དེས་ན་མཐའ་སྦྱོར།

དེས་ན་མཐའ་སྦྱོར་ནི།

མཁྱེན་གསུམ་གྱི་རྣམ་པ་གོ་རིམ་དུ་བསྒོམ་པའི་རིགས་གནས་ཀྱི་སེམས་དཔའི་སྦྱོར་བ་དེ།མཐའ་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས། གསུམ་བསྡུས་བསྒོམ་གོ་རིམ་དུ་བསྒོམ་པའི་སྦྱོར་བའམ་སྦྱིན་སོགས་དཀར་ཆོས་བཅུ་གསུམ་གོ་རིམ་གྱིས་བསྒོམ་པའི་སྦྱོར་བ་སྟེ། ཞེས་གསུངས་པའི་ཕྱིར་རོ། །དབྱེ་ན་བཅུ་གསུམ། ས་མཚམས་ནི། ཚོགས་ལམ་ནས་རྒྱུན་མཐའི་སྔ་ལོགས་བར་དུ་ཡོད་དེ། ཉ་ཊཱིཀ་ལས། བཞི་བོ་ནང་ཕལ་ཆེར་ངོ་བོ་གཅིག་ལ་གནས་སྐབས་རྫས་ཐ་དད་པ་ཡང་ཡོད་དེ། ཚོགས་ལམ་ན་རྩེ་སྦྱོར་མེད་ཅིང་རྣམ་ཀུན་དང་མཐར་སྦྱོར་ཡོད་པ་ལྟ་བུའོ། །ཞེས་པ་དང༌། ཉ་ཊཱིཀ་ལས། ས་མཚམས་མ་མཐའ་ཚོགས་ལམ་ནས་དངོས་སུ་བྱུང་ཞིང་ཡ་མཐའ་རྒྱུན་མཐའི་བར་ན་ཡོད་པར་ཨཱརྱས་བཞེད་པར་མངོན་ཏེ་དྲན་པ་ཉེར་བཞག་སོགས་བྱང་ཕྱོགས་རྫོགས་པས་མཐོང་བའི་ལམ་དང་རྣམ་པ་ཐམས་ཅད་མཁྱེན་པ་ཉིད་ཡོངས་སུ་རྫོགས་པའི་བར་གྱིས་ནི་སྒོམ་པའི་ལམ་ཡིན་ཏེ་ཞེས་སོ། །སློབ་དཔོན་ལྟར་ན་དྲོད་ནས་ཡོད་དེ་རྩེ་སྦྱོར་ཐོབ་པས་ཞེས་དང༌། སངས་རྒྱས་ཡེ་ཤེས་ཀྱིས།སྦྱོར་བའི་གནས་སྐབས་ནས་བཟུང་ནས་རྡོ་རྗེ་ལྟ་བུའི་ཏིང་ངེ་འཛིན་ལ་ཐུག་གི་བར་དུ་མི་དམིགས་པ་དང་ལྡན་པའི་ཚུལ་ཁྲིམས་རང་དང་གཞན་ལ་ཕན་པའི་ལུས་སྒྲུབ་པའི་ཕྱིར་རོ་ཞེས་ཏེ། ཐུག་གི་བར་ཞེས་པ་སྔ་ལོགས་ཚུན་ཆད་ཀྱི་དོན་ཡིན་པས་རྒྱུན་མཐའི་སྔ་ལོགས་ཚུན་ཆད། ཅེས་དང༌། སློབ་དཔོན་ལྟར་ན་རྩེ་སྦྱོར་ཐོབ་ནས་ཞེས་བསྣན་ཏེ་འདི་མི་ལེགས་སོ། །ཞེས་གསུངས་པའི་ཕྱིར་རོ། །སྒྲ་བཤད་ནི། ཉ་ཊཱིཀ་ལས། བསྡུས་བསྒོམ་མམ་བཅུ་གསུམ་པོ་མཐར་གྱིས་ཏེ་སྔ་མའི་རྗེས་སུ་ཕྱི་མ་འབྲེལ་བར་རིམ་གྱིས་བསྒོམ་པ་ཅན་ཡིན་པས་མཐར་གྱིས་པའོ། །ཞེས་གསུངས་པ་ལྟར་རོ། །མཐར་སྦྱོར་གྱི་ས་མཚམས་དེ་ལྟར་བཞག་པ་མི་འཐད་པར་ཐལ། མདོ་ལས་མཐར་སྦྱོར་གྱི་ས་མཚམས་ལ་སེམས་བསྐྱེད་པ་དང་པོ་ནས་བཟུང་སྟེ། ཞེས་