེ་ན་དགེ་མི་དགེ་ལུང་མ་བསྟན་གསུམ་མོ། །ཡང་ལས་ལ་དབྱེ་ན། སེམས་པའི་ལས་བསམ་པའི་ལས་གཉིས། དེ་གཉིས་ངོས་འཛིན་ཀུན་བཏུས་ས་འགྲེལ་ལས། མདོ་ལས། དགེ་སློང་དག་སེམས་པ་ལས་སུ་ང་སྨྲ་སྟེ། བསམ་པ་ཡང་ངོ་ཞེས་གསུངས་པ་ལྟར་སེམས་པ་ཡིད་ཁོ་ནའི་ལས་དང༌། དེས་བསྐྱེད་པའི་བསམ་པ་ལུས་དང་ངག་དང་ཡིད་གསུམ་ཀའི་ལས་ཏེ། གཉིས་པོ་དེས་ལས་ཀྱི་ཀུན་འབྱུང་གི་མཚན་ཉིད་དམ་རང་བཞིན་ཐམས་ཅད་མདོར་བསྡུས་པའོ། །མཛོད་དུ། ལས་ལས་འཇིག་རྟེན་སྣ་ཚོགས་སྐྱེས། །དེ་ནི་སེམས་པ་དང་དེས་བྱས། །སེམས་པ་ཡིད་ཀྱི་ལས་ཡིན་ཏེ། །དེས་བསྐྱེད་ངག་དང་ལུས་ཀྱི་ལས། །ཞེས་ཀྱང་བཤད་ལ། ཡེ་ཤེས་བཤེས་གཉེན་ནི། འདི་དང་འདིས་འགྲོ་བར་བྱེད་དོ་ཞེས། ཡང་དག་པར་འཛིན་པའི་སེམས་པ་དང༌། བྱ་མི་བྱ་དཔྱོད་པ་ལ་ཞུགས་པ། ངེས་པའི་སེམས་པ་དང༌། ངེས་ནས་བྱ་བའི་ཚེ། ལུས་ངག་བསྐུལ་བའི་སེམས་པ་གསུམ་ལས། དང་པོ་གཉིས་སེམས་པའི་ལས་དང༌། ཕྱི་མ་བསམ་པའི་ལས་སོ་ཞེས་གསུངས་ཏེ། ལས་སྒྲུབ་པའི་རིགས་དང་ཡང་མཐུན་པའོ། །ཞེས་གསུངས་སོ། །ཡང་དབྱེ་ན་འཕེན་བྱེད་དང་རྫོགས་བྱེད་ཀྱི་ལས་གཉིས། དེ་གཉིས་ཀྱི་ཁྱད་པར་ནི། ཀུན་བཏུས་ས་འགྲེལ་ལས། འཕེན་རྫོགས་ཀྱི་ཁྱད་པར་ངོས་བཟུང་བ་ནི། དགེ་བ་ཟག་པ་དང་བཅས་པ་དང་མི་དགེ་བའི་ལས་ཀྱིས་ནི་རིམ་པ་ལྟར་དགེ་བས་བདེ་འགྲོ་ཁོ་ན་དང་མི་དགེ་བས་ངན་འགྲོ་ཁོ་ནར་སྐྱེ་བ་འཕེན་པར་བྱེད་པའི་ལས་ཞེས་བྱ་བ་དང༌། དགེ་མི་དགེ་གཉིས་ཀས་བདེ་འགྲོ་ངན་འགྲོ་གཉིས་ཀར་འབྲས་བུ་ཡོངས་སུ་རྫོགས་པར་བྱེད་པའི་ལས་སུ་རིག་པར་བྱའོ། །དེ་ལ་འཕེན་པ་ནི་ལས་གང་གིས་གང་དུ་སྐྱེ་བ་དེའི་རྣམ་པར་སྨིན་པའི་ཕུང་པོ་སོ་སོར་མ་འདྲེས་པར་འཕེན་པ་སྟེ། སྐྱེ་རིས་བཟང་ངན་ཐ་དད་པ་ལྟ་བུའོ། །ཡོངས་སུ་རྫོགས་པར་བྱེད་པ་ན་ལས་གང་གིས་གནས་གང་དུ་སྐྱེས་པ་དེ་ན་ཡང་འབྲས་བུ་འདོད་པ། ཚེ་རིང་དེ་བཞིན་ནད་མེད་དང༌། །གཟུགས་དང་སྐལ་བ་བཟང་དང་རིགས། །ནོར་དང་ཤེས་རབ་དག་དང་བདུན། །ཡོན་ཏན་མདོ་སྡེ་རྣམས་ལས་གསུངས། །ཞེས་པ་རྣམས་མྱོང་བ་དང༌། མི་འདོད་པ་དེ་ལས་ལྡོག་པའི་ཚེ་ཐུང་བ་དང་ནད་མང་བ་ལ་སོགས་པ་མྱོང་བ་སྟེ། ཚོན་བཟང་ངན་གྱིས་རྫོགས་པར་བྱས་པ་ལྟ་བུའོ། །དེ་དག་ལའང་མུ་བཞི་སྟེ། འཕེན་བྱེད་དགེ་བས་བདེ་འགྲོ་ལ་འཕངས་ཀྱང་རྫོགས་བྱེད་མི་དགེ་བས་རྫོགས་པས་སྡུག་བསྔལ་མྱོང་ལ་མི་དབུལ་བོ་ལྟ་བུ་དང༌། དེ་ལས་ལྡོག་པ་མི་དགེ་བས་འཕངས་ཀྱང་དགེ་བས་རྫོགས་པ་ཀླུ་འབྱོར་ལྡན་ལྟ་བུ་དང༌། འཕེན་རྫོགས་གཉིས་ཀ་མི་དགེ་བས་བྱས་པ་དམྱལ་བ་ལྟ་བུ་དང༌།གཉི་ག་དགེ་བས་བྱས་པ་འཁོར་ལོས་བསྒྱུར་བ་ལྟ་བུའོ། །ཞེས་གསུངས་སོ། །ཡང་དབྱེ་ན་བསོད་ནམས་དང་བསོད་ནམས་མ་ཡིན་པ་དང་མི་གཡོ་བའི་ལས་དང་གསུམ། དེ་གསུམ་གྱི་ངོ་བོ་ནི། ཀུན་བཏུས་ས་འགྲེལ་ལས། ལས་ཀྱི་ངོ་བོ་ངོས་བཟུང་བ་ནི། བསོད་ནམས་ཀྱི་ལས་དང༌། བསོད་ནམས་མ་ཡིན་པའི་ལས་དང༌། མི་གཡོ་བའི་ལས་ཞེས་མདོ་ལས་གང་འབྱུང་བ་ལ་བསོད་ནམས་གང་ཞེ་ན་ལས་གང་འདོད་པ་དང་རབ་ཏུ་ལྡན་པའི་ལྷ་དང་མི་འགྲུབ་པའི་དགེ་བའོ། །བསོད་ནམས་མ་ཡིན་པ་གང་ཞེ་ན། ལས་གང་ངན་སོང་གསུམ་འགྲུབ་པའི་མི་དགེ་བའོ། །མི་གཡོ་བའི་ལས་གང་ཞེ་ན། གང་གཟུགས་དང་གཟུགས་མེད་པ་དང་རབ་ཏུ་ལྡན་པའི་ལྷ་རྣམས་འགྲུབ་པའི་དགེ་བ་སྟེ། རང་ས་ལས་གཞན་དུ་རྣམ་སྨིན་མི་གཡོ་ཞིང༌། མཉམ་པར་གཞག་པའི་ས་བ་ཡིན་པ་དང༌། ས་འོག་མའི་སྐྱོན་གྱིས་མི་གཡོ་བའོ། །དེ་དག་ཀྱང་བསོད་ནམས་ཡིན་ཡང་ཁྱད་པར་དུ་བཟང་བས་མི་གཡོ་བ་ཞེས་བརྗོད་པའོ། །ཞེས་སོ། །ཡང་དབྱེ་ན་མཐོང་ཆོས་དང་སྐྱེས་ནས་དང་ལན་གྲངས་གཞན་ལ་མྱོང་འགྱུར་གྱི་ལས་གསུམ། དེ་གསུམ་གྱི་ངོས་འཛིན་ནི། ཀུན་བཏུས་ས་འགྲེལ་ལས། མཐོང་བའི་ཆོས་ལ་མྱོང་བའི་ལས་གང་ཞེ་ན། ལས་གང་ཚེ་དེ་ཉིད་ལ་བྱས་པས་མཐོང་བའི་ཆོས་ཚེ་དེ་ཉིད་ལ་རྣམ་པར་སྨིན་པའི་འབྲས་བུ་རྣམ་པར་སྨིན་ཞིང་མྱོང་བར་འགྱུར་བ་སྟེ། ཞེས་དང༌། གཉིས་པ་སྐྱེས་ནས་མྱོང་བ་འགྱུར་བའི་ལས་གང་ཞེ་ན། ལས་གང་བྱས་པའི་སྐྱེ་བ་དེ་ལ་ཚེ་ཕྱི་མ་སྐྱེ་བ་གཞན་གྱིས་བར་མ་ཆད་པ་ཉིད་ལ་རྣམ་པར་སྨིན་པའི་འབྲས་བུ་རྣམ་པར་སྨིན་ཞིང་མྱོང་བར་འགྱུར་བ་སྟེ། མཚན་གཞི་དཔེར་བརྗོད་པ་འདི་ལྟ་སྟེ་མཚམས་མེད་པ་ལྔའི་ལས་རྣམས་སོ། །ཞེས་དང༌། གསུམ་པ་ལན་གྲངས་གཞན་ལ་མྱོང་བར་འགྱུར་བའི་ལས་གང་ཞེ་ན། ལས་གང་བྱས་པའི་ཚེ་ཕྱི་མ་དེ་ལས་གཉིས་པ་ཕན་ཆད་དུ་རྣམ་པར་སྨིན་པའི་འབྲས་བུ་རྣམ་པར་སྨིན་ཞིང་མྱོང་བར་འགྱུར་བ་སྟེ། ལས་བརྒྱ་བར། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་པ་ལྟ་བུའོ། །ཞེས་གསུངས་སོ། །དེ་གསུམ་ཡང་བསགས་པའི་ཚེ་ལ་ལྟོས་ནས་རྣམ་སྨིན་གྱི་མགོ་རྩོམ་པའི་དབང་དུ་བྱས་པ་ཡིན་ཏེ། ཀུན་བཏུས་ས་འགྲེལ་ལས། དུས་གསུམ་པོ་དེ་དག་ཀྱང་མགོ་རྩོམ་པའི་དབང་དུ་བྱས་ནས་གཞག་པ་ཡིན་གྱི། དེ་ཙམ་གྱིས་རྫོགས་པའི་ངེས་པ་ནི་མེད་དེ། རང་རྒྱལ་ལྔ་བརྒྱ་བསད་པས་དམྱལ་བ་ཀྱི་ཧུད་ཅེས་བྱ་བ་མཚམས་མེད་ཀྱི་དམྱལ་བར་ཡང་དང་ཡང་དུ་སྐྱེས་པར་བཤད་པའི་ཕྱིར་རོ། །ཞེས་གསུངས་སོ། །ཡང་ལས་ལ་ངོ་བོ་རྣམ་སྨིན་གྱི་དབྱེ་ན་གསུམ་ཡོད་དེ། ཀུན་བཏུས་ས་འགྲེལ་ལས། ཟག་བཅས་ཀྱི་ལས་ནི་གསུམ་ལས། ངོ་བོ་ནག་ལ་རྣམ་པར་སྨིན་པ་ནག་པའི་ལས་གང་ཞེ་ན། གང་མི་དགེ་བའི་ཞེས་པ་སྟེ། ཉོན་མོངས་པ་ཅན་ཡིན་པ་དང༌། འབྲས་བུ་རྣམ་སྨིན་མི་འདོད་པ་མྱོང་བའི་ཕྱིར་རོ། །དེ་ལས་ལྡོག་པ་དཀར་ལ་རྣམ་པར་སྨིན་པ་དཀར་བའི་ལས་གང་ཞེ་ན། ཁམས་གསུམ་པའི་དགེ་བ་ཟག་བཅས་ཏེ། ཉོན་མོངས་པ་ཅན་མ་ཡིན་ཞིང་རྣམ་སྨིན་འདོད་པ་མྱོང་བའོ། །ལས་དཀར་ནག་ཏུ་འདྲེས་པར་གྱུར་ལ་རྣམ་པར་