གསུམ་པ་སྤྲུལ་སྐུ་བཤད་པ།

གསུམ་པ་སྤྲུལ་སྐུ་བཤད་པ་ལ

རྩ་བར། གང་གིས་སྲིད་པ་ཇི་སྲིད་པར། །འགྲོ་ལ་ཕན་པ་སྣ་ཚོགས་དག ། མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་མི་འཆད། །ཅེས་སོ། །དེ་འཆད་པ་ལ་མདོ་ལུགས་མ་ལས། སྣ་ཚོགས་པའི་སྤྲུལ་པ་གང་གིས་སྲིད་པ་ཇི་སྲིད་གནས་ཀྱི་བར་དུ། འགྲོ་བ་སེམས་ཅན་ཐམས་ཅད་གང་ལ་གང་འདུལ་དེར་སྟོན་པའི་ཚུལ་གྱིས་གནས་སྐབས་དང༌། མཐར་ཐུག་གི་ཕན་པའི་རྣམ་པ་སྣ་ཚོགས་པ་དག་མཉམ་པ་སྟེ་གཅིག་ཆར་དུ་མཛད་པའི་སྐུ་གང་ཡིན་པ་དེ་ནི་ཐུབ་པའི་གཟུགས་སྐུ་གཉིས་ལས་སྤྲུལ་པའི་སྐུ་ཡིན་ནོ། །དཔེར་ན་མེ་ལ་ལར་འབར་བར་སྣང་ཞིང་ལ་ལར་ཞི་བར་སྣང་བ་དང༌། ཞི་བར་སྣང་བ་ལས་སླར་ཡང་འབར་བར་སྣང་བ་ལྟར། སྐུ་འདི་ནི་སྣང་བ་ལས་ནི་སྣང་བ་དང༌། ལ་ལར་མི་སྣང་བ་ལས་སླར་ཡང་ལ་ལར་སྣ་ཚོགས་སུ་སྟོན་པའི་ཕྱིར་ཇི་སྲིད་འཁོར་བ་གནས་ཀྱི་བར་དུ་རྒྱུན་མི་འཆད་པ་ཡིན་ནོ། །ཞེས་གསུངས་སོ། །དེས་ན་མཚན་ཉིད་ནི། མཐོང་སྤང་གི་མ་དག་པའི་གདུལ་བྱ་ལ་དངོས་སུ་སྣང་ནུས་པའི་གཟུགས་སྐུ་གཉིས་པ་དེ། སྤྲུལ་སྐུའི་མཚན་ཉིད་ཡིན་ཏེ། ཉ་ཊཱིཀ་ལས། སངས་རྒྱས་ཀྱི་སྤྲུལ་པའི་སྐུ་ནི། སངས་རྒྱས་ཀྱི་གཟུགས་སྐུ་གང་ཞིག མཐོང་སྤང་གིས་མ་དག་པའི་གདུལ་བྱའི་དོན་དངོས་སུ་མཛད་པ། ཞེས་གསུངས་སོ། །དབྱེ་ན། དབུ་མ་མདོ་སྡེའི་རྒྱན་ལས། བཟོ་དང་སྐྱེ་དང་བྱང་ཆུབ་ཆེ། །མྱ་ངན་འདས་པ་རྟག་སྟོན་པས། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ཐབས་ཡིན་ནོ། །ཞེས་པ་ལྟར་བཟོ་སྤྲུལ་སྐུ། སྐྱེ་བ་སྤྲུལ་སྐུ། བྱང་ཆུབ་ཆེན་པོའམ་མཆོག་གི་སྤྲུལ་སྐུ་དང་གསུམ། དེ་དག་གི་མཚན་གཞི་ནི། ཉ་ཊཱིཀ་ལས། དབྱེ་ན་དྲི་ཟའི་རྒྱལ་བོ་རབ་དགའ་གདུལ་བའི་དོན་དུ་དྲི་ཟར་སྤྲུལ་བ་ལྟ་བུ་བཟོ་དང༌། སོར་ཕྲེང་ཅན་དུ་སྟོན་པ་ལྟ་བུ་སྐྱེ་བ་ལྷོ་ཕྱོགས་ཀྱི་སངས་རྒྱས་གཅིག་གི་སྤྲུལ་བར་སོར་ཕྲེང་གི་མདོར་བཤད་དོ། །ཡང་ན་དམ་པ་ཏོག་དཀར་ལྟ་བུའམ་ཀ་ཕི་ན་འདུལ་བའི་དོན་དུ་འཁོར་ལོས་བསྒྱུར་རྒྱལ་དུ་བསྟན་པ་ལྟ་བུའོ། ། འོག་མིན་དུ་སངས་རྒྱས་ནས་འདིར་མཛད་པ་བཅུ་གཉིས་སྟོན་པ་བྱང་ཆུབ་ཆེན་པོའི་སྤྲུལ་པ་དང་འགྲེལ་ཆེན་དུ་མྱ་ངན་ལས་འདས་པའང་སྤྲུལ་བའི་སྐུར་འདོད་དོ། །ཞེས་དང༌། རྒྱན་གྱི་ས་འགྲེལ་ལས། དྲི་ཟའི་རྒྱལ་པོ་རབ་དགའ་གདུལ་བའི་དོན་དུ་རྒྱུད་མངས་སྦྲེང་བ་དང༌། གཞན་ཡང་ཤིང་མཁན་དང་རྫ་མཁན་ལ་སོགས་པར་ཡང་སྟོན་པ་བཟོའི་སྤྲུལ་བ་དང༌། བྲམ་ཟེ་དང་རྒྱལ་རིགས་ལ་སོགས་པ་དང་རི་བོང་དང་རུ་རུ་ལ་སོགས་པའི་སྐྱེ་བར་ཡང་སྟོན་པ་སྐྱེ་བའི་སྤྲུལ་པ་དང༌། རྡོ་རྗེའི་གདན་དུ་མངོན་པར་རྫོགས་པར་འཚང་རྒྱ་བ་བྱང་ཆུབ་ཆེན་པོའི་སྤྲུལ་པ་དང༌། ཞེས་གསུངས་སོ། །མཆོག་གི་སྤྲུལ་སྐུའི་མཛད་པ་བཅུ་གཉིས་ནི། རྒྱུད་བླ་ཐོགས་འགྲེལ་གྱི་མཆན་ལས། སྤྲུལ་སྐུ་ནི་ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་ཉིན་མཚན་དང་ལན་དྲུག་ཏུ་སོ་སོར་གཟིགས་ནས་ནི། །ཆོས་ཀྱི་སྐུ་ཉིད་ཀྱི་རྣམ་འགྱུར་ཡིན་པས་ངོ་བོ་དེ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བའི་རབས་སྣ་ཚོགས་གང་ལ་གང་འདུལ་གྱི་ཚུལ་དུ་མངོན་པར་སྐྱེ་བ་དང༌། །སྤྲུལ་པ་དེ་རྣམས་ཀྱི་གཙོ་བོ་མཆོག་གི་སྤྲུལ་པའི་མཛད་པ་བཅུ་གཉིས་ནི་དགའ་ལྡན་ནས་ནི་འཕོ་བ་དང༌།གཅིག ལྷུམས་སུ་འཇུག་པ་དང་གཉིས་བལྟམ་པ་དང༌། གསུམ། ཡི་གེ་ལ་སོགས་བཟོ་ཡི་གནས་ལ་མཁས་པ་དང་བཞི། བཙུན་མོའི་འཁོར་གྱིས་བསྐོར་ནས་རྒྱལ་པོའི་ཁབ་ཏུ་དགྱེས་པར་རོལ་བ་དང༌།ལྔ། ངེས་པར་འབྱུང་བ་དང་དྲུག་ལོ་དྲུག་ཏུ་དཀའ་བ་སྤྱོད་པ་དང༌།བདུན། བྱང་ཆུབ་ཀྱི་སྙིང་པོར་བྱང་ཆུབ་ཤིང་དྲུང་དུ་གཤེགས་པ་དང༌། བརྒྱད། བདུད་ཀྱི་སྡེ་འཇོམས་པ་དང་དགུ་རྫོགས་པར་ནི། །བྱང་ཆུབ་པ་དང་བཅུ་ཆོས་ཀྱི་འཁོར་ལོ་བསྐོར་བ་དང་བཅུ་གཅིག