གཉིས་པ་ལོངས་སྐུ་བཤད་པ།

གཉིས་པ་ལོངས་སྐུ་བཤད་པ་ལ།

མདོ་ལུགས་མར་མདོར་བསྟན་རྒྱས་བཤད་དུ་བྱས་ནས་བཤད་པས་དེ་ལྟར་བཤད་པ་ལ་འགལ་བ་མེད་མོད། འདིར་ཉ་ཊཱིཀ་ལྟར་ལོངས་སྐུའི་ངོ་བོ་བཤད། མཚོན་བྱེད་མཚན་དཔེ་བཤད་པ་དང་གཉིས། དང་པོ་ནི། རྩ་བར། མཚན་ནི་སུམ་ཅུ་རྩ་གཉིས་དང༌། །དཔེ་བྱད་བརྒྱད་ཅུའི་བདག་ཉིད་འདི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་པའི་དོན་འཆད་པ་ལ། མཚན་དཔེས་བརྒྱན་པའི་བད༷ག་ཉི༷ད་ཀྱི་གཟུགས་སྐུ་གནས་འོག་མིན་ཁོ་ནར་བཞུགས་པ་འདི༷་ཆོས་ཅན། ཐུབ་པའི་ལོངས་སྤྱོད་རྫོགས་པའི་སྐུ་ཡིན་ཏེ། འཁོར་ས་བཅུའི་བྱང་སེམས་ཁོ་ན་དང་ལྷན་གཅིག་ཏུ་ཐེ༷ག་ཆེ༷ན་གྱི་ཆོས་ལ་རྫོགས་པར་ཉེ༷་བར་ལོ༷ངས་སྤྱོ༷ད་ཕྱིར༷། སངས་རྒྱས་བཅོམ་ལྡན་འདས་རྣམས་ཀྱི་སྐུ་སྐྱེས་བུ་ཆེན་པོའི་མཚ༷ན་སུ༷མ་ཅུ༷་རྩ༷་གཉི༷ས་ཀྱིས་བརྒྱན་པ་དཔེ༷་བྱ༷ད་བཟང་བོ་བརྒྱ༷ད་ཅུ༷ས་བརྒྱན་པ་བྱང་ཆེན་པོ་རྣམས་ལ་ཐེག་ཆེན་པོའི་ཆོས་ཀྱི་ལོངས་སྤྱོད་བླ་ན་མེད་པའིདགའ་བདེ་ཚིམ་རབ་ཏུ་དགའ་བ་མཛད་པར་འགྱུར་རོ། །ཞེས་ཉ་ཊཱིཀ་ལས་སོ། །དེས་ན། ཐེག་པ་ཆེན་པོའི་ཆོས་ལ་རྫོགས་པར་ལོངས་སྤྱོད་པའི་དང་པོའི་གཟུགས་སྐུ་མཐར་ཐུག་དེ། ལོངས་སྐུའི་མཚན་ཉིད་ཡིན་ཏེ། མདོ་ལུགས་མ་ལས། ལོངས་སྤྱོད་རྫོགས་པའི་སྐུའི་མཚན་ཉིད་ནི། གཉིས་མེད་ཡེ་ཤེས་ཀྱི་ངོ་བོ་གྱུར་པའི་མཚན་ནི་སུམ་ཅུ་རྩ་གཉིས་དང་དཔེ་བྱད་བརྒྱད་ཅུའི་བདག་ཉིད་དུ་གྱུར་པ་འདི་ཐེག་པ་ཆེན་པོའི་ཆོས་རྫོགས་པར་ཉེ་བར་ལོངས་སྤྱོད་པའི་སྐུ་ཡིན་པའི་ཕྱིར། ཐུབ་པའི་ལོངས་སྤྱོད་རྫོགས་པའི་སྐུ་ཡིན་པར་མདོ་ལས་བཞེད་དོ། །ཞེས་གསུངས་པའི་ཕྱིར་རོ། །ཡང་ན་དེའི་མཚན་ཉིད་ཉ་ཊཱིཀ་ལས། གཉིས་པ་སངས་རྒྱས་ཀྱི་ལོངས་སྤྱོད་རྫོགས་སྐུའི་མཚན་ཉིད། སངས་རྒྱས་ཀྱི་གཟུགས་སྐུ་ངེས་པ་ལྔ་ལྡན་ཏེ། གནས་ངེས་པ་འོག་མིན་ཆེན་པོ་སྟེ་དེ་ཡང་གཙང་མའི་གནས་འོག་མིན་ཕལ་བའི་སྟེང་ན་ཡོད་དེ། ལང་གཤེགས་ལས། གཙང་མའི་གནས་དག་སྤངས་པ་ཡི། །འོག་མིན་གནས་ནི་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་བ་པོ་གཅིག་འདིར་འཚང་རྒྱ། །ཞེས་སོ། །དེ་ལྟར་ཞི་འཚོ་ཀ་ཤི་ཡང་ངོ། །བཀའ་བཅད་དུ། འོག་མིན་ཕལ་བ་དེའི་ལོགས་གཅིག་ན་གྲོང་ལས་དགོན་པ་ལྟར་ཡོད་པར་འདོད་དོ། །ངོ་བོའམ་སྐུ་ངེས་པ་མཚན་དཔེས་བརྒྱན་པ། འཁོར་ངེས་པ་ཨ་བྷ་ཡ་ཟླ་གྲགས་སེང་བཟང་སོགས་ས་བཅུའི་བྱང་སེམས། ཆོས་བཤེས་ས་བཅུ་བའི་བྱང་སེམས་ཁོ་ན་བློ་བརྟན་ཡང་མཐར་ཕྱིན་པའི་བྱང་ཆུབ་སེམས་དཔའ་རྣམས་དང་ཆོས་བགྲོ་བ་མྱོང༌། ཞེས་དབུས་མཐའི་འགྲེལ་བཤད་དུའོ། །དུས་ངེས་པ་སྐུ་དེ་ཉིད་ཀྱིས་འཁོར་བ་ཇི་སྲིད་པར་བཞུགས། ཆོས་ངེས་པ་ཐེག་ཆེན་ཁོ་ནའོ། །ཞེས་དང༌།རྒྱན་གྱི་ས་འགྲེལ་ལས། འོག་མིན་ཆེན་པོར་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ནའང་མཚན་དང་དཔེ་བྱད་ཀྱིས་བརྒྱན་པར་སྣང་བས་ཐེག་པ་ཆེན་པོའི་ཆོས་ཁོ་ན་ལ་རྒྱུན་མི་འཆད་པར་ཉེ་བར་སྤྱོད་པ་ལོངས་སྤྱོད་རྫོགས་པའི་སྐུ་དང༌། ཞེས་གསུངས་སོ། །ངེས་པ་ལྔ་ལྡན་གྱི་དོན་ལ་ལོངས་སྐུ་ཡིན་ན་མཚན་དཔེའི་རྒྱན་པའི་ཁྱབ་ཅེས་པ་ལ་ལོངས་སྐུའི་མཚན་གཞིའི་ཡེ་ཤེས་དེ་མཚན་དཔེའི་རྒྱན་པ་ཡིན་མིན་དང་ལོངས་སྐུ་ཡིན་མིན་དཔྱད། ཡང་ལོངས་སྐུ་ཡིན་ན་དུས་འཁོར་བ་ཇི་སྲིད་དུ་བཞུགས་པས་ཁྱབ་ན་སྤྲུལ་སྐུའི་རྒྱུར་གྱུར་པའི་ལོངས་སྐུ་དང་སྐད་ཅིག་དང་པོའི་ལོངས་སྐུ་སོགས་ཀྱིས་དཔྱད། ཡང་ལོངས་སྐུ་ཡིན་ན་གནས་ངེས་པ་འོག་མིན་དུ་བཞུགས་པས་ཁྱབ་ན་ངོ་བོ་ཉིད་སྐུས་ཐམས་ཅད་ལ་ཁྱབ་ཀྱང་ལོངས་སྐུས་མ་ཁྱབ་པ་དང༌། གསང་བ་བསམ་གྱིས་མི་ཁྱབ་པ་ལས། ནམ་མཁས་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། །ཅེས་པ་སོགས་ཀྱིས་དཔྱད། ཡང་ལོངས་སྐུ་ཡིན་ན་འཁོར་ངེས་པ་ས་བཅུ་བྱང་སེམས་ཀྱི་སྐོར་བ་ཡིན་པས་ཁྱབ་ན། ཐེག་བསྡུས་ལས། ལོངས་སྤྱོད་རྫོགས་པའི་སྐུ་ཅིའི་ཕྱིར་ངོ་བོ་ཉིད་ཀྱི་སྐུ་མ་ཡིན་ཞེ་ན། རྒྱུ་དྲུག་གི་ཕྱིར་ཏེ། དེ་གཟུགས་ཀྱི་སྐུར་སྣང་བ་དང༌། སངས་རྒྱས་ཀྱི་འཁོར་གྱི་དཀྱིལ་འཁོར་ཚད་མེད་པ་དག་ན་ཐ་དད་པར་སྣང་བ་དང༌། མོས་པ་ཇི་ལྟ་བ་བཞིན་དུ་མཐོང་བས་མ་ངེས་པའི་ངོ་བོ་ཉིད་དུ་སྣང་བ་དང༌། གཞན་དང་གཞན་དུ་སྣང་བས་གཡོ་བའི་ངོ་བོ་ཉིད་དུ་སྣང་བ་དང༌། བྱང་ཆུབ་སེམས་དཔའ་དང་ཉན་ཐོས་དང་ལྷ་ལ་སོགས་པ་འཁོར་སྣ་ཚོགས་དང་འདྲེས་པས་འདྲེས་པར་སྣང་བ་དང༌། ཀུན་གཞི་རྣམ་པར་ཤེས་པ་དང་འཇུག་པའི་རྣམ་པར་ཤེས་པ་གཉིས་གནས་གྱུར་པ་མི་རིགས་པར་སྣང་བའི་ཕྱིར་ལོངས་སྤྱོད་པ་ཉིད་ངོ་བོ་ཉིད་ཀྱི་སྐུར་མི་རིགས་སོ། །ཞེས་པའི་དོན་ལ་བརྟག་པར་བྱའོ། །ཡང་མདོ་ཕར་ཕྱིན་ཐེག་པ་ལྟར་ན་འདོད་ཁམས་སུ་གསར་དུ་འཚང་མི་རྒྱ་བར་འོག་མིན་སྡུག་པོ་བཀོད་པ་སོགས་ལོངས་སྐུའི་ཞིང་དུ་འཚང་རྒྱ་བ་ཡིན་ཏེ། རྒྱུད་ལས།གཙང་མའི་གནས་ནི་རབ་སྤངས་ནས། །འོག་མིན་སྡུག་པོ་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་བ་པོ་དེ་འདིར་འཚང་རྒྱ། །ཞེས་དང༌། ལང་གཤེགས་ལས། འདོད་པའི་ཁམས་དང་གཟུགས་མེད་དུ། །སངས་རྒྱས་རྣམ་པར་འཚང་མི་རྒྱ། །གཟུགས་ཀྱི་ཁམས་ཀྱི་འོག་མིན་ཏུ། །འདོད་ཆགས་བྲལ་ཁྱོད་འཚང་རྒྱའོ། །ཞེས་དང༌། སྡུག་པོ་བཀོད་པའི་མདོ་ལས། སངས་རྒྱས་ཐམས་ཅད་འོག་མིན་ཏུ། །སངས་རྒྱས་མ་གྱུར་འདོད་ཁམས་སུ། །སངས་རྒྱས་མཛད་པ་མི་མཛད་དོ། །ཞེས་དང༌། ཞང་སྟོན་གྱི་རྒྱུད་བླའི་འགྲེལ་བ་ལས། འོག་མིན་སྟུག་པོ་བཀོད་པ་ལ་སོགས་པ་ལོངས་སྐུའི་ཞིང་དུ་སངས་རྒྱས་འཐོབ་སྟེ།ཐུབ་པ་ཆེན་པོ་བཞིན་ནོ། །སངས་རྒྱས་ཐམས་ཅད་འོག་མིན་དུ་སངས་རྒྱས་འཐོབ་པ་ནི་མིན་ཏེ། མདོ་རྒྱན་དུ། ལོངས་སྤྱོད་རྫོགས་པ་ཁམས་ཀུན་དུ། །འཁོར་ཡོངས་བསྡུ་དང་ཞིང་དང་མཚན། །སྐུ་དང་ཆོས་རྫོགས་ལོངས་སྤྱོད་དང༌། །མཛད་པ་དག་གིས་ཐ་དད་དོ། །ཞེས་པས་ལོངས་སྐུའི་ཞིང་ཁམས་ཐ་དད་ལ། སོ་སོའི་ལོངས་སྐུའི་ཞིང་དུ་འཐོབ་པ་ནི་ངེས་པ་སྟེ་ཐུབ་པ་ཆེན་པོ་བཞིན་ནོ། །འོག་མིན་འདི་ཡང་གཟུགས་ཁམས་ཀྱི་འོག་མིན་མིན་ཏེ། ཕལ་པོ་ཆེར།སྟོང་གསུམ་མི་མཇེད་འདི་ལ་སོགས་པ་མང་པོ་ནང་དུ་འདུས་པའི་འོག་མིན་དུ་ཐུབ་པའི་ལོངས་སྐུ་རྣམ་སྣང་སངས་རྒྱས་ཐོབ་པར་བཤད་པས་སོ། །ཞེས་གསུངས་པའི་ཕྱིར་རོ། །