སྨིན་པའང་དཀར་ནག་ཏུ་འདྲེས་པར་གྱུར་པ་གང་ཞེ་ན། ལས་གང་འདོད་པའི་ཁམས་དང་རབ་ཏུ་ལྡན་པའི་དགེ་སྡིག་འདྲེས་མ་ལས་རྣམ་སྨིན་བདེ་སྡུག་འདྲེས་མ་མྱོང་བ་སྟེ། དེ་ཉིད་ལ་ངོ་བོ་གཅིག་ལས་འགལ་ཡང་བསམ་སྦྱོར་གཉིས་ལ་ལྟོས་ནས་འཇོག་པས། གཞན་སླུ་བའི་ཆེད་དུ་སྦྱིན་པ་ལ་སོགས་པ་སྤྱོད་པ་བསམ་པས་ནག་ལ་སྦྱོར་བས་དཀར་བ་དང༌། བུ་དང་སློབ་མ་ལ་སོགས་པ་ལུས་ངག་གིས་ཐོ་འཚམ་ཡང་མི་ཕན་པ་ལས་ཟློག་པར་འདོད་པ་སྦྱོར་བས་ནག་ལ་བསམ་པས་དཀར་བ་དག་ལ་འདྲེས་མ་ཞེས་བྱའོ། །ཞེས་གསུངས་སོ། །ཡང་ལས་གཅིག་གིས་སྐྱེ་བ་དུ་མ་འཕེན་པ་ཡོད་དེ། ཀུན་བཏུས་ས་འགྲེལ་ལས། ལས་གཅིག་གིས་ཚེ་རབས་དུ་མའི་ས་བོན་གསོས་ནས་ལུས་སྐྱེ་བ་དུ་མ་འཕེན་པའི་ལས་ཀྱང་ཡོད་དེ། མཆོད་རྟེན་ལ་ཕྱག་གུས་པ་གཅིག་ཕུལ་བས་ལུས་ཀྱིས་ནོན་པའི་རྡུལ་ཕྲ་རབ་ཀྱི་གྲངས་དང་མཉམ་པའི་འཁོར་ལོས་བསྒྱུར་བ་ཐོབ་པ་ལྟ་བུའོ། །ལས་དུ་མས་ལུས་སྐྱེ་བ་གཅིག་འཕེན་པའི་ལས་ཀྱང་ཡོད་དེ། མཆོད་སྤྱིན་བརྒྱ་བྱས་པས་བརྒྱ་བྱིན་དུ་སྐྱེས་པ་ལྟ་བུའོ། །ཞེས་གསུངས་པའི་ཕྱིར། འདོད་མི་ནུས་པར་ཐལ། ཐེག་མཆོག་ཟིན་བྲིས་ལས། མ་རིག་པས་ཀུན་ནས་བསླངས་པའི་ལས་གཅིག་གིས། རྣམ་སྨིན་གཉིས་བསྐྱེད་ནུས་པར་ཐལ་བར་འགྱུར་རོ། །དེ་ནི་རྣམ་པ་ཀུན་ཏུ་མི་རུང་སྟེ། མཛོད་ལས། ལས་ནི་ཤུན་བཅས་འབྲས་བུ་བཞིན། །དེ་བཞིན་སྨན་དང་མེ་ཏོག་བཞིན། །ཞེས་དཔེ་དང་བཅས་ཏེ་གསུངས་པའི་ཕྱིར་རོ། །ཞེས་གསུངས་པའི་ཕྱིར་ཟེར་ན་དེ་ནི་མངོན་པ་འོག་མ་ལྟར་ཡིན་ནམ་སྙམ་ལ་འོན་ཀྱང་ཕྱོགས་སྔ་དགག་ཚུལ་ཅི་ལྟར་ཡིན་དཔྱད། ལས་དུ་མས་ཕན་ཚུན་ལྟོས་ནས་ཚེ་རབས་དུ་མའི་ས་བོན་གསོས་པས་ལུས་སྐྱེ་བ་དུ་མ་འཕེན་པའི་ལས་ཀྱང་ཡོད་དེ། ཚུལ་ཁྲིམས་དུ་མ་བསྲུངས་པས་ལྷ་མི་དུ་མ་ཐོབ་པ་ལྟ་བུ་ཉིད་དོ། །འཕངས་པ་རྣམས་རིམ་གྱིས་མྱོང་ཚུལ་ལ། ལུས་དུ་མ་གཅིག་ཅར་མི་རུང་བས། འགྲོ་བ་ལྔ་འགྲུབ་པའི་ལས་མང་པོ་དང་ལྡན་པའི་སེམས་ཅན་ཇི་ལྟར་རིམ་གྱིས་རྣམ་པར་སྨིན་པ་མྱོང་བར་འགྱུར་ཞེ་ན། རྒྱུད་གཅིག་ལ་ལས་ཀྱི་ས་བོན་དུ་མ་ཡོད་པ་དེ་ལ་དགེ་མི་དགེའི་ལས་གང་ཤིན་ཏུ་ལྕི་ཞིང་སྟོབས་ཆེ་བར་གྱུར་པ་དེ་ཐོག་མར་རྣམ་པར་སྨིན་པར་འགྱུར་རོ། །ཡང་ལྕི་ཡང་མཉམ་ན་འཆི་བའི་དུས་ན་གསོས་བཏབ་ནས་གང་མངོན་དུ་གྱུར་པའོ། །ཡང་དེ་དག་མཉམ་ན་གང་ཡུན་རིང་དུ་གོམས་པ་ཤས་ཆེ་བར་གྱུར་པའོ། །ཡང་དེ་རྣམས་མཉམ་ན་གང་ཐོག་མར་སྤྱད་པ་དེའི་འབྲས་བུ་ཐོག་མ་ཉིད་དུ་རྣམ་པར་སྨིན་པར་འགྱུར་རོ། །ཞེས་ཀུན་བཏུས་ས་འགྲེལ་ལས་གསུངས་སོ། །རང་ལུགས་ལ་སེམས་བྱུང་སེམས་པ་ལས་ཀྱི་གཙོ་བོར་བཞག་ཀྱང་ལས་ལ་དེས་མ་ཁྱབ་སྟེ། དགེ་མི་དགེ་ཐམས་ཅད་ལས་ཡིན་པར་རུང་བའི་ཕྱིར་ཏེ། ཀུན་བཏུས་ས་འགྲེལ་ལས། སྤང་བྱ་མི་དགེ་བ་ནི་མི་དགེ་བའི་ལས་ཀྱང་ཡིན་ལ། ངན་