མྱ་ངན་ལས་འདས་པར་གཤེགས་པའི་མཛད་པ་དང་བཅུ་གཉིས་པོ་རྣམས། །ཡོངས་སུ་མ་དག་པའི་སངས་རྒྱས་ཀྱི་ཞིང་རྣམས་སུ། །དུས་སྲིད་པ་ཇི་སྲིད་གནས་ཀྱི་པར་དུ་སྟོན། །ཞེས་གསུངས་སོ། །ངོ་བོ་ཉིད་སྐུ་རང་དོན་གྱི་སྐུ་དང་གཟུགས་སྐུ་གཉིས་གཞན་དོན་གྱི་སྐུ་ཡིན་ཏེ། རྒྱུད་བླ་ཐོགས་འགྲེལ་གྱི་མཆན་ལས། རང་དོན་གཞན་དོན་དོན་དམ་སྐུ་དང་ནི། དོན་དམ་དེ་ཉིད་སྣང་བ་ལ་བརྟེན་ནས་དངོས་པོར་འཛིན་པའི་གཞན་སྣང་ལ་ལྟོས་ཀུན་རྫོབ་སྐུ་ཉིད་དེ་རིམ་པ་ལྟར། བྲལ་བའི་འབྲས་བུ་དང་རྣམ་པར་སྨིན་པའི་འབྲས་བུ་ནི། སྐུ་གཉིས་ཀྱི་ཡོན་ཏན་གྱི་དབྱེ་བ་དྲུག་ཅུ་རྩ་བཞི་འོག་ནས་འབྱུང་བ་འདི་དག །ཅེས་གསུངས་པའི་ཕྱིར། དེ་མ་ཡིན་པར་ཐལ། སྐུ་བཞི་པོ་རང་དོན་གྱི་སྐུ་ཡིན་པའི་ཕྱིར་ཏེ། ཉ་ཊཱིཀ་ལས། རང་དོན་གྱི་དབྱེ་བ། གཞན་དོན་གྱི་དབྱེ་བའོ། །ཞེས་ཤེར་འབྱུང་ངོ༌། དང་པོ་ལ་བཞི་སྟེ། ངོ༌། ཆོས། རྫོགས། སྤྲུལ་ལོ། །ཞེས་གསུངས་པའི་ཕྱིར་ཟེར་ན་སྔར་གདམས་ངག་གི་སྐབས་སུ་དཔྱད་པ་ལྟར་བརྟག་པར་བྱའོ། ། གཉིས་པ་འཕྲིན་ལས་བཤད་པ་ལ། དུས་ཀྱི་སྒོ་ནས་མདོ་བསྟན་པ་དང་གྲངས་ཀྱི་སྒོ་ནས་རྒྱས་པར་བཤད་པ་དང་གཉིས། དང་པོ་ནི། རྩབར། དེ་བཞིན་འཁོར་བ་ཇི་སྲིད་འདི།ལས་ནི་རྒྱུན་མི་འཆད་པར་འདོད། །ཅེས་སོ། །དེ་འཆད་པ་ལ་མདོ་ལུགས་མ་ལས། སྤྲུལ་བའི་སྐུ་སྣ་ཚོགས་པས་འཁོར་བ་སྲིད་དུ་གཅིག་ཆར་གཞན་དོན་མཛད་པ་དེ༷་བཞི༷ན་དུ་ཡུན་འཁོ༷ར་བ༷་ཇི༷་སྲི༷ད་གནས་ཀྱི་བར་དུ་ཐུག་པ་འདི༷འི་སྐུ་གསུང་ཐུགས་ཀྱི་མཛད་པ་འཕྲིན་ལ༷ས་ནི༷་རྒྱུ༷ན་མི༷་འཆ༷ད་པ༷ར་འདོ༷ད་ཅིང་བསྟན་ཏོ། །ཇི་ལྟར་སེམས་ཅན་གྱི་ལུས་ངག་ཡིད་ཀྱི་ལས་ནི་རྣམ་ཤེས་ཀྱི་རྗེས་སུ་འགྲོ་ཞིང་རྣམ་ཤེས་ཀྱི་རྗེས་སུ་འབྲང་བ་ལྟར། སངས་རྒྱས་ཀྱི་སྐུ་གསུང་ཐུགས་ཀྱི་ལས་དག་ཀྱང་ཡེ་ཤེས་ཀྱི་རྗེས་སུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་ཡིན་ནོ། །ཞེས་གསུངས་སོ། །དེས་ན་མཚན་ཉིད་ནི། རང་ཐོབ་བྱེད་སངས་རྒྱས་ཀྱི་ཐུགས་རྗེ་ཆེན་པོ་སྟོབས་ལས་ཐོབ་པའི་རྣམ་དཀར་གྱི་ཡོན་ཏན་དེ། སངས་རྒྱས་ཀྱི་འཕྲིན་ལས་ཀྱི་མཚན་ཉིད།ཡང་ན་རང་ཐོབ་བྱེད་རྟོགས་པ་ཆོས་སྐུ་ལ་བརྟེན་ནས་འདུལ་བྱའི་དོན་བསྒྲུབ་པའི་རྣམ་དཀར་གྱི་ལས་དེ། སངས་རྒྱས་ཀྱི་འཕྲིན་ལས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། ཆོས་སྐུའི་མཛད་པ་འཕྲིན་ལས་ནི། རྟོགས་པ་ཆོས་སྐུས་སྐལ་ལྡན་གདུལ་བྱའི་དོན་བསྒྲུབས་པའམ་སྒྲུབ་པའི་བྱ་བ། དབྱེ་ན་བྱེད་པ་པོ་ལ་དང༌།བྱ་བ་ལ་ཡོད་པའི་གཉིས་ལས། དང་པོའི་མཚན་ཉིད།སངས་རྒྱས་ཀྱི་འཕྲིན་ལས་གང་ཞིག རྒྱུན་མི་འཆད་ཅིང་ལྷུན་གྱིས་གྲུབ་པར་འཇུག་པ། གཉིས་པའི་མཚན་ཉིད་ཟུར་དང་པོ་འདྲ། སངས་རྒྱས་ཀྱི་གདུལ་བྱས་ཐོབ་པའི་དགེ་ལེགས་ཅི་རིགས་པ། ཞེས་དང༌། བསྟན་བཅོས་རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཞེས་དང༌། ཐེག་མཆོག་དབུ་མ་ལས། ཐུགས་རྗེ་དེ་ལས་འཕྲིན་ལས་ཟད་མེད་འབྱུང༌། །འགྲོ་རྣམས་སྡུག་བསྔལ་ཆུང་དང་ཟད་པར་མཛད། །ཅེས་གསུངས་པའི་ཕྱིར་རོ། །ཡང་ན་རྒྱུད་བླ་མར་དཔེ་དགུས་འཕྲིན་ལས་གསུངས་ལ། དེ་ཡང་མི་རྟོག་བཞིན་དུ་སྐུའི་སྣང་བ་སྟོན་པ་བརྒྱ་བྱིན་གྱི་དཔེ་དང༌། འབད་པ་མེད་པར་ཆོས་གསུང་པ་ལྷའི་རྔའི་དཔེ་དང༌། མཁྱེན་བརྩེས་ཀུན་ལ་ཁྱབ་པ་སྤྲིན་གྱི་དཔེ་དང༌། ཆོས་སྐུ་ཀུན་ལ་མ་གཡོས་པ་བཞིན་དུ་སྤྲུལ་པ་སྟོན་པ་ཚངས་པའི་དཔེ་དང༌། ཡེ་ཤེས་ཀྱི་སྣང་བ་འཕྲོ་བ་ཉི་མའི་དཔེ་དང༌། ཐུགས་ཀྱི་གསང་བ་ཡིད་བཞིན་ནོར་བུའི་དཔེ་དང༌། གསུང་གི་གསང་བ་སྒྲ་བརྙན་གྱི་དཔེ་དང༌། སྐུ་ཡི་གསང་བ་ནམ་མཁའི་དཔེ་དང