དེས་ན་མཚན་ཉིད།

དེས་ན་མཚན་ཉིད་ནི།

ཡེ་ཤེས་སྐད་ཅིག་མ་གཅིག་གིས་འོད་གསལ་ཆོས་ཉིད་ཀྱི་སྐུ་རྫོགས་པར་གཅིག་ཆར་དུ་མཁྱེན་པའི་སྦྱོར་བ་མཐར་ཐུག་པའི་སྐད་ཅིག་སྦྱོར་དེ། ཆོས་སྐུ་རྫོགས་པར་རྟོགས་པའི་སྐད་ཅིག་སྦྱོར་གྱི་མཚན་ཉིད་ཡིན་ནོ།།དེ་ཡང་ཉ་ཊཱིཀ་ལས། རྣམ་སྨིན་མིན་པའི་སྐད་ཅིག་མའི་སྦྱོར་བའི་མཚན་ཉིད། རྣམ་སྨིན་མིན་པའི་ཟག་མེད་གཅིག་མངོན་དུ་བྱེད་པ་ན་དེ་དང་རིགས་མཐུན་ཐམས་ཅད་གཅིག་ཅར་མངོན་དུ་བྱེད་པའི་སྐད་ཅིག་མའི་སྦྱོར་བ་སྟེ། ཞེས་གསུངས་པ་ནི་འགྲེལ་བ་དོན་གསལ་ལྟར་ཡིན་པ་ལས་ཡུམ་མདོ་དང་མངོན་རྟོགས་རྒྱན་དུ་རྣམ་པར་མ་སྨིན་པ་སྦྱར་བ་མི་སྣང་ངོ༌། །ཆོས་སྐུ་རྫོགས་པར་རྟོགས་པའི་སྐད་ཅིག་སྦྱོར་ཞེས་མིང་འདོགས་པ་ནི་མདོ་ལུགས་མའི་གསུང་ཟིན་ལ་བརྟེན་ནས་བཤད་པ་ཡིན་ལ།མིང་འདོགས་གཞན་ནི། ཉ་ཊཱིཀ་མཆན་ལས། ཤཱནྟི་རད་ཀིར་གཉིས་ཟག་པ་མེད་པའི་ཆོས་ཐམས་ཅད་སྐད་ཅིག་གཅིག་ལ་མངོན་པར་རྟོགས་པ་ཞེས་མིང་འདོགས་སོ། །ཞེས་གསུངས་སོ། །སྤྱིར་སྐད་ཅིག་སྦྱོར་བཞི་པོ་ལྡོག་པའམ་རྟོགས་ཚུལ་གྱིས་ཕྱེ་བ་ཡིན་ཏེ། མདོ་ལུགས་མ་ལས། ཏིང་ངེ་འཛིན་གཅིག་པའི་འདི་ཉིད་རྟོགས་ཚུལ་གྱི་སྒོ་ནས་བཞིར་བཤད་དོ། །ཞེས་དང༌། ཉ་ཊཱིཀ་ལས། དེ་ལ་ཡང་ངོ་བོ་གཅིག་ལ་མཚན་ཉིད་ཀྱིས་ཏེ་ལྡོག་པས་ཕྱེ་བས་རྣམ་པ་བཞི་ཡོད་པས་དེ་སྟོན་ནོ། །ཞེས་གསུངས་པའི་ཕྱིར་རོ། །སྐབས་འདིར་འགྲེལ་བར་རྣམ་སྨིན་ཡིན་མིན་གྱི་ཁྱད་པར་ནི། ཉ་ཊཱིཀ་ལས། དང་པོ་ཕྱི་རོལ་རྒྱུ་རྐྱེན་གྱིས་འདུས་མ་བྱས་པས་རྣམ་སྨིན་མ་ཡིན་པ་ཟག་པ་ཉོན་མོངས་མེད་པའི་ཆོས་ཐམས་ཅད་ནི་ལམ་བདེན་ཏེ། མངོན་པར།་ ཟག་མེད་ལམ་གྱི་བདེན་པ་དང༌། །ཞེས་པ་ནས། ཆོས་བཤེས་ནི། རྣམ་སྨིན་གསུམ་སྟེ། ས་དང་པོ་ལ་འཇིག་རྟེན་ལས་འདས་པར་རྣམ་པར་སྨིན་པ། ས་བརྒྱད་པ་ལ་མཚན་མ་མེད་པར་རྣམ་པར་སྨིན་པ། སངས་རྒྱས་ས་ལ་བསམ་གྱིས་མི་ཁྱབ་ཅིང་ལྷུན་གྱིས་གྲུབ་པར་རྣམ་པར་སྨིན་པ་སྟེ། དེ་དག་ཏུ་ཆོས་ཐམས་ཅད་སྔ་མ་ལས་མི་འདྲ་བར་སྨིན་པས་རྣམ་སྨིན་ནོ། །ཞེས་དང༌། ལས་ཉོན་གྱི་རྣམ་སྨིན་མིན་པའི་སངས་རྒྱས་སའི་ཟག་མེད་ཅེས་སྦྱར་རོ། །ཞེས་གསུངས་སོ། །ཡང་ཉ་ཊཱིཀ་ལས། རྩ་བ་ནི། ཐུབ་པ་རྒྱུན་མཐའི་རྟོགས་པ་འདི་ནི་ཆོས་ཅན། རྣམ་སྨིན་མིན་པའི་སྐད་ཅིག་གཅིག་པའི་སྦྱོར་བ་སྟེ།རྣམ་སྨིན་མིན་པའི་སངས་རྒྱས་སའི་སྦྱིན་སོགས་ཟག་མེད་ཡེ་ཤེས་གཅིག་མངོན་དུ་གྱུར་པ་ན་དེ་ཐམས་ཅད་ཅིག་ཅར་མངོན་དུ་བྱེད་པའི་སྦྱོར་བ་མཐར་ཐུག་ཡིན་པས་སོ། །རྟགས་གྲུབ་སྟེ། སངས་རྒྱས་སའི་རྣམ་སྨིན་མིན་པའི་སྦྱིན་སོགས་ཟག་མེད་རེ་རེས་ཀྱང་དེ་འདྲའི་ཟག་མེད་ཀུན་བསྡུས་པའི་ཕྱིར་ཞེས་ཤེས་པར་བྱའོ། །ཞེས་གསུངས་པ་རང་ལུགས་ལ་འཐད་པ་ཡིན་མིན་དཔྱད་པར་བྱའོ། །ཡང་ཉ་ཊཱིཀ་ལས། རྩ་བ་ནི་ཇི་ལྟར།ནས། འགུལ་བ་ལྟར་རྒྱུན་མཐར་སངས་རྒྱས་སའི་སྦྱིན་སོགས་གཅིག་མངོན་དུ་བྱས་ན་དེ་ཉིད་ཀྱི་སྐད་ཅིག་གཅིག་ལ་དེ་ཀུན་ཤེས་པ་སྟེ་མངོན་དུ་བྱེད་པའང་དེ་བཞིན་ནོ། །ཞེས་མངོན་དུ་བྱེད་རྒྱུའི་ཆོས་དེ་སངས་རྒྱས་ས་ལ་བཤད་དོ། །