འགྲོ་རྣམས་ཀྱི་ལམ་ཡང་ཡིན་པ་བཅུ། ཞེས་དང༌། གཉེན་པོ་དགེ་བ་ནི་དགེ་བཅུའི་ལས་ཡིན་ལ། ཞེས་དང༌། ལམ་རིམ་བདུད་རྩི་ཉིང་ཁུ་ལས། དེའི་ཕྱིར་མི་དགེ་བ་བཅུ་སྤོང་བའི་སེམས་པ་ས་བོན་དང་བཅས་པ་ནི་དགེ་བ་བཅུའོ། །ཞེས་གསུངས་པའི་ཕྱིར་རོ། །དེ་ལ་དགེ་བའི་ས་བོན་དགེ་བ་ཡིན་པ་མི་འཐད་པར་ཐལ། ཀུན་བཏུས་ས་འགྲེལ་ལས། གནོད་བྱེད་ཀྱང་ཡོད་དེ། ཐེག་བསྡུས་ཀྱི་འགྲེལ་པར། དགེ་མི་དགེ་གཉི་གར་མི་གསལ་བ་སྟེ་ལུང་མ་བསྟན་པའོ། །ཞེས་གསུངས་པའི་ཕྱིར་དང༌། དགེ་མི་དགེས་བཞག་པའི་བག་ཆགས་ཀུན་གཞི་དང་རྫས་གཅིག་པ་དེ་དགེ་མི་དགེ་མཚན་ཉིད་པ་ཡིན་ན། དེ་དག་ངོ་བོ་གཅིག་ཏུ་ཐལ་ཞིང་འགལ་བ་མ་ཡིན་པར་ཡང་ཐལ་བའི་ཕྱིར་དང༌། བསམ་གཏན་དང་པོ་ཡན་ཆད་ནའང་དེའི་བག་ཆགས་ཡོད་པས་མི་དགེ་བ་ཡོད་པར་ཐལ་བ་ལ་སོགས་པའི་ཕྱིར་རོ། །རང་ལུགས་ནི། འཇོག་བྱེད་དགེ་མི་དགེ་ལུང་མ་བསྟན་གང་གིས་བཞག་ཀྱང་བག་ཆགས་ནི་ལུང་མ་བསྟན་ཉིད་ཡིན་ཏེ། ཀུན་གཞི་ལུང་མ་བསྟན་དང་རྫས་གཅིག་པའི་ཕྱིར་རོ། །ཞེས་ཕྱོགས་སྔ་དགག་པ་དང་རང་ལུགས་བཞག་པ་དེའི་ཕྱིར་ཟེར་ན་དཔྱད། རང་འབྲས་རྣམ་སྨིན་འཕེན་བྱེད་ཀྱི་རིགས་གནས་ཀྱི་ལས་དེ། གཉིས་པ་འདུ་བྱེད་ཀྱི་ལས་ཀྱི་མཚན་ཉིད་ཡིན་ཏེ། ས་བཅུ་བར། མ་རིག་པས་བྱས་པའི་ལས་ཀྱི་རྣམ་པར་སྨིན་པ་ནི་འདུ་བྱེད་དོ། །ཞེས་དང༌། ཀུན་བཏུས་ས་འགྲེལ་ལས། འདུ་བྱེད་དང་ཞེས་པ་ཡང་སྲིད་འཕེན་པར་ནུས་པའི་སྒོ་གསུམ་གྱི་ལས་བསོད་ནམས་དང་བསོད་ནམས་མ་ཡིན་པ་དང་མི་གཡོ་བའི་འདུ་བྱེད་རྣམས་སོ། །ཞེས་དང༌། ཉ་ཊཱིཀ་ལས། ཟག་བཅས་ཀྱི་ཕུང་བོ་འགྲུབ་པའི་རྒྱུ་གཏི་མུག་གིས་བསླང་བའི་ལུས་ངག་ཡིད་ཀྱི་ལས་བྱས་ཤིང་བསགས་པ་རྣམས་ནི་འདུ་བྱེད། ཅེས་གསུངས་པའི་ཕྱིར་རོ། །དབྱེ་ན་བསོད་ནམས་དང་བསོད་ནམས་མ་ཡིན་པ་དང་མི་གཡོ་བའི་འཕེན་བྱེད་ཀྱི་ལས་གསུམ་ཡོད་དོ། ། གསུམ་པ་རྣམ་ཤེས་ཀྱི་ཡན་ལག་ནི། འཕེན་བྱེད་ལས་ཀྱི་བག་ཆགས་བགོས་པའམ་དེའི་འཕང་འབྲས་སུ་གྱུར་པ་གང་རུང་གི་རྣམ་ཤེས་དེ། གསུམ་པ་རྣམ་ཤེས་ཀྱི་མཚན་ཉིད་ཡིན་ཏེ། རྟེན་འབྲེལ་གྱི་མདོ་ལས། རྣམ་པར་ཤེས་པ་གང་ཞེ་ན། རྣམ་པར་ཤེས་པའི་ཚོགས་དྲུག་གོ །ཞེས་དང༌། ཀུན་བཏུས་ས་འགྲེལ་ལས། རྣམ་པར་ཤེས་པ་དང་ཞེས་པ་ལས་ཀྱི་བག་ཆགས་དང་ལྡན་པའི་ཀུན་གཞི་སྟེ། དེའང་ས་བོན་བཞག་ཙམ་རྒྱུ་དུས་ཀྱི་རྣམ་ཤེས་དང༌། ནུས་པ་བརྟས་ནས་སྐྱེ་གནས་སུ་ཁྲིད་པའི་ཚེ་འབྲས་བུའི་དུས་ཀྱི་རྣམ་ཤེས་སོ། །ཞེས་དང༌། ཉ་ཊཱིཀ་ལས། ལས་དེའི་ས་བོན་དེས་བགོས་པའི་སེམས་སམ་མདོར། ཚོགས་དྲུག་པོ་རྣམ་ཤེས་སུ་བཤད་པ་ལྟར་རམ། ནས། མདོར་ན་འདུ་བྱེད་གསུམ་གྱིས་བསྒོས་པའི་ཤེས་༼ཡིད་ཤེས་སམ་ཀུན་གཞི་༽པ་འདུ་བྱེད་གསུམ་དང་མཐུན་པར་ཁམས་གསུམ་དུ་འགྲོ་བའི་རྒྱུའི་དངོས་པོའམ་རྣམ་སྨིན་གྱི་དངོས་པོར་གྱུར་པའི་རྣམ་ཤེས་ནི་རྣམ་ཤེས་སོ་ཞེས་ཀ་ཤིས་སོ། །ཞེས་གསུངས་སོ། །བར་དོར་འབྲས་དུས་ཀྱི་རྣམ་ཤེས་བཞག་པ་མི་རིགས་ཏེ། རྟེན་འབྲེལ་མདོ་འགྲེལ་ལས། ཅིའི་ཕྱིར་རྣམ་པར་ཤེས་པའི་རྐྱེན་གྱིས་སྲིད་པ་བར་མའི་མིང་དང་གཟུགས་རྣམ་པར་མ་བཞག་པ་ཅེ་ན། འདུ་བྱེད་ནི་སྐྱེས་པའི་དབང་དུ་བྱས་ཏེ། ཞེས་གསུངས་སོ། །འབྲས་དུས་ཀྱི་རྣམ་ཤེས་སྐྱེ་སྲིད་དུ་ཉིང་མཚམས་སྦྱར་ནས་བཞག་པ་ཡིན་ཏེ། རྟེན་འབྲེལ་མདོ་འགྲེལ་ལས། འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པ་དེ་ཉིད་འདུ་བྱེད་ཀྱིས་རྐྱེན་གྱིས་ཡིན་གྱི་ཉིང་མཚམས་སྦྱོར་བའི་རྣམ་པར་ཤེས་པ་ནི་མ་ཡིན་ནོ། །ཞེས་དང༌། ཉིང་མཚམས་སྦྱོར་བའི་རྣམ་པར་ཤེས་པ་དང་བཞི་བ་མིང་གཟུགས་དུས་མཉམ་དུ་གྲུབ་ཅིང༌། ཞེས་དང༌། འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པ་ནི་སྲིད་པ་བར་མའི་རྒྱུན་གྱིས་མའི་མངལ་དུ་འཇུག་པ་ཉིད་ཡིན་པར་རིག་པར་བྱ་སྟེ།དེ་དང་འབྲེལ་བའི་ཕྱིར། ཞེས་གསུངས་པའི་ཕྱིར་རོ། ། རྟེན་འབྲེལ་ཡན་ལག་བཅུ་གཉིས་ལ་ས་བོན་དང་མངོན་གྱུར་གཉིས་རེ་གཉིས་རེ་ཡོད་པར་ཐལ། ཉ་ཊཱིཀ་ལས། འོན་ཀྱང་བཅུ་གཉིས་པོ་ཐམས་ཅད་ལ་རྒྱུ་དང་འབྲས་བུ་གཉིས་སུ་ས་བཅུའི་འགྲེལ་བར་དབྱིག་བཤད་པས་ཀུན་གཞི་ས་བོན་གྱི་ཆ་དང་རྣམ་སྨིན་གྱི་ཆ་ལ་རུང་ངོ༌། །ཞེས་དང༌། ཐེག་མཆོག་དབུ་མའི་ཟིན་བྲིས་ལས། དེ་ལྟར་ན་ཡན་ལག་བཅུ་གཉིས་པོ་དེ་རྣམས་ཀྱི་བག་ཆགས་ཀུན་གཞི་ལ་བཞག་པ་མངོན་དུ་མ་གྱུར་པ་དང༌། ས་བོན་ཡོངས་སུ་སྨིན་པ་ལས་ཡན་ལག་བཅུ་གཉིས་མངོན་དུ་འགྱུར་བ་གཉིས་འབྱུང་བ་ཐམས་ཅད་ལ་ཤེས་པར་བྱའོ། །ཞེས་གསུངས་པའི་ཕྱིར་ཟེར་ན་དེ་ཡང་མི་རིགས་པར་ཐལ། བཅུ་གཉིས་ལས་འཕང་འབྲས་ལ་མངོན་གྱུར་བ་བཞག་པ་དང་གྲུབ་འབྲས་རྣམས་ལ་ས་བོན་བཞག་པ་མི་འཐད་པའི་ཕྱིར། དེར་ཐལ།ཐེག་མཆོག་ཟིན་བྲིས་ལས། མིང་གཟུགས་ལ་སོགས་པ་བཞི་བོ་དེ་རྣམས་འཕངས་པའི་ཡན་ལག་མ་ཡིན་ཏེ། གྲུབ་པའི་ཡན་ལག་ཡིན་པའི་ཕྱིར། གྲུབ་པའི་ཡན་ལག་ཡིན་ཏེ། དེ་དག་ས་བོན་ཙམ་མ་ཡིན་པར་མངོན་པར་གྱུར་པ་ཡིན་པའི་ཕྱིར། དེ་ལ་མངོན་གྱུར་ཡིན་ཡང༌། འཕངས་པའི་ཡན་ལག་མ་ཡིན་པའི་སྐྱོན་མེད་དོ་ཞེས་ཟེར་ན། འཕངས་པའི་ཡན་ལག་གི་མཚན་ཉིད་མ་ཚང་ཡང༌། འཕངས་པའི་ཡན་ལག་ཡིན་ཞེས་སྨྲ་ན་ཧ་ཅང་ཐལ་བར་འགྱུར་རོ། །ཞེས་གསུངས་པའི་ཕྱིར་ཟེར་ན་དཔྱད་དོ། །

བཞི་བ་མིང་གཟུགས་ནི།