གསུངས་པའི་སེམས་བསྐྱེད་དེ་དོན་དམ་སེམས་བསྐྱེད་བྱས་ནས་དེ་ནི་མཐོང་ལམ་ནས་བཞག་དགོས་པའི་ཕྱིར། དེར་ཐལ། མདོ་ལུགས་མ་ལས། འདིར་སེམས་དང་པོ་བསྐྱེད་པ་ནས་ཞེས་པ་ནི་ཆོས་ཐམས་ཅད་སྒྱུ་མ་ལྟ་བུར་མཐོང་བའི་རྩེ་སྦྱོར་ཐོབ་ནས་བཟུང་སྟེ། ཞེས་པའི་དོན་ཏོ། །ཞེས་གསུངས་པའི་ཕྱིར་ཟེར་ན་དཔྱད། ཡང་མཐར་སྦྱོར་གྱི་མ་མཐའི་ས་མཚམས་ཚོགས་ལམ་དང་མཐོང་ལམ་གཉིས་གང་ནས་ཀྱང་བཞག་པ་མི་རིགས་པར་ཐལ། དེ་སྦྱོར་ལམ་བཟོད་པ་ནས་བཞག་དགོས་པའི་ཕྱིར། དེར་ཐལ།སྔོན་མེད་ལེགས་བཤད་ལས། སྦྱོར་ལམ་ནས་རྒྱུན་མཐའི་སྔ་ལོགས་ཀྱི་བར་དུ་ཡོད་དོ་ཞེས་གསུངས་པ་ལྟར་ན་བདག་གི་རྣམ་པར་རྟོག་པ་ནི་སྦྱོར་ལམ་ཡང་བཟོད་པ་ལ་བྱ་དགོས་པར་སེམས་སོ། །ཞེས་དང༌། ཚོགས་ལམ་ན་རྣམ་རྫོགས་ཡོད་ཀྱི་རྩེ་མོ་མེད་དོ། །བྱང་ཞིང་འཕེལ་བ་སྦྱོར་ལམ་དྲོད་རྩེ་གཉིས་ནས་ཡོད་ཀྱང༌། རྣམ་པ་མང་པོས་རྣམ་པ་མང་པོ་ལ་རྒྱས་ཐེབས་པ་དེ་ན་མེད་པས། རྩེ་སྦྱོར་ཡོད་ཀྱང་མཐར་གྱིས་པ་མེད་དོ། །བཟོད་པ་ནས་ནི་རྒྱས་ཐེབས་ཚུལ་དེ་ཡོད་པའི་ཕྱིར་མཐར་གྱིས་པ་ཡང་ཡོད་དེ། དེ་ནས་བརྩམས་ཏེ་གསུམ་ག་སྤེལ་མར་འབྱུང་ངོ༌། །རྩེ་སྦྱོར་མ་ཐོབ་པའི་སྔོན་དུ་མཐར་གྱིས་པ་ཡོད་པར་འདོད་པ་མི་འཐད་དེ། ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །མདོ་ལུགས་མ་ལས། མཐར་གྱིས་པའི་དོན་ནི་ཆོས་ཐམས་ཅད་དངོས་པོ་མེད་པ་རྨི་ལམ་ལྟ་བུའི་ངོ་བོར་མཐོང་བའི་རྩེ་སྦྱོར་ཐོབ་ནས་ཆོས་ཀྱི་སྐུ་རིམ་གྱིས་རྫོགས་ཤིང་རིམ་གྱིས་རྟོགས་པའི་དོན་ཡིན་ནོ། །ཞེས་པས་མཐོང་ལམ་རྩེ་སྦྱོར་ལ་སྦྱར་བ་ནི་ཆོས་སྐུ་མངོན་དུ་རྟོགས་པ་ལ་སྦྱར་བ་ལས་མ་མཐའི་ས་མཚམས་ངོས་བཟུང་བ་མིན་ཅེས་བཤད་ཚུལ་ཞིག་ཡོད་མེད་དཔྱད། མཐར་སྦྱོར་གྱི་སྒྲ་བཤད་ནི། ཉ་ཊཱིཀ་ལས། བསྡུས་བསྒོམ་མམ་བཅུ་གསུམ་པོ་མཐར་གྱིས་ཏེ་སྔ་མའི་རྗེས་སུ་ཕྱི་མ་འབྲེལ་བར་རིམ་གྱིས་བསྒོམ་པ་ཅན་ཡིན་པས་མཐར་གྱིས་པའོ། །ཞེས་གསུངས་པ་ལྟར་རོ། །