༌། འགྲོ་བའི་དཀར་པོའི་ཆོས་ཀྱི་གཞི་རྟེན་དུ་གྱུར་པས་གཞིའི་དཔེ་སྟེ་དགུས་གསུངས་སོ། །སེམས་ཅན་གྱི་རྣམ་དཀར་གྱི་མཛད་པ་དེ་སངས་རྒྱས་ཀྱི་མཛད་པ་དང་སེམས་ཅན་གཉིས་ཀའི་མཛད་པ་ཡིན་མིན་དཔྱད། ཡང་འཕྲིན་ལས་དང་མཛད་པ་གཉིས་མི་འདྲ་བར་ཐལ། ཐེག་མཆོག་དབུ་མའི་ཟིན་བྲིས་ལས། གོང་དུ་སངས་རྒྱས་རང་སྣང་གི་མཛད་པ་དང་འཕྲིན་ལས་གཉིས་ཐ་དད་དུ་བསྟན་བ་དེ་གཉིས་ཀྱི་ཁྱད་པར་ཅི་ཞེ་ན། མཛད་པ་དང་འཕྲིན་ལས་གཉིས་ངོ་བོ་གཅིག་ཀྱང་ལྡོག་ཆ་ཐ་དད་པར་འཇོག་སྟེ། འཕྲིན་ལས་ནི་བྱ་བ་དང་མཛད་པ་ནི་བྱེད་པར་འཇོག་གོ །ཞེས་གསུངས་པའི་ཕྱིར་ཟེར་ན་དཔྱད། དགེ་བ་ཡིན་ན་སངས་རྒྱས་ཀྱི་འཕྲིན་ལས་ཡིན་པས་ཁྱབ་སྟེ། སྤྱོད་འཇུག་ལས། ཇི་ལྟར་མཚན་མོ་མུན་ནག་སྤྲིན་རུམ་ན། །གློག་འགྱུ་སྐད་ཅིག་རབ་སྣང་སྟོན་པ་ལྟར། །དེ་བཞིན་སངས་རྒྱས་མཐུ་ཡིས་རྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐང་འགའ་འབྱུང༌། །ཞེས་དང༌། དེའི་ས་འགྲེལ་ལས། དཔེ་ཇི་ལྟར་ན་ཉི་མ་ནུབ་པའི་མཚན་མོ་ཟླ་བའང་མེད་པའི་མུན་ནག་སྐར་མའི་སྣང་བ་ཙམ་ཡང་མེད་པའི་སྤྲིན་རུམ་ཤིན་ཏུ་འཐུག་པོས་ཁེབས་པ་ན། གློ་བུར་དུ་གློག་འགྱུ་བའི་འོད་ཀྱིས་སྐད་ཅིག་ཙམ་རབ་ཏུ་སྣང་བའི་དངོས་པོ་ཅུང་ཟད་སྟོན་པ་ལྟར་དོན་དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱི་ཐུགས་རྗེའི་འོད་ཟེར་གྱི་མཐུ་ཡིས་བརྒྱ་ལམ་རེས་འགའ་ཞིག་ན་འཁོར་བའི་མུན་པར་གནས་པའི་འཇིག་རྟེན་པ་རྣམས་ལ་རང་གཞན་གྱི་དོན་དུ་དམ་པའི་ཆོས་ལ་འཇུག་པར་བྱའོ་སྙམ་པའི་བསོད་ནམས་ཀྱི་བློ་གྲོས་ཀྱི་སྣང་བ་ཐང་འགའ་ཙམ་འབྱུང་བ་སྲིད་ཀྱི་ཕལ་ཆེར་མི་འབྱུང་ཞིང་བྱུང་ཡང་ཡུན་རིང་དུ་མི་གནས་པས་ཤིན་ཏུ་དཀོན་པ་རྙེད་པའི་དུས་སུ་སྐྱེས་བུ་ཆེན་པོའི་སྤྱོད་པ་ལ་འབད་པར་རིགས་སོ། །ཞེས་གསུངས་པའི་ཕྱིར་རོ། །