རང་རྒྱུ་གསུམ་པ་རྣམ་ཤེས་སྐྱེ་གནས་སུ་ཞུགས་པ་ལས་གྲུབ་པའི་མིང་བཞི་དང་གཟུགས་ཀྱི་ཕུང་པོ་ཅི་རིགས་ཀྱི་འཕང་འབྲས་དེ། ཡན་ལག་བཞི་པ་མིང་གཟུགས་ཀྱི་མཚན་ཉིད་ཡིན་ཏེ། ས་བཅུ་བ་ལས། རྣམ་ཤེས་དང་ལྷན་ཅིག་འབྱུང་བའི་ལེན་པའི་ཕུང་བོ་བཞི་ནི་མིང་དང་གཟུགས། ཞེས་དང༌། སའི་དངོས་གཞི་ལས།རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་ཀྱང་བྱ་ལ། མིང་དང་གཟུགས་ཀྱི་རྐྱེན་གྱིས་རྣམ་པར་ཤེས་པ་ཞེས་ཀྱང་བྱ་སྟེ། ད་ལྟར་གྱིས་དུས་ན་ཚེ་ཇི་སྲིད་པར་མདུང་ཁྱིམ་གྱི་ཚུལ་དུ་འཇུག་གོ །ཞེས་དང༌། རྟེན་འབྲེལ་མདོ་འགྲེལ་ལས། མིང་དང་གཟུགས་ནི་སྐྱེ་མཆེད་དྲུག་ལ་ཐུག་པའི་བར་དུུ་ཡིན་གྱི། དེ་ཕན་ཆད་ནི་མ་ཡིན་ནོ། །ཞེས་དང༌། ཀུན་བཏུས་ས་འགྲེལ་ལས། མིང་དང་གཟུགས་ཞེས་པ་ཀུན་གཞིའི་རྣམ་ཤེས་མངལ་དུ་ཞུགས་པ་ལས་གྲུབ་པའི་མིང་བཞི་དང་གཟུགས་ཀྱི་ཕུང་པོ་དབང་པོ་མ་དོད་ཀྱི་བར་རྣམས་སོ། །ཞེས་དང༌། ཉ་ཊཱིཀ་ལས། སྐྱེ་གནས་སུ་མཚམས་སྦྱར་བའི་སྐད་ཅིག་གཉིས་པ་ཕན་ཆད་མེར་མེར་བོ་སོགས་དང༌། དེ་དང་ལྷན་ཅིག་པའི་རྣམ་ཤེས་ནི་མིང་གཟུགས་ཏེ་མིང་ནི་ཚོར་བ་འདུ་ཤེས་འདུ་བྱེད་རྣམ་ཤེས་སོ། །ཞེས་དབྱིག་གོ །ཞེས་གསུངས་པའི་ཕྱིར་རོ། །སྐབས་འདིའི་མིང་དང་གཟུགས་ཅི་རིགས་ཡིན་ན་བཞི་བ་མིང་གཟུགས་ཡིན་དགོས་པ་འདྲའོ། ། ལྔ་བ་སྐྱེ་མཆེད་ནི། རང་རྒྱུ་མིང་གཟུགས་འཕེལ་བའི་རྣམ་ཤེས་སྐྱེ་བའི་སྒོར་གྱུར་བའི་འཕང་འབྲས་དེ། ལྔ་བ་སྐྱེ་མཆེད་ཀྱི་མཚན་ཉིད་ཡིན་ཏེ། ཀུན་བཏུས་ས་འགྲེལ་ལས། སྐྱེ་མཆེད་དྲུག་དང་ཞེས་པ་དེར་མིང་དང་གཟུགས་འཕེལ་བ་ལས་མིག་ལ་སོགས་པའི་དབང་པོ་དྲུག་ཚང་བའོ། །ཞེས་དང༌། ཉ་ཊཱིཀ་ལས། ཟག་བཅས་ཀྱི་མིང་གཟུགས་འཕེལ་བ་རྣམ་ཤེས་སྐྱེ་སྒོར་གྱུར་པ་ནི་སྐྱེ་མཆེད་དྲུག་སྟེ་མིག་ནས་ཡིད་ཀྱི་བར་རོ། །ཞེས་གསུངས་པའི་ཕྱིར་རོ། ། དྲུག་པ་རེག་པ་ནི། རང་རྒྱུ་སྐྱེ་མཆེད་སྨིན་པ་ལས་ཡུལ་དབང་སེམས་གསུམ་འདུས་ནས་བདེ་སྡུག་ཅི་རིགས་ལ་གཅོད་པའི་འཕང་འབྲས་དེ། ཡན་ལག་དྲུག་པ་རེག་པའི་མཚན་ཉིད་ཡིན་ཏེ། ཀུན་བཏུས་ས་འགྲེལ་ལས། རེག་པ་དང་ཞེས་པ་གསུམ་འདུས་ནས་བདེ་སོགས་འབྱུང་བ་དང་མཐུན་པའི་དབང་པོའི་འགྱུར་པ་ཡུལ་ཡོངས་སུ་གཅོད་པ་སྟེ་མིག་གི་འདུས་ཏེ་རེག་པ་ལ་སོགས་པའོ། །ཞེས་དང༌། ཉ་ཊཱིཀ་ལས། དེ་རྣམས་སྨིན་པ་ལས་ཡུལ་དབང་རྣམ་ཤེས་རྣམ་གསུམ་ཕྲད་པའི་ཟག་བཅས་ནི་རེག་པའོ། །ས་བཅུ་བར་རོ། །ཞེས་གསུངས་པའི་ཕྱིར་རོ། །དབྱེ་ན། མིག་གི་འདུས་ཏེ་རེག་པ་ནས། ཡིད་ཀྱི་འདུས་ཏེ་རེག་པའི་བར་རེག་པའི་ཚོགས་དྲུག་གོ །བདུན་པ་ཚོར་བ་ནི། རང་རྒྱུ་རེག་པ་ལ་བརྟེན་ནས་བདེ་སྡུག་བར་མ་ཅི་རིགས་ཉམས་སུ་མྱོང་བའི་འཕང་འབྲས་སུ་གྱུར་བའི་ཚོར་བ་དེ། ཡན་ལག་བདུན་པ་ཚོར་བའི་མཚན་ཉིད་ཡིན་ཏེ། ཀུན་བཏུས་ས་འགྲེལ་ལས། རེག་པ་ལ་བརྟེན་ནས་སིམ་པ་དང་གདུང་བ་དང་གཉི་ག་མ་ཡིན་པ་ཉམས་སུ་མྱོང་བ་སྟེ་མིག་གི་འདུས་ཏེ་རེག་པའི་རྐྱེན་གྱིས་བྱུང་བའི་ཚོར་བ་ལ་སོགས་པའོ། །ཞེས་གསུངས་པའི་ཕྱིར་རོ། །དབྱེ་ན། རང་ཡིན་གྱི་བདེ་སྡུག་བཏང་སྙོམས་གསུམ་ཡོད་དོ། ། བརྒྱད་པ་སྲེད་པ་ནི། རང་རྒྱུ་ཚོར་བས་རང་ཡུལ་ཉམས་སུ་མྱོང་བ་སོགས་ལ་བླང་དོར་ཅི་རིགས་སུུ་ཞེན་པ་དང་ལས་གསོས་འདེབས་ནུས་ཀྱི་གཞི་མཐུན་གྱི་ཆགས་པ་དེ། ཡན་ལག་བརྒྱད་པ་སྲེད་པའི་མཚན་ཉིད་ཡིན་ཏེ། ཀུན་བཏུས་ས་འགྲེལ་ལས། སྲེད་པ་དང་ཞེས་པ་ཚོར་བས་བདེ་སོགས་མྱོང་བ་རྣམས་ལ་བླང་དོར་དུ་འདོད་ཆགས་ཤིང་ཞེན་པ་སྟེ། ཞེས་གསུངས་སོ། །དབྱེ་ན། སྲེད་པའི་ཚོགས་དྲུག་ཅེས་ཀླུས་སོ། །ཞེས་ཉ་ཊཱིཀ་ལས་སོ། །དྲུག་ནི་རྣམ་ཤེས་དྲུག་གི་དབང་གིས་སོ། །དེ་ཡང་སྲིད་པ་དང་སྲིད་པའི་ལོངས་སྤྱོད་ལ་རྒྱུན་དུ་སྤྱོད་ཀྱང་ཚྭ་ཆུ་འཐུངས་པ་བཞིན་ངོམས་ཤིང་ཚིམ་པ་མེད་པ་ནི་སྲེད་པ་སྟེ། དུས་གསུམ་གྱི་དབྱེ་བས་གསུམ། ཞེས་སོགས་དང༌། ཡང་ན་མཐོང་སྒོམ་གྱི་སྤང་བྱ་འདོད་ཁམས་ཀྱི་འདོད་ཆགས་ནི་འདོད་སྲེད། དེའི་སྤང་བྱ་ཁམས་གོང་གཉིས་ཀྱི་འདོད་ཆགས་ནི་སྲིད་སྲེད། ཐར་བ་ལ་མངོན་པར་ཆགས་པ་ནི་མི་སྲིད་པར་སྲེད་པ། ལྟ་བ་ལྔ་ནི་ལྟ་བའི་སྲེད་པ་སྟེ་བཞིའོ། །ཞེས་དབྱིག་་གོ ། དགུ་བ་ལེན་པ་ནི། རང་རྒྱུ་སྲེད་པ་འཕེལ་པ་ལས་དངོས་སུ་བླང་དོར་གྱི་སྒོ་ནས་རྩོད་ཅིང་ཡང་སྲིད་ཉེ་བར་ལེན་པར་བྱེད་པའི་ཆགས་པ་དེ། དགུ་བ་ལེན་པའི་མཚན་ཉིད་ཡིན་ཏེ། ཀ་ཤིའི་མདོ་འགྲེལ་ལས། སྡུག་པའི་དངོས་པོ་ལ་སྨོན་པའི་རྣམ་པ་ནི། ལེན་པའོ། །ཞེས་དང༌། ཀུན་བཏུས་ས་འགྲེལ་ལས། ལེན་པ་དང་ཞེས་པ་སྲེད་པ་འཕེལ་བ་ལས་དངོས་སུ་བླང་དོར་གྱི་སྒོ་ནས་རྩོད་ཅིང་ཡང་སྲིད་ཉེ་བར་ལེན་པར་བྱེད་པ་སྟེ། ཞེས་དང༌། ཉ་ཊཱིཀ་ལས། གང་འདོད་པ་ལ་སོགས་པ་ལ་འདུན་ཅིང་ཆགས་པས་སྦྱོར་བ་ནི་ལེན་པ་སྟེ།ཞེས་གསུངས་པས་སོ། །དབྱེ་ན་འདོད་པའི། ལྟ་བའི། ཚུལ་ཁྲིམས་བརྟུལ་ཞུགས་ཀྱི། བདག་ཏུ་སྨྲ་བའི་ཉེར་ལེན་བཞི་སྟེ། འདོད་པའི་འཁྲིག་པ་དང་མུ་སྟེགས་ཀྱི་ཆོས་དང་འདོད་པའི་ཡོན་ཏན་ལྔ་ལ་ཆགས་པ་གསུམ་དང༌། རྟག་ཆད་ཀྱི་ལྟ་བ་དང༌། ཁྱི་དང་བ་ལང་སོགས་ཀྱི་བརྟུལ་ཞུགས་སོགས་དང༌། བདག་ཡོད་པར་ལྟ་ཞིང་ཆགས་པ་བཞི་རིམ་བཞིན་ནོ། །དབྱིག་གོ །ཞེས་ཉ་ཊཱིཀ་ལས་སོ། །

བཅུ་བ་སྲིད་པ་ནི།

རང་འབྲས་ཡང་སྲིད་བསྐྱེད་པ་ལ་མངོན་དུ་ཕྱོགས་པའི་ནུས་པ་མཐུ་ཅན་དུ་སོང་བའི་ལས་དེ། ཡན་ལག་བཅུ་བ་སྲིད་པའི་མཚན་ཉིད་ཡིན་ཏེ། ཀུན་བཏུས་ས་འགྲེལ་ལས། སྲིད་པ་དང་ཞེས་པ་ཀུན་གཞིའི་རྣམ་ཤེས་ཉེར་ལེན་དང་བཅས་པ་ལས། ལས་ཀྱི་ས་བོན་ནུས་པ་མཐུ་ཆེན་དུ་འཕེལ་ནས། ཡང་སྲིད་སྐྱེ་བ་བསྐྱེད་ངེས་སུ་གྱུར་པ་སྟེ། རྟེན་འབྲེལ་མདོ་འབྲེལ་ལས། བག་ཆགས་ཀྱི་གནས་སྐབས་ལ་སྲིད་པའི་མིང་ཐོབ་པ་ཡིན་ནོ། །ཞེས་དང༌། མདོ་ལས། འགྲོ་བ་རྒྱུད་ལྔའི་སྲིད་པ་དང་བར་དོའི་སྲིད་པ་དང་ལས་ཀྱི་སྲིད་པ་རྣམས་གསུངས་པ་ལས། འདི་ནི་ལས་ཀྱི་སྲིད་པ་ཡིན་པས་སོ། །དབྱེ་ན་ཁམས་གསུམ་གྱི་སྲིད་པ་གསུམ་མོ། །ཉ་ཊཱིཀ་ལས། དེ་ལྟར་ལས་འདུ་བྱེད་ཀྱི་ས་བོན་སྲེད་ལེན་གྱིས་མངོན་པར་རླན་པ་དེ་ཉིད་འབྲས་བུ་ཡང་སྲིད་དངོས་སུ་བསྐྱེད་པ་ལ་མངོན་དུ་ཕྱོགས་པའི་ལས་ནི་སྲིད་པ་སྟེ། འདིས་བར་མ་ཆོད་པར་ཡང་སྲིད་པར་འབྱུང་བར་བྱེད་པས་སྲིད་པ་སྟེ་སྲིད་པའི་རྒྱུ་ཡིན་པས་སྲིད་པ་ཞེས་བྱའོ། །སྤྱིར་སྲིད་པ་ལ་དབྱེ་ན། འཆི། བར། སྐྱེ་སྲིད། སྔོན་དུས་སྲིད་པ་བཞིའོ། །ལེན་པ་ལས་བྱུང་བའི་ལས་ཟག་པ་དང་བཅས་པ་ནི་སྲིད་པའོ། །ཞེས་ས་བཅུ་བར་རོ། །ཞེས་གསུངས་པའི་ཕྱིར་རོ། །བཅུ་བ་སྲིད་པ་ལ་ཕལ་ཆེར་ས་བོན་ཞིག་དགོས་པས་ས་བོན་ལ་དགེ་མི་དགེ་འཇོག་དགོས་སམ་གོང་དུ་བཤད་པ་ལྟར་དཔྱད་དོ། །

བཅུ་གཅིག་པ་སྐྱེ་བ་ནི།

རང་རྒྱུ་ལས་ཀྱི་སྲིད་པ་སྟོབས་ལྡན་ལས་མངོན་པར་འགྲུབ་པའི་རྣམ་སྨིན་གྱི་ཕུང་པོ་དེ། ཡན་ལག་བཅུ་གཅིག་པ་སྐྱེ་བའི་མཚན་ཉིད་ཡིན་ཏེ། ཀུན་བཏུས་ས་འགྲེལ་ལས། སྐྱེ་བ་དང་ཞེས་པ་ལས་ཀྱིས་སྲིད་པ་སྟོབས་ལྡན་ལས་ཕུང་པོ་གསར་དུ་མངོན་པར་འགྲུབ་པ་སྟེ་སྲོག་དང་བཅས་པར་སྐྱེ་བའོ། །ཞེས་དང༌། སྲིད་པ་དེའི་མཇུག་ཐོགས་སུ་རྣམ་ཤེས་མིང་གཟུགས་ནས་ཚོར་བའི་བར་ནི་ཕུང་བོ་འབྱུང་བས་སྐྱེ་བ་སྟེ། ཞེས་བློ་གྲོས་ཆེན་པོའོ། །ལས་ཀྱི་སྲིད་པའི་རྒྱུ་ལས་ཕུང་བོ་འབྱུང་བ་ནི་སྐྱེ་བའོ། །ཞེས་ཀླུས་ཏེ། ལས་ཀྱི་རྒྱུ་མཐུན་པ་ནི་སྐྱེ་བ་སྟེ་ཕུང་བོ་འབྱུང་བའོ། །ས་བཅུ་བར་རོ། །ཞེས་གསུངས་པའི་ཕྱིར་རོ། །དབྱེ་ན། སྒོ་ང་མངལ་དྲོད་གཤེར་རྫུས་སྐྱེས་བཞིའོ། །ཞེས་ཉ་ཊཱིཀ་ལས་སོ། །བཅུ་གཉིས་པ་རྒ་ཤི་ནི། རང་རྒྱུ་ལས་ཉོན་གྱི་རང་དབང་མེད་པར་ལང་ཚོ་གཞན་དུ་འགྱུར་བའི་ཉེར་ཕུང་དེ། བཅུ་གཉིས་པ་རྒ་བའི་མཚན་ཉིད། རང་རྒྱུ་ལས་ཉོན་གྱི་དབང་གི་སྲོག་དབང་འགག་པའི་ཆའི་ལྡན་མིན་གྱི་ཉེར་ཕུང་དེ། བཅུ་གཉིས་པ་ཤི་བའི་མཚན་ཉིད་ཡིན་ཏེ། ཀུན་བཏུས་ས་འགྲེལ་ལས། རྒ་ཤི་ནི། སྐྱེས་ཕྱིན་ཆད་ལང་ཚོ་འགྱུར་བ་དང་བཅས་ཤིང་མཐར་སྲོག་ཀྱང་འགགས་པའོ། །ཞེས་དང༌། ཉ་ཊཱིཀ་ལས། དར་ལ་བབ་པའི་བར་གྱི་ཕུང་བོ་རྣམས་རྙིང་ཞིང༌། སྟོབས། མཐུ། གཟི་བརྗིད། མདངས་སོགས་ཉམས་པ་ནི་རྒ་བ། ཞེས་ཀླུ་དབྱིག་སྟེ། དབྱེ་ན། ཚེ། དབང་པོ། སྟོབས། གཟུགས། དྲན་པ། ཤེས་རབ།བདེ་བ་འགྱུར་བ་སྟེ་བདུན་ནོ། །ཚེ་ཟད་ནས་སྲོག་འགགས་པ་ནི་ཤི་བ། འགག་པ་ནི་འཆི་བ་སྟེ། དབྱེ་ན། དུས། དུས་མིན་འཆི་བ་གཉིས་སོ། །རྒ་ཤི་གཉིས་ཡན་ལག་གཅིག་ཏུ་བྱས་པ་ནི་རྒ་བ་མེད་པར་འཆི་བ་སྲིད་པས་སོ། །ཞེས་རྒྱལ་སྲས་སོ། །ཞེས་གསུངས་སོ། །རྟེན་འབྲེལ་ཡན་ལག་བཅུ་གཉིས་ཀྱི་གནས་སྐབས་ལ་གང་ཟག་ཅེས་བཏགས་པ་ཡིན་པར་ཐལ། མདོ་ལུགས་མ་ལས། འགྲོ་བ་སེམས་ཅན་ཀུན་ཡན་ལག་བཅུ་གཉིས་པོ་འདི་ལ་བཏགས་པ་ཡིན་གྱི། འདི་ལ་རྫས་སུ་གྲུབ་པའི་སེམས་ཅན་དང༌། གང་ཟག་ལ་སོགས་པ་ནི་ཅི་ཡང་མེད་དོ། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །